Di tëkisi aki ta taki taa: „An musu bigi da i te i si taa sëmbë ta pena dee pootima. An musu bigi da i te sëmbë an ta kuutu soni a wan leti fasi, nasö te de an ta du bunu a di köndë ka wan gaama ta tii, biga wan sëmbë di hei möön dee heihei sëmbë aki ta si andi ta pasa, nöö woto sëmbë dë di hei möön de.”​—Peleik. 5:8.

Kandë wan sëmbë sa taki taa di tëkisi aki ta taki u libisëmbë di abi makiti u tii wan köndë. Ma te u pakisei ën bunu, a ta lei u wan soni u Jehovah tu. Di soni aki sa da u kötöhati, söseei a sa mbei u dë seiki u wan soni.

Peleikima 5:8 ta taki u wan tiima di ta peeta dee pooti sëmbë, söseei di an ta libi ku de a wan leti fasi. Di tiima aki musu hoi a pakisei taa wan sëmbë di hei möön hën, nasö di abi möön makiti möön hën, ta luku ën. Boiti di dë, woto sëmbë sa dë di hei möön di tiima aki. A tjali taa bëina hii dee tiima an ta du soni a wan leti fasi, nöö sëmbë ta tja fuka u di soni dë hedi.

Ma aluwasi a sa ta djei kuma soni an o tooka ko bunu möönsö, tökuseei u sa dë seiki taa Jehovah ta si andi „dee heihei sëmbë” dee ta tii ta du. U sa ta fan ku Jehovah, nöö u tuwë dee fuka fuu dëën (Ps. 55:22; Fil. 4:6, 7). U sabi taa „Jehovah ta luku hii di goonliba faa si andi ta pasa, sö taa a sa du wan soni da dee sëmbë dee ta dini ën ku hii de hati”.​—2 Klon. 16:9.

Wë Peleikima 5:8 ta toona mëni u unfa soni dë a di goonliba ka u dë aki. A ta toona mëni u taa hii juu wan sëmbë o dë di o abi möön makiti a wan wotowan liba. Ma a ta toona mëni u tu taa Jehovah da di kaba heiwan u hii di mundu. A buta di Womi Mii fëën de kai Jesosi Keesitu, u tii. Jesosi da di Könu u di Könuköndë fëën. Di Gadu di abi hii makiti a mundu, ta si hii soni. A ta kuutu soni a wan leti fasi. Nöö di Womi Mii fëën ta kuutu soni a wan leti fasi tu.