DI PAAJA di u ta paaja di bunu buka da di möön fanöudu wooko di sëmbë ta du a di ten aki. A dë wan gaandi u dë wan sëmbë di ta du di wooko aki da Jehovah. Ma so juu a sa taanga da dee pionili ku dee peleikima u ta du di wooko aki fajafaja. Faandi mbei?

So peleikima feni taa sömëni sëmbë an ta dë a wosu te de nango peleiki da de. Ma te de dë a wosu, nöö a ta pasa taa de an ta kë jei soni u di Könuköndë bosikopu, nöö so juu hati u de ta boonu ku u. Woto peleikima abi wan gaan kamian ka de ta peleiki, nöö sëmbë ta haika de. Ma de ta fëëë taa de an o sa peleiki da hii dee sëmbë u di kamian ka de ta peleiki. Söseei woto peleikima peleiki sömëni jaa longi, nöö de ko lasihati u di di kaba u di goonliba an ko jeti.

Soni sa miti u a di peleikiwooko di sa mbei taa a taanga da u u du di peleikiwooko fajafaja. U di u ta libi a wan goonliba di dë a Saatan „didibi basu”, mbei u sabi taa a o taanga da u u paaja di bunu buka.​—1 Johanisi 5:19.

Aluwasi andi ta miti i a di peleikiwooko, tökuseei i sa dë seiki taa Jehovah o heepi i fii sa ta du ën go dou. Ma andi sa heepi i fii sa ta du di peleikiwooko fii möön fajafaja? Boo taki u wan tu soni di sa heepi i.

Hiniwan jaa dusudusu sëmbë ta tei dopu ta toon Jehovah Kotoigi. Ee i da wan njunjun peleikima, i sa lei sömëni soni u dee sëmbë dee ta peleiki sömëni jaa longi kaa. Ma ee i dë wan peleikima sömëni jaa longi kaa, i sa heepi dee njunjun peleikima u? A sa mbei i fii bunu seei ee i du ën.

Jesosi bi sabi taa dee bakama fëën bi abi heepi fanöudu u ko toon möön bunu peleikima, nöö fëën mbei a bi lei de unfa de bi musu peleiki (Lukasi 8:1). A di ten aki seei, dee njunjun peleikima abi lei fanöudu di o heepi de u toon möön bunu peleikima.

Wa musu pakisei taa u di wan njunjun peleikima nango a peleikiwooko, hën da a ta lei kaa  unfa a musu lei sëmbë soni. A abi wan sëmbë fanöudu u lei ën soni a wan sutifasi. Wan peleikima di sa’ u peleiki bunu musu lei ën (1) unfa a musu seeka hënseei u sabi andi a o taki, (2) unfa a musu fan ku sëmbë a wan bunu fasi, (3) unfa a musu da wan sëmbë wan buku, (4) unfa a musu seeka hënseei u toona go luku dee sëmbë dee bi kë sabi möön soni u Bëibel, ku (5) unfa a sa bigi lei sëmbë soni u Bëibel. Wan njunjun peleikima sa toon wan möön bunu peleikima te a ta luku unfa wan peleikima di sa’ u peleiki bunu ta lei sëmbë soni, ku te a ta djeesi ën (Lukasi 6:40). Nöö di njunjun peleikima o fii möön bunu te a sabi taa wan sëmbë dë kabakaba u heepi ën. Te i ta gafa wan njunjun peleikima ku te i ta piki ën unfa a sa du di peleikiwooko möön bunu, nöö di soni dë sa heepi ën.​—Peleikima 4:9, 10.

Kandë i ta mbei möiti u feni sëmbë u fan a di peleikiwooko, ma so daka di sëmbë di i ku ën o fan möön bunu da di sëmbë di i ku ën ta peleiki. Hoi a pakisei taa Jesosi bi manda dee bakama fëën „tu ku tu” u de go peleiki (Lukasi 10:1). Te tu sëmbë ta peleiki makandi, de sa da deseei degihati, söseei de ta da deseei taanga u peleiki go dou. U abi di okasi u „miti fuu da u seei taanga”, te u ta peleiki ku dee baaa ku sisa fuu.​—Loomë 1:12.

Andi da wan tu soni di i sa taki ku di sëmbë di i ku ën ta peleiki? Wan fuunu abi wan woto u konda di sa da di wotowan degihati ö? I bi lei wan bunu soni di i bi tei ten u lei soni u Bëibel ö, nasö di i ku dee sëmbë fii bi hoi di wosudendu dini ö? Wan soni di i bi jei a wan komakandi bi da i degihati ö? So juu i sa wooko ku wan peleikima di ja sabi sö bunu jeti. Kandë i sa hakisi ën unfa a du ko a di tuutuu lei. Andi da di soni mbei a ta biibi taa Jehovah hën abi di ölganisaasi aki? Un gaandi a abi a di ölganisaasi nasö andi da dee soni dee Jehovah heepi ën faa du? Kandë i sa konda dëën andi Jehovah bi heepi i fii du. Aluwasi andi dee sëmbë dee i ta peleiki da ta du, te i ta wooko ku wan sëmbë a di peleikiwooko, i abi wan bunu okasi u „ta da unu seei degihati ta heepi unu na unu fuun nango fesi nöömö.”​—1 Tesalonika 5:11.

Ee u kë du di peleikiwooko fajafaja, nöö u musu mbei möiti u lei soni a wan möön bunu fasi. „Di köni saafu di dë u futoou” da u gaan hia soni di u sa tei u lei soni a de (Mateosi 24:45, NW). Boo  taki u wan soni di u sa tei u lei useei soni: Faandi mbei a dë fanöudu u ta du di peleikiwooko? Di pisi ka sikifi „ Faandi mbei i musu mbei möiti u ta dë fajafaja a di peleikiwooko hii juu?” ta lei u faandi mbei u musu du ën.

Te i luku dee soni dee sikifi a di pisi dë finifini, nöö a o da i taanga u ta peleiki fajafaja hii juu. Butëën kuma wan maaka u ko sabi möön Bëibel tëkisi di ta lei faandi mbei u musu ta peleiki fajafaja. Nöö pakisei fundu u dee soni dë. Te i du di soni aki, nöö joo ta peleiki fajafaja seei.

Hii juu di ölganisaasi u Jehovah ta lei u peipei fasi fa u sa peleiki möön bunu. Boiti di peleiki di u nango peleiki a sëmbë wosu, u sa sikifi biifi da sëmbë, u sa peleiki ku tëlëfön, a sitaati nasö a kamian ka hia sëmbë dë, u sa peleiki te u feni wan okasi nasö u sa peleiki a di kamian ka de ta wooko. Kandë i sa go heepi u peleiki a kamian ka Kotoigi an hia nasö ka de an pena dë seei.

I dë kabakaba u pooba u du wan njunjun soni ö? Soni bi waka bunu da sömëni sëmbë di bi pooba u du dee soni aki. Luku dii woto u sëmbë di soni bi waka bunu da.

Wan sisa de kai April bi pooba wan u dee soni di bi sikifi a di Könuköndë diniwooko fuu, di ta lei fa u sa bigi lei sëmbë soni u Bëibel. A bi hakisi dii sëmbë di ku ën ta wooko a di wan kamian ee de an kë lei soni u Bëibel. April bi foondo seei di hii dee dii sëmbë taki taa de kë, söseei de bi bigi go ku ën a dee komakandi.

De bi da u taanga tu u buta u pakisei a soni di sikifi a dee buku fuu di i pakisei taa wan sëmbë di i sabi bi o kë lesi. Wan keling-gaanwomi di ta libi na Amëëkanköndë bi buta taa a o da hii dee sëmbë u wan pisiwata dee ta sei wagi banti, wan  Ontwaakt! di bi ta taki soni u wagi banti. Söseei hën ku hën mujëë bi go a möön leki 100 data kantoo, u da de wan woto Ontwaakt! di ta taki soni u heepi sëmbë u de sa fusutan dee data u de möön bunu. A taki taa di go di de bi go luku dee sëmbë bi heepi de u ko sabi soni u di peleikiwooko fuu ku dee buku fuu. Baka di di keling-gaanwomi ku hën mujëë ko sabi dee sëmbë möön bunu dee ta libi a di kamian ka a bi ta peleiki, hën a bi heepi de u ko abi möön hia gobaka.

Wan sisa de kai Judy bi sikifi wan biifi u da di hedikantoo tangi u di de da u taanga u peleiki ku tëlëfön. A bi taki taa hën mama, di bi abi 86 jaa, nöö di bi abi peipei siki, bi lo’ u peleiki ku tëlëfön. Te u kaba fëën a bi bigi lei wan mujëë di bi abi 92 jaa soni u Bëibel!

Dee soni dee sikifi a dee buku fuu ta heepi u tuutuu. Fëën mbei pooba de! De sa heepi i fii sa dë waiwai, söseei fii dë fajafaja a di peleikiwooko.

Andi da di soni di ta mbei taa u ta wai te u ta du di peleikiwooko? Na dee sömëni buku u ta da sëmbë, na dee sömëni sëmbë u ta feni u lei soni u Bëibel, nasö dee sëmbë dee u heepi u ko toon Jehovah Kotoigi. Pakisei di woto u Noa. Un mëni sëmbë a bi heepi u toon dinima u Jehovah, boiti dee sëmbë fëën wosudendu? Ma tökuseei a bi dë wan bunu peleikima. Di möön fanöudu soni, hën da te u ta dini Jehovah ku hii u hati go dou.​—1 Kolenti 4:2.

Sömëni peleikima ko si taa ee de kë ta fii bunu te de ta du di peleikiwooko, nöö de musu buta maaka di de sa dou. Andi da wan tu u dee maaka aki? De sikifi a di pisi „ Buta maaka di i sa dou”.

Begi Jehovah faa heepi i u soni sa waka bunu a di peleikiwooko fii. Te i dou di maaka di i bi buta, nöö joo fii bunu u di i sabi taa i ta du hii soni di i sa du u paaja di bunu buka.

A dë sö tuu taa soni ta dë di sa mbei a ta taanga da u u du di peleikiwooko fuu. Ma soni dë di i sa du di sa heepi i u du di peleikiwooko fii fajafaja. I musu ta fan ku di sëmbë di i ku ën ta peleiki a wan fasi di sa da unu degihati. I musu ta lei iseei soni u Bëibel hii juu a wan fasi di sa heepi i. Pooba dee soni di di köni saafu di dë u futoou taki taa u musu du, söseei buta maaka di i sa dou. Ma di möön gaan soni di i musu hoi a pakisei, hën da Jehovah da i di gaandi u dë wan Kotoigi fëën di ta paaja di bunu buka (Jesaaja 43:10). Awa, joo ta wai seei te i ta mbei möiti u ta dë fajafaja a di peleikiwooko hii juu!