A WAN apaiti komakandi di bi o hoi a 28 u piki-deewei-liba u di jaa 2013 a Nagoya a Japan, Anthony Morris, wan baaa u di Tii Kulupu bi taki wan soni di bi mbei dee sëmbë wai seei. De bi tja wan njunjun Bëibel ko a döö a Japantöngö, di de ta kai The Bible​—The Gospel According to Matthew (Di Bëibel​—Di pisi di Mateosi sikifi). A pasa 210.000 sëmbë di bi ko a di komakandi dë nasö di bi sa si ën a gaan teefei. Baka di dee sëmbë jei di soni di di baaa taki, hën de bi ta naki maun seei u lei fa de bi wai tjika.

De bi toona doloki di pisi u Mateosi puu a di Bëibel Nyun-Grontapuvertaling a Japantöngö. Ma di buku aki di abi 128 bladsëidë da wan apaiti buku. Baaa Morris bi lei taa de bi mbei di buku aki u heepi dee sëmbë di de ta peleiki a Japan. Andi tooka a di buku aki? Faandi mbei a bi dë fanöudu u mbei ën? Nöö unfa dee sëmbë feni di buku?

Sömëni sëmbë bi foondo seei di de si fa di buku Mateosi mbei. De ta sikifi di Japantöngö a liba tja go a basu nasö a töötösë maun tja go a letisë maun. Nöö gaansë u dee soni sëmbë ta lesi a pampia ku dee buku fuu, de ta sikifi de a töötösë maun tja go a letisë maun. Ma nöö di njunjun buku aki, de sikifi ën a liba tja go a basu, kumafa de ta sikifi gaansë u dee kolanti u Japan ku woto soni di sëmbë ta lesi. Te de sikifi dee soni a sö wan fasi, nöö an ta taanga da dee sëmbë u Japan u lesi. Söseei de puu dee soni de bi ta sikifi a liba u di bladsëidë u di Nyun-Grontapuvertaling, hën de buta de kuma hedipakisei a di buku, u heepi dee sëmbë u de si wantewante andi da dee möön fanöudu soni u di woto.

Dee baaa ku sisa u Japan bigi lesi di buku Mateosi wantewante. Wan sisa di abi söwan 80 jaa bi taki taa: „Mi bi lesi di buku Mateosi sömëni pasi kaa, ma di fasi fa de ko sikifi ën nöunöu, söseei dee hedipakisei, bi heepi mi u fusutan di taki di Jesosi bi hoi a di kuun liba möön bunu.” Wan njönku sisa bi sikifi taa: „Mi lesi hii di buku Mateosi kaba wan pasi. Mi bi guwenti u lesi soni di de sikifi a töötösë maun tja go a letisë maun, ma gaansë u dee sëmbë u Japan möön lobi te de sikifi dee soni a liba tja go a basu.”

Faandi mbei de bi mbei di wan kodo buku u Bëibel aki da dee sëmbë de ta peleiki da a Japan? Hii fa sömëni sëmbë u Japan an sabi hia soni u Bëibel, tökuseei de ta kë lesi ën. Sömëni sëmbë di an bi si wan Bëibel wan daka, abi di okasi nöunöu u abi wan pisi u di Bëibel, söseei di okasi u lesi ën.

Faandi mbei di buku Mateosi de bi sikifi? Te gaansë u dee sëmbë u Japan jei di wöutu „Bëibel”, nöö de ta pakisei Jesosi Keesitu. Wë di buku Mateosi ta taki unfa de waka pai Jesosi, a ta taki u dee gaan sëmbë fëën, a ta taki u di nëbai taki di a bi hoi a di kuun liba, söseei a ta taki u dee soni Jesosi bi taki taa bi o pasa a dee lasiti daka. Dee lö soni aki dee sëmbë u Japan lobi, nöö fëën mbei u tei di buku Mateosi.

 Dee peleikima u Japan bi paati di njunjun buku aki fajafaja seei di de bi go peleiki a sëmbë wosu, söseei te de bi nango a dee gobaka. Wan sisa bi sikifi taa: „Mi abi möön okasi u paaja di Wöutu u Gadu da dee sëmbë dee u ta peleiki da. Wantewante baka di komakandi ka de da u di buku dë seei, mi feni wan sëmbë da di buku Mateosi!”

Unfa dee peleikima ta paati di njunjun buku aki? Sömëni u dee sëmbë u Japan sabi dee woto kuma „piki döö”, „tuwë bumbuu soni da hagu”, ku „ja musu abi bookohedi fu dee soni fu amanjan” (Mateosi 6:34; 7:6, 13). De ta foondo seei te de jei taa Jesosi Keesitu hën bi taki dee soni aki. Te so sëmbë si dee soni a taki dë a di buku Mateosi, nöö de ta taki: „Mi bi kë lesi di Bëibel ee wan pasi seei.”

Di dee peleikima toona go luku dee sëmbë di bi tei di buku Mateosi, nöö gaansë u de ta taki taa de lesi so pisi fëën wantewante di de kisi ën nasö de lesi hii ën tuu kaa. Wan womi di pasa 60 jaa bi piki wan peleikima taa: „Mi lesi ën sömëni pasi kaa, nöö a ta da m’ kötöhati seei. Gaantangi lei mi möön soni u Bëibel.”

U ta da sëmbë di buku Mateosi te u ta peleiki a kamian ka hia sëmbë dë. Wan sisa bi da wan njönku mujëë di e-mail adres fëën, di a bi da di buku Mateosi. Baka wan juu longi, hën di mujëë manda wan e-mail da di sisa, nöö a piki ën taa a lesi wan pisi u di buku, nöö a kë ko sabi möön soni. Baka wan wiki, hën di mujëë bigi lei soni u Bëibel, nöö an tei longi ufö a bigi go a dee komakandi.

Möön leki 1.600.000 u di buku Mateosi, de manda ku boto go a dee peipei kemeente u Japan. Hiniwan liba, dee Kotoigi ta da sëmbë dusudusu u di buku aki. Di soni di sikifi a fesi u di buku ta taki unfa dee sëmbë dee mbei di buku aki taa fii. A sikifi taa: „U ta biibi tuutuu taa di buku aki sa heepi unu u kë ko sabi möön u di Bëibel.”