1. Faandi mbei woo ko möön zuntu ku Jehovah te u ta djeesi Jesosi?

U LO’ u djeesi dee sëmbë u lobi. U hii dee sëmbë dee bi libi a goonliba aki, Jesosi Keesitu da di möön bunu sëmbë di u sa djeesi. Faandi mbei u sa taki sö? Wë Jesosi bi taki wan pasi taa: „Di sëmbë di si mi, nöö mi Tata a si naandë kaa” (Johanisi 14:9). Jesosi bi taki sö u di a ta djeesi hën Tata a di möön bunu fasi. Fëën mbei te u lei wan soni u Jesosi, hën da wan soni u Jehovah u lei dë kaa. Nöö te u ta djeesi Jesosi, hën da u ta ko möön zuntu ku Jehovah di möön gaan sëmbë u mundu. Wan gaandi seei u feni aki e!

2, 3. (a) Faandi mbei Jehovah konda soni u di libi u Jesosi finifini da u, nöö andi di Gadu fuu kë taa u musu du? (b) Andi woo luku a di woto aki, söseei a di woto di ta ko?

² A di Bëibel Jehovah konda soni u di libi u Jesosi finifini da u. Wë faandi mbei? U di di Gadu fuu kë taa u ko sabi di Womi Mii fëën sö taa u sa djeesi ën a wan bunu fasi (Lesi 1 Petuisi 2:21). Di Bëibel taki taa u musu waka a  Jesosi baka finifini. Andi di soni dë kë taki? Jehovah kë taa u musu waka a di Womi Mii fëën baka, hën da u musu djeesi Jesosi a hii soni di a bi du. U sabi taa Jesosi an bi abi zöndu, nöö fëën mbei Jehovah an ta suku taa u musu du hii soni kuma di Womi Mii fëën. Ma Gadu kë taa u musu mbei hii möiti di u sa mbei u djeesi Jesosi.

³ Boo go luku wan tu u dee bunu fasi dee Jesosi abi. A di woto aki, woo taki u di sakafasi ku di tjalihati di Jesosi abi. A di woto di ta ko, woo taki u di degihati ku di köni di a abi u si soni a wan bunu fasi. Te woo taki u hiniwan u dee fasi aki, nöö woo piki dee dii hakisi aki: Andi di fasi aki kë taki? Unfa Jesosi bi lei taa a abi di fasi dë? Unfa u sa djeesi ën?

4. Andi a kë taki te wan sëmbë abi sakafasi?

⁴ Andi da sakafasi? Sömëni sëmbë di abi gaanfasi ta pakisei taa te wan sëmbë abi sakafasi, hën da a sösö nasö an ta kaba futoou ënseei. Ma sö a dë tuutuu ö? Wë wan sëmbë di kë abi sakafasi musu abi degihati. Te wan sëmbë abi sakafasi, hën da an abi gaanfasi, söseei an ta fii ënseei hei möön wotowan. Di fosu soni di u musu du ee u kë abi sakafasi, hën da wa musu pakisei fuu seei möön leki fa a fiti. Wan wöutubuku di ta taki soni u Bëibel taki taa te wan sëmbë abi sakafasi, hën da a sabi unfa a piki a Gadu fesi tjika. Söseei ee u abi sakafasi, nöö wa o ta fii taa u bumbuu möön woto sëmbë (Loomë 12:3). A taanga da zöndu libisëmbë u lei taa de abi sakafasi. Ma u sa ko abi sakafasi ee u ta pakisei fundu u di bigi di Jehovah bigi möön u, ku te u ta waka a Jesosi baka.

5, 6. (a) Ambë da di hedibasia de kai Mikaëli? (b) Unfa Mikaëli lei taa a abi sakafasi?

⁵ Unfa Jesosi bi lei taa a abi sakafasi? Hii juu di Womi Mii u Gadu bi ta lei taa a abi sakafasi. A bi du ën di a bi dë wan makiti ëngëli a liba ala, söseei di a bi dë wan libisëmbë a goonliba aki. Boo luku wan tu fasi fa a bi du ën.

⁶ Di fasi fa a bi dë. A di Bëibel buku de kai Judasi, u ta lesi soni u di libi u Jesosi ufö a bi ko a goonliba aki (Lesi Judasi 9). Jesosi, di de ta kai di hedibasia Mikaëli, „ku didibi bi ta fia u di dëdë sinkii u Mosesi”. Baka di Mosesi dëdë, hën Jehovah bi bei ën a wan kamian ka na wan sëmbë bi o sa feni ën (Detolonomi 34:5, 6). Kandë Didibi bi kë pooba dee Isaëli sëmbë u tei di dëdë sinkii u Mosesi go ta dini. Ma aluwasi andi Didibi bi kë du seei, tökuseei Mikaëli bi abi degihati u tapëën. Wan buku taki taa Mikaëli bi ta fia ku Didibi taa an abi di leti u tei di dëdë sinkii u Mosesi. Tökuseei di hedibasia bi sabi taa nëën abi di leti u kuutu Didibi. Fëën mbei a disa di soni da Jehovah di Möön Gaan Kuutuma, di abi hii leti u kuutu Saatan. Jesosi bi lei taa a abi sakafasi tuutuu!

7. Unfa Jesosi lei taa a abi sakafasi a di fasi fa a bi ta fan, söseei ku dee soni a bi ta du?

 ⁷ Di Jesosi bi dë a goonliba a bi lei taa a abi sakafasi, a di fasi fa a bi ta fan ku sëmbë, söseei a dee soni a bi ta du. Di fasi fa a bi ta fan. Jesosi an bi ta suku gafa da hënseei, ma a bi kë taa hën Tata hën bi musu kisi hii gafa (Maikusi 10:17, 18; Johanisi 7:16). Nöiti Jesosi bi ta fan ku dee bakama fëën a wan fasi di bi o mbei de fii kuma de an bunu tjika. Ma a bi abi lesipeki da de, nöö a bi ta lei de taa a ta futoou de, u di a bi ta gafa de u dee bunu fasi di de bi abi (Lukasi 22:31, 32; Johanisi 1:47). Dee soni a bi ta du. Jesosi an bi kë libi kuma guduma (Mateosi 8:20). A bi dë kabakaba u saka hënseei u du hiniwan wooko di so sëmbë an bi kë du (Johanisi 13:3-15). A bi lei taa a abi sakafasi tu, u di a bi ta haika hën Tata. (Lesi Filipi 2:5-8). Jesosi an bi dë kuma dee gaanfasi sëmbë dee an bi ta kë haika na wan sëmbë, ma a bi ta du hii dee soni di Jehovah bi piki ën faa du, „teefa i si a dëdë” seei. A dë gbelingbelin u si taa Jesosi, di Libisëmbë Mii bi abi „saka fasi” tuutuu.​—Mateosi 11:29.

8, 9. Unfa u sa lei taa u abi sakafasi?

⁸ Unfa u sa djeesi Jesosi a di sakafasi di a abi? Di fasi fa u dë. Te u abi sakafasi, nöö u sabi taa na hii soni u abi leti u du. Fëën mbei u sabi taa wa abi di leti u kuutu wotowan. Wa o ta kuutu de, nöö wa o abi wan föutu pakisei u dee soni de ta du (Lukasi 6:37; Jakobosi 4:12). Te u abi sakafasi, nöö wa o ta si kuma „u bunu” möön wotowan (Peleikima 7:16). Gaanwomi di abi sakafasi an o feni taa de bunu möön hii dee woto baaa ku sisa. Ma dee lobihati sikapuma aki ta ’saka de seei da dee otowan u de ta luku de kuma de hei möön de’.​—Filipi 2:3; Lukasi 9:48.

⁹ Luku andi bi pasa ku Baaa W. J. Thorn di bigi dini kuma keling-gaanwomi a di jaa 1894. Baka sömëni jaa hën de mandëën fu a go kiija ganian a di Kingdom Farm a New York. Te Baaa Thorn bi pakisei taa a bi musu ta du wan möön hei wooko, nöö a bi ta piki hënseei taa: „Ju piki pisi doti. Andi seei i abi u mbei bigi da?” (Lesi Jesaaja 40:12-15). Di Baaa aki lei taa a abi sakafasi tuutuu!

10. Unfa u sa lei taa u abi sakafasi a di fasi fa u ta fan, söseei ku dee soni u ta du?

¹⁰ Di fasi fa u ta fan. Ee u abi sakafasi tuutuu, nöö a o dë u jei a di fasi fa u ta fan ku wotowan (Lukasi 6:45). Te u ta fan ku wotowan, nöö wa o ta taki hii juu u a dee gaandi fuu nasö u dee soni u bi du (Nöngö 27:2). Ma woo ta gafa dee baaa ku sisa fuu u dee bunu soni de ta du, söseei woo ta buta pakisei a dee bunu fasi u de ku dee soni de sa’ u du (Nöngö 15:23). Dee soni u ta du. Keesitu sëmbë di abi sakafasi an ta pooba u ko dë nëbai sëmbë a di goonliba aki. Ma de ta libi a wan fasi di ta lei taa de an ta  suku u ko gudu, söseei de ta du hiniwan wooko di de sa du sö taa de sa dini Jehovah kumafa de sa dini ën tjika (1 Timoteo 6:6, 8). Di fasi fa u sa lei möön bunu taa u abi sakafasi, hën da te u ta haika wotowan. U musu abi sakafasi u ’ta haika dee sëmbë dee ta tei fesi’ a di kemeente, nöö u musu ta du dee soni di ölganisaasi u Jehovah ta piki u.​—Hebelejën 13:17, NW.

11. Andi a kë taki te wan sëmbë abi tjalihati?

¹¹ Andi da tjalihati? Di wöutu „tjalihati” sa kë taki suti fasi, söseei a sa kë taki te u abi fii da wotowan. Wan sëmbë di abi tjalihati ta lei taa a lobi wotowan. Di Bëibel ta taki taa Jehovah ku Jesosi abi tjalihati ku lobi da libisëmbë (Lukasi 1:78; 2 Kolenti 1:3; Filipi 1:8). Wan buku di taki soni u Bëibel ta taki taa te wan sëmbë abi tjalihati da wan wotowan, nöö na booko nöö a ta booko hën hedi ku wotowan. A ta taki taa te u abi tjalihati, hën da u ta booko u hedi a sö wan fasi taa u ta fii taa u musu u du wan soni u heepi sëmbë sö taa soni sa waka möön bunu da de. Te wan sëmbë abi tjalihati, nöö a o dëën taanga u du soni u heepi sëmbë u ko abi wan möön bunu libi.

12. Andi ta lei taa Jesosi bi abi tjalihati da wotowan, nöö andi di tjalihati fëën bi mbei a du?

¹² Unfa Jesosi bi lei taa a bi abi tjalihati? A bi ta fii da sëmbë, nöö a bi ta du soni da de. Jesosi bi abi tjalihati da sëmbë. Di Jesosi bi si taa hën mati Malia ku dee woto sëmbë bi ta këë u di Lazalosi bi dëdë, hën a bi këë ku de (Lesi Johanisi 11:32-35). Di tjalihati di Jesosi bi abi bi mbei a weki di womi mii u wan mujëë di manu fëën bi dëdë kaa. Bakaten, di wan seei tjalihati dë, hën bi mbei a weki Lazalosi puu a dëdë tu (Lukasi 7:11-15; Johanisi 11:38-44). Di soni di Jesosi bi du naandë, bi mbei taa Lazalosi bi sa feni di okasi u go libi a Gadu Köndë. Ufö a bi weki Lazalosi, a bi „abi tjalihati” u dee gaan hia sëmbë dee bi ta ko nëën. Di soni dë mbei a bi „go ta lei de sömëni soni” (Maikusi 6:34). Di soni di a bi du naandë bi tooka di libi u dee sëmbë dee bi tei dee soni a bi ta lei de! Na fii nöö Jesosi bi fii tjali da dee sëmbë. Di tjalihati di a bi abi, bi mbei taa a bi heepi sëmbë di bi abi heepi fanöudu.​—Mateosi 15:32-38; 20:29-34; Maikusi 1:40-42.

13. Unfa dee soni Jesosi bi ta taki bi ta lei taa a bi abi tjalihati da wotowan? (Luku di peentje a bigi u di woto.)

¹³ Dee soni a bi ta taki ta lei taa a abi tjalihati. Di tjalihati di Jesosi bi abi bi ta mbei a ta fan a wan suti fasi ku wotowan, möönmöön ku dee sëmbë dee bi ta fii bookosaka. Apösutu Mateosi bi taki di soni di di tjabukama Jesaaja bi taki u Jesosi. A bi taki taa: „Te a si wan sëmbë booko saka, kuma wan piki pau de booko pië hëngi buta tëkëë dë, nöö an o fën ën puu. Ee a si wan sëmbë abi wan pikii biibi a Masa Gadu liba eti, kuma wan lampu di oli fëën ta kaba nöö a ta tapa nango njöiin, nöö an o böö ën tapa” (Jesaaja 42:3; Mateosi 12:20). Andi dee soni aki kë taki? Jesosi an bi ta libi hogi ku sëmbë. Ma a bi ta fan ku de a wan fasi di ta mbei de fii bunu. A bi ta konda bunu buka da „dee sëmbë dee ta fii bookosaka” (Jesaaja 61:1). A bi  ta piki dee sëmbë taa ’ee wan sëmbë dë fukafuka, a ko wei u dee lai dee a ta tja’, nöö ’be a ko a nëën, nöö a o mbei a ko dë bööböö’ (Mateosi 11:28-30). A bi piki dee bakama fëën taa Gadu ta booko hën hedi ku hiniwan u dee dinima fëën, te kisi „dee pikiwan” seei, dee sëmbë di di goonliba ta si kuma sösö sëmbë.​—Mateosi 18:12-14, NW; Lukasi 12:6, 7.

14. Unfa u sa lei wotowan taa u abi tjalihati u de?

¹⁴ Unfa u sa djeesi Jesosi a di tjalihati di a abi? U musu ta fii da wotowan. Di Bëibel ta piki u taa u musu mbei möiti u „a’ tjalihati u otowan”, hii fa a sa taanga da u u du ën. Te u abi tjalihati u wotowan, nöö u ta lei taa u tei di „njunjun hati [njunjun fasi u libi, NW]”, di Jehovah kë taa hii Keesitu sëmbë musu abi (Lesi Kolosën 3:9, 10, 12). Unfa u sa lei taa u abi tjalihati u wotowan? Di Bëibel ta taki taa: „Un hopo unu hati” (2 Kolenti 6:11-13). Haika bunu te wan sëmbë ta konda da i unfa a ta fii, söseei te a ta piki i andi ta dëën bookohedi (Jakobosi 1:19). Pakisei andi di sëmbë piki i, nöö hakisi iseei: ’Unfa mi bi o fii ee mi bi dë nëën kamian? Andi mi bi o kë u sëmbë du da m’?​—1 Petuisi 3:8.

15. Andi u sa du u heepi dee sëmbë dee ta tjali nasö dee dë ku fuka?

¹⁵ Dee soni u ta du musu lei taa u abi tjalihati u wotowan. Te u abi tjalihati, nöö woo ta heepi wotowan, möönmöön dee sëmbë dee ta tjali nasö dee dë ku fuka. Unfa u sa heepi de? Loomë 12:15 ta taki taa: „Ee i si wan sëmbë ta këë, nöö këë ku ën makandi.” Sëmbë ta abi kötöhati fanöudu möön di piki di bi o piki de andi de musu du. De abi wan mati fanöudu di ta booko hën hedi ku de tuutuu, söseei di ta haika de. Wan sisa di bi kisi kötöhati u baaa ku sisa di di mujëë mii fëën dëdë, taki taa: „Mi bi tei ën u bigi seei di dee mati u mi bi ko luku mi, hën de këë makandi ku m’.” U seei sa lei taa u abi tjalihati da wotowan te u ta du soni u heepi de. Kandë wan sisa di hën manu dëdë, abi heepi fanöudu u seeka wan soni a di wosu fëën. Nasö kandë wan baaa nasö wan sisa di gaandi kaa, abi heepi fanöudu u go a komakandi, u go a peleikiwooko  nasö u go a data. Kandë wan piki soni nöö u du da wan sëmbë, ma a sa dë wan gaan soni dëën (1 Johanisi 3:17, 18). Ma di möön gaan soni di u sa du, hën da u sa lei wotowan taa u abi tjalihati u de te u ta paaja di bunu buka da de kumafa u sa paajëën tjika. Disi da di möön bunu fasi fa u sa heepi limbohati sëmbë u ko abi wan möön bunu libi!

16. Andi u sa taki u da dee sëmbë dee ta fii bookosaka, degihati?

¹⁶ Dee soni dee u ta taki musu lei taa u abi tjalihati u sëmbë. Te u abi tjalihati da wotowan, nöö a o da u taanga u fan ku dee sëmbë dee ta fii bookosaka ’be de kisi degihati’ (1 Tesalonika 5:14). Andi u sa taki u da de degihati? U sa piki de unfa u ta booko u hedi ku de tjika. U sa gafa de, söseei u sa heepi de u si dee bunu fasi di de abi ku dee bunu soni di de sa’ u du. U sa mbei de toona mëni fa Jehovah bi heepi de u ko feni di tuutuu lei, nöö di soni dë mbei taa a ta si de kuma wan dii soni (Johanisi 6:44). U sa da de kötöhati taa Jehovah ta booko hën hedi gaanfa ku dee futuboi fëën dee „lasi hati” nasö di „bookosaka” (Psalöm 34:18). Te u abi tjalihati da sëmbë, nöö dee soni dee u ta taki, sa da de kötöhati.​—Nöngö 16:24.

17, 18. (a) Unfa Jehovah kë taa dee gaanwomi u kemeente libi ku dee sikapu fëën? (b) Andi woo taki a di woto di ta ko?

¹⁷ Un dee gaanwomi u kemeente, Jehovah kë taa un musu abi tjalihati da dee sikapu fëën (Tjabukama 20:28, 29). Un hoi a pakisei taa unu abi di faantiwöutu u lei de soni, u da de degihati, söseei u mbei de fii bunu (Jesaaja 32:1, 2; 1 Petuisi 5:2-4). Fëën mbei wan gaanwomi u kemeente di abi tjalihati, an o ta pooba u basi dee baaa ku sisa fëën. Hën da an o ta buta wëti da de nasö an o ta mbei de fii taa de an ta du hia tjika, te de an sa. Ma wan gaanwomi musu kë taa dee baaa ku sisa fëën ta dë waiwai tuutuu, nöö a ta biibi taa di lobi di de lobi Jehovah o mbei de du hii soni di de sa du u dini ën ku hii de hati.​—Mateosi 22:37.

¹⁸ Te u ta pakisei fundu u di fasi fa Jesosi bi lei taa a abi sakafasi ku tjalihati, nöö woo kë djeesi ën a dee fasi dë. A di woto di ta ko, woo taki u di fasi fa u sa djeesi Jesosi a di degihati ku di köni di a abi u si soni a wan bunu fasi.