1-2. Andi Timoteo bi musu du, te u luku 1 Timoteo 6:20?

U TA buta dee gudu fuu a woto sëmbë maun u de hoi da u. U ta buta di möni fuu a banku. Te u du di soni aki, nöö u ta hoi taa de an o lasi di möni fuu, söseei taa sëmbë an o go fufuu ën. Ma u ta hoi taa de o tjubi di möni fuu. U sa fusutan unfa a dë te u buta wan gudu fuu a wan sëmbë maun faa tjubi da u.

² Lesi 1 Timoteo 6:20. Apösutu Paulosu bi toona mëni Timoteo taa a bi feni wan gaan gudu. Di gudu dë, bi dë di sabi di a bi ko sabi andi Gadu abi a pakisei da libisëmbë. Jehovah bi da Timoteo di gaandi faa ta „konda di Buka u Gadu nöömö da sëmbë” (2 Tim. 4:2, 5). Paulosu bi piki Timoteo taa a musu ta tjubi dee soni dee Jehovah bi dëën. Wë leti kuma Timoteo, Jehovah da u gudu tu. Andi da dee gudu dë? Nöö faandi mbei u musu tjubi dee gudu di Jehovah da u?

3-4. Faandi mbei u sa taki taa dee lei u Bëibel dë kuma gaan gudu?

³ Jehovah da u dee tuutuu lei dee dë sikifisikifi a di Wöutu fëën, di Bëibel. Dee lei u Bëibel dë kuma gaan gudu, u di de ta lei u unfa u sa ko dë gaan mati ku Jehovah, söseei de ta lei u unfa u sa ko dë waiwai tuutuu. Te u ta biibi dee lei aki, söseei te u ta libi ku de, nöö sëmbë an o sa feni u ganjan ku poipoi lei, söseei woo sa ta libi a wan fasi di fiti.​—1 Kol. 6:9-11.

⁴ Wan woto soni di mbei u taki taa dee lei dee dë a di wöutu u Gadu dë kuma gaan gudu, da u di Jehovah ta mbei dee sëmbë dee abi sakafasi, nasö „dee a kai da u de feni di libi u teego” wanwan ko sabi dee soni dë (Tjab. 13:48). Sëmbë di abi sakafasi ta tei taa di köni saafu di dë u futoou hën ta lei u soni  u Bëibel a di ten aki (Mat. 11:25; 24:45). Wa bi o sa sabi dee soni aki ee na Gadu hën bi heepi u fuu ko sabi de. Nöö soni an dë di dii möön dee lei aki.​—Nöng. 3:13, 15.

5. Un woto gudu Jehovah da u?

⁵ Jehovah da u di gaandi tu fuu lei wotowan soni di nama ku ën ku dee soni dee a o du a di ten di ta ko (Mat. 24:14). Di buka di u ta paaja dë kuma gaan gudu seei, u di a ta heepi sëmbë u de ko a di wosudendu u Jehovah, söseei a ta jabi pasi da de u de libi u teego (1 Tim. 4:16). Aluwasi ee u sa du di wooko aki gaanfa, nasö ee wa sa du ën gaanfa sö, tökuseei a o dë taa u ta heepi du di möön gaan wooko di ta du a di ten aki (1 Tim. 2:3, 4). A dë wan gaandi fuu sa ta wooko makandi ku Gadu!​—1 Kol. 3:9.

6. Andi bi ko pasa ku so sëmbë, u di de an bi ta köni?

⁶ A di pisiten di Timoteo bi dë a libi, i bi abi so Keesitu sëmbë di an bi ta tei di wooko di de ku Gadu bi sa wooko makandi, u bigi. U di Demasi bi lobi dee soni u di goonliba aki, mbei an bi kë wooko makandi ku Paulosu möön (2 Tim. 4:10). A kan taa Figelusi ku Hemogenesi an bi kë du di peleikiwooko möön, u di de bi ta fëëë taa sëmbë bi o du ku de tu, kumafa de bi du ku Paulosu (2 Tim. 1:15). Himënëusi, Alekesani, ku Filitusi bi haika poipoi lei, hën de kumutu a di tuutuu lei (1 Tim. 1:19, 20; 2 Tim. 2:16-18). Bigibigi dee sëmbë dee u kai aki bi lobi Jehovah, ma bakaten de an bi ko ta si dee soni di Gadu bi ta da de u gaan soni möön.

7. Andi Saatan ta du sö taa a sa feni u du andi a kë?

⁷ Andi Saatan ta du u mbei u tuwë dee gaan gudu di Jehovah da u? Luku so u dee soni di Saatan ta wooko ku de u ganjan sëmbë. A ta wooko ku soni di sëmbë ta du u mbei piizii, söseei a ta wooko ku soni kuma teefei, ladio, Internet, buku nasö woto soni. A ta wooko ku dee soni aki u mbei u pakisei soni, nasö u mbei u du soni di sa mbei wa lobi Jehovah möön, nasö u mbei wa hoi useei a dee wëti fëën möön. Saatan kë fuu buta pakisei a di fasi fa woto sëmbë o si u, nasö a dee soni di de ta taki fuu, nöö wa du di peleikiwooko möön. Söseei a kë fuu fëëë di du di sëmbë sa du ku u. A kë ganjan u tu fuu haika ’dee poipoi soni dee an ta kai ku Gadu’, di dee sëmbë dee kumutu a di biibi ta taki, sö taa u disa di tuutuu lei.​—1 Tim. 6:20, 21.

8. Andi i lei a di woto u wan baaa de kai Daniel?

⁸ Ee wa luku bunu, a sa pasa taa pikipiki u bigi disa di tuutuu lei. Boo luku di woto u wan baaa de kai Daniel *, di bi lo’ u pëë game gaanfa seei. A bi taki taa: „Mi bi bigi pëë game sensi di mi bi abi teni jaa. Bigibigi dee game dee mi bi ta pëë an bi hogi. Ma pikipiki mi bi bigi  ta pëë game di bi nama ku feti, söseei di bi nama ku taku jeje.” Bakaten, di baaa aki bi bigi ta pëë game söwan 15 juu longi hiniwan daka. Baaa Daniel bi taki tu taa: „Mi bi sabi taa dee game dee mi bi ta pëë, ku di ten di mi bi ta tei u pëë de, bi ta mbei mi ku Jehovah an dë gaan mati möön. Ma mi hati bi ta piki mi taa ma bi abi fu du andi dee mama wëti u Bëibel ta piki mi.” Ee wa luku bunu, nöö dee soni dee u ta du u mbei piizii sa mbei wa panjan di tuutuu lei hoi möön. Ee sö wan soni ko pasa, nöö woo sa lasi dee gaan gudu di Jehovah da u.

9. Ku andi Paulosu bi tei Timoteo maaka, te u luku 1 Timoteo 1:18, 19?

⁹ Lesi 1 Timoteo 1:18, 19. Paulosu bi tei Timoteo maaka ku wan sodati, nöö a bi dëën taanga faa „biinga seei go dou” a di feti. Paulosu an bi ta taki u wan tuutuu feti ku libisëmbë. Unfa Keesitu sëmbë dë kuma sodati di dë a wan feti? Un fasi u musu ko abi kuma sodati u Keesitu? Boo luku feifi soni di u sa lei u di woto di Paulosu bi konda. Dee woto aki sa heepi u fuu panjan di tuutuu lei hoi gingin.

10. Andi a kë taki u libi gbelingbelin kumafa Gadu kë?

¹⁰ U musu libi gbelingbelin kumafa Gadu kë. Wan bunu sodati ta hoi hënseei a dee wotowan fëën. A o biinga taanga u tjubi wan sëmbë di a lobi, nasö wan soni di a ta si kuma wan gaan fanöudu soni. Paulosu bi piki Timoteo faa mbei möiti u libi gbelingbelin kumafa Gadu kë a hii futu. Di soni dë kë taki taa a bi musu ta hoi hënseei a Gadu (1 Tim. 4:7). Möön u ko lobi Jehovah, möön woo kë panjan di tuutuu lei hoi gingin.​—1 Tim. 4:8-10; 6:6.

11. Faandi mbei u musu ta duwengi useei a soni?

¹¹ Mbei taanga möiti fii duwengi iseei. Ee wan sodati kë dë kabakaba u feti hiniwan ten, nöö a musu duwengi hënseei a soni. Saatan an bi sa feni Timoteo ganjan u di Timoteo bi haika Paulosu. Paulosu bi piki ën faa kule da soni di di hati fëën bi sa mandëën faa du, faa ta biinga u ko abi bunu fasi, söseei faa ta mbei ten u dë makandi ku dee baaa ku dee sisa fëën (2 Tim. 2:22). Timoteo bi musu duwengi hënseei faa bi sa du dee soni aki. Useei musu ta duwengi useei ee u kë wini dee zöndu fii fuu (Lom. 7:21-25). U musu sa duwengi useei tu ee u kë disa di awoo fasi fa u bi ta libi, nöö u mbei möiti fuu ko abi woto bunu fasi (Ef. 4:22, 24). Ee sinkii fuu wei, nöö tökuseei u musu duwengi useei fuu go a wan komakandi.​—Heb. 10:24, 25.

12. Unfa u sa ko wooko ku di Bëibel a wan möön bunu fasi?

¹² Wan sodati musu lei u wooko ku dee fetilai fëën. Ee a kë sa’ u wooko ku de a wan bunu fasi, nöö hiniwan daka a musu ta mbei möiti faa ko sa’ u feti ku de. Sö nöö u musu ko sa’ u wooko ku di Wöutu u Gadu a wan bunu fasi tu (2 Tim. 2:15). U sa lei di soni aki, a dee komakandi fuu. Ma ee u kë heepi wotowan u de biibi taa dee lei u Bëibel sa heepi de, nöö u musu ta lei soni u Bëibel hiniwan daka. Ee u kë taa di biibi fuu musu ko möön taanga, nöö u musu ta wooko ku di Wöutu u Gadu. Ma na lesi nöö u musu ta lesi ën. U musu ta pakisei fundu fëën tu, söseei u musu ta öndösuku soni a dee buku fuu, sö taa u sa fusutan dee soni dee u lesi a di Bëibel, nöö u libi ku de (1 Tim. 4:13-15). Te u ta du dee soni aki, ufö woo sa wooko ku di Wöutu u Gadu u lei sëmbë soni. Na lesi nöö u musu ta lesi tëkisi da sëmbë, ma u kë u de fusutan dee tëkisi, söseei u kë u de fusutan unfa de sa wooko ku de. Wë te u ta lei soni u Bëibel hiniwan daka, nöö woo sa möön lei sëmbë soni fëën.​—2 Tim. 3:16, 17.

13. Andi Hebelejën 5:14 ta taki taa u musu du fuu sa sabi andi da bunu ku andi da hogi?

 ¹³ I musu sa’ u si andi sa pasa. Wan sodati musu sa sabi a fesi taa hogi sa miti ën, nöö a koti pasi dëën. Useei musu sa’ u si soni di sa tja hogi ko da u, nöö u kule da de. (Nöng. 22:3; lesi Hebelejën 5:14.) U musu köni ku dee soni dee u ta du u mbei piizii, söseei u musu köni ku dee soni dee u ta luku ku dee soni dee u ta haika. Fanafiti libi lo’ u dë a dee soni dee ta dë a teefei. Gadu ta buuse dee lö libi dë. Boiti di dë, de o tja hogi ko da u bakaten. Fëën mbei a bunu fuu köni ku dee lö fasi u mbei piizii aki, u di pikipiki a sa mbei wa ko lobi Jehovah sö möön.​—Ef. 5:5, 6.

14. Unfa di si di Daniel bi sa si soni a fesi, bi heepi ën?

¹⁴ Baaa Daniel, di u bi taki soni fëën, bi ko si taa an bunu u pëë game di nama ku feti, nasö di nama ku taku jeje. A bi go öndösuku soni a di Watchtower Library, di bi sa heepi ën ku di soni aki. Unfa a bi heepi ën? Wë di baaa aki an ta pëë dee lö game dë möön. An nango a di kamian a Internet möön ka a bi ta pëë dee game dë, nöö an ta nama ku woto sëmbë di ta pëë dee lö game dë tu. Daniel bi taki taa: „Ma ta pëë dee game dë möön. Ka u di dë mi nango a döö go du woto soni, nasö mi nango du soni makandi ku dee baaa ku dee sisa u di kemeente.” Nöunöu di baaa aki dë wan gaanwomi, nöö a ta du di pioniliwooko.

15. Faandi mbei di mindi di sëmbë ta mindi soni da wan gaan hogi soni?

¹⁵ Leti kuma Timoteo, useei musu ko sa’ u si unfa dee soni di dee sëmbë dee kumutu a di tuutuu lei ta taki, hogi tjika (1 Tim. 4:1, 7; 2 Tim. 2:16). Dee lö sëmbë aki sa paaja mindimindi woto u dee baaa, nasö de sa mbei wa futoou di ölganisaasi u Jehovah möön. Dee soni dë sa mbei di biibi fuu ko suwaki. Wa musu biibi dee soni dë. Faandi mbei? Wë u di dee sëmbë dee ta paaja dee woto aki „dë kuma dee hogi fasi u de puu dee tuutuu soni u Gadu a de hati fiaa”. Söseei „de lobi u pii oto ta fan ta fia ku sëmbë” (1 Tim. 6:4, 5). De kë fuu biibi dee soni di de ta taki, söseei fu wa futoou dee baaa fuu möön.

16. Ku un soni di sa puu u pakisei u musu ta köni?

¹⁶ Na mbei soni puu i pakisei. Timoteo bi dë kuma wan bunu „sodati” da Keesitu, nöö a bi musu ta buta hii hën pakisei a di diniwooko fëën. An bi musu mbei gudu, nasö woto soni di a bi o kë du da hënseei, puu hën pakisei a di  diniwooko (2 Tim. 2:3, 4). Wë useei an musu mbei di kë di u kë möön gudu puu u pakisei a di diniwooko fuu. ’Dee gudu u di goonliba aki sa ganjan u’, nöö de sa mbei wa ko lobi Jehovah sö möön. De sa mbei tu taa wa tei di Wöutu u Gadu u bigi möön, söseei taa wa ko abi peesa u konda soni fëën da wotowan möön (Mat. 13:22). Wa musu biinga a gudu baka, ma u musu tei di ten ku di kaakiti fuu u du soni di nama ku di Könuköndë fosu.​—Mat. 6:22-25, 33.

17-18. Andi u sa ta du sö taa u ku Jehovah sa dë mati go dou?

¹⁷ I musu dë seekaseeka u du soni hesihesi. Wan sodati musu sabi a fesi andi a o du u tjubi hënseei. Ee u kë tjubi dee gudu dee Jehovah da u, nöö u musu hopo du soni wantewante te u si taa hogi ta ko. Andi sa heepi u fuu du di soni aki? Wë u musu seeka a fesi fuu sabi andi woo du te u si taa wan hogi ta ko.

¹⁸ Te sëmbë go a wan kamian, nöö a lo’ u pasa taa te de dou, wan sëmbë ta lei de dee döö dee dë zuntu ku de. Faandi mbei de ta du di soni aki? Wë de ta du ën sö taa dee sëmbë sa kule go a döö ee wan soni ko pasa. Sö nöö u sa seeka soni a fesi fuu sabi andi woo du ee wan soni di an bunu ko a teefei, nasö a Internet. Dee soni aki sa dë fanafiti libi a di së u manu ku mujëë soni, hogidu, ku poipoi lei u sëmbë di kumutu a di tuutuu lei. Ee u seeka useei a fesi da soni di sa miti u, nöö woo sa du wan soni wantewante sö taa u ku Jehovah sa dë mati go dou.​—Ps. 101:3; 1 Tim. 4:12.

19. Un gaan bunu woo feni ee u tjubi dee gaan bunu dee Jehovah da u?

¹⁹ U musu tjubi dee gaan gudu dee Jehovah da u. Dee soni aki da dee lei u Bëibel ku di gaandi di u abi u heepi wotowan u deseei sa ko sabi soni u Bëibel. Te u du dee soni aki, nöö háti fuu an o ta fon u, libi fuu o ta waka bunu, söseei woo dë waiwai u di u ta heepi wotowan u de ko sabi soni u Jehovah. Jehovah sa heepi u fuu tjubi dee gudu dee a da u.​—1 Tim. 6:12, 19.