1. Na un ten a sa taanga da u fuu dini Jehovah?

NA UN ten i ta si kuma a sa möön taanga u dini Jehovah? Te i abi sömëni bookohedi ö, naa te ja abi hia bookohedi? Te u abi bookohedi, nöö hesihesi seei u ta buta futoou a Jehovah. Ma andi u ta du te soni ta waka bunu a u libi? U ta fëëkëtë unfa a dë fanöudu tjika fuu dini Gadu ö? Wë Jehovah bi piki dee Isaëli sëmbë taa di soni aki bi o sa miti de.​—Deto. 6:10-12.

2. Unfa Könu Asa bi du soni?

² Könu Asa da wan sëmbë di u sa waka nëën baka. A bi du soni ku köni, u di a bi buta hii hën futoou a Jehovah. Na te soni an bi nango bunu dëën nöö a bi ta dini Jehovah, ma a bi ta dini Jehovah te soni bi nango bunu dëën tu. Sensi di Asa njönku, hën a ta „dini Jehovah ku hii hën hati” (1 Kön. 15:14). Asa bi lei taa a bi ta dini Jehovah ku hii hën hati, di a bi puu dee poipoi biibi a Juda. Di Bëibel ta taki taa „a puu dee begitafa ka sëmbë bi nango ta dini dee gadu u dee woto köndë sëmbë. Boiti di dë, a booko dee heihei kamian ka sëmbë bi ta dini poipoi gadu puu. A booko dee santa posu puu, hën a koti dee santa posu tuwë” (2 Klon. 14:3, 5). Ma na di dë nöö, Asa bi puu hën avo Maaka, fu an dë wan heihei mujëë a di könuköndë möön. Faandi mbei? Wë u di a bi ta da sëmbë taanga u de dini wan poipoi gadu.​—1 Kön. 15:11-13.

3. Andi ku andi woo luku a di woto aki?

³ Na puu nöö Asa bi puu poipoi biibi a Juda. A bi heepi dee sëmbë u Juda u de ko ta dini Jehovah baka. Jehovah bi mbei Asa ku dee sëmbë u Juda feni gaan bunu. A bi mbei feti an dë a di  köndë u de. * Di Asa bi ta tii, nöö teni jaa longi „feti an bi dë a di köndë” (2 Klon. 14:1, 4, 6). A di woto aki, woo luku unfa Asa bi wooko ku di ten fëën a di pisiten di feti an bi dë a di köndë. Baka di dë, nöö woo taki u dee fesiten Keesitu sëmbë. Deseei bi du soni kuma Asa. De bi wooko ku di ten u de a wan bunu fasi, a wan pisiten ka de bi sa dini Gadu fiifii. Te u kaba fëën, nöö woo piki di hakisi aki: Ee i ta libi a wan köndë ka lanti ta da dee Jehovah Kotoigi pasi u de dini Gadu fiifii, nöö unfa i sa wooko ku di ten fii a wan bunu fasi a di pisiten dë?

4. Unfa Asa bi du soni a wan pisiten ka feti an bi dë, te u luku 2 Kloniki 14:2, 6, 7?

⁴ Lesi 2 Kloniki 14:2, 6, 7. Asa bi piki dee sëmbë taa Jehovah hën bi „mbei hii soni waka bunu da [de]”. Asa an bi ta si kuma u di soni bi ta waka bunu, mbei de bi musu tei di ten dë ta piizii u di libi nöö a kaba. Ma a bi bigi mbei foto, peni, hei wakitima wosu, ku gaandöö. A bi piki dee sëmbë u Juda taa: „U abi di köndë.” Andi Asa bi kë taki? A bi kë taki taa felantima an bi dë a di köndë di bi o sa tapa de u de waka fiifii, söseei di bi o sa tapa de u de mbei soni a di köndë. A bi da dee sëmbë taanga u de wooko ku di ten dë a wan bunu fasi.

5. Faandi mbei Asa bi heepi dee sodati fëën u de ko möön taanga?

⁵ Asa bi tei di pisiten ka feti an bi dë, u heepi dee sodati fëën tu u de ko möön taanga (2 Klon. 14:8). Di soni dë kë taki taa an bi ta futoou Jehovah u? Wë nönö. Asa bi sabi taa u di hën bi dë di könu, mbei a bi musu seeka dee sëmbë da dee soni dee bi o sa miti de bakaten. Asa bi sabi taa soni an bi o dë sö a Juda u nöömö, nöö soni an bi dë sö u nöömö tu.

6. Unfa dee fesiten Keesitu sëmbë bi du soni, a wan pisiten di sëmbë an bi ta tapa de u de dini Gadu?

⁶ Hii fa sëmbë bi lo’ u du ku dee fesiten Keesitu sëmbë, tökuseei so juu de bi ta abi ten ka de bi ta feni pasi u de dini Gadu fiifii tu. Andi de bi ta du a dee ten dë? Wë dee womi ku dee mujëë dë bi ta paaja di bunu buka fajafaja. Di buku Tjabukama ta taki taa de bi ta „libi a pasi seei ta lesipeki Masa Gadu”. De bi ta paaja di bunu buka nango nöömö, hën te u kaba fëën, hën „sömëni oto sëmbë [bi] ta ko ta nama ku de nöömö”. U ta si gbelingbelin taa Jehovah bi ta mbei soni waka bunu da de, te de bi ta peleiki fajafaja a dee pisiten ka sëmbë an bi ta tapa de u de dini ën.​—Tjab. 9:26-31.

7-8. Andi Paulosu ku wanlö woto Keesitu sëmbë bi du di de feni di okasi?

⁷ Dee fesiten Keesitu sëmbë bi ta tei hii okasi di de bi feni u de paaja di bunu buka. Di apösutu Paulosu bi ko si taa a bi sa peleiki da sömëni sëmbë a di foto Efeise, hën a bi fika a di foto dë, hën a du di peleikiwooko.​—1 Kol. 16:8, 9.

⁸ Paulosu ku wanlö woto Keesitu sëmbë bi feni pasi u de peleiki da sömëni sëmbë tu, a di jaa 49. A di ten dë, dee apösutu ku dee gaanwomi dee bi dë a Jelusalen bi luku ee dee Keesitu sëmbë dee an bi dë Dju, bi musu koti di maaka u dee Dju (Tjab. 15:23-29). Baka di Paulosu ku wanlö woto Keesitu sëmbë bi piki dee kemeente andi dee apösutu ku dee gaanwomi dee bi dë a Jelusalen bi taki, hën hii de tuu bi mbei gaan möiti „ta konda di buka nöömö” (Tjab. 15:30-35). Andi bi ko pasa? Di Bëibel ta taki taa „de [bi] ta kisi kaakiti nango fesi seei a di biibi, nöö hiniwan daka möön hia sëmbë [bi] ta piki di buka ta ko ta nama ku de”.​—Tjab. 16:4, 5.

9. Unfa soni dë a sömëni köndë a di ten aki, nöö andi u sa hakisi useei?

⁹ A di ten aki, u sa peleiki a sömëni köndë söndö u sëmbë tapa u. I ta libi a wan u dee köndë aki ö? Wë ee sö a dë, nöö hakisi iseei taa: ’Unfa mi ta wooko ku di okasi di mi abi aki?’ U ta libi a dee lasiti u di goonliba aki, nöö di pisiten aki dë wan apaiti pisiten da u seei. U ta peleiki, ta lei sëmbë soni u Bëibel a wan fasi fa sëmbë an bi du ën a goonliba wan daka (Maik. 13:10). Sömëni soni dë di u sa du a di wooko aki!

10. Andi 2 Timoteo 4:2 ta da u taanga fuu du?

¹⁰ Andi ku andi i sa ta du, ee u abi di okasi u dini Gadu söndö u sëmbë tapa u? (Lesi 2 Timoteo 4:2.) Wë i sa wegi luku ee ju nasö wan sëmbë fii wosudendu sa seti soni u peleiki möön gaanfa, nasö u du di pioniliwooko. Wa musu suku fuu ko gudu a di ten aki, biga dee soni dee u abi an o pasa di gaan fuka ku u.​—Nöng. 11:4; Mat. 6:31-33; 1 Joh. 2:15-17.

11. Andi so sëmbë bi du, u de sa ta paaja di bunu buka da möön hia sëmbë?

¹¹ Sömëni peleikima bi lei wan woto töngö, u de sa ta peleiki, ta lei sëmbë soni u Jehovah. Di ölganisaasi u Jehovah ta tja sömëni soni ko a döö, u heepi u fuu sa ta peleiki a möön hia töngö. A di jaa 2010, dee buku fuu bi dë a söwan 500 töngö. Nöunöu, dee buku fuu dë a möön leki 1000 töngö!

12. Konda wan woto u lei un wini sëmbë ta feni, te de jei di bosikopu u di Könuköndë a de mamabëë töngö.

¹² Unfa sëmbë ta fii te de jei soni u Jehovah a de mamabëë töngö? Boo luku di woto u wan sisa, di bi feni wini u wan könklësi di de bi hoi nëën mamabëë töngö a di foto Memphis, a Tennessee, na Amëëkanköndë. De bi hoi di könklësi aki a Kinyarwanda töngö. Di töngö aki da di töngö di sëmbë ta möön fan a di köndë  Luwanda, a di köndë Kongo (Kinsjasa), söseei a di köndë Uganda. Di di könklësi kaba, hën di sisa bi taki taa: „17 jaa kaa mi foloisi ko ta dë na Amëëkanköndë. Ma disi da di fosu pasi di mi fusutan hii dee soni di de taki a wan könklësi.” Wë a dë gbelingbelin u si taa di sisa aki bi feni wini tuutuu, di a jei dee soni u di könklësi nëën mamabëë töngö. Wë ee libi fii ta da i pasi, nöö kandë i sa lei wan woto töngö fii sa heepi so sëmbë a di pisiwata ka i ta libi. Wë kandë i bi o kë du di soni aki seei, u di so sëmbë dë a di pisiwata ka di kemeente fii ta peleiki, di ta fusutan wan woto töngö möön bunu. Joo dë ku piizii tuutuu ee i mbei di möiti dë.

13. Unfa dee baaa ku dee sisa fuu u Losiaköndë bi du soni, di de bi abi okasi u dini Jehovah fiifii?

¹³ Na hii dee baaa ku dee sisa fuu ta feni pasi u de sa ta peleiki kumafa de kë. A so köndë, dee baaa ku dee sisa fuu an sa ta peleiki fiifii, u di lanti tapa di wooko fuu. Buta pakisei a dee baaa ku dee sisa fuu u Losiaköndë. Sëmbë bi du ku de sömëni jaa longi. Ma a gaanliba u di jaa 1991, hën lanti bi da de pasi u de sa ta peleiki fiifii. A di ten dë, söwan 16.000 peleikima bi dë a Losiaköndë. Tuwenti jaa baka di dë, hën de bi ko dë 160.000 peleikima! Wë u ta si gbelingbelin taa dee baaa ku dee sisa fuu bi du soni a wan bunu fasi, di de bi abi di okasi u du di peleikiwooko fiifii. Nöunöu de an sa ta dini Jehovah fiifii möön. Ma hii fa a dë sö, tökuseei de dë fajafaja u wooko da Jehovah jeti. De ta du hii soni di de sa du, u de dini Jehovah go dou.

14-15. Unfa Jehovah bi wooko ku di kaakiti fëën u heepi Asa?

¹⁴ A di ten di pasa, Asa ku dee woto sëmbë an bi feni di okasi u de dini Jehovah fiifii u nöömö. Wan gaan kulupu sodati bi kumutu a  di köndë Etiopia ta ko a de. De bi pasa wan milion sëmbë. Di hedima u dee sodati dë de bi ta kai Zelaki, nöö Zelaki bi dë seiki taa dee sodati fëën bi o sa feti wini Juda. Könu Asa an bi luku ee dee sodati fëën bi hia nasö ee de an bi hia, ma a bi buta futoou a Jehovah di Gadu fëën. Asa bi begi Jehovah, hën a hakisi ën taa: „Jehovah, ju di Gadu fuu, mi ta begi i, heepi u baa. Biga a ju wë u buta futoou, a i në u hopo ko feti ku di gaan kulupu sodati aki.”​—2 Klon. 14:11.

¹⁵ Dee sodati u Etiopia bi hia bëina tu toon möön dee sodati u Asa. Ma Asa bi sabi taa Jehovah taanga, söseei a bi sabi taa Jehovah bi o heepi dee sëmbë fëën. Nöö Jehovah an bi dëën sen. Dee sodati u Etiopia bi lasi di feti.​—2 Klon. 14:8-13.

16. Unfa u du sabi taa di dini di dee dinima u Jehovah ta dini ën fiifii a di ten aki an o dë u nöömö?

¹⁶ Wa sabi finifini andi o pasa ku hiniwan fuu a di ten di ta ko. Ma u sabi taa di dini di dee dinima u Jehovah ta dini ën fiifii a di ten aki an o dë u nöömö. Hoi a pakisei taa Jesosi bi taki taa a dee lasiti daka, „hii sëmbë [bi] o ta buuse” dee bakama fëën (Mat. 24:9). Apösutu Paulosu seei bi taki taa „ee wan sëmbë i kë libi gbelingbelin kumafa Gadu kë, fii ta waka a Jesosi Keesitu baka, nöö i musu u feni sitaafu a libisëmbë maun nöömö” (2 Tim. 3:12). Saatan dë ku „taanga hatiboonu”. Fëën mbei ee u bi o ko ta si kuma u sa koti pasi dëën fu an feni u du, nöö a bi o dë taa u ta ganjan useei.​—Ako. 12:12.

17. Un tesi sa miti u?

¹⁷ Abiti möön tesi o miti u di sa mbei a taanga da u fuu hoi useei a Jehovah. An o tei longi möön, nöö wan ’gaan fuka di an bi ko pasa wan daka eti’, o dë a hii di goonliba (Mat. 24:21). A di ten dë, dee famii fuu sa bia ko ta du ku u, söseei sëmbë sa tapa di wooko fuu (Mat. 10:35, 36). Ma hiniwan fuu o buta futoou a Jehovah taa a o heepi u, söseei taa a o tjubi u, kumafa Asa bi du ën u?

18. Te u luku andi Hebelejën 10:38, 39 ta taki, nöö andi o heepi u fuu sa dë seekaseeka da di pisiten ka wa o sa dini Gadu fiifii möön?

¹⁸ Jehovah ta seeka u nöunöu fuu sa abi wan taanga biibi. A ta seeka u da dee soni dee o pasa a di ten di ta ko. A ta tei „di köni saafu di dë u futoou” u da u „njanjan a di soifi ten”, sö  taa u sa abi hii dee soni dee u abi fanöudu fuu sa hoi dou, a di dini di u ta dini ën (Mat. 24:45, NW). Ma hiniwan fuu musu mbei taanga möiti, fuu sa ko abi wan taanga biibi a Jehovah.​—Lesi Hebelejën 10:38, 39.

19-20. Andi ku andi u musu hakisi useei baka te u lesi 1 Kloniki 28:9, nöö faandi mbei u musu hakisi useei dee soni dë?

¹⁹ U musu ta suku Jehovah kumafa Könu Asa bi ta du ën (2 Klon. 14:4; 15:1, 2). U ta bigi suku Jehovah te u lei soni fëën, nöö u tei dopu. U ta tei hii okasi di u feni u mbei di lobi di u abi da Jehovah ko möön taanga. Fëën mbei u sa hakisi useei di soni aki: ’Mi nango hii juu a dee komakandi ö?’ Te u nango a dee komakandi di di ölganisaasi u Jehovah ta seeka da u, nöö u ta feni kaakiti fuu dini Jehovah go dou, söseei u ta feni taanga a dee baaa ku dee sisa fuu (Mat. 11:28). U sa hakisi useei tu taa: ’Mi ta lei soni u Bëibel hii juu ö?’ Ee u ta dë ku dee sëmbë fuu a wan wosu, nöö u musu hakisi useei taa: ’U ta buta ten hiniwan wiki fuu sa ta hoi di Wosudendu Dini ö?’ Nasö ee u ta dë u wanwan, nöö u sa hakisi useei taa: ’Mi ta seeka soni go dou u mi sa ta lei soni u Bëibel, leti kumafa mi bi o du ën ee mi bi ta dë ku dee sëmbë u mi a wan wosu ö?’ Söseei u sa hakisi useei taa: ’Mi ta mbei hii möiti di mi sa, u mi sa ta peleiki, ta lei sëmbë soni u Bëibel ö?’

²⁰ Faandi mbei u musu hakisi useei dee soni aki? Wë di Bëibel ta piki u taa Jehovah ta öndösuku dee soni dee u ta pakisei ku dee soni dee dë a u hati. Fëën mbei useei musu ta du di seei soni tu. (Lesi 1 Kloniki 28:9.) Ee u ko si taa u musu tooka dee maaka dee u buta da useei, di fasi fa u ta tja useei, nasö di fasi fa u ta pakisei, nöö u musu hakisi Jehovah faa heepi u fuu sa tooka dee soni dë. A di ten aki u musu seeka useei da dee tesi dee o miti u a di ten di ta ko. Na mbei na wan soni tapa i fii du soni a wan bunu fasi, a di pisiten di i abi u dini Jehovah fiifii!