1. Andi sa pasa ku wan sëmbë te dee puu wan famii fëën a di kemeente?

DE PUU wan sëmbë fii a di kemeente u? Di soni dë sa hati i gaanfa seei! Wan sisa de kai Hilda, bi taki taa: „Di mi ku mi manu tööu dou 41 jaa, hën a ko lasi libi. Di di soni dë pasa, nöö mi bi ta mëni taa möön hogi soni an bi o sa miti möön di dë. * Ma di di womi mii u mi hai hënseei puu a di kemeente, hën a disa di mujëë fëën ku dee mii fëën, nöö di soni dë bi möön hati mi seei.”

2-3. Unfa Jehovah ta fii te dee dinima fëën go disëën, te u luku di soni di sikifi a Psalöm 78:40, 41?

² Pakisei unfa a bi o sa hati Jehovah tjika, di so u dee ëngëli fëën dee ku ën bi ta dë a liba ala bia baka dëën! (Jud. 6) Söseei pakisei unfa a bi sa hati ën tjika, di dee Isaëli sëmbë dee a bi lobi seei, bi ta pasa hën buka hiniwan juu. (Lesi Psalöm 78:40, 41.) I sa dë seiki taa a ta hati di Tata fuu di dë a liba ala tu te wan sëmbë di i lobi go disëën. A ta fusutan unfa a ta hati i tjika. A o lei i taa a ta fii da i, nöö a o da i kötöhati. Söseei a o heepi i fii sa hoi dou.

³ A di woto aki, woo taki andi u sa du u Jehovah sa heepi u te wan sëmbë fuu an ta dini ën möön. Söseei woo si unfa u sa heepi wotowan a di kemeente ee a ko dë taa wan sëmbë u de an ta dini Jehovah möön. Ma ufö u taki u dee soni dë, nöö woo luku ku un fasi u pakisei u musu ta köni.

4. Unfa mama ku tata ta fii te wan mii u de go disa Jehovah?

⁴ Te wan njönkuwan go disa Jehovah, nöö hën mama ku hën tata ta bia ta hakisi deseei ee andi de bi sa du jeti, u heepi di mii u de faa bi sa fika a di tuutuu lei. Di de bi puu di mii u wan baaa de kai Luke a di kemeente, hën a bi taki taa: „Mi bi ta si kuma mi hën mbei di soni dë pasa. Ma bi sa ta duumi bunu a ndeti. Nöö so juu mi bi ta këë, nöö mi bi ta fii wan pei pen a mi hati.”  De bi puu di womi mii u wan sisa de kai Elizabeth a di kemeente tu, nöö hënseei bi taki taa: „Kandë sömëni soni dë di ma bi du bunu. Mi bi ta fii kuma ma bi heepi di mii u mi tjika faa ko lobi Jehovah.”

5. Ee wan sëmbë go disa Jehovah, nöö ambë u sa taki taa mbei di soni dë pasa?

⁵ U musu hoi a pakisei taa Jehovah da hiniwan fuu pasi fuu sa taki andi woo du ku u libi. Di soni aki kë taki taa a da u pasi fuu taki ee woo piki hën buka, nasö ee wa o piki hën buka. So miii an bi feni taanga a de mama ku de tata u de dini Jehovah. Ma tökuseei de bi buta taa de o dini Jehovah, söseei taa de bi o hoi deseei nëën. Ma i abi wotowan di de mama ku de tata bi ta heepi de u de ko lobi Jehovah sensi di de piki, ma di de ko möön bigi, hën de go disa Jehovah. Hën da ee fuu taki ën, nöö hiniwan fuu musu taki ee woo dini Jehovah (Jos. 24:15). Fëën mbei mama ku tata di ta tjali u di wan mii u de go disa Jehovah an musu ta si kuma de mbei di soni dë pasa!

6. Andi sa pasa ku wan njönkuwan te hën mama nasö hën tata go disa Jehovah?

⁶ So juu a ta pasa taa mama ku tata ta disa di tuutuu lei (Ps. 27:10). Di soni dë sa hati dee mii gaanfa seei, u di miii ta lesipeki de mama ku de tata, söseei de ta si de kuma sëmbë di de musu ta djeesi a di fasi fa de ta du soni. Esther da wan sisa di hën tata bi kumutu a di tuutuu lei, nöö a bi taki taa: „Sömëni pasi seei mi bi ta këë, u di mi bi ko fusutan taa na kumutu nöö mi tata bi ta kumutu a di tuutuu lei, ma dini seei an bi kë dini Jehovah möön. Mi lobi mi tata. Fëën mbei di de bi puu ën a di kemeente, nöö mi bi ta booko mi hedi ta hakisi miseei ee unfa soni bi nango dëën. Di soni dë bi ta da mi bookohedi gaanfa seei.”

7. Unfa Jehovah ta fii te dee gaansëmbë u wan njönkuwan go disa di tuutuu lei?

⁷ Ee i da wan njönkuwan di wan u dee gaansëmbë fii go disa di tuutuu lei, nöö sabi taa u ta tjali ku i. I sa dë seiki taa Jehovah saanfa di soni dë ta hati i tjika. A lobi i, söseei a ta tei ën u bigi taa i ta hoi dou. U dee baaa ku dee sisa fii ta wai taa i ta hoi dou tu. Hoi a pakisei taa na i mbei taa wan u dee gaansëmbë fii du di soni dë. Kumafa u bi taki kaa, Jehovah ta da hii libisëmbë di okasi u de sa taki ee de o dini ën nasö ee de an o dini ën. Fëën mbei hiniwan dopudopu Keesitu sëmbë „musu piki Gadu hënseei a dee soni dee a ta du”.​—Gal. 6:5.

8. Andi dee famii u wan sëmbë di de puu a di kemeente sa du, a di pisiten di de dë ta wakiti faa toona ko baka? (Söseei luku di pisi „ Toona ko a Jehovah”.)

⁸ Te wan sëmbë di i lobi go disa Jehovah, nöö i sa ta dë ku di mëni taa wan daka a o toona ko baka. Ma andi i sa ta du a di pisiten di i dë ta wakiti faa toona ko? Wë i sa ta mbei möiti u di biibi fii ko möön taanga. Te i ta du sö, nöö dee sëmbë fii o sa djeesi i a di fasi fa i ta biibi. Söseei di sëmbë fii di de puu a di kemeente seei o sa djeesi i tu. Boiti di dë, joo feni taanga tu fii sa hoi dou hii fa i ta tjali. Boo buta pakisei a wantu soni di i sa du.

9. Andi i sa du u di biibi fii an ko suwaki? (Söseei luku di pisi „ Wantu tëkisi di sa da i taanga ee wan sëmbë fii go disa Jehovah”.)

⁹ I musu ta du dee soni dee dë fanöudu fuu ta du, sö taa di biibi fii an ko suwaki. A dë  fanöudu fii ta du soni u di biibi fii ko möön taanga, söseei fii ta da dee sëmbë fii taanga. Unfa i sa du di soni dë? Wë i sa mbei möiti fii ta lesi di Wöutu u Gadu, ta kai pakisei nëën, söseei i musu nango a dee komakandi. Joanna da wan sisa fuu di hën tata ku hën sisa kumutu a di tuutuu lei. A bi taki taa: „Mi bi ta feni kötöhati te mi bi ta lesi woto u sëmbë di di Bëibel ta taki soni u de. So u dee sëmbë dë da Abigaëli, Ësitë, Jöpu, Josëfu, ku Jesosi. Di fasi fa de bi hoi dou bi ta da mi taanga seei, nöö a bi ta mbei taa ma bi ta tjali sö möön. Dee poku fuu di dee baaa ta tja ko a döö seei ta da mi taanga tu.”

10. Unfa Psalöm 32:6-8 sa heepi u fuu hoi dou te u ta tjali?

¹⁰ Piki Jehovah andi da dee soni dee ta da i bookohedi. Te i ta tjali, nöö ja musu disa u begi ën. Begi di Gadu fuu di lobi u faa heepi i fii sa si soni kumafa a ta si soni, söseei faa „mbei i ko köni, nöö a lei i di pasi ka i musu waka”. (Lesi Psalöm 32:6-8.) Wë a sa dë wan taanga soni da i fii konda da Jehovah unfa i ta fii. Ma Jehovah ta fusutan unfa di pen di i ta tja a i hati hebi tjika. A lobi i gaanfa seei, nöö a ta da i taanga fii konda hii soni dëën.​—Ëki. 34:6; Ps. 62:7, 8.

11. Faandi mbei u sa futoou di fasi fa Jehovah ta du soni, te u luku Hebelejën 12:11? (Söseei luku di pisi „ Di puu di de ta puu sëmbë a di kemeente da wan soni di Jehovah seti u di a lobi u”.)

¹¹ Na kuutu di fasi fa dee gaanwomi kuutu soni, ma wooko makandi ku de. Di puu di de ta puu sëmbë a di kemeente da wan u dee soni di Jehovah seti. A seti di soni aki sö taa di sëmbë di de puu a di kemeente sa feni wini fëën, söseei u wotowan seei sa feni wini fëën tu. (Lesi Hebelejën 12:11.) So sëmbë u di kemeente o sa taki taa dee gaanwomi an kuutu soni a wan bunu fasi. Ma hoi a pakisei taa a lo’ u pasa taa dee sëmbë dee ta taki dee soni dë, an ta kë taki dee hogi soni di di sëmbë di de puu a di kemeente du. Wa sabi hii soni u di woto. Fëën  mbei a bunu fuu futoou dee gaanwomi dee bi kuutu di sëmbë, taa de mbei hii möiti u wooko ku dee mama wëti u Bëibel.​—2 Klon. 19:6.

12. Un wini so sëmbë bi feni u di de bi wooko ku di fasi fa Jehovah seti soni?

¹² Te i ta wooko makandi ku dee gaanwomi te de puu wan sëmbë fii a di kemeente, nöö u sa taki taa a sö wan fasi i ta heepi di sëmbë fii faa toona ko baka. Elizabeth, wan sisa di u bi taki soni fëën kaa, bi taki taa: „A bi ta taanga da u seei fu wa hulu möön ku di womi mii fuu di de bi puu a di kemeente. Ma di di womi mii fuu bi toona ko baka, nöö hënseei bi taki taa a bi bunu taa de bi puu ën a di kemeente. Bakaten a bi taki taa a bi lei sömëni bumbuu soni seei u di di soni aki bi pasa. Di soni aki bi mbei taa mi bi ko abi möön lesipeki da dee wëti u Jehovah.” Di manu u di sisa aki de ta kai Mark, nöö hën seei bi taki taa: „Wan hii pisiten baka di di womi mii fuu toona ko baka, hën a piki mi taa wan u dee soni di mbei a toona ko, hën da u di wa bi ta hulu ën seei. Mi ta wai seei taa Jehovah heepi u fuu bi sa piki hën buka.”

13. Andi sa heepi i te i ta tjali?

¹³ Konda da mati fii di abi wan taanga biibi unfa i ta fii. Mbei möiti fii ta nama ku baaa ku sisa di abi wan taanga biibi, di sa heepi i fu ja ta tjali sö möön (Nöng. 12:25; 17:17). Sisa Joanna, di u bi taki soni fëën a fesi kaa, bi taki taa: „Mi bi ta fii kuma mi dë mi wanwan. Ma te mi bi ta da woto ku dee mati u mi, nöö mi bi ta fii möön bunu.” Ma andi i sa du ee a ta djei kuma sëmbë a di kemeente ta taki soni di ta mbei i ta möön tjali?

14. Faandi mbei a dë fanöudu fuu ta ’hoi pasensi da useei, ta da useei paadon ku hii u hati’?

¹⁴ Hoi pasensi ku dee baaa ku dee sisa fii. Fuu taki ën kumafa a dë, nöö na hii sëmbë o sa piki u soni di ta kai ku u hiniwan juu (Jak. 3:2). Hii u tuu da zöndu libisëmbë. Fëën mbei an ta bigi da u te u ta si taa so sëmbë an ta saandi de musu taki, söseei an ta bigi da u te u ta si taa de taki wan soni di de an bi kë taki. Na fëëkëtë di soni di apösutu Paulosu bi taki. A bi taki taa: „Un musu hoi pasensi da unuseei ta da unuseei paadon ku hii unu hati, aluwasi un feni taa wan wotowan du wan soni di hati unu” (Kol. 3:13). Wan sisa di de bi puu wan sëmbë fëën a di kemeente, bi taki taa: „Jehovah bi heepi mi u mi bi sa da baaa ku sisa paadon, u di de bi suku u da mi taanga, ma de bi taki wan soni di mbei mi fii bookosaka.” Andi dee sëmbë u di kemeente sa du, u heepi dee famii u wan sëmbë di de puu a di kemeente?

15. Andi u sa du u heepi dee baaa ku dee sisa, di de puu wan sëmbë u de a di kemeente?

¹⁵ Lei dee baaa ku dee sisa dee sëmbë u de go disa Jehovah, taa i lobi de. Wan sisa de kai Miriam bi taki taa di de bi puu hën baaa a di kemeente, nöö a bi ta fii wan fasi u go a komakandi. A bi taki taa: „Mi bi ta booko mi hedi ku andi wotowan bi o taki, u di mi baaa an bi ta dini Jehovah möön. Ma sömëni baaa ku sisa bi lei taa de ta fii ku mi, söseei de an bi taki hogi u mi baaa. De bi heepi mi u ma fii taa mi dë mi  wanwan.” Wan woto sisa bi taki taa: „Di de bi puu di womi mii fuu a di kemeente, nöö sömëni baaa ku sisa bi ko da u taanga. So u de bi taki seei taa de an bi saandi de bi musu piki u. So u de bi këë makandi ku mi, nöö wotowan bi sikifi biifi manda da mi u da mi taanga. Di soni di de bi du dë bi heepi mi gaanfa seei!”

16. Te de puu wan sëmbë a di kemeente, nöö unfa dee baaa ku dee sisa u di kemeente sa heepi dee famii u di sëmbë dë go dou?

¹⁶ I musu ta heepi dee baaa ku dee sisa di de puu wan sëmbë u de a di kemeente. A dë fanöudu seei fii ta da de taanga, söseei fii ta lei de taa i lobi de, möönmöön a di pisiten dë (Heb. 10:24, 25). So juu a ta pasa taa dee famii u wan sëmbë di de puu a di kemeente, ta fii taa wotowan an ta nama ku de sö möön kuma fosu. Nöö a ta dë sö da de kuma de puu de a di kemeente tu. Wa kë taa de musu fii sö! Dee njönkuwan di de mama ku de tata an ta dini Jehovah möön, abi taanga fanöudu. De bi puu di manu u wan sisa de kai Maria a di kemeente, nöö a bi go disa dee sëmbë fëën wosudendu. Maria bi taki taa: „So u dee mati u mi bi ta ko a u pisi, de bi ta heepi mi boi soni, söseei de bi ta heepi mi lei dee mii soni u Bëibel. De bi ta fii ku mi, söseei de bi këë makandi ku mi. Te sëmbë bi ta taki soni u mi di an bi dë tuu, nöö de bi ta lei de taa na sö soni dë tuutuu. De bi da mi taanga gaanfa seei!”​—Lom. 12:13, 15.

17. Unfa dee gaanwomi sa lei taa de ta fii da dee baaa ku dee sisa, di wan sëmbë u de go disa Jehovah?

¹⁷ Un dee gaanwomi, un tei hiniwan okasi di un feni, u heepi dee famii u di sëmbë di go disa Jehovah. Un abi wan apaiti faantiwöutu. Hën da fuun ta heepi dee baaa ku dee sisa fuunu di wan sëmbë u de go disa Jehovah (1 Tes. 5:14). Un tei di okasi u da dee baaa ku dee sisa aki taanga ufö di komakandi bigi, söseei te di komakandi kaba. Un sa go luku de a de pisi, söseei un sa begi makandi ku de. Un wooko makandi ku de a di peleikiwooko. So juu un sa kai de u de ko a unu pisi fuun du di Wosudendu Dini makandi. A dë fanöudu u dee gaanwomi ta lei dee baaa ku dee sisa aki taa de ta fii da de, taa de lobi de, söseei taa de ta buta pakisei a de.​—1 Tes. 2:7, 8.

18. Andi Gadu kë taa dee sëmbë dee an ta dini ën möön musu du, kumafa 2 Petuisi 3:9 ta taki?

¹⁸ Jehovah „an kë u na wan kodo sëmbë lasi libi. Ma a kë taa hii sëmbë musu feni di okasi u de sa bia de libi ko nëën”. (Lesi 2 Petuisi 3:9.) Aluwasi ee wan sëmbë du wan gaan zöndu, tökuseei Jehovah ta kai di sëmbë dë gaan soni jeti. Hoi a pakisei taa Jehovah paka wan gaan paima u puu u a zöndu ku dëdë basu. A pakëën ku di libi u di Womi Mii fëën. Jehovah ta mbei möiti u heepi dee sëmbë dee an ta dini ën möön u de ko nëën baka, u di a lobi de. A ta dë ku di mëni taa dee sëmbë aki o toona ko baka. U ta si di soni dë a di woto di Jesosi bi konda u di womi mii di bi lasi, ma di bi toona ko baka (Luk. 15:11-32). Sömëni u dee sëmbë dee bi go disa Jehovah bi toona ko nëën baka, nöö dee baaa ku dee sisa bi tei dee sëmbë aki ku wai. Sisa Elizabeth di u bi taki soni fëën a fesi kaa, bi wai seei di de bi toona tei di womi mii fëën a di kemeente baka. A bi taki taa: „Mi ta wai seei taa sömëni sëmbë bi da u taanga fu wa lasi biibi.”

19. Faandi mbei u sa ta futoou Jehovah hii juu?

¹⁹ U sa futoou Jehovah hii juu. Nöiti a ta piki u fuu du wan soni di o tja hogi ko da u. A dë wan Tata di lo’ u da sëmbë soni, söseei di ta fii ku u. Na piki lobi a lobi dee sëmbë dee ta dini ën. I sa dë seiki taa Jehovah an o disa i te soni ta taanga da i (Heb. 13:5, 6). Baaa Mark di u bi taki soni fëën a fesi kaa, bi taki taa: „Nöiti Jehovah ta disa u. Nöiti a ta disa u te soni ta taanga da u.” Hii juu Jehovah o ta da i „di gaan kaakiti” fëën (2 Kol. 4:7). I sa hoi iseei a Jehovah. Söseei i sa ta dë ku di mëni taa soni o go bunu, aluwasi ee wan sëmbë fii go disa Jehovah.