1. Unfa u sa ta kai Jehovah?

JESOSI da „di fosu soni di Gadu mbei”, nöö hën ku gaan hia woto ëngëli dë a di wosudendu u Jehovah (Kol. 1:15; Ps. 103:20). Di Jesosi bi dë a goonliba aki, a bi heepi sëmbë u de si taa de sa ta kai Jehovah de Tata. Di a bi ta fan ku dee bakama fëën, hën a bi taki taa de ku ën tuu musu kai Jehovah Taata (Joh. 20:17). Boiti di dë, te u buta u libi a Gadu maun, söseei te u dopu, nöö u ta ko abi sömëni baaa ku sisa di lobi u.​—Maik. 10:29, 30.

2. Andi woo luku a di woto aki?

² A ta taanga da so sëmbë u de si Jehovah kuma de Tata. Boiti di dë, kandë so sëmbë an ta saanfa de musu lei taa de lobi dee baaa ku dee sisa u de. A di woto aki, woo taki unfa Jesosi ta heepi u fuu si taa Jehovah da u Tata, nöö a lobi u. Söseei woo luku unfa Jesosi ta heepi u fuu si taa u ku Jehovah sa ko dë gaan mati. Woo taki u wantu fasi tu fa u sa ta djeesi Jehovah a di fasi fa a ta libi ku dee baaa ku dee sisa fuu.

3. Unfa di begi di Jesosi bi lei dee bakama fëën ta heepi u fuu ku Jehovah ko dë möön gaan mati?

³ Jehovah da wan Tata di lobi dee mii fëën. Jesosi kë fuu si Jehovah kumafa a ta si ën. A ta si Jehovah kuma wan Tata di abi bunu fasi, söseei di lobi dee mii fëën. Jesosi ta si Jehovah kuma wan sëmbë di u sa ta fan ku ën hii juu. An bi ta si hën Tata kuma wan sëmbë di ta piki u andi u musu du, nöö a kaba. U ta si taa sö Jesosi bi ta si hën Tata tuutuu, te u luku di fasi  fa a bi lei dee bakama fëën u de begi. A bi piki de taa te de o begi, nöö de musu kai ën: „U Tata” (Mat. 6:9). Jesosi bi sa piki u fuu kai Jehovah „di Gadu di abi hii makiti”, „di Sëmbë di mbei hii” soni, nasö „di kaba Tiima u mundu fu nöömö”. An bi o dë wan föutu soni ee u bi ta kai Jehovah a dee lö fasi dë, u di sö di Bëibel ta kai Jehovah tu (Ken. 49:25; Jes. 40:28; 1 Tim. 1:17). Ma Jesosi piki u fuu kai ën u „Tata”.

4. Faandi mbei u sa taki taa Jehovah kë fuu ku ën dë mati?

⁴ A ta taanga da i fii si Jehovah kuma wan Tata di lobi i ö? A sa ta taanga da so fuu fuu du di soni aki. Ee di tata fuu di pai u an bi ta libi bunu ku u, nöö a sa ta taanga da u fuu si wan sëmbë kuma wan tata fuu di lobi u. Ma Jehovah sabi gbelingbelin unfa u ta fii, söseei a sabi faandi mbei u ta fii sö. A kë fuu ku ën dë mati. Fëën mbei di Wöutu fëën ta piki u taa: „Ko zuntu u Gadu, nöö a o ko zuntu fii tu” (Jak. 4:8). Jehovah lobi u, nöö a paamusi u taa a o dë di möön bunu Tata da u.

5. Unfa Jesosi sa heepi u fuu ku Jehovah ko dë möön gaan mati, te u luku Lukasi 10:22?

⁵ Jesosi sa heepi u fuu ku Jehovah ko dë möön gaan mati. Jesosi sabi hën Tata bumbuu, söseei a abi dee seei fasi dee hën Tata abi. Fëën mbei Jesosi bi taki taa: „Di sëmbë di si mi, nöö mi Tata a si naandë kaa” (Joh. 14:9). Jesosi dë kuma wan gaan baaa fuu. Fëën mbei a ta lei u unfa u sa ta lesipeki u Tata, söseei unfa u sa ta piki hën buka. A ta lei u tu unfa u sa ta du soni di ta kai ku ën. Ma Jesosi ta möön heepi u fuu si unfa Jehovah abi bunu fasi tjika, söseei unfa a lobi u tjika. (Lesi Lukasi 10:22.) Boo luku wantu woto di ta lei u di soni aki.

6. Konda unfa Jehovah bi lei taa a bi ta haika dee begi u Jesosi.

⁶ Hii juu Jehovah ta haika dee mii fëën. Buta pakisei a di fasi fa a bi haika Jesosi, di fosu Womi Mii fëën. An dë u taki taa Jehovah bi ta haika hii dee begi u Jesosi di a bi dë a goonliba aki (Luk. 5:16). Jehovah bi ta haika te Jesosi bi ta begi ën faa tii ën te a bi o du wan  fanöudu soni, kuma di a bi o tei dee 12 apösutu fëën (Luk. 6:12, 13). Jehovah bi haika Jesosi tu di a bi abi wan gaan bookohedi. Di Judasi bi o sei ën, hën a bi begi fajafaja. A bi taki u dee gaan soni dee bi o miti ën. Jehovah bi haika di begi u Jesosi, ma boiti di dë, a bi manda wan ëngëli ko dëën taanga.​—Luk. 22:41-44.

7. Unfa i ta fii te i ta si taa Jehovah ta haika dee begi u dee sëmbë fëën?

⁷ Jehovah ta haika dee begi fuu tu, nöö a ta piki dee begi fuu a di soifi ten, söseei a di möön bunu fasi (Ps. 116:1, 2). Wan sisa di ta liba a di köndë India bi si unfa Jehovah bi piki dee begi fëën. A bi abi sömëni bookohedi, nöö di soni dë bi mbei a bi ta dë pantapanta. A bi ta begi Jehovah faa heepi ën. Di sisa aki bi taki taa: „Di JW Broadcasting^® u sebitaa-liba u di jaa 2019 bi taki andi u sa du te u abi bookohedi. A bi heepi mi gaanfa seei. Jehovah bi piki di begi u mi.”

8. Unfa Jehovah bi lei Jesosi taa a lobi ën?

⁸ Leti kumafa Jehovah bi lei Jesosi taa a lobi ën di a bi dë a goonliba aki, sö nöö a ta lei u taa a lobi u tu (Joh. 5:20). Jehovah bi heepi Jesosi faa bi sa abi wan taanga biibi go dou, a bi dëën taanga di a bi abi bookohedi, söseei a bi ta dëën dee soni dee a bi abi fanöudu faa sa libi. Jehovah bi piki di Womi Mii fëën taa a lobi ën, söseei a bi mbei a sabi taa libi fëën ta kai ku ën (Mat. 3:16, 17). Jesosi bi sabi taa hën Tata lobi ën, söseei taa an bi o disëën. A bi sabi tu taa hën Tata bi o ta heepi ën. Fëën mbei nöiti wan daka Jesosi bi fii kuma a dë hën wanwan.​—Joh. 8:16.

9. Unfa u du sabi taa Jehovah lobi u?

⁹ Leti kuma Jesosi, hii u tuu bi si sömëni pasi taa Jehovah lobi u. Pakisei di soni aki: Jehovah tei u ko dë mati fëën, a da u sömëni baaa ku sisa di ta du soni di ta mbei u fii bunu, söseei di ta da u taanga te u ta fii bookosaka (Joh. 6:44). Jehovah ta da u hii soni di u abi fanöudu fuu sa abi wan taanga biibi go dou. Söseei a ta heepi u fuu feni dee soni dee u abi fanöudu fuu sa libi (Mat. 6:31, 32). Te u ta pakisei unfa Jehovah lobi u tjika, nöö u ta ko lobi ën möön gaanfa.

10. Andi u sa lei u di fasi fa Jehovah ta libi ku dee baaa ku dee sisa fuu?

¹⁰ Jehovah lobi dee baaa ku dee sisa fuu. Ma so juu a sa ta taanga da u fuu lei taa u lobi de. Di soni aki sa dë sö, u di u dë sëmbë u peipei föluku, söseei u di de kiija u a peipei fasi. Boiti di dë, u di hii u tuu ta mbei föutu, mbei a sa pasa taa u du wan soni di sa hati woto sëmbë. Tökuseei hii u tuu sa du soni u lei taa u lobi dee baaa ku dee sisa fuu. Unfa u sa du di soni aki? Wë u sa djeesi di Tata fuu a di lei di a ta lei taa a lobi dee baaa ku dee sisa fuu (Ef. 5:1, 2; 1 Joh. 4:19). Boo luku andi u sa lei u Jehovah.

11. Unfa Jesosi bi lei taa a ta djeesi hën Tata a di tjalihati di a abi da libisëmbë?

¹¹ Jehovah „a’ tjalihati u libisëmbë” (Luk. 1:78). Wan sëmbë di abi tjalihati u wotowan an lobi te wotowan ta pena, nöö a ta suku fasi u heepi de, nasö u da de kötöhati. Di fasi fa Jesosi bi ta libi ku sëmbë bi ta lei unfa Jehovah bi ta booko hën hedi ku de tjika (Joh. 5:19). Wan daka Jesosi bi si gaan hia sëmbë ta ko nëën, hën „tjali u de kisi ën teee. Biga a si taa de dë fukafuka weiwei, kuma wanlö hia sikafu dë a mundu söndö sëmbë u kiija de” (Mat. 9:36). Na fii nöö Jesosi bi ta fii da dee sëmbë, ma a bi du wan soni u heepi de. A bi kula dee suwakima, nöö a bi heepi dee sëmbë dee bi dë „fukafuka”.​—Mat. 11:28-30; 14:14.

12. Konda unfa u sa ta lei taa u abi tjalihati u sëmbë.

¹² Te u ta pakisei dee fuka dee ta miti dee  baaa ku dee sisa fuu, nöö woo sa abi tjalihati u de. A sa pasa taa wan sisa dë ku suwaki, ma an lo’ u taki u di suwaki fëën wan apaiti. Ma kandë a o wai ee wan sëmbë bi o kë heepi ën ku so soni. Ee u ta si taa a ta taanga dëën faa sölugu dee sëmbë fëën wosudendu, nöö kandë u sa ta boi soni dëën, nasö u sa ta heepi ën seeka wosu. Nasö ee wan baaa lasi wooko, nöö kandë u sa dëën wan piki möni u heepi ën u te a feni wan woto wooko. Ma kandë wa a’ fu piki ën ambë dëën di möni.

13-14. Unfa u sa lei taa u lo’ u da sëmbë soni, kumafa Jehovah lo’ u da sëmbë soni?

¹³ Jehovah lo’ u da sëmbë soni (Mat. 5:45). An dë fuu wakiti u wan baaa nasö wan sisa hakisi u fuu heepi ën ku wan soni, ufö u lei taa u abi tjalihati u sëmbë. U sa du soni kumafa Jehovah ta du soni. U sa heepi wotowan a soni söndö faa dë taa de musu ko hakisi u fuu heepi de. Hiniwan daka Jehovah ta mbei di sonu jabi da u. An dë fuu ta hakisi ën faa du di soni aki. Nöö hii sëmbë a goonliba aki ta feni wini te di sonu jabi. Jehovah ta lei taa a lobi u tuutuu, u di a ta da u dee soni dee u abi fanöudu. U lobi Jehovah u di a abi bunu fasi, söseei u di a lo’ u da sëmbë soni!

¹⁴ Sömëni u dee baaa ku dee sisa fuu ta lei taa de ta waka a Jehovah baka. De lo’ u da sëmbë soni tu. A di jaa 2013, wan gaan ventu de kai Haiyan, bi böö a di köndë Filipijnen. A bi booko sömëni kamian a di köndë aki. Sömëni baaa ku sisa wosu bi booko, söseei de bi lasi sömëni soni di de bi abi. Ma dee baaa ku dee sisa u hii së u goonliba bi heepi de wantewante. Sömëni baaa ku sisa bi da möni, söseei de bi heepi mbei söwan 750 wosu a wan jaa dendu! A di pisiten u di kolona siki, dee Kotoigi bi mbei taanga möiti u heepi dee baaa ku dee sisa u de. Te u ta heepi dee baaa ku dee sisa fuu wantewante, nöö u ta lei de taa u lobi de.

15-16. Andi u musu du u lei taa u ta djeesi di Tata fuu di dë a liba ala, te u luku Lukasi 6:36?

¹⁵ Jehovah ta da sëmbë paadon. (Lesi Lukasi 6:36.) Di Tata fuu di dë a liba ala ta da u paadon hiniwan daka (Ps. 103:10-14) Dee bakama u Jesosi bi dë zöndu libisëmbë, nöö Jesosi bi ta da de paadon. Jesosi bi dë kabakaba u dëdë da u, sö taa Gadu sa ta da u paadon u  dee zöndu fuu (1 Joh. 2:1, 2). U ta kë dë möön gaan mati u Jehovah ku Jesosi, u di de ta da sëmbë paadon.

¹⁶ U ta ko lobi dee baaa ku dee sisa fuu möön gaanfa te u ta da de „paadon” (Ef. 4:32). So juu a sa ta taanga da u fuu da wotowan paadon. Fëën mbei u musu mbei taanga möiti fuu sa ta du di soni aki. Wan sisa bi taki taa wan woto u Di Hei Wakitimawosu bi heepi ën faa da wotowan paadon ku hii hën hati. Di në u di woto dë da „Gi makandra pardon nanga un heri ati”. * Di sisa aki bi taki taa: „Di woto bi heepi mi u mi fusutan taa te mi ta da wotowan paadon, nöö miseei ta feni wini fëën tu. A bi taki taa te i ta da sëmbë paadon, nöö an kë taki taa i feni di soni di de du u bunu, nasö taa i musu du kuma di soni di de du an hati i. Ma te i ta da sëmbë paadon, nöö a kë taki taa ja ta hoi de a bëë möön, nöö i ta mbei möiti fii dë bööböö.” Te u ta da dee baaa ku dee sisa fuu paadon, nöö u ta lei taa u lobi de, söseei taa u ta djeesi Jehovah, di Tata fuu.

17. Unfa u sa hei di Tata fuu di dë a liba ala, te u luku Mateosi 5:16?

¹⁷ U ta tei ën u bigi seei taa u abi baaa ku sisa a hii së u goonliba di lobi de na de. U kë taa hii sëmbë musu ko dini Gadu makandi ku u. Fëën mbei u musu mbei taanga möiti fu wa du soni di sa mbei sëmbë pakisei hogi u Jehovah, nasö u dee sëmbë fëën. U ta mbei möiti u libi a sö wan fasi taa sëmbë sa kë ko sabi soni u Jehovah, nöö te u kaba fëën de sa dini ën tu.​—Lesi Mateosi 5:16.

18. Andi sa heepi u fuu peleiki söndö fëëë?

¹⁸ So juu sëmbë sa du ku u, nasö de sa mbei u fa, u di u ta piki di Tata fuu buka a soni. Andi u sa du ee u ta fëëë te u ta konda soni u di biibi fuu da wotowan? Wë u sa hoi a pakisei taa Jehovah ku di Womi Mii fëën o heepi u. Jesosi bi piki dee bakama fëën taa de an bi abi fu booko de hedi ta hakisi deseei ee unfa de musu fan nasö andi de musu taki. Faandi mbei a bi taki sö? Wë Jesosi bi taki taa: „A di juu dë Gadu o da unu di fa fuun piki de. Nöö  an o dë taa unu o fan di fan naandë e, ma di [jeje] fuu Tata di dë a unu liba dë, hën o ta fan da unu.”​—Mat. 10:19, 20.

19. Konda unfa wan sëmbë bi peleiki ku degihati.

¹⁹ Luku di woto u wan baaa de kai Robert. Di Robert bi bigi ta lei soni u Bëibel, hën wan kuutubangi a Zuid-Afiikan bi kai ën a kuutu faa go konda faandi mbei an kë go a sodati. A di ten dë an bi sabi soni u Bëibel wan bëtë. Ma hii fa a bi dë sö, tökuseei an bi fëëë u piki de taa an bi kë go a sodati, u di a lobi dee baaa ku dee sisa fëën. A bi tei ën u bigi taa a bi dë a di wosudendu u Jehovah! Di kuutubakaa bi hakisi Robert taa: „Ambë da dee baaa ku dee sisa fii?” Robert an bi dë ku di mëni taa de bi o hakisi ën sö wan soni. Ma wantewante dë a mëni di tëkisi u di daka wöutu u di daka dë. Di tëkisi bi dë Mateosi 12:50. Di tëkisi dë ta taki taa: „Hiniwan sëmbë di ta du kumafa mi Tata a liba ala kë faa du, nöö hën wë da mi baaa ku mi sisa ku mi mama.” Hii fa Robert an bi sabi soni u Bëibel wan bëtë, tökuseei di jeje u Jehovah bi heepi ën faa piki di hakisi dë, ku sömëni woto hakisi jeti. A musu u dë sö taa Jehovah bi wai ku Robert! Useei sa dë seiki taa Jehovah ta wai ku u tu te u ta hakisi ën faa da u degihati fuu sa ta peleiki da sëmbë.

20. Un möiti u musu mbei? (Johanisi 17:11, 15)

²⁰ Boo ta tei ën u bigi hii juu taa u dë a di wosudendu u Jehovah, ka sëmbë lobi de na de. U abi di möön bunu Tata, söseei u abi sömëni baaa ku sisa di lobi u. U musu ta tei di soni aki u bigi seei. Saatan ku dee bakama fëën an lobi u, nöö de kë fuu si kuma di Tata fuu an lobi u, söseei de ta kë poi di libi di u ta libi fiifii ku useei. Ma Jesosi bi begi da u. A bi hakisi di Tata fuu faa luku u sö taa u sa ta libi fiifii ku useei go dou. (Lesi Johanisi 17:11, 15.) Jehovah ta piki di begi dë. U musu mbei möiti fuu dë kuma Jesosi. U musu ta biibi ku hii u hati taa di Tata fuu di dë a liba ala lobi u, söseei taa a o ta heepi u. Boo ta mbei möiti hii juu fuu ko möön lobi Jehovah ku dee baaa ku dee sisa fuu.