JESOSI bi taki a Mateosi 13:24-26 taa: „[Di Könuköndë] dë leti kuma wan sëmbë tei wan bumbuu njanjan böngö tja go jaa nëën goon te a kaba, nöö hën a go. Nöö tefa ndeti, köndë kötö pii, nöö hën wan felantima fëën tei wan taku sii hën a go saapi a di goon fu di sëmbë. Nöö hën a go jaa di taku sii a di goon dendu te a kaba, nöö hën a go fëën. Nöö hën de dë tee juu dou, di njanjan seti nasi. Nöö hën dee wookoma fëën ko si taa wanlö taku soni dë a di njanjan dendu.” So sëmbë di sikifi soni u Bëibel an ta kaba biibi taa di soni di Jesosi bi taki aki bi pasa tuutuu. Ma te u luku dee soni dee sikifi a dee awooten buku u dee Loomë sëmbë, nöö sö wan soni bi sa pasa tuutuu.

Wan wöutu buku di ta taki soni u Bëibel ta taki taa dee Loomë sëmbë bi buta wan wëti di bi ta lei taa a bi dë wan hogi soni te wan sëmbë bi jaa taku sii a wan woto sëmbë goon. Wë ee de bi buta sö wan wëti, hën da sö wan soni bi ta pasa tuutuu. Wan womi de kai Alastair Kerr di ta öndösuku soni di nama ku wëti, taki taa a di jaa 533 baka Keesitu, hën di tiima u Loomë de kai Justinian bi sikifi di buku Digest. Di buku aki bi ta taki u dee möön fanöudu soni dee bi sikifi a di wëti u Loomë, söseei a ta taki u soni di könima bi taki di nama ku di wëti, kumutu a di jaa 100 te kisi di jaa 250 baka Keesitu. A di buku Digest, wan u dee könima de kai Ulpian bi taki u soni di bi pasa baka di jaa 100. Sëmbë bi jaa taku sii a wan woto sëmbë goon, hën hii dee soni di di sëmbë bi paandi bi kaba a sösö. Di buku Digest ta taki taa te de bi kisi di sëmbë di bi du di hogi, nöö de bi ta mbei a paka di sëmbë di bi abi di goon u dee soni dee a lasi.

Dee lö soni aki bi ta pasa a di pisiwata di Loomë bi ta tii, nöö a ta lei taa di soni di Jesosi bi taki a di woto bi sa pasa a di ten dë tuutuu.