1. Andi Jesosi bi piki dee bakama fëën te a nama ku di kaba u di goonliba aki, nöö andi a bi piki de u de ta du?

 FÖ U dee bakama u Jesosi bi hakisi ën wan soni wantu daka ufö a dëdë. De bi hakisi taa: „Un maaka joo lei u fuu sa sabi taa . . . di kaba u di goonliba aki zuntu?” (Mat. 24:3) A kan taa dee bakama fëën bi kë sabi na un ten Jelusalen ku di Wosu u Gadu bi o booko kaba a sösö. Di Jesosi piki de, nöö an bi piki de soni u Jelusalen ku di Wosu u Gadu nöö a kaba, ma a bi piki de soni u „di kaba u di goonliba aki” tu. Di Jesosi bi ta taki na un ten di kaba bi o ko, hën a bi taki taa: „Na wan sëmbë sabi di juu ku di daka dë e. Dee basia u Gadu köndë ala ku di Womi Mii seei an sabi ën, ma Gadu u Tata wanwan tö nöö sabi ën.” Baka di dë, hën a piki dee bakama fëën taa de „musu dë ta luku pasi”, söseei taa de „musu dë ku wojo limbo”.​—Maik. 13:32-37.

2. Faandi mbei a bi dë fanöudu u dee fesiten Keesitu sëmbë dë ku wojo limbo?

² Dee fesiten Keesitu sëmbë bi musu dë ku wojo limbo ee de bi kë fika a libi. Jesosi bi piki dee bakama fëën unfa de bi o sa du sabi taa di ten zuntu, u sëmbë ko booko Jelusalen ku di Wosu Gadu kaba a sösö. A bi taki taa: „Te un si sodati lontu Jelusalen buta a djegi, nöö un musu sabi taa di ten dou fu de booko ën puu dë e.” Te de bi si sö, nöö de bi „musu kule go tjubi a dee gaan kuun”, kumafa Jesosi bi piki de (Luk. 21:20, 21). Dee sëmbë dee bi piki Jesosi buka, bi fika a libi di dee Loomë sodati bi ko booko Jelusalen kaba a sösö.

3. Andi woo taki a di woto aki?

 ³ Nöunöu u ta libi a dee kaba pisiten u di hogi goonliba aki. Fëën mbei useei musu dë setiseti ku wojo limbo tu. A di woto aki, woo taki unfa u sa du soni ku köni te u ta luku dee soni dee ta pasa a di goonliba aki, woo taki unfa u sa ta buta mëni a useei, söseei woo taki unfa u sa wooko ku di ten di fika aki a wan bunu fasi.

4. Faandi mbei u musu ta kë sabi unfa dee soni dee ta pasa a goonliba nöunöu aki, nama ku dee soni di di Bëibel bi taki taa bi o pasa?

⁴ Soni dë di mbei u ta kë sabi unfa dee soni dee ta pasa a goonliba nöunöu aki, nama ku dee soni di di Bëibel bi taki taa bi o pasa. Jesosi bi piki u andi ku andi bi o pasa, sö taa u bi sa sabi te di kaba u di goonliba aki zuntu (Mat. 24:3-14). Apösutu Petuisi bi da u taanga fuu ta luku unfa dee tjabukama woto u Bëibel bi o ta pasa, sö taa u sa abi wan taanga biibi go dou (2 Pet. 1:19-21). Di lasiti buku u Bëibel ta bigi ku dee wöutu aki: „Di bosikopu aki da wan bosikopu di Jesosi Keesitu tja ko a limbo, di Gadu seei dëën faa musu mbei dee saafu u Gadu ko sabi dee soni dee o pasa abiti möön” (Ako. 1:1). Fëën mbei u ta buta pakisei gaanfa seei a dee soni dee ta pasa a goonliba nöunöu aki, fuu sa si unfa de o mbei dee tjabukama woto u Bëibel pasa tuutuu. Boiti di dë, kandë woo ta kë taki u dee soni aki ku u na u.

5. Ku andi u musu ta köni, ma andi u musu du? (Luku dee peentje.)

⁵ Te u ta taki soni u dee tjabukama woto u Bëibel, nöö u musu köni fu wa ta taki andi u ta mëni taa o pasa. Wë faandi mbei? U di wa kë taki wan soni di sa mbei taa dee baaa ku dee sisa u di kemeente an ta libi fiifii ku deseei möön. A sa pasa taa u ta jei fa dee tiima u di goonliba aki ta taki taa de o seeka soni fuu sa ta libi bööböö. Ka fuu ta taki taa di soni aki hën o mbei di tjabukama woto u 1 Tesalonika 5:3 pasa tuutuu, nöö a bi o möön bunu fuu ta buta pakisei a dee njunjun soni di dee baaa ta tja ko a limbo da u. Te dee soni dee u ta taki ta kai ku dee soni dee sikifi a dee buku fuu, nöö u ta heepi dee sëmbë u di kemeente u de ta libi fiifii ’makandi ku wan pakisei, söseei ku wan hati’.​—1 Kol. 1:10; 4:6.

6. Andi u ta lei a 2 Petuisi 3:11-13?

⁶ Lesi 2 Petuisi 3:11-13. Apösutu Petuisi ta heepi u fuu ko sabi unfa u musu ta si soni, te a nama ku dee tjabukama woto u Bëibel. A ta da u taanga fuu ta „hoi a pakisei taa di daka [u Jehovah] ta ko”. Faandi mbei? Wë na u di u kë ko sabi „di daka ku di juu” di Jehovah o mbei Amagedon ko, ma u di u kë wooko ku di ten di fika fuu ’ta tja useei a wan limbolimbo fasi, ta du soni di ta lei taa u ta dini Gadu fajafaja’ (Mat. 24:36; Luk. 12:40). Hën da fuu taki ën, u kë du soni a wan leti fasi, söseei u kë mbei hii möiti be a dë taa u ta du soni da Jehovah u di u lobi ën ku hii u hati. Fuu sa du di soni dë, nöö u musu ta buta mëni a useei.

7. Unfa u ta lei taa u ta buta mëni a useei? (Lukasi 21:34)

⁷ Jesosi bi piki dee bakama fëën u de ta buta mëni a dee soni dee ta pasa a goonliba, ma a bi piki de tu taa de musu ta buta mëni a deseei. U ta si di soni aki a di soni di sikifi a Lukasi 21:34. (Lesi ën.) Luku andi Jesosi bi taki. A bi taki taa: „Dee sëmbë o, un mëni unu seei e.” Wan sëmbë di ta buta mëni nëën seei da wan sëmbë di ta köni ku soni di sa  mbei hën ku Jehovah poi. A di lö fasi dë, a ta du soni sö taa Jehovah sa lobi ën go dou.​—Nöng. 22:3; Jud. 20, 21.

8. Andi apösutu Paulosu bi da dee Keesitu sëmbë taanga u de du?

⁸ Apösutu Paulosu bi da dee Keesitu sëmbë taanga u de ta buta mëni a deseei. A bi piki dee Keesitu sëmbë u Efeise taa: ’Un musu mëni unuseei kumafa un ta tja un libi e. Wan musu libi kuma dee sëmbë söndö fusutan, ma un musu libi kuma sëmbë di a’ bumbuu pakisei’ (Ef. 5:15, 16). Hii juu Saatan ta mbei möiti u poi u ku Jehovah. Fëën mbei di Bëibel ta piki u fuu ta ’mbei möiti fuu sabi andi Gadu kë a u’, sö taa Saatan an wini u.​—Ef. 5:17.

9. Unfa u sa ko sabi andi Gadu kë a u?

⁹ Di Bëibel an ta taki u hii dee soni dee sa mbei taa u ku Jehovah poi. A lo’ u pasa taa u ta abi u du soni di di Bëibel an ta taki soni u de finifini. Fuu sa du soni a wan köni fasi, nöö u musu mbei möiti fuu sabi ’andi Gadu kë a u’. Woo ko sabi di soni dë, te u ta öndösuku Gadu Wöutu hiniwan juu, söseei te u ta kai pakisei a dee soni dee u ta lei. Möön u ko fusutan andi Gadu kë a u, söseei möön u ta pakisei kumafa Keesitu ta pakisei, nöö möön woo ta du soni „kuma sëmbë di a’ bumbuu pakisei”, aluwasi ee wëti an dë di ta piki u andi u musu (1 Kol. 2:14-16). So juu an ta taanga da u fuu fusutan taa u musu köni ku so soni, ma so juu a ta taanga.

10. Ku un pei soni u musu ta köni?

¹⁰ So u dee soni dee u musu ta köni ku de da: kai lobi ku sëmbë di u ku ën an tööu, bebe daan pasa maaka, njan pasa maaka, taki hatihati soni da sëmbë, luku feti soni, luku fanafiti soni a di së u manu ku mujëë, ku woto soni di an bunu (Ps. 101:3). Didibi, di felantima fuu, ta suku fasi hii juu u mbei u ku Jehovah an dë mati möön (1 Pet. 5:8). Ee wa köni, nöö pikipiki Saatan sa poi u hati ku u fusutan. A sa mbei u ko ta haun ku wotowan, ta ganjan sëmbë, ta buuse wotowan, ta hoi wotowan a bëë, söseei a sa mbei u ko abi gaanfasi ku langawojo (Gal. 5:19-21). Pikipiki u sa ko abi dee fasi aki. Fëën mbei ee wa mbei möiti wantewante u dee fasi aki an mbei lutu a u hati, nöö de sa mbei u du soni di an bunu.​—Jak. 1:14, 15.

11. Ku un soni di sa miti u söndö fuu mëni u musu ta köni, nöö faandi mbei u musu ta köni ku ën?

¹¹ Wan soni di sa miti u söndö fuu mëni, da di nama di u sa ko ta nama ku sëmbë di an ta tja deseei a wan bunu fasi. Boo taa i ku wan sëmbë di an dë wan Jehovah Kotoigi ta wooko makandi a wan kamian. U di i kë u di sëmbë di i ku ën ta wooko musu ta si taa dee Jehovah Kotoigi da bumbuu sëmbë, mbei i ta libi bunu ku ën, ta heepi ën a soni. A kan tu taa wanwan pasi i ta njan makandi ku di sëmbë aki. Te fii mëni, i ku ën ko ta njan makandi bëina hiniwan juu. Wanwan pasi di sëmbë ta taki u soni di an fiti, nöö bigibigi i ta mbei möiti fu ja taki go a dee pisi dë. Ma baka wan pisiten, i ko guwenti u jei dee lö soni dë sö tee taa de an ko ta toobi i möön. Nöö hën wan daka, hën di sëmbë hakisi i fuun go bebe wan soni makandi baka wooko, hën i go ku ën. Te u kaba fëën, i bigi ko ta si soni kuma di sëmbë di i ku ën ta wooko. Wë nöö fa soni ko dë sö, nöö un longi a o tei ufö i bigi ko ta du soni kuma di sëmbë dë? Wë a dë sö tuu taa u ta libi bunu ku hii sëmbë, söseei u ta lesipeki hii sëmbë, ma u musu hoi a pakisei taa woo ko dë kuma dee sëmbë dee u ta hulu (1 Kol. 15:33). Ee u ta buta mëni a useei kumafa Jesosi bi piki u, nöö woo mbei möiti fu wa ta nama ku sëmbë di an ta hoi dee wëti u Jehovah, ee an  dë fanöudu (2 Kol. 6:15). A sö wan fasi woo si te hogi ta ko, nöö u koti pasi dëën.

12. Andi dee bakama u Jesosi bi musu ta du a di pisiten di de bi dë ta wakiti u sëmbë ko booko Jelusalen ku di Wosu u Gadu kaba a sösö?

¹² Jesosi an bi kë u dee bakama fëën musu dë piii ta wakiti u sëmbë booko Jelusalen ku di Wosu Gadu kaba a sösö. A bi da de wan wooko u de du. A bi piki de taa de bi musu ta konda di bunu buka da sëmbë ’a Jelusalen te dou hii Judea, te kisi Samalia, söseei te dou a dee köndëköndë u goonliba tuu ka sëmbë dë’ (Tjab. 1:6-8). Wan gaan wooko wë a bi da de dë e! Te de bi ta mbei hii möiti u du di wooko di a bi da de, nöö a sö wan fasi de bi ta lei taa de ta wooko ku di ten u de a wan köni fasi.

13. Faandi mbei a dë fanöudu fuu ta wooko ku di ten fuu a wan köni fasi? (Kolosën 4:5)

¹³ Lesi Kolosën 4:5. Fuu sa buta mëni a useei, nöö a dë fanöudu fuu ta köni ku di fasi fa u ta wooko ku di ten fuu. Soni sa miti hiniwan fuu „a wan juu di wa bi mëni” (Peleik. 9:11). U sa lasi u libi a wan ten di wa bi mëni.

14-15. Unfa u sa wooko ku di ten fuu a wan köni fasi? (Hebelejën 6:11, 12) (Luku di peentje.)

¹⁴ U ta lei taa u ta wooko ku di ten fuu a wan köni fasi, te u ta du soni kumafa Jehovah kë,  söseei te u ta du soni fuu ku ën ko dë möön gaan mati (Joh. 14:21). ’U musu taanpu gingin a di biibi u ta biibi Masa Jesosi aki. Wa musu disa möönsö. U musu ta biinga hiniwan ten a di wooko u Masa’ (1 Kol. 15:58). Nöö ee a ko dë taa u lasi libi nasö taa di kaba u di hogi goonliba aki dou, nöö wa o bai sabisö u di wa bi du möön soni da Jehovah.​—Mat. 24:13; Lom. 14:8.

¹⁵ A di ten aki, Jesosi ta tii dee bakama fëën go dou u de ta paaja di bunu buka u di Könuköndë u Gadu a hii së u goonliba. Jesosi du di soni di a bi paamusi u. A ta tei di ölganisaasi u Jehovah u lei u unfa u musu peleiki, söseei a ta da u dee soni dee u abi fanöudu fuu sa paaja di bunu buka (Mat. 28:18-20). Te u ta mbei hii möiti ta peleiki ta lei sëmbë soni u Bëibel, söseei te u ta dë ku wojo limbo ta wakiti u Jehovah poi di hogi goonliba aki, nöö u ta lei taa u ta piki Jesosi buka. Te u ta du di soni di sikifi a Hebelejën 6:11, 12, nöö di soni dë o heepi u fuu sa du soni ku biibi u te di kaba dou.​—Lesi ën.

16. Andi u dë kabakaba u du?

¹⁶ Jehovah buta wan daka ku wan juu ka a o poi di hogi goonliba u Saatan aki. Te di daka dë dou, nöö Jehovah o du hii dee soni dee a bi paamusi u a di Wöutu fëën. So juu u sa ta si kuma di kaba an ta ko möönsö. Ma di daka u Jehovah „an o ko lati”! (Hab. 2:3) Fëën mbei boo dë kabakaba ’ta wakiti Jehovah. Ku pasensi u kë dë ta wakiti di Gadu fuu di o heepi u’.​—Mik. 7:7.