1. Un buku Jehovah sikifi te u luku Maleaki 3:16, nöö andi sikifi nëën?

 DUSUDUSU jaa kaa Jehovah ta sikifi wan apaiti buku. A ta sikifi wanlö sëmbë në a di buku dë, nöö di fosu në di sikifi nëën, da di u di womi de kai Abeli. * A bi dë di fosu sëmbë di bi hoi hënseei a Gadu (Luk. 11:50, 51). Bakaten Jehovah bi sikifi woto sëmbë në buta a di buku dë tu, nöö nöunöu milionmilion në dë nëën. Di Bëibel ta kai di buku dë „wan buku faa mëni [sëmbë]”, nasö di „Buku u Libi”. A di woto aki, woo kai ën di „Buku u Libi”.​—Lesi Maleaki 3:16; Ako. 3:5; 17:8.

2. Ambë në dë sikifisikifi a di „Buku u Libi”, nöö andi u sa du u në fuu sikifi a di buku dë?

² Hii dee sëmbë dee ta dini Jehovah, dee abi gaan lesipeki dëën, ku dee lobi ën tuu në dë sikifisikifi a di apaiti buku aki. Dee sëmbë aki o sa feni di libi u teego. A di ten aki ee useei mbei möiti fuu ku Jehovah ko dë mati, nöö Jehovah o sikifi di në fuu a di buku aki tu, u di di Womi Mii fëën paka di lusupaima da u (Joh. 3:16, 36). Hii u tuu kë u në fuu sikifi a di buku aki, aluwasi ee woo libi a liba ala nasö a goonliba aki.

3-4. (a) Woo feni di libi u teego ee në fuu dë sikifisikifi a di „Buku u Libi” nöunöu ö? (b) Andi woo luku a di woto aki ku di woto di ta ko?

³ Di soni aki kë taki taa hii dee sëmbë dee në u de sikifi a di buku dë o feni di libi u teego nömönömö u? U sa ko sabi di soni aki te u luku di soni di Jehovah bi piki Mosesi a Ëkisodesi  32:33. Jehovah bi taki taa: „Hiniwan sëmbë di du zöndu a mi wojo, mi o feki puu a di buku u mi.” Hën da dee në dee sikifi a di buku dë nöunöu sa feki puu nëën baka. A dë kuma Jehovah sikifi dee në aki ku wan pötuloutu (Ako. 3:5). U musu mbei hii möiti u di në fuu an feki puu a di buku dë, u te di ten dou taa di në fuu sikifi ku pëni nëën u teego.

⁴ Di soni aki sa mbei taa u ta hakisi useei so soni. U sa ta hakisi useei dee soni aki: Andi di Bëibel ta taki u dee sëmbë dee në u de sikifi a di buku dë, söseei andi a ta taki u dee sëmbë dee në u de an sikifi nëën? Na un ten dee sëmbë dee në u de sikifi a di buku dë o feni di libi u teego? Ma nöö unfa soni o waka da dee sëmbë dee dëdë söndö u de feni di okasi u ko sabi soni u Jehovah? Në u de seei sa sikifi a di buku dë tu ö?” Woo feni dee piki u dee hakisi aki a di woto aki, ku di woto di ta ko.

AMBË NË DË A DI BUKU?

5-6. (a) Ambë në seei dë sikifisikifi a di Buku u Libi, te u luku Filipi 4:3? (b) Na un ten në u de o sikifi u teego a di buku dë?

⁵ Ambë në sikifi a di Buku u Libi? Fuu sa piki di hakisi aki, nöö woo taki u feifi kulupu sëmbë. So u dee sëmbë aki në dë sikifisikifi a di Buku u Libi, ma so u de në an sikifi nëën.

⁶ Di fosu kulupu sëmbë, da dee sëmbë dee Gadu tei u go tii makandi ku Jesosi a liba ala. Në u de dë sikifisikifi a di Buku u Libi nöunöu ö? Wë aai. Dee soni dee Paulosu bi piki „dee wotowan” dee hën ku de bi ta wooko makandi a Filipi, ta lei u taa dee në u dee salufuwan dee o tii makandi ku Jesosi a liba ala dë sikifisikifi a di Buku u Libi kaa. (Lesi Filipi 4:3.) Ma ee de kë taa në u de musu fika a di buku dë, nöö de musu hoi deseei a Jehovah go dou. Nöö baka te de feni di lasiti sitampu, ufö në u de o sikifi a di buku dë u teego. Di soni aki  o pasa ufö de lasi libi, nasö ufö di gaan fuka bigi.​—Ako. 7:3.

7. Na un ten në u dee woto sikapu o sikifi u teego a di Buku u Libi, te u luku Akoalimbo 7:16, 17?

⁷ Di u tu kulupu sëmbë, da dee woto sikapu. Në u de dë sikifisikifi a di Buku u Libi nöunöu kaa u? Wë aai. Ma në u de o dë sikifisikifi a di buku jeti baka te de pasa Amagedon libilibi ö? Aai (Ako. 7:14). Jesosi bi taki taa dee woto sikapu bi „o feni di libi u teego” (Mat. 25:46). Ma dee sëmbë dee o pasa Amagedon libilibi an o feni di libi u teego wantewante. Në u de o dë sikifisikifi ku pötuloutu jeti a di buku, kumafa a bi dë. A di pisiten u di Dusu Jaa Tii, Jesosi „o kiija de ta tja de kumafa wan bumbuu sëmbë ta kiija sikafu. Nöö a o ta tja de go ka de sa bebe di wata di ta da libi u teego”. Dee sëmbë dee në u de o dë sikifisikifi a di Buku u libi, da dee sëmbë dee ta piki Keesitu buka ku dee sëmbë dee Jehovah o feni bunu.​—Lesi Akoalimbo 7:16, 17.

8. Ambë në an sikifi a di Buku u Libi, nöö andi o pasa ku de?

⁸ Di u dii kulupu sëmbë, da dee kaabita dee o poi kaba a sösö na Amagedon. Në u de an sikifi a di Buku u Libi. Jesosi bi taki taa de „o feni gaan sitaafu fu teego” (Mat. 25:46). Jehovah bi mbei Paulosu taki taa ’di sitaafu di dee sëmbë dë o feni, o dë fu teego’ (2 Tes. 1:9; 2 Pet. 2:9). Di seei soni aki hën o pasa ku hii dee sëmbë dee du zöndu a Gadu wojo, u di de an abi lesipeki da di santa jeje fëën. De an o feni di libi u teego, ma de o poi kaba a sösö u teego. Boiti di dë, de an o weki ko a libi baka (Mat. 12:32; Maik. 3:28, 29; Heb. 6:4-6). Wë nöunöu boo buta pakisei a tu kulupu sëmbë, di o weki ko a libi baka a goonliba aki.

DEE SËMBË DE O WEKI KO A LIBI BAKA

9. Ambë da dee tu kulupu sëmbë dee o weki ko a libi baka a goonliba aki, te u luku Tjabukama 24:15, nöö andi tooka a dee tu kulupu aki?

⁹ Di Bëibel ta taki soni u tu kulupu sëmbë, di o weki ko a libi baka u libi u teego a goonliba aki. Dee sëmbë „dee bi libi bunu a Masa Gadu wojo ku dee an bi libi bunu tuu”. (Lesi Tjabukama 24:15.) Dee sëmbë „dee bi libi bunu a Masa Gadu wojo”, da dee sëmbë dee bi dini Jehovah ku hii de hati di de bi dë a libi. Ma dee sëmbë „dee an bi libi bunu”, da dee sëmbë dee an bi dini Jehovah. Fuu taki ën kumafa a dë, dee soni di de bi ta du an bi ta kai ku Gadu. Ma u di hii dee tu kulupu sëmbë aki tuu o weki ko a libi baka, mbei u sa taki taa në u de dë sikifisikifi a di Buku u Libi ö? Wë fuu sa ko sabi di soni aki, nöö boo taki u hiniwan u dee tu kulupu aki apaiti.

10. Faandi mbei dee sëmbë „dee bi libi bunu a Masa Gadu wojo” o weki ko a libi baka, nöö un gaandi so u de o feni? (Luku di pisi „Soni di dee lesima hakisi”, di ta taki soni u di weki di Gadu o weki sëmbë ko a libi baka, di dë a Di Hei Wakitimawosu aki.)

¹⁰ Dee sëmbë „dee bi libi bunu a Masa Gadu wojo” da di u fö kulupu sëmbë. Ufö de dëdë, në u de bi dë a di Buku u Libi. De feki në u dee sëmbë aki puu a di buku di de dëdë u? Wë nönö, u di de dë a libi jeti a Jehovah pakisei. Jehovah ’an dë wan Gadu u dëdë sëmbë’, biga ’hii dee sëmbë dee Gadu mbei tuu dë ku libi jeti nëën wojo’ (Luk. 20:38). Di soni aki kë taki taa te dee sëmbë dee bi libi bunu a Gadu wojo o weki ko a libi baka u libi a goonliba aki, nöö në u de o dë a di Buku u Libi, hii fa ku „pötuloutu” a o sikifi (Luk. 14:14). U sa dë seiki taa so u dee sëmbë dee o weki baka, o abi di gaandi u dë „gaama a hii di goonliba”.​—Ps. 45:16.

11. Andi dee sëmbë „dee an bi libi bunu” o abi u lei, ufö në u de sa sikifi a di Buku u Libi?

 ¹¹ Boo taki soni u di lasiti kulupu sëmbë, nasö di u feifi kulupu. Dee sëmbë aki da dee sëmbë „dee an bi libi bunu”. A kan taa u di de an bi sabi dee wëti u Jehovah, mbei de bi libi an wan fasi di an bunu ufö de dëdë. Fëën mbei në u de an dë a di Buku u Libi. Ma Gadu o weki de ko a libi baka, u de sa feni di okasi u në u de sa sikifi a di buku dë. Dee sëmbë aki o abi heepi fanöudu tuutuu. So u de bi du gaan hogi soni ufö de dëdë. Fëën mbei a o dë fanöudu u dee sëmbë dë lei u libi a wan leti fasi, kumafa Jehovah kë. U de sa libi a sö wan fasi, mbei di Könuköndë u Gadu o seeka soni u lei hii sëmbë a goonliba soni u dee wëti u Gadu.

12. (a) Ambë o lei dee sëmbë dee an bi libi bunu soni? (b) Andi o pasa ku dee sëmbë dee an o kë du dee soni di de o lei?

¹² Ambë o lei dee sëmbë dee an bi libi bunu soni? Dee gaan hia sëmbë dee o pasa di gaan fuka libilibi, ku dee sëmbë dee o weki ko a libi baka, dee bi libi bunu a Masa Gadu wojo. Ee dee sëmbë dee an bi libi bunu kë u në u de sikifi a di Buku u Libi, nöö de musu ko dë mati u Jehovah, söseei de musu buta de libi nëën maun. Jesosi Keesitu ku dee salufuwan o dë a liba ala ta luku unfa dee sëmbë dee an bi libi bunu, o ta du dee soni di de ta lei (Ako. 20:4). Dee sëmbë dee an o kë du dee soni di de ta lei an o fika a libi, aluwasi ee de abi 100 jaa (Jes. 65:20). U di Jehovah ku Jesosi sa si andi dë a wan sëmbë hati, mbei de an o da na wan sëmbë pasi u du hogi soni a di njunjun goonliba.​—Jes. 11:9; 60:18; 65:25; Joh. 2:25.

SËMBË O WEKI BAKA U FENI LIBI NASÖ U DE KUUTU DE

13-14. (a) Unfa u bi ta fusutan dee soni dee Jesosi bi taki a Johanisi 5:29 a di ten di pasa? (b) Na un soni di Jesosi bi taki u musu buta pakisei?

¹³ Jesosi bi taki soni tu u dee sëmbë dee o weki ko a libi baka, u libi a goonliba aki.  A bi taki taa: „Di juu o dou ka hii dee sëmbë dee dë a geebi tuu o jei hën töngö, nöö dee o kumutu dë. Dee sëmbë dee bi libi bunu, o weki ko a libi baka u de feni libi, nöö dee sëmbë dee bi libi hogi, o weki ko a libi baka u de kuutu de” (Joh. 5:28, 29). Andi Jesosi bi kë taki di a bi taki dee soni dë?

¹⁴ A di ten di pasa, u bi ta si kuma dee soni dee Jesosi bi taki bi nama ku dee soni di dee sëmbë dee bi o weki ko a libi baka bi o du baka te de weki ko a libi baka. Hën da fuu taki ën, so sëmbë di bi o weki ko a libi baka bi o du bunu soni, nöö so u de bi o du soni di an bunu. Ma te i luku ën, nöö Jesosi an bi ta taki taa dee sëmbë dee o weki ko a libi baka o du bunu soni, nasö hogi soni. A bi ta taki u soni di bi pasa kaa. A bi ta taki soni u dee sëmbë dee „bi libi bunu” ku dee „bi libi hogi”. Di soni aki ta lei u taa dee sëmbë aki bi du dee soni dë ufö de dëdë. Di soni aki dë u fusutan, na sö nö? Biga Gadu an o da na wan sëmbë pasi u de du hogi a di njunjun goonliba. A musu u dë sö taa dee sëmbë dee an bi du bunu soni, bi du dee soni dë ufö de dëdë. Wë nöö unfa u musu fusutan dee soni Jesosi bi taki di a bi taki taa so sëmbë „o weki ko a libi baka u de feni libi”, nöö so u de „o weki ko a libi baka u de kuutu de”?

15. Ambë „o weki ko a libi baka u de feni libi”, nöö faandi mbei?

¹⁵ Dee sëmbë dee bi libi bunu ufö de dëdë „o weki ko a libi baka u de feni libi”, u di në u de dë sikifisikifi kaa a di Buku u Libi. Hën da di soni di sikifi a Johanisi 5:29 di ta taki u „dee sëmbë dee bi libi bunu” dee o weki ko a libi baka, dë di seei soni kuma di soni di sikifi a Tjabukama 24:15, di ta taki taa dee sëmbë „dee bi libi bunu a Masa Gadu wojo” o weki ko a libi baka. Di soni aki ta kai ku di soni di sikifi a Loomë 6:7, di ta taki taa: „Te wan sëmbë dëdë, nöö a kumutu a hogilibi basu ko fii.” Hën da Jehovah da dee sëmbë dee bi libi bunu nëën wojo paadon u dee zöndu u de di de dëdë, ma an fëëkëtë dee bunu soni di de bi du ufö de dëdë (Heb. 6:10). Ma tökuseei dee sëmbë dee bi libi bunu musu hoi deseei a Gadu go dou te de weki ko a libi baka, sö taa në u de sa fika a di Buku u Libi.

16. Andi di weki di sëmbë „o weki ko a libi baka u de kuutu de” kë taki?

¹⁶ Ma unfa soni o waka da dee sëmbë dee bi libi hogi ufö de dëdë? Wë u di de dëdë kaa, mbei Gadu an o hoi de a bëë möön u dee hogi libi u de. Ma di soni aki an kë taki taa de bi libi bunu a Gadu wojo di de bi dë a libi. Nöö di soni aki mbei taa në u de an dë a di Buku u Libi. Fëën mbei u sa taki taa di weki di „dee sëmbë dee bi libi hogi” o weki ko a libi baka, dë di seei soni nöö kuma di soni di sikifi a Tjabukama 24:15, di taki taa dee sëmbë „dee an bi libi bunu” o weki ko a libi baka. De „o weki ko a libi baka u de kuutu de”. * Di soni aki kë taki taa Jesosi o ta buta pakisei a di fasi fa de ta libi (Luk. 22:30). Nöö baka wan pisiten Jesosi o sabi ee de bunu tjika u në u de sikifi a di Buku u Libi. Ee dee sëmbë dee an bi libi bunu tooka di hogi fasi fa de bi ta libi, söseei ee de buta de libi a Jehovah maun, nöö Jehovah o sikifi de në a di Buku u Libi.

17-18. Andi hii dee sëmbë dee o weki ko a libi baka musu du, nöö andi da di fasi fa de bi libi di Akoalimbo 20:12, 13 ta taki fëën?

 ¹⁷ Aluwasi ee dee sëmbë dee o weki ko a libi baka da sëmbë di bi libi bunu a Gadu wojo nasö sëmbë di an bi libi bunu nëën wojo, tökuseei hii de tuu o abi u hoi dee wëti dee o dë sikifisikifi a dee njunjun pampia lolu, di de o jabi a di pisiten u dee 1000 jaa. Apösutu Johanisi bi konda andi a bi si a wan wojolimbo sunjan. A bi taki taa: „Mi si dee dëdë sëmbë, heiwan ku lagiwan tuu, taanputaanpu a di Sëmbë di dë a di könubangi fesi. Nöö aan soni, hën de jabi dee buku. Nöö hën de tei wan oto buku bi sai dë möön de kai di Buku u Libi, nöö hën de jabi ën tu. Nöö hën de kuutu dee dëdë sëmbë dee dë taanputaanpu dë te dou kumafa de bi libi a goonliba. Biga hii fa de bi libi a goonliba tuu dë sikifisikifi a dee buku de jabi naandë dendu.”​—Ako. 20:12, 13.

¹⁸ De o luku di fasi fa dee sëmbë dee o weki ko a libi baka bi libi a fesi, nöö de kuutu de u? Wë nönö! Hoi a pakisei taa u di de dëdë kaa, mbei Gadu an o hoi de a bëë u dee hogi libi u de möön. Ma a o luku fa de o libi ku dee lei di de o kisi a di njunjun goonliba, nöö a o kuutu de. Fëën mbei sëmbë kuma Noa, Samuëli, Dafiti ku Daniëli seei, dee bi abi wan taanga biibi, o abi u ko lei soni u Jesosi Keesitu, söseei dee o abi u lei taa de ta biibi taa a paka paima da u. Nöö ee dee womi aki musu lei sömëni soni jeti, nöö hën da dee sëmbë dee an bi libi bunu a Gadu wojo o abi möön hia soni u lei!

19. Andi o pasa ku dee sëmbë dee an o kë libi ku dee wëti u Gadu?

¹⁹ Andi o pasa ku dee sëmbë dee an o kë libi ku dee wëti u Gadu? Akoalimbo 20:15 ta taki taa: „Hiniwan sëmbë di në an dë sikifisikifi a di Buku u Libi, nöö de o hiti ën tuwë go a di gaan faja kuma ze dë dendu.” Awa, de o poi de kaba a sösö u teego. Fëën mbei a dë fanöudu seei fuu mbei möiti u në fuu sa sikifi a di Buku u Libi, söseei faa sa fika nëën!

20. Un pei wooko woo du a di pisiten u di Dusu Jaa Tii? (Luku di peentje u di kafiti.)

²⁰ Di pisiten u di Dusu Jaa Tii o dë wan gaan suti ten! A o dë wan ten ka de o lei sëmbë soni u Gadu möön leki dee ten a fesi. Ma a o dë wan ten tu ka Jehovah o luku di fasi fa sëmbë ta tja deseei (Jes. 26:9; Tjab. 17:31). Unfa woo lei sëmbë soni u Gadu? Di woto di ta ko o heepi u fuu fusutan di soni aki, söseei fuu lei taa u ta tei ën u bigi.