1, 2. (a) Ku ambë fosu di soni di sikifi a Mateosi 24:12 nama? (b) Unfa di buku Tjabukama ta lei taa gaansë u dee fesiten Keesitu sëmbë bi lobi Gadu gaanfa jeti? (Luku di peentje a bigi u di woto.)

DI JESOSI bi dë a goonliba, nöö a bi taki finifini unfa sëmbë bi o sa sabi taa u ta libi a di „kaba” pisiten u di goonliba aki. Wan u dee soni di a bi taki taa bi o pasa tu, hën da: „Gaan së u de an o lobi de na de möön” (Mateosi 24:3, 12). Dee Dju u di ten u dee fesiten Keesitu sëmbë bi ta taki taa de da sëmbë u Gadu, ma wan pisiten de an bi ko ta lobi Gadu sö möön.

² Ma tökuseei i bi abi woto Keesitu sëmbë a di ten dë, di an bi dë sö. De bi ta peleiki fajafaja ta „konda di Bunu Buka da lanti taa Jesosi hën da di Paamusi Könu di Masa Gadu bi o manda ko”. Dee Keesitu sëmbë aki bi lobi Gadu gaanfa jeti (Tjabukama 2:44-47; 5:42). Ma wantu fesiten Keesitu sëmbë an bi ta lobi Gadu sö möön. Unfa u du sabi di soni aki?

3. Andi bi sa mbei so Keesitu sëmbë an bi ta lobi Gadu ku wotowan sö möön?

 ³ Jesosi bi piki dee fesiten Keesitu sëmbë dee bi ta libi a Efeise taa: „Wan ta lobi mi kumafa un bi lobi mi a fesi möön” (Akoalimbo 2:4). A sa dë taa dee Keesitu sëmbë u Efeise bi ta kë du soni kuma dee woto sëmbë u di foto dë dee bi ta pakisei deseei nöö (Efeise 2:2, 3). Efeise bi dë wan gudu foto ka sëmbë bi ta möön booko de hedi ku gudu, söseei u de ko abi wan möön bunu libi. Sömëni sëmbë u Efeise bi ta libi fanafiti a di së u manu ku mujëë soni, nöö de an bi ta lesipeki dee wëti u Gadu. De bi ta kë piizii möön leki di lei di de bi musu ta lei taa de lobi Gadu ku wotowan.

4. (a) Unfa a du ko taa sömëni sëmbë u di ten aki an ta lobi Gadu sö möön? (b) Kai dii soni ka di lobi fuu musu ko möön taanga?

⁴ Di taki di Jesosi bi taki taa sëmbë an bi o ta lobi deseei möön, nama ku di ten fuu aki sö tu. Dee sëmbë u di ten aki an ko ta lobi Gadu sö möön. Milionmilion sëmbë ta buta futoou a dee ölganisaasi u di goonliba aki taa de o puu dee fuka u di goonliba, ka u de buta futoou a Gadu. Möönmöön sëmbë an ta lobi Gadu. A sa pasa tu taa dee dinima u Jehovah seei an ko ta lobi ën sö möön, kumafa a bi pasa a di kemeente u Efeise na awooten. Wë boo go luku unfa u sa mbei di lobi fuu ko möön taanga da: (1) Jehovah, (2) dee tuutuu lei u Bëibel, ku (3) dee baaa ku dee sisa fuu.

5. Faandi mbei u musu lobi Gadu?

⁵ Ambë u musu lobi möön gaanfa? Jesosi bi taki taa: „I musu lobi Gadu i Masa te dou ku hii i hati ku hii i akaa [libi, NW] ku hii di pakisei fii di i abi. Hën da di möön hebi wan u hii dee wëti tuu” (Mateosi 22:37, 38). Di lobi di u lobi Jehovah ta heepi u fuu hoi dee wëti fëën, fuu hoi dou, söseei fuu ta buuse hogidu. (Lesi Psalöm 97:10.) Ma Saatan ku di goonliba fëën an kë fuu lobi Gadu möön.

6. Andi ta pasa te sëmbë an ta lobi Gadu sö möön?

⁶ Dee sëmbë u di goonliba aki an ta kaba fusutan andi da lobi. Ka u de lobi Gadu, nöö de ta lobi „de seei nöö” (2 Timoteo 3:2). De ta buta hii de pakisei a „dee taku kë u libisëmbë hati ku langawojo ku gaan fasi, nöö dee lö soni dë dë soni u goonliba” (1 Johanisi 2:16). Apösutu Paulosu bi taki andi sa pasa ee u ta pakisei useei fosu. A bi taki taa: „Ee di kë fuu libisëmbë hati ta tii i, nöö i ku Gadu paati kaa e” (Loomë 8:6, 7). Dee sëmbë dee ta pakisei möön gaanfa u wooko möni, nasö dee sëmbë dee ta buta pakisei möön gaanfa a dee manu ku mujëë fii u de, ta lasi hati gaanfa seei te u kaba fëën.—1 Kolenti 6:18; 1 Timoteo 6:9, 10.

7. Andi da wan föutu pakisei di Keesitu sëmbë sa ko abi a di ten aki?

⁷ Sömëni sëmbë di an ta biibi a Gadu, söseei di an ta biibi taa Gadu hën mbei hii soni, ta pooba u ganjan sëmbë u de an lobi Gadu, nasö u de an biibi taa wan Gadu dë. De ta mbei sëmbë biibi taa don sëmbë, nasö sëmbë di an go a siköö wan daka, de nöö ta biibi taa wan Gadu dë. Boiti di dë, sömëni sëmbë ta möön lesipeki dee könima, ka u de lesipeki Gadu (Loomë 1:25). Wan Keesitu sëmbë seei sa ko ta pakisei sö tu. Di soni aki sa mbei u ku Jehovah an dë gaan mati möön, nöö kandë wa o ta lobi ën sö möön.—Hebelejën 3:12.

8. (a) Andi ku andi sa mbei dee sëmbë u Jehovah lasi hati? (b) Unfa di tëkisi u Psalöm 136 sa da u kötöhati?

⁸ Wë u di u ta libi a di hogi goonliba u Saatan,  mbei sömëni soni dë di sa mbei u lasi hati (1 Johanisi 5:19). Ma ee u ta lasi hati, nöö di biibi fuu sa ko suwaki, söseei wa o ta lobi Gadu sö möön. Kandë sömëni fuu sa ta miti bookohedi u di u ta ko gaandi, u di u dë ku siki, nasö u di u abi möni fuka. Nasö kandë u ta tjali u di wa sa du so soni kumafa u bi o kë du de. Nöö kandë woo fii booko saka u di soni an waka kumafa u bi mëni. Ma aluwasi andi ta miti u, tökuseei nöiti u musu si kuma Jehovah go disa u. Pakisei di soni di sikifi a Psalöm 136:23: „A bi pakisei u di u bi lasi hati, nöö di bunuhati fëën dë u teego.” U sa dë seiki taa Jehovah o haika u ’te u ta begi ën’, nöö a o piki dee begi fuu.—Psalöm 116:1; 136:24-26.

9. Andi bi heepi Paulosu faa bi sa ta lobi Gadu nöömö?

⁹ Apösutu Paulosu bi dë wan dinima u Gadu di bi ta pakisei fundu u di fasi fa Jehovah bi ta heepi ën, nöö di soni aki bi heepi ën faa hoi dou. A bi sikifi taa: „Masa [Jehovah, NW] hën da mi Heepima. Ma o fëëë. Andi seei wan sösö libisëmbë sa du ku mi?” (Hebelejën 13:6) Di futoou di Paulosu bi abi a Jehovah bi heepi ën faa bi sa libi ku dee soni dee bi ta miti ën. Di de bi ta du sömëni hogi soni ku Paulosu, nöö an bi lasi biibi a Jehovah möönsö. Di a bi dë a dunguwosu seei, a bi ta sikifi biifi manda da dee baaa ku dee sisa u dee kemeente u da de degihati (Efeise 4:1; Filipi 1:7; Filemon 1). Aluwasi un soni bi ta miti Paulosu, tökuseei a bi lobi Jehovah gaanfa jeti. A bi ta buta futoou a di Gadu ka „hii kötöhati ta kumutu”, söseei di ta „heepi u fuu feni kötöhati” a hii „dee hia sitaafu ta miti u a di goonliba aki” (2 Kolenti 1:3, 4). Unfa u sa djeesi Paulosu?

10. Andi sa heepi u fuu sa ta lobi Jehovah nöömö?

¹⁰ Paulosu bi taki u wan fasi fa u sa ko ta lobi Gadu nöömö, di a bi sikifi taa: „Hiniwanten un musu ta begi.” Bakaten hën a sikifi tu taa: „Un musu ta begi nango  nöömö tu. Wan musu disa” (1 Tesalonika 5:17; Loomë 12:12). Faandi mbei di begi di u ta begi ta mbei u ku Gadu ko dë gaan mati? Te u ta begi, hën da u ta fan ku Jehovah. Di soni aki sa mbei u ku Jehovah ko dë gaan mati (Psalöm 86:3). Te u ta konda hii dee soni dee dë a u hati da di Tata fuu di dë a liba ala, nöö u ku ën o ko dë gaan mati (Psalöm 65:2). Söseei woo ko möön lobi Jehovah te u ta si fa a ta piki dee begi fuu. Woo dë seiki taa „Jehovah dë zuntu ku hii dee sëmbë dee ta kai ën” (Psalöm 145:18). Di dë di u dë seiki taa Jehovah lobi u, söseei taa a o heepi u, o mbei u sabi unfa u musu libi ku hiniwan fuka di sa miti u nöunöu, söseei ku hiniwan fuka di sa miti u a di ten di ta ko.

11, 12. Unfa u sa ko möön lobi dee tuutuu lei u Bëibel?

¹¹ Keesitu sëmbë lobi tuutuu lei. A di Wöutu u Gadu u sa feni tuutuu lei. Jesosi bi piki ën Tata taa: „Di Wöutu fii hën da di Tuu” (Johanisi 17:17). Ee u kë lobi dee tuutuu lei u Bëibel, nöö u musu sabi andi sikifi a di Bëibel (Kolosën 1:10). Ma u musu du möön soni. Luku unfa di sikifima u Psalöm 119 ta heepi u fuu fusutan andi u musu du. (Lesi Psalöm 119:97-100.) Te u lesi wan soni a di Bëibel, nöö hii di daka dë u musu ta pakisei fundu u di soni di u bi lesi. Te u ta pakisei fundu u dee wini dee u sa feni te u ta libi ku dee tuutuu lei u Bëibel, nöö möönmöön woo ko lobi ën.

¹² Di psalöm sikifima bi taki tu taa: „Dee soni dee i taki, suti seei a mi buka dendu. Awa, de suti möön höniwata a mi buka!” (Psalöm 119:103) Dee buku di di ölganisaasi u Gadu ta mbei, dë kuma suti njanjan. Te u ta njan wan soni di u lobi, nöö u ta kë tei u ten fuu njan mën. A di wan seei fasi u musu ta tei u ten fuu lei useei soni u Bëibel. Nöö woo ta möön piizii u dee „suti wöutu” u di tuutuu lei, söseei an o taanga da u fuu ta hoi dee soni dee u bi lesi, söseei fuu wooko ku de u heepi wotowan.—Peleikima 12:10.

13. Andi bi heepi Jelemia faa lobi di Wöutu u Gadu? Nöö unfa di soni dë bi heepi ën?

¹³ Di tjabukama de kai Jelemia bi lobi di Wöutu u Gadu. A bi taki taa: „Di mi feni dee wöutu fii, hën mi njan de. Hën mi bigi ta piizii. Awa, na piki wai mi ta wai, u di mi ta tja di në fii, Jehovah, di Gadu di ta tii dee sodati” (Jelemia 15:16). Jelemia bi ta pakisei fundu u dee soni dee dë a di Wöutu u Gadu, nöö a bi lobi de tu. A bi ta tei ën u bigi taa a bi sa ta wooko da Jehovah a goonliba aki, söseei taa a bi sa ta konda di bosikopu fëën da sëmbë. Ee u lobi dee tuutuu lei u Bëibel, nöö woo ko si taa a dë wan apaiti gaandi di u abi fuu dë wan Kotoigi u Jehovah, söseei fuu ta paaja di bunu buka u di Könuköndë a dee lasiti daka u di goonliba aki.

14. Un woto soni o heepi u fuu ko möön lobi dee tuutuu lei u Bëibel?

¹⁴ Un woto soni o heepi u fuu ko möön lobi dee tuutuu lei u Bëibel? Hii juu u musu nango a dee kemeente komakandi, ka u sa lei soni u Jehovah. Di lei di u ta lei soni a Di Hei Wakitimawosu hiniwan wiki, da wan u dee fasi fa Jehovah ta lei u soni. Ee u kë feni wini u di komakandi aki, nöö u musu ta seeka a fesi. U sa lesi hii dee Bëibel tëkisi di de sikifi a di woto. A di ten aki, sömëni fuu sa lesi nasö download Di Hei Wakitimawosu buta a di tëlëfön fuu nasö a di tablet fuu, u  di a dë u feni a sömëni töngö a di website fuu jw.org, söseei a di JW Library app. So u dee computer soni ta heepi u fuu feni wan Bëibel tëkisi hesihesi. Ma ee u kë lei soni u hiniwan woto, nöö u musu ta lesi dee tëkisi bunu, söseei u musu ta pakisei fundu u de, nöö woo ko möön lobi dee tuutuu lei u Bëibel.—Lesi Psalöm 1:2.

15, 16. (a) Andi Jesosi bi piki u te u luku di soni di sikifi a Johanisi 13:34, 35? (b) Unfa di lobi di u lobi Gadu ku di Bëibel nama ku di lobi di u lobi dee baaa ku dee sisa fuu?

¹⁵ Di lasiti ndeti di Jesosi bi dë a goonliba, hën a bi piki dee bakama fëën taa: „Fa mi nango aki, nöö mi o manda unu a wan njunjun soni e. Wan si fa mi lobi unu nö? Wë nöö sö un musu lobi unu seei tu. Biga te un ta lobi sö kaa, nöö hii sëmbë o si taa bakama u mi gbelin un dë e.”—Johanisi 13:34, 35.

¹⁶ Di lobi di u lobi dee baaa ku dee sisa fuu nama ku di lobi di u lobi Jehovah. Ee wa lobi Gadu, nöö wa sa lobi dee baaa ku dee sisa fuu. Söseei ee wa lobi dee baaa ku dee sisa fuu, nöö wa sa lobi Gadu. Apösutu Johanisi bi sikifi taa: „Di sëmbë i ta si ku i wojo mii dë hën ja lobi, nöö unfa i sa lobi Gadu di ja si ku wojo wan daka?” (1 Johanisi 4:20) Te u lobi Jehovah ku dee baaa ku dee sisa fuu, nöö woo lobi di Bëibel tu. Faandi mbei u taki sö? Wë u di ee u lobi dee soni dee u ta lei a di Bëibel, nöö woo kë hoi dee wëti di nama ku di lobi di u musu lobi Gadu ku dee baaa ku dee sisa fuu.—1 Petuisi 1:22; 1 Johanisi 4:21.

17. Na un fasi u sa lei taa u lobi wotowan?

¹⁷ Lesi 1 Tesalonika 4:9, 10. Na un fasi u sa lei taa u lobi dee baaa ku dee sisa u di kemeente fuu? Kandë wan baaa nasö wan sisa di ko gaandi kaa abi sëmbë fanöudu u tjëën go a dee komakandi, söseei u de tjëën go a wosu baka. Kandë wan mujëë di manu fëën dëdë kaa, abi sëmbë fanöudu u  ko heepi ën seeka wan soni a di wosu fëën (Jakobosi 1:27). U musu ta buta pakisei a dee baaa ku dee sisa dee lasi hati, nasö dee abi woto bookohedi, söseei u musu ta da de degihati ku kötöhati (Nöngö 12:25; Kolosën 4:11). U ta lei taa u lobi „dee oto sëmbë dee ta biibi Masa kuma u” ku dee soni dee u ta taki, söseei ku dee soni dee u ta du.—Galasia 6:10.

18. Andi o heepi u fuu seeka wan toobi di u abi ku wan baaa nasö wan sisa fuu?

¹⁸ Di Bëibel taki taa a „dee lasiti daka” u di hogi goonliba aki, sömëni sëmbë bi o ko ta pakisei deseei nöö, söseei de bi o abi langahati (2 Timoteo 3:1, 2). U kuma Keesitu sëmbë, musu ta mbei möiti nöömö fuu ko ta lobi Jehovah, di Wöutu fëën, ku dee baaa ku dee sisa fuu möön gaanfa. U di u da zöndu libisëmbë, mbei so juu u sa ta abi pikipiki toobi ku dee baaa ku dee sisa fuu. Ma u di u lobi de, mbei woo mbei möiti fuu seeka dee toobi aki a wan suti fasi, söseei woo du ën wantewante (Efeise 4:32; Kolosën 3:14). Nöiti di lobi fuu musu ko kötö! Ma boo ta lobi Jehovah, di Wöutu fëën, ku dee baaa ku dee sisa fuu nöömö ku hii u hati.