1, 2. (a) Un woto Jesosi bi konda da dee gaan mati fëën? (Luku di peentje a bigi u di woto.) (b) Andi u musu ko sabi u di woto u dee sikapu ku dee kaabita?

JESOSI bi ta konda wan soni da dee gaan mati fëën, Petuisi, Andiasi, Jakobosi ku Johanisi. Di Jesosi kaba konda di woto u di köni saafu di dë u futoou, di woto u dee teni wëndjë mujëë mii ku di woto u dee talënti, hën a konda wan woto da dee mati fëën möön. A taki u wan ten di di sëmbë „di ko dë Libisëmbë Mii” o kuutu „hii sëmbë u goonliba”. A bi taki taa di sëmbë „di ko dë Libisëmbë Mii” o paati sëmbë a tu pei kulupu. A taa wan kulupu sëmbë o dë kuma sikapu, nöö di wotowan o dë kuma kaabita. Nöö a bi taki u wan woto kulupu sëmbë möön, di u dii kulupu. De da „dee sëmbë” u di Könu nasö dee baaa fëën.​—Lesi Mateosi 25:31-46.

² Leti kumafa dee apösutu bi kë sabi soni u di woto aki, sö nöö dee dinima u Jehovah u di ten aki kë sabi soni fëën  tu, u di a nama ku sëmbë libi. Jesosi bi taki taa so sëmbë o feni di libi u teego, ma wotowan o lasi de libi. Fëën mbei a dë taanga fanöudu fuu ko sabi andi di woto aki kë taki, söseei andi u musu du fuu sa feni di libi u teego. A di woto aki, woo piki dee hakisi aki: Unfa Jehovah heepi u fuu ko fusutan di woto u dee sikapu ku dee kaabita? Unfa u du sabi taa di woto aki ta lei u taa u musu du di peleikiwooko? Ambë musu peleiki? Nöö faandi mbei a dë fanöudu taa sëmbë musu heepi di „Könu” ku dee „baaa” fëën nöunöu?

3, 4. (a) Andi u musu ko sabi fuu sa fusutan di woto u dee sikapu ku dee kaabita? (b) Unfa di Watch Tower bi puu di woto aki a di jaa 1881?

³ Ee u kë fusutan andi di woto u dee sikapu ku dee kaabita kë taki, nöö u musu ko sabi (1) ambë da di sëmbë „di ko dë Libisëmbë Mii” nasö di Könu, ambë da dee sikapu ku dee kaabita, söseei ambë da dee „sëmbë” u di Könu nasö dee baaa fëën? U musu ko sabi (2) na un ten di sëmbë „di ko dë Libisëmbë Mii” o paati dee sikapu ku dee kaabita? ku (3) faandi mbei de kai so u dee sëmbë sikapu, nöö de kai dee wotowan kaabita?

⁴ A di jaa 1881, di Watch Tower bi taki taa di sëmbë „di ko dë Libisëmbë Mii” ku di Könu tuu, da Jesosi. Nöö a bi taki taa na dee baaa u di Könu wanwan nöö o tii a Gadu Könu makandi ku Jesosi, ma hii dee sëmbë dee o libi a goonliba dee an o abi zöndu möön. Di Watch Tower bi taki taa de bi o paati sëmbë a di pisiten u di Dusu Jaa Tii u Keesitu. Nöö a bi taki taa dee sëmbë dee bi ta djeesi Gadu a di fasi fa a ta du soni ku lobi, de de bi o kai sikapu.

5. Unfa dee sëmbë u Gadu bi ta fusutan di woto a di jaa 1923?

⁵ Bakaten Jehovah bi heepi dee sëmbë fëën u de ko fusutan di woto aki möön bunu. A di jaa 1923, di Watch Tower u 15 u tinimu-liba, bi taki taa di sëmbë „di ko dë Libisëmbë Mii” da Jesosi. Ma a bi lei ku wan tu Bëibel tëkisi taa dee baaa u di Könu nöö da dee sëmbë dee o tii ku Jesosi, söseei taa hii de tuu o dë a Gadu Köndë a di pisiten u di Dusu Jaa Tii. A bi taki tu taa dee sikapu da dee sëmbë dee o libi a goonliba te Jesosi ku dee baaa fëën o tii. Nöö u di di woto ta taki taa dee sëmbë dë ta heepi dee baaa u di Könu, mbei di paati di de o paati dee sikapu ku dee kaabita musu pasa a di ten di dee salufu baaa u Jesosi dë a goonliba jeti, hën da ufö di Dusu Jaa Tii bigi. Di Watch Tower dë, bi taki tu taa dee sikapu bi o dë dee sëmbë dee ta biibi a Jesosi, nöö dee ta biibi taa di Könuköndë o tja wan möön bunu libi ko.

6. Unfa di fasi fa u bi ta fusutan di woto ko tooka a di jaa 1995?

⁶ Sömëni jaa longi u bi ta mëni taa ku di peleikiwooko Gadu bi o kuutu dee sëmbë a di ten u di kaba. Te sëmbë bi tei di bunu buka, nöö de bi dë kuma sikapu, ma te de an bi kë tei ën, nöö de bi dë kuma kaabita. Ma a di jaa 1995, u bi ko fusutan di woto aki wan woto fasi. Di Waktitoren bi maaka Mateosi 24:29-31 (lesi ën) luku ku Mateosi 25:31, 32 (lesi ën), nöö a bi taki taa Jesosi o kuutu sëmbë a di pisiten u di gaan fuka te hën di  ko dë Libisëmbë Mii o ’ko ku di hei di a abi’. *​—Luku di pisi a basu.

7. Andi di woto u dee sikapu ku dee kaabita kë taki?

⁷ A di ten aki u ta fusutan di woto u dee sikapu ku dee kaabita gbelingbelin. U sabi taa di sëmbë „di ko dë Libisëmbë Mii” nasö di Könu da Jesosi. Dee baaa u di Könu da dee sëmbë dee salufu ku di santa jeje, nöö de o tii a Gadu Köndë makandi ku Jesosi (Loomë 8:16, 17). „Dee sikapu” ku „dee kaabita” da sëmbë u hii pei nasiön. De o kuutu dee sëmbë aki a di kaba pisi u di gaan fuka di o ko abiti möön. Nöö u sabi taa Jesosi o kuutu sëmbë a di fasi fa de libi ku dee salufuwan di dë a goonliba aki jeti. U dë ku tangi a hati seei taa Jehovah heepi u dee jaa dee pasa fuu ko fusutan di woto aki ku dee wotowan dee sikifi a Mateosi kapitel 24 ku 25!

8, 9. Faandi mbei Jesosi bi taki taa dee sikapu da „sëmbë di libi bunu a Gadu wojo”?

⁸ Jesosi an bi kai dee wöutu „peleiki” nasö „peleikiwooko” di a bi konda di woto u dee sikapu ku dee kaabita. Wë nöö unfa u du sabi taa di woto ta lei u taa di peleikiwooko da wan gaan fanöudu wooko di u musu du?

⁹ Wë ee u kë sabi, nöö u musu hoi a pakisei taa a di pisiten dë, Jesosi bi ta lei dee bakama fëën wan soni a wan nöngö fasi. An bi ta taki u tuutuu sikapu ku tuutuu kaabita. Wë a di wan seei fasi, an bi kë taki taa hiniwan sëmbë di de bi o feni taa dë wan sikapu, bi musu da dee salufuwan soni u njan ku soni u bisi, nasö sölugu de te de siki, nasö go luku de te de bi söötö de a dunguwosu. Nönö, Jesosi bi taki taa dee sikapu da sëmbë di „libi bunu a Gadu wojo”, u di de bi tei dee salufuwan kuma baaa fëën, nöö de bi heepi dee salufuwan a dee lasiti daka aki di taanga u pasa.​—Mateosi 10:40-42; 25:40, 46; 2 Timoteo 3:1-5.

10. Unfa dee sikapu sa heepi dee baaa u Keesitu?

¹⁰ Di Jesosi bi konda di woto u dee sikapu ku dee kaabita, nöö a bi taki u soni di bi o pasa a di ten u di kaba (Mateosi 24:3). A bi taki taa: „Di bunu buka u di Njunjun Tii u Gadu musu paaja te dou hii goonliba” (Mateosi 24:14). Nöö ufö a bi konda di woto u dee sikapu ku dee kaabita, a bi konda di woto u dee talënti. Jesosi bi konda di woto aki u lei dee salufuwan taa de musu peleiki fajafaja. Ma wan tu u de nöö dë a goonliba aki jeti, nöö di wooko di de musu du hia seei! Jesosi piki dee salufuwan taa de  musu paaja di bunu buka ’be hii föluku jei’ ufö di kaba dou. U ta lei a di woto u dee sikapu ku dee kaabita taa „dee sikapu” heepi dee baaa u Jesosi. Nöö wan u dee möön bunu fasi fa de sa du ën, hën da de musu heepi dee baaa u Jesosi u du di peleikiwooko. Ma nöö a tjika te u ta da möni u du di peleikiwooko nasö te u ta da dee baaa u Jesosi taanga u du di wooko u?

11. Andi so sëmbë sa hakisi deseei, nöö faandi mbei de sa hakisi deseei di soni dë?

¹¹ A di ten aki, aiti milion bakama u Jesosi dë a goonliba, nöö gaansë u de na salufuwan. Jesosi an bi da hii dee bakama fëën talënti. Dee salufu baaa fëën nöö a da (Mateosi 25:14-18). Fëën mbei so sëmbë sa hakisi deseei taa: ’Ee Jesosi an da m’ talënti, nöö a dë fanöudu u m’ peleiki tuutuu ö?’ Aai. Wë boo luku faandi mbei.

12. Andi u ta lei u dee soni Jesosi taki, di sikifi a Mateosi 28:19, 20?

¹² Jesosi bi piki hii dee bakama fëën taa de musu peleiki. Di Gadu weki Jesosi baka, hën a piki dee bakama fëën taa de musu lei sëmbë „be de bia ko dë bakama” fëën, söseei de musu lei de „hii dee soni” dee a manda de u de du. Fëën mbei dee bakama u Jesosi dë seei musu peleiki kumafa Jesosi bi taki (Lesi Mateosi 28:19, 20). U ta fusutan gbelingbelin taa hii u tuu musu peleiki, aluwasi u abi di houpu u go libi a Gadu Köndë nasö di houpu u libi a goonliba aki.​—Tjabukama 10:42.

13. Andi u ta lei u di soni di Johanisi bi si a di wojolimbo sunjan?

¹³ A di buku Akoalimbo, u ta lei taa dee salufuwan ku dee woto baaa tuu bi o du di peleikiwooko. Jesosi bi lei apösutu Johanisi wan soni a wan wojolimbo sunjan. A bi si „di mujëë u di Sikapu Mii”, ta kai sëmbë u de ko bebe wata di ta da sëmbë libi. Di mujëë da dee 144.000 salufuwan dee o tii makandi ku Jesosi a Gadu Köndë ala (Akoalimbo 14:1, 3; 22:17, NW). Di wata da di lusupaima u Jesosi di o heepi sëmbë u de ko abi wan telutelu libi. De an abi zöndu möön, nöö de an o ta dëdë möön tu (Mateosi 20:28; Johanisi 3:16; 1 Johanisi 4:9, 10). Dee salufuwan ta lei sëmbë fajafaja andi da di lusupaima, söseei unfa de sa feni wini fëën (1 Kolenti 1:23). Ma Johanisi bi si wan woto kulupu sëmbë a di wojolimbo sunjan di an dë salufuwan, ma di abi di houpu u libi a goonliba. Deseei de bi manda u kai sëmbë. De musu taki taa: ’Ko!’ Nöö de ta du di soni dë, u di de ta lei sëmbë soni u di bunu buka. Fëën mbei di wojolimbo sunjan aki ta lei taa hii dee sëmbë dee tei di bunu buka musu peleiki da wowotan.

14. Unfa u ta hoi „dee wëti u Keesitu”?

¹⁴ Hii dee sëmbë dee ta hoi „dee wëti u Keesitu” musu peleiki (Galasia 6:2).  Jehovah kë u hii dee sëmbë dee ta dini ën musu hoi dee seei wëti aki tu. A di ten di pasa, a bi kë taa dee Isaëli sëmbë ku dee woto köndë sëmbë dee bi ta libi a de mindi tuu bi musu hoi dee wëti fëën (Ëkisodesi 12:49; Leifitiki 24:22). Wë a di ten aki an dë fanöudu u hoi hii dee wëti dee Jehovah bi da dee Isaëli sëmbë. Ma aluwasi wa dë salufuwan seei, u musu hoi „dee wëti u Keesitu”. Wan u dee möön fanöudu soni di Jesosi bi lei u, da di lobi di u musu ta lobi wotowan (Johanisi 13:35; Jakobosi 2:8). U musu lobi Jehovah, Jesosi ku woto sëmbë. Nöö di möön bunu fasi fa u sa lei taa u lobi wotowan, da te u ta konda soni u di bunu buka u di Könuköndë da de.​—Johanisi 15:10; Tjabukama 1:8.

15. Faandi mbei u sa taki taa Jesosi bi manda hii dee bakama fëën u de peleiki?

¹⁵ So juu wan soni di Jesosi bi piki dee bakama fëën sa dë da sömëni u dee bakama fëën. Ku 11 u dee bakama fëën wanwan Jesosi bi mbei wan buka, nöö a bi paamusi de taa de bi o tii a di Könuköndë fëën. Ma 144.000 sëmbë o tii makandi ku ën (Lukasi 22:29, 30; Akoalimbo 5:10; 7:4-8). Nöö di Gadu bi weki Jesosi baka, wan tu u dee bakama fëën nöö bi jei di a bi manda de u de go peleiki (Tjabukama 10:40-42; 1 Kolenti 15:6). Ma hii dee bakama u Jesosi u di fosu jaahöndö bi du di soni di a bi manda de dë (Tjabukama 8:4; 1 Petuisi 1:8). Sö nöö a di ten aki, u sabi taa u musu peleiki, hii  fa wa jei Jesosi piki u taa u musu du di wooko aki. Ee u luku ën bunu, u dë aiti milion sëmbë ta du di peleikiwooko. U sabi taa ku di peleikiwooko di u ta du, u ta lei taa u ta biibi a Jesosi tuutuu.​—Jakobosi 2:18.

16-18. Unfa u sa heepi dee baaa u Keesitu, nöö faandi mbei nöunöu u musu du ën?

¹⁶ Möönmöön Saatan ta feti ku dee salufu baaa u Keesitu dee dë a goonliba aki jeti, nöö a sabi tu taa „ten fëën ko sati” (Akoalimbo 12:9, 12, 17). Ma hii fa Saatan ta feti ku dee salufuwan, de ta tei fesi a di peleikiwooko go dou, nöö möönmöön sëmbë ta ko jei soni u di bunu buka. U ta si gbelingbelin taa Jesosi dë ku dee salufuwan, söseei taa a ta tii de.​—Mateosi 28:20.

¹⁷ U ta tei ën u bigi taa u sa heepi dee baaa u Keesitu ku di peleikiwooko. U ta heepi de tu te u ta da möni ku te u ta wooko taanga u mbei Könuköndë zali, u mbei kamian u hoi gaan komakandi, ku bëikantoo. Di „köni saafu di dë u futoou” buta dee gaanwomi u kemeente ku woto baaa a wooko. Te u ta piki de buka, nöö u ta lei taa u kë heepi dee baaa u Keesitu.​—Mateosi 24:45-47; Hebelejën 13:17.

¹⁸ Abiti möön dee salufuwan dee dë a goonliba aki jeti, o kisi di lasiti sitampu. Baka di dë, dee basia u Gadu o disa dee „fö ventu” u de „musu böö ko a di goonliba”, nöö di gaan fuka o bigi (Akoalimbo 7:1-3). Ufö Amagedon bigi, Jesosi o tei dee salufuwan tja go a Gadu Köndë (Mateosi 13:41-43). Fëën mbei ee u kë u Jesosi feni u kuma wan sikapu te a o ko kuutu sëmbë, nöö nöunöu kaa u musu heepi dee salufu baaa u Keesitu.