1. Faandi mbei u musu ta saka useei a Jehovah basu?

U MUSU ta saka useei * a Jehovah basu, u di hën mbei u. Di soni dë mbei a abi leti u piki u unfa u musu libi (Ako. 4:11). Ma wan woto soni di mbei u musu ta piki Jehovah buka, hën da u di hën da di möön bunu tiima. Sömëni sëmbë bi ta tii woto libisëmbë a di ten di pasa. Ma te u maaka di fasi fa dee sëmbë dë bi ta tii, ku di fasi fa Jehovah ta tii, nöö u ta si taa Jehovah köni, a lobi sëmbë, a abi tjalihati u sëmbë, söseei a ta fii ku sëmbë. Na wan woto tiima abi dee fasi aki kumafa Jehovah abi de.​—Ëki. 34:6; Lom. 16:27; 1 Joh. 4:8.

2. Faandi mbei u musu ta saka useei a Jehovah basu, te u luku Hebelejën 12:9-11?

² Jehovah kë taa u musu ta piki hën buka, u di u lobi ën, söseei u di u ta si ën kuma di lobihati Tata fuu, ma na u di u ta fëëë ën. Paulosu bi taki a di biifi di a bi manda da dee Hebelejën Keesitu sëmbë taa u musu ta ’saka useei möön gaanfa a di Tata basu’, u di hën ta seeka u „fuu ko dë bumbuu” sëmbë.​—Lesi Hebelejën 12:9-11.

3. (a) Unfa u ta lei taa u ta saka useei a Jehovah basu? (b) Un hakisi woo piki a di woto aki?

³ U ta lei taa u ta saka useei a Jehovah basu te u ta mbei hii möiti fuu ta piki hën buka a hii soni, söseei te u ta duwengi  useei fu wa taki da useei andi bunu ku andi hogi (Nöng. 3:5). An ta taanga da u sö fuu piki Jehovah buka te u ko sabi dee waiti fasi dee a abi. Faandi mbei u taki sö? Wë u di u ta si dee fasi fëën a hii dee soni dee a ta du (Ps. 145:9). Möön u ta lei soni u Jehovah, möön woo ko ta lobi ën. Nöö te u lobi Jehovah, wa o abi te a hia wëti fanöudu di ta piki u andi u musu du ku andi wa musu du. Woo ta mbei möiti fuu ko ta pakisei kumafa Jehovah ta pakisei, söseei woo ta mbei möiti fu wa du soni di an bunu (Ps. 97:10). Ma so juu a sa ta taanga da u fuu piki Jehovah buka. Faandi mbei a ta dë sö so juu? Nöö andi dee gaanwomi sa lei a Gaama Nehemia? Andi dee tata sa lei a Könu Dafiti? Söseei andi dee mama sa lei a Malia di mama u Jesosi? Dee hakisi aki woo piki a di woto aki.

4-5. Faandi mbei a sa ta taanga da u fuu saka useei a Jehovah basu, te u luku Loomë 7:21-23?

⁴ Wan soni di sa mbei a ta taanga da u fuu saka useei a Jehovah basu, hën da u di u dë zöndu libisëmbë. Fëën mbei na hii juu u ta kë piki Gadu buka. Baka di Adam ku Eva hopo fia ku Gadu, di de njan di pau njanjan di Gadu bi piki de taa de an musu njan, nöö di soni dë bi lei taa de bi bigi taki da deseei andi da bunu ku andi da hogi (Ken. 3:22). A di ten aki seei sömëni sëmbë an ta kë piki Gadu buka, nöö de ta kë taki da deseei andi da bunu ku andi da hogi.

⁵ Hii fa wa dë kuma dee sëmbë aki, u di u sabi Jehovah, söseei u di u lobi ën, tökuseei a sa ta taanga da u so juu fuu du soni kumafa Jehovah kë. So juu soni bi ta taanga da apösutu Paulosu tu. (Lesi Loomë 7:21-23.) U kë du soni di ta kai ku Jehovah kumafa Paulosu bi ta du ën. Hii juu u musu ta köni fu wa go du soni di an bunu.

6-7. Andi da wan woto soni di sa mbei a taanga da u fuu saka useei a Jehovah basu? Konda wan woto.

⁶ Wan woto soni di sa mbei a ta taanga da u fuu saka useei a Jehovah basu, hën da di fasi fa de kiija u. Sëmbë lo’ u piki u soni di an ta kai ku dee soni dee Jehovah ta lei u. Fëën mbei u musu ta köni fu wa ko ta pakisei kumafa dee lö sëmbë dë ta pakisei. Boo luku wan woto.

⁷ A di ten aki, sëmbë lo’ u da njönkuwan taanga u de du wan wooko ka de sa ta feni hia möni. De bi da wan sisa de kai Mary * taanga faa du di soni aki tu. Ufö a bi ko sabi soni u Jehovah, a bi nango a wan u dee möön bunu universiteit di dë a di köndë fëën. Dee famii u Mary bi ta duwengi ën faa suku wan wooko ka a bi sa feni hia möni, sö taa sëmbë bi sa ta lesipeki ën. Di soni aki bi kai ku ën tu. Ma di a ko sabi soni u Jehovah, hën a ko lobi Jehovah. Te u kaba fëën an bi kë du dee soni dee a bi buta taa a bi o du möön. Ma hii fa soni ko dë sö, tökuseei a ta taki taa: „So juu mi ta si peipei fasi fa mi sa mbei hia möni, ma mi sabi taa dee soni dë o tapa mi u mi dini Jehovah kumafa mi ta dini ën nöunöu. Di fasi fa de bi kiija mi, ta mbei a ta taanga da mi so juu u mi taki taa ma o tei wan wooko di de hakisi mi u mi du. Mi musu ta begi Jehovah faa heepi mi u ma tei wan wooko di sa mbei a taanga da mi u mi dini ën ku hii mi hati.”​—Mat. 6:24.

8. Andi woo luku nöunöu?

⁸ Useei ta feni wini te u ta saka useei a Jehovah basu. Ma te dee gaanwomi, dee mama ku dee tata, ku wotowan di abi taki a wotowan liba, ta saka deseei a Gadu basu, nöö woto sëmbë ta feni wini fëën. Boo luku wantu woto u Bëibel di ta lei u unfa wan sëmbë di abi taki a wotowan liba, sa du soni a wan fasi di ta mbei Jehovah wai ku ën.

9. Andi da wantu bookohedi di Nehemia bi abi?

⁹ Jehovah da dee gaanwomi di faantiwöutu u de ta luku dee sëmbë fëën (1 Pet. 5:2). Dee gaanwomi sa lei sömëni soni a di fasi fa Nehemia bi ta libi ku dee sëmbë u Jehovah. U di Nehemia bi dë wan gaama u Juda, mbei a bi abi makiti gaanfa (Neh. 1:11; 2:7, 8; 5:14). Boo luku wantu soni di bi sa da Nehemia bookohedi. Nehemia bi ko si taa dee sëmbë bi ta du soni di an fiti a di wosu u Gadu, söseei taa de an bi ta heepi dee Leifi sëmbë ku dee soni di de bi abi fanöudu, kumafa di Wëti u Jehovah bi ta taki. Dee Dju an bi ta hoi di Saba daka, söseei so u dee womi bi ta tööu ku woto köndë mujëë. Wë Gaama Nehemia bi musu seeka dee soni aki.​—Neh. 13:4-30.

10. Andi Nehemia bi du di a bi abi sömëni bookohedi?

¹⁰ Nehemia an bi wooko ku di makiti fëën u duwengi dee sëmbë u de du soni kumafa a kë. Ma a bi begi Jehovah hakisi ën faa heepi ën, söseei a bi heepi dee sëmbë u de ko sabi dee wëti u Jehovah (Neh. 1:4-10; 13:1-3). Nehemia bi ta wooko makandi tu ku dee sëmbë, u heepi de u de toona mbei dee peni u Jelusalen.​—Neh. 4:15.

11. Unfa dee gaanwomi musu ta libi ku sëmbë u di kemeente, te u luku 1 Tesalonika 2:7, 8?

¹¹ Kandë dee gaanwomi an abi dee seei bookohedi di Nehemia bi abi, ma de sa ta djeesi Nehemia a sömëni fasi. De sa ta wooko taanga u heepi dee baaa ku dee sisa u di kemeente. De an musu ta si kuma de hei möön wotowan u di de abi taki a wotowan liba. Ma de musu ta libi ku dee baaa ku dee sisa u de a wan lobihati fasi. (Lesi 1 Tesalonika 2:7, 8.) Te de abi sakafasi, söseei te de ta lei taa de lobi wotowan tuutuu, nöö de o ta fan ku de a wan suti fasi. Wan baaa de kai Andrew, di dë gaanwomi sömëni jaa longi kaa, bi taki taa: „Mi ta si taa te wan gaanwomi ta libi bunu ku dee baaa ku dee sisa, ta fan suti ku de, nöö de ta möön fii bunu. Te dee gaanwomi ta du sö, nöö di soni dë ta heepi dee baaa ku dee sisa u di kemeente  u de wooko makandi ku de.” Wan woto baaa de kai Tony, di dë gaanwomi sömëni jaa kaa, bi taki tu taa: „Hii juu mi ta mbei möiti u du di soni di sikifi a Filipi 2:3. Mi ta mbei möiti u mi ta si wotowan hei möön mi. Di soni aki ta heepi mi u ma pëë basi da wotowan.”

12. Faandi mbei dee gaanwomi musu abi sakafasi?

¹² Dee gaanwomi musu abi sakafasi, leti kumafa Jehovah abi sakafasi. Hii fa Jehovah da di Möön Hei Tiima u mundu, tökuseei a ta „saka ko” heepi dee „mofina sëmbë” dee dë a goon aki (Ps. 18:35; 113:6, 7). Jehovah ta buuse sëmbë di abi gaanfasi.​—Nöng. 16:5.

13. Faandi mbei wan gaanwomi musu ta köni ku dee soni dee a ta taki?

¹³ Wan fasi fa wan gaanwomi sa lei taa a ta saka hënseei a Jehovah basu, hën da te a ta köni ku dee soni dee a ta taki. Ee an du sö, nöö a sa pasa taa a taki wan soni di an fiti, te wotowan an lesipeki ën (Jak. 1:26; Gal. 5:14, 15). Andrew, di u bi taki soni fëën a fesi kaa, bi taki taa: „So juu mi bi ta fii kuma wan baaa nasö wan sisa an lesipeki mi, nöö mi bi ta kë fan goofu ku ën. Ma mi bi pakisei fundu u womi sëmbë di di Bëibel ta taki u de taa de bi dë sëmbë di bi ta hoi deseei a Gadu, nöö di soni dë bi heepi mi u mi ko fusutan faandi mbei mi musu ko abi sakafasi ku saapifasi.” Dee gaanwomi ta lei taa de ta saka deseei a Jehovah basu, te de ta fan ku dee baaa ku dee sisa a wan suti fasi, söseei te de ta fan ku dee woto gaanwomi a wan suti fasi tu.​—Kol. 4:6.

14. Un faantiwöutu Jehovah da dee tata, nöö unfa a kë u de tja di faantiwöutu dë?

¹⁴ Jehovah buta dee tata kuma hedima u di wosudendu u de, nöö a kë u de ta lei dee mii u de soni, söseei a kë u de ta leti de mii u de buta a pasi te de du wan soni di an bunu (1 Kol. 11:3; Ef. 6:4). Di soni aki an kë taki taa dee tata sa du andi de kë ku dee mii u de. Jehovah hën seti di wosudendu libi. Fëën mbei Jehovah o hakisi dee tata faantiwöutu u di fasi fa de bi libi ku dee sëmbë u de (Ef. 3:14, 15). Dee tata ta lei taa de ta saka deseei a Jehovah basu, te de ta tja di faantiwöutu di Jehovah da de a wan fasi di a feni bunu. De sa lei te a hia soni te de ta lei soni u Könu Dafiti.

15. Faandi mbei u sa taki taa Könu Dafiti da wan sëmbë di dee tata sa lei soni nëën?

¹⁵ Jehovah bi buta Dafiti kuma hedima u di wosudendu fëën, ma a bi butëën kuma hedima u Isaëli tu. U di Dafiti bi dë könu, mbei a bi abi makiti seei. Na hii juu a bi wooko ku di makiti fëën a wan bunu fasi, nöö di soni dë bi mbei a mbei gaan föutu (2 Sam. 11:14, 15). Ma tökuseei a bi lei taa a ta saka hënseei a Jehovah basu. Na un fasi? Wë a bi ta haika te  Jehovah bi bai ën a soni. Te a bi ta begi Jehovah, nöö a bi ta piki ën unfa a bi ta fii. Nöö a bi ta mbei taanga möiti faa du dee soni dee Jehovah bi ta piki ën faa du (Ps. 51:1-4). Boiti di dë, a bi abi sakafasi, nöö a bi ta haika te wan womi nasö wan mujëë bi dëën lai (1 Sam. 19:11, 12; 25:32, 33). Dafiti bi tei köni a dee soni dee bi miti ën, nöö a bi buta hii hën pakisei a di dini di a bi musu ta dini Jehovah.

16. Andi dee tata sa lei a Dafiti?

¹⁶ Boo luku wantu soni di dee tata sa lei a Könu Dafiti. Wë de ta lei taa de an musu wooko ku di faantiwöutu di Jehovah da de, a wan föutu fasi. Te de mbei föutu, nöö de musu ta tei taa de mbei föutu, söseei de musu ta haika te wotowan da de lai u Bëibel. Te de ta du sö, nöö dee sëmbë u de wosudendu o ta lesipeki de, u di de o si taa de abi sakafasi. Te de ta begi ku dee sëmbë u de wosudendu, nöö de musu ta konda da Jehovah unfa de ta fii, nöö dee sëmbë u de o jei unfa de kë u Jehovah heepi de tjika. Ma di fanöudu soni, hën da de musu buta di dini di de ta dini Jehovah a di fosu kamian a de libi (Deto. 6:6-9). Di fasi fa i ta tja iseei, da di möön bunu fasi fa i sa heepi dee sëmbë fii wosudendu.

17. Un faantiwöutu Jehovah da dee mama?

¹⁷ Jehovah da dee mama wan gaan faantiwöutu a di wosudendu tu, söseei a da dee mama taki a dee mii u de liba tu (Nöng. 6:20). Wan mii an ta fëëkëtë dee soni di hën mama bi taki dëën di a bi dë miii, söseei an ta fëëkëtë di fasi fa hën mama bi ta du soni (Nöng. 22:6). Boo luku andi dee mama sa lei a Malia, di mama u Jesosi.

18-19. Andi dee mama sa lei a Malia?

¹⁸ Malia bi sabi di Wöutu u Gadu bumbuu. A bi ta lesipeki Jehovah gaanfa, nöö hën ku Jehovah bi dë gaan mati. A bi dë kabakaba u saka hënseei a Jehovah basu, aluwasi a bi dë taa hii hën libi bi o tooka.​—Luk. 1:35-38, 46-55.

¹⁹ Un dee mama, un sa djeesi Malia a sömëni fasi. Na un fasi sö? Wan fasi fa un sa djeesi ën, hën da te un ta lei soni u Bëibel, ku te un ta begi sö taa unu ku Jehovah sa dë mati go dou. Wan woto fasi fa un sa djeesi Malia, hën da te un dë kabakaba u tooka soni a unu libi u libi fuunu sa kai ku Jehovah. Kandë unu mama ku unu tata hati bi ta boonu hesi, nöö de bi ta fan goofu ku unu. Nöö a kan taa di soni dë mbei un ko ta si kuma an föutu ee un ta du di wan seei soni ku dee mii fuunu. Hii fa unu sabi dee wëti u Jehovah kaa, tökuseei a sa ta taanga da unu jeti fuun hoi unuseei te dee mii fuunu mbei hati fuunu boonu. A sa ta taanga da unu tu fuun abi pasensi ku de, möönmöön  te sinkii fuunu wei (Ef. 4:31). Te a dë sö, nöö un musu begi Jehovah faa heepi unu. Wan mujëë de kai Lydia, bi taki taa: „So juu mi bi musu ta begi fajafaja u ma fan ku hatiboonu, te di womi mii u mi an bi piki mi buka. So juu mi bi ta seti u taki wan soni, nöö bakaten mi bi ta dë piii, nöö mi begi Jehovah faa heepi mi. Te mi ta begi, nöö a ta heepi mi u mi duwengi miseei.”​—Ps. 37:5.

20. Un soni ta taanga da so mama, nöö andi sa heepi de?

²⁰ Wan woto soni di sa ta taanga da so mama, hën da te de musu lei dee mii u de taa de lobi de (Tit. 2:3, 4). De kiija sömëni u dee mama aki a wan wosudendu ka de mama ku de tata an bi ta lei de taa de lobi de. Aluwasi ee sö de kiija i, tökuseei ja musu u kiija dee mii fii a di lö fasi dë tu. A sa kan taa wan mama di ta saka hënseei a Jehovah basu, musu ko sabi unfa a musu lei dee mii fëën taa a lobi de. Kandë a sa ta taanga dëën faa tooka di fasi fa a ta si soni, di fasi fa a ta fii, ku di fasi fa a ta du soni. Ma a sa tooka. Te a du sö, nöö hën ku dee sëmbë fëën wosudendu tuu o feni wini fëën.

21-22. Un wini u ta feni te u ta saka useei a Jehovah basu, te u luku Jesaaja 65:13, 14?

²¹ Könu Dafiti bi sabi un wini a ta tja ko te i ta saka iseei a Jehovah basu. A bi taki taa: „Dee soni di Jehovah ta piki u, da bunu soni. De ta mbei hati fuu ta piizii. Dee wëti u Jehovah bunu. De ta mbei di wojo belenki. De ta bai di futuboi fii seei puu a soni tu. Te a ta hoi hënseei a de, nöö a o feni gaan bunu seei” (Ps. 19:8, 11). A di ten aki u ta si gbelingbelin ambë ta saka hënseei a Jehovah basu, ku ambë an ta saka hënseei nëën basu. Dee sëmbë dee ta saka deseei a Jehovah basu „ta piizii u di hati u de dë bunu”.​—Lesi Jesaaja 65:13, 14.

²² Te dee gaanwomi, dee tata ku dee mama, ta saka deseei a Jehovah basu, nöö libi u de ta waka möön bunu, dee sëmbë u de wosudendu ta möön dë waiwai, söseei dee baaa ku dee sisa u di kemeente ta möön libi makandi ku deseei. Ma di möön fanöudu soni, hën da de o ta mbei Jehovah ta wai ku de (Nöng. 27:11). Soni an dë di sa da u piizii möön di soni aki!