Andi da di në u Gadu? Gadu seei taki taa: „Mi da Jehovah. Mi në di dë” (Jesaaja 42:8). Di në u Gadu sikifi söwan 7000 pasi a di Bëibel. Hii fa a dë sö, tökuseei u ta si taa a sömëni Bëibel di de puu ko a woto töngö, de puu di në u Gadu hën de buta „Masa” nëën kamian. Gadu kë fii ku ën musu dë mati. Fëën mbei a kë fii ta „kai hën në.”​—Psalöm 105:1.

Dee fasi fa de ta kai Jehovah. Di Bëibel ta kai Jehovah „Gadu”, „di makiti Gadu u mundu”, „di Gadu di mbei hii soni”, „Tata”, „Masa” nasö „Könu.” A di Bëibel de sikifi sömëni begi u sëmbë di bi kai di në u Jehovah nasö wan u dee fasi fa de ta kai Jehovah a wan lesipeki fasi.​—Daniëli 9:4.

 Unfa Gadu dë? Gadu da wan Jeje. Na wan sëmbe sa si ën (Johanisi 4:24). Di Bëibel ta taki taa,na wan daka seei libisëmbë si Gadu ku wojo möönsö’ (Johanisi 1:18). Di Bëibel ta konda da u unfa Gadu ta fii te u ta du so soni. Sëmbë sa mbei a fii tjali, nasö de sa mbei „a ta wai.”​—Nöngö 11:20; Psalöm 78:40, 41.

Dee fasi dee Gadu abi. Gadu an ta luku fesi, ma a ta si hii sëmbë di wan fasi (Tjabukama 10:34, 35). Gadu „abi tjalihati u sëmbë, nöö a lobi sëmbë tu. Hati fëën an ta boonu hesi, a abi bunuhati pasa maaka, nöö hii juu a ta du dee soni dee a ta taki” (Ëkisodesi 34:6, 7). Hii fa a abi hii dee bunu fasi aki, tökuseei a abi fö fasi di ta möön dë u si.

Makiti. U di Jehovah da „di Kaba Heiwan”, mbei a abi hii makiti u du hii soni di a paamusi u taa a o du da u.​—Kenesesi 17:1.

Köni. Gadu köni möön hii sëmbë a mundu. Fëën mbei di Bëibel ta taki taa „hën wanwan abi hii köni.”​—Loomë 16:27.

Letilibi. Hii juu Gadu ta du soni a wan leti fasi. Hii dee soni dee a ta du dë „söndö föutu”, söseei „na wan hogilibi dë nëën.”​—Detolonomi 32:4.

Lobi. Di Bëibel ta taki taa Gadu „hatiböö da lobi” (1 Johanisi 4:8). Na lei nöö Gadu ta lei taa a lobi u, ma nëën lobi kumutu. A hii soni di a ta du u ta si di lobi di a abi, nöö di lobi dë ta tja wini ko da u a peipei fasi.

Di dë di Gadu dë mati ku libisëmbë. Gadu da di Tata fuu a liba ala di lobi u (Mateosi 6:9). Ee u buta biibi nëën, nöö u ku ën sa dë mati (Psalöm 25:14). Gadu kë fii begi ën sö taa i ku ën sa ko dë möön gaan mati, söseei a kë fii ’tuwë hii dee fuka fii tuu dëën, biga a a’ toobi ku i.’​—1 Petuisi 5:7; Jakobosi 4:8.

Jesosi na Gadu. Jesosi dë apaiti. Hën da di wan kodo sëmbë di Gadu seei mbei. Fëën mbei di Bëibel ta kai ën di Womi Mii u Gadu (Johanisi 1:14). Baka di Jehovah mbei Jesosi, nöö hën ku di fosu womi mii fëën wooko makandi u mbei hii woto soni. Jesosi bi dë wan „gaan bunu wookoma”.​—Nöngö 8:30, 31; Kolosën 1:15, 16.

 Nöiti Jesosi Keesitu bi taki taa hën da Gadu. Ma a bi taki taa: „Nëën [a Gadu] ala mi kumutu. Hën manda mi ko aki” (Johanisi 7:29). Di Jesosi bi ta fan ku wan u dee bakama fëën, a bi taki u Jehovah taa a dë „mi Tata di dë Tata fuunu tu” ku „mi Gadu di dë di Gadu fuunu tu” (Johanisi 20:17). Baka di Jesosi dëdë, hën Jehovah weki ën ko a libi baka u go libi a liba ala, söseei a dëën makiti, di a butëën nëën letimaun së.​—Mateosi 28:18; Tjabukama 2:32, 33.

Jesosi Keesitu sa heepi i fii ku Gadu ko dë möön gaan mati

Jesosi bi ko a Goonliba aki u lei u soni fëën Tata. Jehovah seei bi taki taa: „Di sëmbë aki, hën wë da di lobi Womi Mii u mi e. Nöö hën un musu ta haika” (Maikusi 9:7). Jesosi sabi Gadu bunu möön hii woto sëmbë. A bi taki taa: ’Na wan sëmbë sabi kaba u di Tata boiti di Mii nöö, ku di sëmbë di di Mii kë faa ko sabi ën.’​—Lukasi 10:22.

Jesosi abi dee seei fasi u Gadu. Jesosi bi ta djeesi hën tata a sö wan bunu fasi taa a bi sa taki taa: „Di sëmbë di si mi, nöö mi Tata a si naandë kaa” (Johanisi 14:9). Jesosi bi ta hai sëmbë ko a Gadu, u di a bi ta djeesi di Tata fëën a di lobi di a abi. Di lobi di Jesosi bi abi bi dë u si a dee soni dee a bi ta taki ku dee soni dee a bi ta du. A bi taa: „Miseei wë da di pasi ku di tuu, ku di libi. Nöö na wan sëmbë sa dou a mi Tata e, ee na mi tja i go nëën” (Johanisi 14:6). A bi taki tu taa: „Dee tuutuu dinima o dini di Tata ku di santa jeje, söseei a wan tuutuu fasi, biga dee lö sëmbë dë di Tata ta suku u ta dini ën” (Johanisi 4:23, NW). Di soni aki da wan gaan soni seei! Jehovah ta suku sëmbë kuma ju di kë ko sabi ambë a dë tuutuu.