Wë nönö, wa sa feni soni u di woto aki a di Bëibel, söseei wa sa feni ën a dee woto buku dee ta taki soni fu awooten.

Di fasi fa sëmbë puu di tëkisi aki a peipei Bëibel, ta mbei so sëmbë pakisei taa a di ten u dee fesiten Keesitu sëmbë, de bi ta dopu da sëmbë di dëdë, ma di an bi dopu. Wan Bëibel bi taa: „Ee sëmbë an ta weki ko a libi baka, nöö faandi mbei sëmbë musu dopu da de?”​—Nyun Testamenti.

Luku andi tu sëmbë di ta öndösuku soni u Bëibel bi taki. Wan u de da Dr. Gregory Lockwood. A bi taki taa soni an sikifi a Bëibel, nasö a dee woto buku dee ta taki soni fu awooten, taa sëmbë bi ta dopu da sëmbë di dëdë, ma di an bi dopu. Sö wan soni wan woto womi de kai Gordon D. Fee bi sikifi tu. A bi taki taa di soni aki an dë sikifisikifi a Bëibel, söseei sö wan soni an bi pasa wan daka na awooten. An dë sikifisikifi a di Giiki pisi u Bëibel, söseei sëmbë an bi taki wan daka taa dee fesiten Keesitu sëmbë bi du di soni dë. Soni an dë tu di ta lei taa de bi ta du ën a dee keiki dee bi ko dë baka di dee apösutu bi dëdë.

Di Bëibel ta taki taa dee bakama u Jesosi bi musu ’go a hii nasiön sëmbë, nöö de bi musu heepi de u de ko dë bakama fëën, nöö de bi musu dopu de. . . , söseei de bi musu ta lei de u de piki hii dee soni tuu dee a manda de u de du’ (Mat. 28:19, 20). Ufö wan sëmbë sa ko toon wan dopudopu bakama u Jesosi, nöö a musu ko sabi soni u Jehovah ku di Womi Mii fëën, a musu biibi de, söseei a musu piki de buka tu. Wan sëmbë di dëdë, nasö di dë a geebi an sa du dee soni aki. Boiti di dë, wan Keesitu sëmbë di dë a libi an sa du dee soni aki dëën.​—Peleik. 9:5, 10; Joh. 4:1; 1 Kol. 1:14-16.

Wë nöö andi Paulosu bi ta taki?

So u dee sëmbë u Kolenti bi ta taki taa dëdë sëmbë an o ko a libi baka (1 Kol. 15:12). Paulosu bi lei de taa di soni di de ta taki an dë tuu. Unfa a bi lei de ën? Wë a bi taki taa a bi ta dë a „dëdë ku libi maun hiniwan juu”. Hii fa hogi bi ta miti Paulosu, tökuseei a bi dë seiki taa aluwasi ee a dëdë, Gadu bi o weki ën ko a libi baka, nöö a bi o go libi a liba ala, leti kuma Jesosi.​—1 Kol. 15:30-32, 42-44.

Dee Keesitu sëmbë u Kolenti bi musu fusutan taa fa de bi dë salufuwan dë, nöö tesi bi o ta miti de hiniwan daka, söseei taa de musu dëdë ufö Gadu sa weki de ko a libi baka. Wë di de bi dopu a di në u Jesosi Keesitu, nöö a bi kë taki taa de dopu u dëdë kumëën tu (Lom. 6:3). Di soni aki kë taki taa leti kuma Jesosi, tesi bi o ta miti de tu, söseei taa de bi o dëdë ufö Gadu sa weki de ko a libi baka, u de sa libi a liba ala.

Möön leki tu jaa baka di Jesosi bi dopu a wata, hën a bi piki tu u dee apösutu fëën taa: „Woon dopu kumafa mi o dopu” (Maik. 10:38, 39). Jesosi an bi ta taki u di dopu di de bi o dopu ën a wata. Ma a bi kë taki ku di soni aki taa di hoi di a ta hoi hënseei a Gadu, o mbei de kii ën. Paulosu bi taki taa dee salufuwan bi o ’hoi a dee sitaafu dee de ta tja go dou, leti kumafa Jesosi seepi bi hoi a dee fëën sitaafu a bi tja, nöö de o dë a dendu u di waiti fëën di a abi nöömö’ (Lom. 8:16, 17; 2 Kol. 4:17). Fëën mbei de musu dëdë ufö Gadu sa weki de ko a libi baka u de sa libi a liba ala.

Wë u sa taki taa di soni di Paulosu bi taki da: „Ma un wini fëën sëmbë o feni te de dopu u de dëdë? Ee a dë sö tuu taa sëmbë an o weki ko a libi baka, nöö faandi mbei de ta dopu u de dëdë?”