1-2. Unfa Peleikima 11:6 nama ku di paaja di u musu ta paaja di bunu buka u di Könuköndë?

A SO köndë, sëmbë ta kë ko sabi möön soni te de jei di bunu buka. A ta dë kuma di soni dë seei de ta wakiti! A wotowan, sëmbë an ta kë ko sabi soni u Gadu ku di Bëibel wan bëtë. Unfa dee sëmbë u di pisiwata ka i ta dë, lo’ u du te de jei di bunu buka? Wë aluwasi de ta haika nasö de an ta haika, Jehovah kë taa u musu ta peleiki go dou u te a taki taa di wooko kaba.

² Te di juu di Jehovah buta dou, nöö wa o peleiki möön. Baka di dë, nöö „di ten u dë aki o kaba” (Mat. 24:14, 36). Ma di ten dë an dou jeti. Wë nöö unfa u sa du di soni di di Bëibel bi taki, di a bi taki taa „na mbei maun fii böö”? *​—Lesi Peleikima 11:6.

3. Andi ku andi woo taki a di woto aki?

³ A di woto ufö disi, u bi taki u fö soni di u musu du fuu sa ko möön sa’ u „kisi libisëmbë” tja ko a Gadu, nasö fuu ko sa’ u du di peleikiwooko möön bunu (Mat. 4:19). Di woto aki o taki u dii soni di sa heepi u fuu sa ko möön dë kabakaba u du di peleikiwooko, aluwasi unfa soni dë da u. Woo si faandi mbei a dë fanöudu fuu ta buta di peleikiwooko a di fosu kamian a u libi, faandi mbei a dë fanöudu fuu abi pasensi, söseei faandi mbei a dë fanöudu fuu ta mbei möiti u di biibi fuu an ko suwaki.

4. Faandi mbei u musu buta hii u pakisei a di wooko di Jehovah da u fuu du?

⁴ Jesosi bi taki unfa soni bi o dë a dee lasiti daka u di goonliba  aki. A bi sabi taa dee soni aki bi o sa puu dee bakama fëën pakisei a di peleiki di de musu ta peleiki. Jesosi bi piki dee bakama fëën taa de musu „ta dë setiseti ta mëni ën” (Mat. 24:42). A di ten u Noa, sömëni soni bi dë di bi puu sëmbë pakisei a di bosikopu di a bi ta paaja. Dee seei soni dë sa puu u pakisei a di ten aki tu (Mat. 24:37-39; 2 Pet. 2:5). Fëën mbei u kë buta hii u pakisei a di wooko di Jehovah da u fuu du.

5. Unfa Tjabukama 1:6-8 ta lei u te naasë di bunu buka bi o paaja dou?

⁵ A di ten aki, a dë fanöudu seei fuu ta buta hii u pakisei a di paaja di u musu ta paaja di bunu buka u di Könuköndë. Jesosi bi taki taa dee bakama fëën bi o du di wooko aki go dou te a dëdë, söseei taa de bi o du ën möön fa hënseei bi du ën (Joh. 14:12). Baka di Jesosi dëdë, hën so u dee bakama fëën bi go ta kisi fisi baka. Di Jesosi weki ko a libi baka, hën a bi du wan foombo soni u mbei so u dee bakama fëën kisi gaan hia fisi. A bi tei di okasi dë u lei de taa di kisi di de bi musu kisi libisëmbë tja ko a Gadu, bi dë fanöudu möön hiniwan woto wooko (Joh. 21:15-17). Ufö Jesosi toona go a liba ala, a bi piki dee bakama fëën taa di peleikiwooko di a bi bigi a Isaëli, bi o dou te a dee woto köndë u goonliba tu. (Lesi Tjabukama 1:6-8.) Sömëni jaa baka di dë, hën Jesosi bi mbei apösutu Johanisi si wan wojolimbo sunjan, u lei ën andi bi o pasa „a di daka u Masa”. * Wan u dee soni di Johanisi bi si, bi dë wan ëngëli di bi „abi wan bunu buka di dë u teego”. Di ëngëli dë bi musu konda di bunu buka dë da „sëmbë u hii pei köndë, ku hii pei lö, ku hii pei töngö, ku hii pei nasiön” (Ako. 1:10; 14:6, NW). U sa taki gbelin taa di soni di Jehovah kë taa u musu du a di ten aki, hën da fuu ta du di peleikiwooko di ta du a hii së u goonliba, u te di wooko kaba.

6. Andi u sa du u pakisei fuu sa ta dë hii juu a di peleikiwooko?

 ⁶ Pakisei fuu o ta dë hii juu a di peleikiwooko ee u ta pakisei unfa Jehovah ta heepi u tjika. A ta da u sömëni soni u mbei di biibi fuu ko möön taanga. A ta da u buku a pampia, söseei fuu sa hai tei buta a tëlëfön. A ta da u soni u haika, ku peipei fëlön. Pakisei di soni aki luku: U abi soni a möön leki 1000 töngö a di website fuu! (Mat. 24:45-47) U ta libi a wan goonliba ka sëmbë ta paati ku deseei, u di de dë a tookatooka politiki paatëi, u di de dë a tookatooka keiki, söseei u di so u de gudu nöö wotowan pooti. Ma Gadu abi möön leki aiti milion dinima a goonliba aki, di ta libi tuutuu kuma wan famii. A feeda 19 u piki-deewei-liba u di jaa 2019, dee Jehovah Kotoigi bi lei taa de dë wan famii tuutuu, u di hii de tuu bi luku wan fëlön di ta taki soni u di daka wöutu u di daka dë. A di ndeti dë, 20.919.041 sëmbë bi ko makandi, hën de mëni di dëdë u Jesosi. Te u ta pakisei di gaandi di u abi u du di peleikiwooko, nöö a ta da u taanga fuu du di wooko aki go dou.

7. Unfa di fasi fa Jesosi bi du soni, sa heepi u fuu ta buta di peleikiwooko a di fosu kamian a u libi?

⁷ Wan woto soni di sa heepi u fuu ta buta di peleikiwooko a di fosu kamian a u libi, hën da te u ta djeesi Jesosi a di fasi fa a bi du soni. An bi mbei na wan soni tapëën faa du di peleikiwooko (Joh. 18:37). An bi kë „dee waiti soni nëbai wan u goonliba”, ku dee könuköndë dee Saatan bi kë dëën (Mat. 4:8, 9; Joh. 6:15). An bi kë ko gudu, söseei an bi ta fëëë taa sëmbë bi o du ku ën (Luk. 9:58; Joh. 8:59). Te tesi ta miti u, nöö woo sa buta di peleikiwooko a di fosu kamian a u libi, te u mëni di soni di apösutu Paulosu bi taki. A bi piki dee woto Keesitu sëmbë u de ta djeesi Jesosi a di fasi fa a bi ta du soni, nöö a sö wan fasi de an bi o ko wei, söseei de an bi o „lasi hati”!

8. Andi da pasensi, nöö faandi mbei a dë fanöudu seei fuu abi ën a di ten aki?

⁸ Pasensi da te wan sëmbë sa’ u dë piii ta wakiti u wan soni musu tooka. A dë fanöudu fuu abi pasensi te u kë kumutu a wan fuka di u dë nëën, nasö te u kë taa wan soni di u bi kë gaanduwe kaa musu pasa. Di tjabukama u Gadu de kai Habaki bi kë seei u hogilibi kaba a Juda (Hab. 1:2). Dee bakama u Jesosi bi ta mëni taa di Könuköndë u Gadu bi o ko ’wantewante dë’, nöö a bi o puu de a di tii u Loomë basu (Luk. 19:11). U kë seei u di daka dou ka di Könuköndë u Gadu o puu hogilibi a goonliba, nöö a seti di njunjun goonliba ka hii sëmbë o ta libi a wan leti fasi (2 Pet. 3:13). Ma tökuseei u musu wakiti ku pasensi u di ten dou, di Jehovah buta taa a o du di soni dë. Boo taki u wantu fasi fa Jehovah ta heepi u fuu ko abi pasensi.

9. Andi ta lei taa Jehovah abi pasensi?

⁹ A Jehovah u ta möön si unfa u sa du soni ku pasensi. Jehovah bi da Noa ten tjika faa bi sa mbei di gaan boto, söseei faa bi sa „konda da dee sëmbë u di ten dë fa u de musu libi bunu a Gadu wojo” (2 Pet. 2:5; 1 Pet. 3:20). Di Abahamu bi jei taa Jehovah bi o booko di foto Sodom ku di foto Gomola, hën a bi hakisi Jehovah sömëni soni di nama ku di booko di a bi kë booko dee foto dë. Ma Jehovah bi haikëën (Ken. 18:20-33). Höndöhöndö jaa longi Jehovah bi puu ta hoi pasensi ku dee Isaëli sëmbë, hii fa de an bi ta hoi deseei nëën (Neh. 9:30, 31). U ta si taa Jehovah abi pasensi a di ten aki tu, u di a ta da hii dee sëmbë dee a ta hai ko nëën di okasi u de sa „bia de libi ko nëën” (2 Pet. 3:9; Joh. 6:44; 1 Tim. 2:3, 4). Di fasi fa Jehovah ta du soni, ta da u taanga fuu ta lei taa u abi pasensi, fa u ta peleiki, ta lei sëmbë soni u Bëibel aki. A ta heepi u fuu ko  abi pasensi tu ku wan woto di dë a di Wöutu fëën.

10. Andi u ta lei a di woto u di sëmbë di ta paandi goon, di sikifi a Jakobosi 5:7, 8?

¹⁰ Lesi Jakobosi 5:7, 8. Di woto u di sëmbë di ta paandi goon, ta lei u unfa u sa lei taa u abi pasensi. A dë sö tuu taa so soni ta göö hesi. Ma gaansë u dee soni dee ta nasi an ta göö hesi, möönmöön dee soni dee ta pai njanjan. Dee soni aki ta tei möön ten u de göö, söseei u de pai njanjan ko lepi, u sëmbë sa koti. A di köndë Isaëli, dee sëmbë bi ta wakiti sikisi liba longi u dee soni u de lepi. Sëmbë bi ta paandi soni kuma alisi a tinimu-liba, nöö de bi ta koti de a piki-deewei-liba (Maik. 4:28). Boo djeesi di sëmbë di ta paandi goon a di pasensi di a abi, hii fa di soni aki sa taanga u du.

11. Unfa pasensi sa heepi u a di peleikiwooko?

¹¹ Zöndu libisëmbë ta kë taa te de mbei möiti, nöö de musu si wini fëën wantewante dë. Ma ee u kë u di goon fuu musu ko abi njanjan, nöö u musu ta luku ën hii juu. U musu ta diki baaku, u musu ta paandi soni, u musu ta hön dee taku uwii ta puu, söseei u musu ta munjan ën. Ee u kë heepi sëmbë u de ko dë bakama u Jesosi, nöö u musu ta mbei möiti hii juu tu. A ta tei ten fuu heepi dee sëmbë dee u ta lei soni u Bëibel, u de ko lobi hii sëmbë, söseei u de an ta si wan kulupu sëmbë hei möön di wotowan. Di pasensi fuu o heepi u fu wa lasi hati te sëmbë an ta haika u. Aluwasi so sëmbë dë kabakaba u haika u, tökuseei u musu du soni ku pasensi. Wa sa duwengi dee sëmbë dee u ta lei soni u Bëibel u de ko abi wan taanga biibi. So juu a bi ta tei ten u dee bakama u Jesosi seei ko fusutan andi Jesosi bi ta lei de (Joh. 14:9). Boo hoi a pakisei taa u sa paandi wan soni, nöö u ta dëën wata, ma Gadu hën ta mbei a göö.​—1 Kol. 3:6.

12. Unfa u sa lei taa u abi pasensi te u ta peleiki da dee famii fuu dee an dë Kotoigi?

¹² A sa taanga da u fuu lei taa u abi pasensi te u ta peleiki da dee famii fuu. Di mama wëti  di sikifi a Peleikima 3:1, 7 sa heepi u. A sikifi dë taa: „Wan ten dë . . . u dë piii ku wan ten dë u fan.” Di fasi fa u ta tja useei sa heepi dee famii fuu u de kë haika di bosikopu di u ta paaja. Boiti di dë, hii juu u musu ta dë kabakaba u konda soni u Jehovah da de (1 Pet. 3:1, 2). U musu ta peleiki ta lei sëmbë soni u Bëibel fajafaja. Ma u musu ta hoi pasensi da hii sëmbë, te kisi dee famii fuu.

13-14. Ambë da wantu sëmbë di u sa djeesi a di pasensi di de bi abi?

¹³ U sa ko abi pasensi te u ta buta pakisei a dee dinima u Gadu u di ten di pasa, ku dee dinima fëën u di ten fuu aki. Habaki bi kë taa hogilibi kaba. Ma a bi lei taa a bi abi pasensi, di a bi taki taa: „Mi o taanpu leti a di kamian ka mi musu hoi wakiti” (Hab. 2:1). Apösutu Paulosu bi taki unfa a bi kë kaba di diniwooko fëën tjika, faa feni di paima fëën a liba ala. Ma tökuseei a bi ta ’konda di bunu buka nöömö da sëmbë’ ku pasensi.​—Tjab. 20:24.

¹⁴ Boo luku di woto u wan baaa ku hën mujëë. Di baaa ku di sisa aki bi go a di Giliati-siköö. Baka di dë, hën de manda de go a wan köndë ka hia peleikima an dë, söseei ka gaansë u dee sëmbë an dë Keesitu sëmbë. Wantu sëmbë nöö bi ta kë ta lei soni u Bëibel. Ma woto baaa ku sisa bi dë a woto köndë tu, di de ku de bi go a di Giliati-siköö. Nöö dee baaa ku dee sisa dë, bi ta piki de unfa de bi ta feni sëmbë ta lei soni u Bëibel tjika, söseei unfa de bi ta heepi sëmbë u de ko toon Kotoigi tjika. Wë hii fa gaansë sëmbë u di pisiwata ka di baaa ku di sisa bi dë, an bi ta kë haika, tökuseei di baaa ku di sisa aki bi ta peleiki go dou ku pasensi. De bi peleiki aiti jaa longi a di kamian dë, hën te u kaba fëën, hën wan u dee sëmbë di de bi ta lei soni u Bëibel ko tei dopu. Andi u ta lei a hii dee sëmbë dee u taki u de aki? Wë u ta si taa de an bi mbei soni tapa de, u de du di wooko u de fajafaja go dou. De an bi mbei maun u de böö. Nöö Jehovah bi paka de u di pasensi u de. Be useei „ta djeesi dee otowan nöömö, dee bi tai hati ta biibi tefa de feni dee soni dee Gadu bi paamusi de”.​—Heb. 6:10-12.

15. Andi da wan fasi fa biibi ta heepi u fuu sa kë möön du di peleikiwooko?

¹⁵ U ta biibi di bosikopu di u ta paaja da sëmbë. Fëën mbei u kë paaja di bosikopu aki ka u sa paajëën dou. U ta biibi di soni di Gadu paamusi u a di Wöutu fëën (Ps. 119:42; Jes. 40:8). U si fa tjabukama woto ta pasa a di ten fuu aki. U si unfa sëmbë ta bia libi, te de bigi du dee soni di di Bëibel ta taki. Di soni aki ta möön mbei u ko dë seiki taa di bunu buka u di Könuköndë da wan bosikopu di hii sëmbë musu jei.

16. Unfa Psalöm 46:1-3 ta heepi u fuu si taa woo kë möön du di peleikiwooko ee u ta biibi Jehovah ku Jesosi?

¹⁶ U ta biibi Jehovah, di Sëmbë di da u di bosikopu di u ta paaja aki. Söseei u ta biibi Jesosi, di sëmbë di a buta ko Könu u di Könuköndë (Joh. 14:1). Aluwasi andi ta miti u, Jehovah o ta heepi u hii juu, söseei a o ta da u taanga. (Lesi Psalöm 46:1-3.) Boiti di dë, u dë seiki taa Jesosi dë a liba ala ta tii di peleikiwooko, nöö a ta wooko ku di kaakiti ku di makiti di Jehovah dëën.​—Mat. 28:18-20.

17. Konda wan woto di ta lei faandi mbei u musu ta du di peleikiwooko go dou.

¹⁷ Biibi ta heepi u fuu ko möön dë seiki taa Jehovah o paka u u dee möiti dee u ta mbei. Nöö so juu a ta paka u a wan fasi di wa bi mëni (Peleik. 11:6). Hii daka dusudusu sëmbë ta waka pasa dee bukuwagi ku dee bukutafa dee u ta buta. Di fasi dë da wan bunu fasi u peleiki ö? Wë aai! Di Könuköndë diniwooko fuu u ëlufumu-liba 2014, bi taki soni u wan mujëë mii di bi dë a hei siköö. Di mujëë mii aki bi kë sikifi  wan soni tja go a siköö, ka a bi o taki soni u dee Jehovah Kotoigi. Di mujëë mii aki an bi sa feni dee Könuköndë zali fuu, ma a bi ko si wan u dee bukutafa fuu a di siköö ka a bi nango. Söseei a bi feni soni di a bi sa sikifi tja go a siköö. Te u kaba fëën, di mujëë mii aki bi tei dopu ko toon wan Jehovah Kotoigi, nöö nöunöu a ta du di kowoonu pioniliwooko. Dee lö woto aki ta da u taanga fuu ta du di peleikiwooko go dou, biga de ta lei u taa sëmbë dë jeti di musu jei di Könuköndë bosikopu.

18. Faandi mbei u dë seiki taa di peleikiwooko o du kaba kumafa Jehovah kë?

¹⁸ U sa dë seiki taa di peleikiwooko o kaba a di soifi ten. Luku andi bi pasa a di ten u Noa. Jehovah bi lei taa hii juu a ta du soni a di möön bunu ten. Jehovah bi buta di daka di di Gaan Wata bi o ko. A bi buta di daka dë 120 jaa a fesi ufö di Gaan Wata ko. Sömëni jaa baka di dë, hën Jehovah bi piki Noa faa mbei di gaan boto. A kan taa 40 jaa nasö 50 jaa longi ufö di Gaan Wata ko, Noa bi ta wooko taanga jeti. Hii fa sëmbë an bi ta haikëën, tökuseei a bi ta piki de andi Gadu bi taki, u te Jehovah piki ën taa di ten dou faa tja dee mbeti go a di boto dendu. Baka di dë, hën „Jehovah tapa di döö” a di soifi ten.​—Ken. 6:3; 7:1, 2, 16.

19. Andi u sa ta dë ku di mëni taa o pasa ee wa mbei maun fuu böö?

¹⁹ Abiti möön Jehovah o mbei u sabi taa u kaba u paaja di bunu buka u di Könuköndë. Baka di dë, a o booko di goonliba u Saatan aki puu, nöö a o seti di njunjun goonliba di o fuu ku sëmbë di o ta piki hën buka. Ma di ten dë an dou jeti. Fëën mbei boo ta djeesi Noa, Habaki ku dee woto sëmbë dee an bi mbei maun u de böö. Boo ta buta di peleikiwooko a di fosu kamian a u libi, boo abi pasensi, söseei boo ta biibi Jehovah ku dee soni dee a paamusi u, ku hii u hati.