Andi o pasa a di ten di ta ko?
I bi hakisi iseei kaa andi o pasa a di ten di ta ko u? Di Bëibel ta lei u taa gaangaan soni musu pasa jeti di nama ku hii sëmbë a goonliba.
Jesosi bi piki u unfa u sa sabi taa „di Könuköndë u Gadu zuntu” (Lukasi 21:31, NW). A bi taki a fesi taa peipei soni bi o ta pasa. Soni kuma gaan feti, goon bi o ta seki ta latja a sömëni kamian, gaan hangi ku taku siki bi o ko dë. Dee soni aki tuu u ta si ta pasa a di ten aki.—Lukasi 21:10-17.
Di Bëibel ta lei u tu taa wan u dee soni dee bi o ta pasa „a dee lasiti daka” u di tii di libisëmbë ta tii, hën da sëmbë an o ta tja deseei a wan bunu fasi. I sa lesi unfa de o ta tja deseei a 2 Timoteo 3:1-5. Te i ta si unfa sëmbë ta tja deseei a di ten aki, nöö an dë u taki taa di soni di di Bëibel taki a fesi ta pasa tuutuu.
Andi di soni aki kë taki? Di juu zuntu u di Könuköndë u Gadu ko tooka soni a di goonliba aki sö taa sëmbë sa abi wan möön bunu libi (Lukasi 21:36). A di Bëibel, Gadu ta paamusi u bunu soni da di goonliba aki ku dee sëmbë dee ta libi a goonliba. Boo taki u wantu u de.
WAN BUNU TII
„A kisi makiti u tii. A kisi hei ku wan könuköndë tu, sö taa hii dee sëmbë, ku dee sëmbë dee dë u peipei köndë ku di ta fan peipei töngö, bi sa dini ën. Di tii fëën o dë u nöömö. An o kaba a mundu möönsö. Di könuköndë fëën da wan könuköndë di na o booko.”—DANIËLI 7:14.
Andi di soni aki kë taki? Joo sa libi fiifii a wan tii basu di Gadu seei seti. Di tii aki o tii hii di goonliba, nöö di Womi Mii u Gadu o ta tii kuma könu.
WOO DË GÖSÖNTU
„Na wan hojo sëmbë di ta libi a di köndë o taki taa: ’Mi suwaki.’”—JESAAJA 33:24.
Andi di soni aki kë taki? Na wan daka seei joo ta fii suwaki. Joo sa libi u nöömö, nöö ja o dëdë tu.
BÖÖBÖÖ LIBI O DË A HII KAMIAN
„Gadu ta mbei feti kaba a goonliba palalaa te dou.”—PSALÖM 46:9.
Andi di soni aki kë taki? Sëmbë aan fu fëëë möön taa feti o ko a wan köndë, nasö taa de musu tja di pena di feti ta tja ko.
BUNUHATI SËMBË NÖÖ O DË A HII DI GOONLIBA
„Hogihati sëmbë an o dë möön . . . Dee sakafasi sëmbë o feni di goonliba.”—PSALÖM 37:10, 11.
Andi di soni aki kë taki? Hogihati sëmbë an o dë möön. Dee sëmbë dee ta piki Gadu buka nöö o dë a goonliba.
HII DI GOONLIBA O TOON WAN PALADËISI
„De o mbei wosu, nöö deseei o ta libi a de. De o paandi doloifi djai, nöö de o ta njan dee fuuta u de.”—JESAAJA 65:21, 22.
Andi di soni aki kë taki? Hii di goonliba o toon wan hanse kamian. Gadu o piki dee begi dee u ta begi ën taa di u fëën kë musu pasa „a goonliba aki.”—Mateosi 6:10.
