1. Unfa u musu ta si di biibi di u abi?

NA HII sëmbë abi biibi (2 Tesalonika 3:2). Ma Jehovah da hii dee sëmbë dee ta dini ën biibi (Loomë 12:3; Galasia 5:22). U dë ku tangi a hati seei taa Jehovah ta da u biibi!

2, 3. (a) Un wini u ta feni ta u abi biibi? (b) Un hakisi woo luku nöunöu?

² Jehovah manda di Womi Mii fëën di a lobi gaanfa seei ko dëdë da u, sö taa hii sëmbë di buta biibi nëën sa feni paadon u dee zöndu u de. Di soni aki heepi sëmbë u de sa toon Jehovah mati, söseei u de sa libi u teego (Johanisi 6:44, 65; Loomë 6:23). Jehovah lobi u seei! Hii fa u da zöndu libisëmbë, söseei hii fa u fiti u dëdë, tökuseei Jehovah si taa u sa du bunu soni (Psalöm 103:10). A heepi u fuu ko sabi di bunu buka di nama ku Jesosi ku di paima di a paka da u. Te u bigi ta buta biibi a Jesosi, söseei te u ta waka nëën baka, nöö woo dë seei ta wakiti u feni di libi u teego!​—Lesi 1 Johanisi 4:9, 10.

³ Ma andi u sa lei u biibi möön? Ee sabi nöö u sabi dee soni dee Gadu bi du da u ku dee soni dee a o du da u a di ten di ta  ko, hën da u abi biibi kaa u? Boo luku andi u sa du möön fuu sa abi biibi.

4. Te u abi biibi, nöö andi a ta heepi u fuu du?

⁴ Te u abi biibi a Jehovah ku Jesosi, nöö na sabi nöö u sabi andi de bi du ku andi de o du. Ma u kë libi seei a di fasi di de lei u taa u musu libi. Nöö u dë fajafaja tu u heepi wotowan u ko sabi de. Apösutu Paulosu bi taki taa: ’Ee i jabi i buka piki taa Jesosi da Masa, nöö i biibi a i hati taa Gadu bi weki ën a dëdë toona dëën libi, nöö i feni di heepi u Gadu kaa. Biga ku i hati i ta biibi, nöö hën ta mbei Gadu ta si i kuma bumbuu sëmbë. Nöö ku i buka i ta piki taa Jesosi da Masa, nöö hën ta mbei i sa feni di heepi u Gadu fu ja lasi go kaba a sösö.’​—Loomë 10:9, 10; 2 Kolenti 4:13.

5. Faandi mbei biibi dë fanöudu, nöö andi u musu du u abi wan taanga biibi?

⁵ A dë gbelingbelin u si taa ee u kë libi u teego a di njunjun goonliba u Gadu, nöö u musu abi biibi, söseei u musu abi wan taanga biibi hii juu. Biibi dë kuma wan folo. U musu ta mujëën faa sa ta göö bunu. Ma ee wa ta mujëën tjika, nöö a o dëdë. A di wan seei fasi nöö u musu ta mbei möiti fuu abi wan „taanga” biibi, nöö a musu „ta göö” nöömö.​—Titusi 2:2; 2 Tesalonika 1:3; Lukasi 22:32; Hebelejën 3:12.

6. Andi da dee tu fasi fa Hebelejën 11:1 ta lei u andi da biibi?

⁶ Di Bëibel ta taki a Hebelejën 11:1 andi da biibi. (Lesi ën.) (1) Biibi da „wan soni dë a i hati i ta mëni nöö i sabi gbelingbelin taa joo feni ën nöömö”. Dee soni dee dë ’a u hati u ta mëni nöö u sabi gbelingbelin taa woo feni de nöömö’, nama ku dee soni dee Gadu paamusi u da di ten di ta ko. Fëën mbei u dë seiki taa hogidu an o dë möön, söseei taa woo libi a wan njunjun goonliba. (2) Biibi da „wanlö soni ja ta si ma i sabi gbelingbelin taa de dë tuu”. Wë u sabi taa Jehovah Gadu, Jesosi Keesitu, dee ëngëli, ku di Könuköndë dë a liba ala tuutuu, hii fa wa sa si de (Hebelejën 11:3). Unfa u sa lei tuutuu taa u ta biibi dee soni dee Gadu paamusi u? Söseei unfa u sa lei taa u ta biibi dee soni dee wa sa si? Wë u sa du di soni aki a di fasi fa u ta libi, a dee soni dee u ta taki, ku dee soni dee u ta du.

7. Unfa di woto u Noa ta heepi u fuu ko fusutan andi a kë taki te wan sëmbë abi biibi? (Luku di peentje a bigi u di woto.)

⁷ Andi u ta lei u di biibi di Noa bi abi? Apösutu Paulosu bi taki taa: „Gadu bi wasiköi ën fu dee soni dee o ko ma de an bi dë u si eti. Nöö hën Noa kisi lesipeki u Gadu, hën a mbei di gaan sipi faa tjubi dee sëmbë fëën wosu dendu fu de an dëdë a di wata” (Hebelejën 11:7). Noa bi ta biibi dee soni dee Jehovah bi piki ën, hën a mbei di gaan gindi ark. Kandë dee sëmbë dee bi ta libi nëën bandja bi ta hakisi ën faandi mbei a ta mbei wan ark. U sa dë seiki taa Noa bi musu u piki de. Di Bëibel ta taki taa Noa „hën bi ta konda da dee sëmbë u di ten dë fa u de musu libi bunu a Gadu wojo” (2 Petuisi 2:5). A bi ta bai dee sëmbë taa Gadu o tja wan gaan wata ko kii dee hogihati sëmbë. Kandë a bi piki de gbelingbelin andi Jehovah bi piki ën. Kandë a bi piki de taa Gadu taki taa: „Mi buta taa mi o kii hii libisëmbë puu, u di de mbei goonliba ko fuu ku hogidu.” Nöö „mi o tja wan Gaan wata ko a goonliba, u feki hii  libilibi soni di abi libi böö puu. Hii libilibi soni di dë a goonliba aki o dëdë”. Baka di dë, a musu u dë sö taa Noa bi konda da dee sëmbë andi de musu du u de an dëdë. Jehovah bi piki Noa taa: „I musu go a di ark dendu.”​—Kenesesi 6:13, 17, 18.

8. Andi Jakobosi bi taki u biibi?

⁸ Jakobosi bi sikifi soni di nama ku biibi tu. Kandë a bi du di soni aki kölö sö baka di apösutu Paulosu bi sikifi di biifi manda da dee Hebelejën Keesitu sëmbë. Jakobosi bi sikifi taa: „Lei mi taa i abi biibi söndö fii du wan soni, nöö mi o du soni u lei i taa mi abi biibi” (Jakobosi 2:18, NW). Jakobosi bi taki taa na biibi nöö u musu ta biibi wan soni nöö a kaba, ma u musu ta du soni di ta lei taa u abi biibi tuutuu. Dee taku jeje seei sabi taa Gadu dë, ma de an abi biibi a Jehovah. Ma de ta fia ku Jehovah gaanfa seei (Jakobosi 2:19, 20). Ma ee wan sëmbë abi biibi, nöö a o ta tja gafa ko da Gadu te a ta du bunu soni. Di soni aki Abahamu bi du. Jakobosi sikifi taa: „Biga luku di fesiten sëmbë fuu de kai Abahamu. Fa a bi sai dë, di libi a bi libi, hën wë mbei a ko dë wan bumbuu sëmbë a Gadu wojo e. Wë biga a bi tei di wan kodo womi mii fëën tö di a bi abi tja go faa tjuma da Gadu kumafa a mandëën. Ja si nö? Sö Abahamu bi ta biibi Gadu tjika. Fa Gadu ko fan ku ën dë, hën a piki. Nöö hën a go u go du di soni Gadu taki dëën. Nöö fa a du dë, nöö di biibi fëën ko dë wan gbelingbelin biibi awaa.” Baka di dë, hën Jakobosi taki taa ee wan sëmbë an ta du soni u lei taa a abi biibi, nöö sösö soni a ta du. A bi taki taa: „Leti kumafa . . . wan sinkii söndö akaa [libi kaakiti, NW] aan libi, nöö söseei biibi ku buka söndö du aan na wan wojo heepi tu.”​—Jakobosi 2:21-23, 26.

9, 10. Andi a kë taki u abi biibi a di Womi Mii u Gadu?

⁹ Baka söwan 30 jaa, hën Johanisi bi sikifi di Bëibel buku fëën ku dee dii biifi fëën. Leti kumafa dee woto sëmbë dee bi sikifi Bëibel bi ta fusutan andi da biibi, sö nöö Johanisi bi ta fusutan andi da biibi tu. Sömëni pasi Johanisi bi wooko ku di Giiki wöutu di Ingisitöngö ta puu so juu kuma „abi biibi”.

¹⁰ Johanisi bi taki taa: „Nöö ee wan sëmbë i ta biibi a di Womi Mii u Gadu i si dë, nöö i abi di libi u teego kaa. Ma ee wan sëmbë ja kë biibi ën, nöö ja o feni di libi dë möönsö, biga di hatiboonu u Gadu dë a i liba kaa” (Johanisi 3:36). Ee u kë abi biibi a Jesosi, nöö u musu ta piki ën buka. Ma te u luku dee soni dee Johanisi bi sikifi, nöö u ta si taa Jesosi bi lo’ u taki taa ee u kë feni di libi u teego, nöö u musu abi biibi nëën ku hën Tata tuu.​—Johanisi 3:16; 6:29, 40; 11:25, 26; 14:1, 12.

11. Unfa u sa lei Jehovah taa u dë ku tangi a hati, u di u ko sabi di tuutuu lei?

¹¹ Jehovah ta wooko ku di santa jeje fëën u heepi u fuu fusutan dee tuutuu soni dee nama ku ën ku di Womi Mii fëën, söseei a ta heepi u fuu abi biibi a de tu. (Lesi Lukasi 10:21.) Unfa u sa lei taa u dë ku tangi a hati da hii dee soni dee Jehovah du da u? Wë hii juu u musu ta dëën tangi u di a da u pasi fuu ku ën sa ko dë mati, söseei u di a mbei Jesosi jabi di pasi da u, u di hën da „di Sëmbë di waka a u fesi kaa ta lei u fa fuu musu biibi” (Hebelejën 12:2). Wë u musu ta mbei di  biibi fuu ta ko möön taanga, u di woo ta begi Jehovah hii juu, söseei u di woo ta lei soni a di Wöutu fëën tu.​—Efeise 6:18; 1 Petuisi 2:2.

12. Andi woo du te u abi biibi?

¹² Hii juu a musu ta dë u si a dee soni dee u ta du taa u ta biibi dee soni dee Jehovah paamusi u. U musu ta konda soni u di Könuköndë u Gadu da wotowan, söseei u musu heepi de u de ko toon bakama u Jesosi. Söseei u musu ta „libi ku hii sëmbë e, ma möön gaanfa ku dee oto sëmbë dee ta biibi Masa kuma u seei” (Galasia 6:10). Nöö u musu ta mbei möiti gaanfa seei fuu ’kaba ku hii dee awoo takuhati fasi dee u bi abi’.​—Kolosën 3:5, 8-10.

13. Unfa ’biibi a Gadu’ dë fanöudu tjika? Andi di Bëibel taki u biibi, nöö faandi mbei a taki di soni dë?

¹³ Di Bëibel taki taa: „An dë taa Gadu sa a’ piizii möönsö ku wan sëmbë di an ta biibi e. Kwetikweti. Biga te wan sëmbë joo ko nëën, nöö i musu biibi taa a dë. Nöö söseei tu i musu biibi taa a ta paka dee sëmbë dee ta suku ën ku wan hati” (Hebelejën 11:6). Di Bëibel ta lei söseei taa ’biibi a Gadu’, da wan u dee fosu soni di wan Keesitu sëmbë musu abi. A dë wan pisi u dee „möön fundu” soni a di dini di u ta dini u Gadu (Hebelejën 6:1). Ma boiti di biibi di u musu abi, u abi woto fasi fanöudu fuu sa dë Jehovah mati u nöömö.​—Lesi 2 Petuisi 1:5-7; Judasi 20, 21.

14, 15. Unfa lobi dë fanöudu tjika te u tei ën maaka ku biibi?

¹⁴ Dee sikifima u Bëibel bi taki möön gaanfa u biibi, möön dee woto fasi di wan sëmbë musu abi. Di soni aki kë taki taa biibi da di möön fanöudu fasi di u musu abi ö?

¹⁵ Paulosu bi tei biibi maaka ku lobi. A bi sikifi taa: „[Ee] mi ta biibi Gadu te tjika u hopo wan hii kununu puu ka a dë buta go a oto kamian, ma ee ma ta lobi di otowan u mi, nöö ma dë wan wojo soni e” (1 Kolenti 13:2). Jesosi bi taki taa „di möön hebi wan u hii dee wëti tuu”, hën da u musu lobi Gadu (Mateosi 22:35-40). Lobi ta heepi u fuu ko abi sömëni woto fasi fuu sa gafa Gadu. Di Bëibel taki taa lobi ta „biibi hii soni”. Lobi o heepi u fuu ta biibi hii dee soni dee Gadu ta piki u a di Bëibel.​—1 Kolenti 13:4, 7.

16, 17. Andi di Bëibel taki u biibi ku lobi? Undi u dee fasi aki möön hebi, nöö faandi mbei?

 ¹⁶ Biibi ku lobi da tu fanöudu fasi seei, nöö dee sikifima u Bëibel bi lo’ u taki soni u de. Paulosu bi da dee baaa ku dee sisa fëën degihati u ’di biibi di de ta biibi a Gadu ku di lobi fëën di dë a de hati, de wë musu dë di felu bisi u de an kisi makei a di biibi’ (1 Tesalonika 5:8). Petuisi bi sikifi soni u Jesosi. A bi sikifi taa: „Hën da di Sëmbë di wan bi si wan daka, ma tökuseei un ta lobi ën. Hii fa wan ta si ën fa u dë aki seei, ma un ta biibi nëën liba” (1 Petuisi 1:8). Jakobosi bi piki dee salufu baaa fëën taa: „Nöö na sö Masa Gadu hën a ta libi e! Biga hën ta tei dee pootima u di goonliba aki u de musu ko biibi a Masa Jesosi Keesitu, fu de feni dee gaan waiti gudu nëën köndë dee a bi paamusi dee sëmbë dee lobi ën” (Jakobosi 2:5). Johanisi bi sikifi taa di wëti u Gadu hën da „u musu biibi taa Jesosi Keesitu hën da di Womi Mii u Masa Gadu. . . . Nöö di u tu dë taa u musu lobi u seei makandi”.​—1 Johanisi 3:23.

¹⁷ Paulosu bi sikifi tu taa: „Dee dii soni aki an o kaba a mundu möönsö: di biibi a Gadu, ku di mëni u abi a dee paamusi fëën, ku lobi. Ma nöö lobi, hën da mama u de tuu” (1 Kolenti 13:13). A di ten di ta ko an o dë fuu abi biibi a dee soni dee Gadu paamusi u da di njunjun goonliba möön, biga Gadu o du hii dee soni dë kaa. Woo libi wan suti libi kumafa di Bëibel taki. Ma hii juu a o dë fuu lobi Gadu ku woto sëmbë. Ma di lobi di woo ta lobi de o ta ko möön taanga daka fu daka.

18, 19. Andi ko pasa u di dee sëmbë u Gadu abi biibi a di ten aki, nöö ambë fiti u kisi gafa u di soni dë?

¹⁸ Dee sëmbë u Jehovah a di ten aki abi biibi a di Könuköndë u Gadu, nöö de ta du soni u heepi ën. Söseei de lobi de na de. De ta du dee soni aki u di de ta da di jeje u Gadu pasi faa tii di libi u de (Galasia 5:22, 23). Un wini di soni aki ta tja ko da u? Wë möön leki aiti milion baaa ku sisa dë a hii së u goonliba ta libi fiifii ku deseei, söseei de ta libi makandi kuma wan famii a dee kemeente u de. A dë gbelingbelin u si taa biibi ku lobi da tu fanöudu fasi seei.

¹⁹ U sa libi makandi kuma wan famii, u di Gadu ta heepi u. A fiti fuu gafëën u di soni aki (Jesaaja 55:13). U dë ku tangi a hati seei taa a „puu u a dëdë buka u di u abi biibi” (Efeise 2:8, NW). Jehovah o heepi sömëni woto sëmbë jeti u de ko abi biibi nëën. Nöö te u kaba fëën hii di goonliba o fuu ku sëmbë di an abi zöndu möön, di ta libi bunu a Gadu wojo, söseei ku sëmbë di o ta dë waiwai ta gafa Jehovah u teego!