So sëmbë ta hakisi deseei ee soni tooka a di Wöutu u Gadu. Di tjabukama u Gadu de kai Jesaaja bi taki taa „dee soni dee Gadu taki ta dë u nöömö” (Jesaaja 40:8). Unfa u sa dë seiki taa dee soni dee Gadu paamusi u a di Wöutu fëën an tooka?

Gadu abi di makiti u tjubi di Wöutu fëën u sëmbë an tookëën. Na awooten te de bi ta toona sikifi di Wöutu u Gadu buta a wan woto pampia, nöö de bi ta luku finifini taa de an puu na wan lëtë, taa na wan soni tooka, söseei taa de an buta na wan soni ko a liba. Ma u di libisëmbë ta mbei föutu, mbei dee sëmbë dee bi ta toona sikifi di Wöutu u Gadu, bi mbei pikipiki föutu di an bi tooka di pakisei u Gadu.

Sömëni dusudusu pampia lolu u di Buku u Gadu di de bi toona sikifi na awooten, dë u feni a di ten aki. Te i ta wegi dee pampia aki luku makandi, nöö an ta taanga u si ee wan u de dë ku föutu. Ee i kë sabi möön soni, nöö luku di woto „Is de Bijbel in de loop van de tijd veranderd?”, di dë a jw.org.

Pakisei di woto u dee pampia lolu di de bi sikifi na awooten, di de bi feni a di së u di Dëdë Ze a di jaa 1947. Dee pampia lolu aki abi pisi u di Wöutu u Gadu di bi sikifi möön leki 2000 jaa pasa kaa. Könima bi wegi dee pampia lolu aki luku ku di Wöutu u Gadu di u abi a di ten aki. Andi de ko si?

De ko si taa di bosikopu di dë a di Wöutu u Gadu a di ten aki, an tooka ku di u dee pampia lolu. * U sa dë seiki taa Gadu tjubi di Wöutu fëën sö taa an lasi go, fuu sa feni ën a di ten aki.

Fëën mbei u sa futoou di Wöutu u Gadu te u ta lesi ën. Boo luku andi dee tjabukama woto ta lei u u Gadu.