1, 2. (a) Andi Jesosi bi taki u dee lasiti daka? (b) Un hakisi woo luku?

PAKISEI fa Jesosi dë sindosindo a di Olëifi Kuun a Jelusalen ta luku di Wosu u Gadu. A dë ku fö u dee apösutu fëën de kai, Petuisi, Andiasi, Jakobosi, ku Johanisi. De ta haika bunu fa Jesosi ta konda di tjabukama woto di nama ku di ten di ta ko. Di tjabukama woto ta taki andi bi o pasa a dee lasiti daka u di hogi goonliba aki te Jesosi bi o tii a di Könuköndë u Gadu. Jesosi piki de taa a di ten dë „di köni saafu di dë u futoou” o tei fesi u wooko dëën a goonliba aki u ta da dee bakama fëën njanjan a di soifi ten.​—Mateosi 24:45-47.

² A di wan seei tjabukama woto Jesosi konda di woto u dee teni wëndjë mujëë mii (Lesi Mateosi 25:1-13). A di woto aki woo luku dee hakisi aki: (1) Andi Jesosi bi kë lei u ku di woto aki? (2) Unfa dee salufuwan dee ta hoi deseei a Gadu bi fiti di lai u di woto di Jesosi bi konda, nöö un wini fëën  de feni? (3)  Unfa hiniwan fuu a di ten aki sa feni wini u di woto di Jesosi bi konda?

3. Unfa dee buku fuu bi puu di woto u dee teni wëndjë mujëë mii a di ten di pasa, nöö andi bi pasa di de puu ën sö?

³ A di fosu woto u bi lei taa a dee jaa dee pasa, di saafu di dë u futoou bi tooka di fasi fa a bi puu so u dee woto dee dë a di Bëibel. Nöunöu di saafu di dë u futoou ta möön buta pakisei a dee soni dee u sa lei a dee woto aki, ma an ta buta pakisei sö möön a dee pikipiki soni di wan woto bi o kë taki. Luku di woto di Jesosi bi konda u dee teni wëndjë mujëë mii. A dee buku fuu u bi lo’ u taki taa dee lampu, di oli ku dee bata bi kë lei u wan soni u wan sëmbë nasö a kë taki wan woto soni. A sa dë sö taa te i ta buta pakisei a dee möön pikipiki soni u di woto, nöö i ta lasi di möön fanöudu soni di u musu lei a di woto dë u? A dë fanöudu seei u feni di piki u di hakisi aki.

4. Unfa u du sabi ambë (a) da di womi di ta toou? (b) da dee wëndjë mujëë mii?

⁴ Boo luku andi Jesosi bi kë lei u di a konda di woto. Di fosu soni, hën da i musu sabi dee sëmbë dee dë a di woto u dee teni wëndjë mujëë mii. Ambë da di womi di ta toou? Hën da Jesosi. U sabi taa Jesosi hën ta toou, u di a bi taki a fesi kaa taa hën da di womi di ta toou (Lukasi 5:34, 35). Ambë da dee wëndjë mujëë mii? De da di „piki hipi”, nöö de da dee salufu bakama u Keesitu. Unfa u du sabi di soni aki? A di woto, dee wëndjë mujëë mii bi musu dë kabakaba ta wakiti ku dee lampu u de sëndësëndë u te di womi di ta toou ko dou. Wë luku andi Jesosi bi piki dee salufu bakama fëën: „Un musu dë kabakaba e, ku faja sëndësëndë a unu maun. Un musu bisi wooko koosu, be i dë kabakaba ta luku di Masa fuunu. Nöö woon dë leti kuma wanlö futuboi de Masa go a kamian a wan piizii. Nöö de o dë a wosu dë pii kabakaba ta luku ën, fu te a ko dou” (Lukasi 12:32, 35, 36). Apösutu Paulosu ku apösutu Johanisi bi seei tei dee salufu bakama u Keesitu maaka ku wëndjë mujëë mii (2 Kolenti 11:2; Akoalimbo 14:4). Fëën mbei u sa taki taa di soni di Jesosi bi taki a Mateosi 25:1-13 nama ku dee salufu bakama fëën.

5. Unfa Jesosi bi lei ku un pisiten di woto di a bi konda bi nama?

⁵ Ku un pisiten di soni di Jesosi bi taki aki nama? Di soni di Jesosi bi taki a kaba u di woto ta heepi u fuu sabi fu un pisiten a bi ta taki. A bi taa: „Di womi ko” (Mateosi 25:10). A di Waktitoren u 15 u baimatu-liba u 2013 u bi lei taa di tjabukama woto di dë a Mateosi 24 ku 25 ta taki aiti pasi u di „ko” u Jesosi. Te Jesosi bi ta taki taa a o „ko”, nöö a bi ta taki u di ko di a o ko a di pisiten u di gaan fuka u ko poi di hogi goonliba aki kaba a sösö. Fëën mbei u sa taki taa di woto di Jesosi bi konda nama ku dee lasiti daka,  ma Jesosi seei hën a o „ko” a di pisiten u di gaan fuka.

6. Andi da di fanöudu soni di u musu lei a di woto aki?

⁶ Andi da di fanöudu soni di u musu lei a di woto aki? Hoi dee woto soni di Jesosi bi taki di a konda di Bëibel woto aki a pakisei. A Mateosi kapitel 24, Jesosi bi taki ambë da „di köni saafu di dë u futoou”. Di saafu dë bi o dë di piki kulupu u womi di dë salufuwan, di bi o ta tei fesi da dee bakama u Keesitu a di pisiten u dee lasiti daka. Jesosi bi piki dee womi aki taa de musu hoi deseei a Gadu. A kapitel 25 Jesosi bi tei di wan seei woto u dee teni wëndjë mujëë mii u da hii dee salufu bakama fëën lai dee ta libi a dee lasiti daka u di goonliba aki. Di soni di a bi kë lei de, hën da de bi musu „dë seei kabakaba hiniwanten” sö taa de an lasi di libi di de bi o feni a Gadu Köndë ala (Mateosi 25:13). Boo luku di woto nöunöu u si fa dee salufuwan bi lei taa de tei di lai aki.

7, 8. (a) Faandi mbei dee köni wëndjë mujëë mii bi dë kabakaba ta wakiti? (b) Unfa dee salufuwan dë seekaseeka?

⁷ A di woto, Jesosi bi taki gbelingbelin taa dee köni wëndjë mujëë mii an bi dë kuma dee don wëndjë mujëë mii, ma de bi dë kabakaba ta wakiti di womi di ta toou faa ko dou. Unfa sö? Wë de bi seeka deseei ta hoi a pakisei taa di womi ta ko. Hii dee teni wëndjë mujëë mii bi musu dë kabakaba ta wakiti ku dee lampu u de sëndësëndë hii di ndeti. Dee feifi köni wëndjë mujëë mii an bi dë kuma dee woto don wëndjë mujëë mii, ma de bi dë seekaseeka, u di de bi tja oli tjika u dee lampu u de an bi sa tapa. Unfa dee salufu bakama u Keesitu dee ta hoi deseei a Gadu, seeka deseei da di ko di Jesosi o ko?

⁸ Dee salufuwan dë seekaseeka u du di wooko di de musu du u te di kaba u di goonliba aki dou. De sabi taa di dini di de ta dini Gadu o mbei de o abi u disa dee gudu u di goonliba u Saatan. Nöö de dë kabakaba u du ën tu. Na u di de sabi taa di kaba u di goonliba aki zuntu, mbei de dë kabakaba u dini Jehovah ku hii de hati, ma de ta du ën u di de lobi Jehovah ku di Womi Mii fëën. U di de ta hoi deseei a Gadu mbei de an ta tja deseei go nama ku dee gudu u di goonliba aki, di libi di sëmbë ta libi fanafiti, söseei ku di pakisei di sëmbë ta pakisei deseei nöö. Dee köni wëndjë mujëë mii bi dë kabakaba ta wakiti ku dee lampu u de sëndësëndë. Sö nöö dee salufuwan dë kuma fajalimbo di ta sëndë njaan, ta wakiti di womi di ta toou faa ko dou, hii fa a sa djei kuma a ta ko lati seei.​—Filipi 2:15.

9. (a) Andi Jesosi bi piki dee sëmbë dee kë kai a duumi? (b) Andi dee salufuwan du di de jei di töngö bai taa: „Di womi ta ko e!” (Luku söseei di pisi a basu.)

⁹ U di dee köni wëndjë mujëë mii bi dë seekaseeka, mbei de bi dë kabakaba ta wakiti di womi di ta toou faa ko dou. A di woto di Jesosi bi konda, hii dee teni  wëndjë mujëë mii bi „duumi”, di de ta bi wakiti di womi di ta toou. Di de bi si kuma a bi o dou lati. A di ten aki a sa pasa taa dee salufu bakama u Keesitu sëmbë sa „duumi”, u di soni sa puu de pakisei hii fa de ta wakiti Keesitu faa ko u? Wë aai. Jesosi bi sabi taa wan sëmbë di bi o kë dini Gadu ku hii ën hati seei bi o ko suwaki, nasö taa soni bi o sa puu hën pakisei hii fa a ta wakiti faa ko. Fëën mbei dee salufu bakama u Keesitu ta mbei möön möiti u de sa dë kabakaba ta wakiti ën. Faandi mbei u sa taki taa de ta mbei möön möiti? A di woto, hii dee teni wëndjë mujëë mii bi hopo di di töngö bai taa: „Di womi ta ko e!” Ma dee köni wëndjë mujëë mii nöö bi dë kabakaba (Mateosi 25:5, 6; 26:41). Di wan seei soni dee salufu bakama u Keesitu du a dee lasiti daka aki di de jei di töngö bai taa: „Di womi ta ko e!” De ta biibi hii dee soni di Jesosi bi taki u di ko fëën, nöö de dë kabakaba ta wakiti ën faa ko dou. * (Luku di pisi a basu.) Boo go luku di kaba pisi u di woto di Jesosi bi konda, di ta taki soni u wan apaiti pisiten.

10. Andi u sa hakisi useei te u luku di soni di dee köni wëndjë mujëë mii piki dee don wëndjë mujëë mii?

¹⁰ A kaba u di woto dee don wëndjë mujëë mii bi hakisi dee köni wëndjë mujëë mii u da de oli u buta a dee lampu u de. Ma dee köni wëndjë mujëë mii an bi kë da de (Lesi Mateosi 25:8, 9). Ma a pasa wan daka kaa taa dee salufu bakama u Keesitu an bi kë heepi wan sëmbë di abi heepi fanöudu ö? Pakisei u di pisiten di di woto ta taki. Jesosi, di Womi di ta toou o ko kuutu sëmbë a wan ten di zuntu ku di kaba u di gaan fuka. Fëën mbei u sa ta taki taa di soni taki aki, ta lei u andi o pasa kölö sö ufö di kaba u di gaan fuka. Faandi mbei u taki sö? Wë biga a di ten dë, dee salufuwan o kisi di lasiti sitampu kaa.

11. (a) Andi o pasa kölö sö ufö di gaan fuka bigi? (b) Andi dee köni wëndjë mujëë mii bi kë taki di de piki dee don wëndjë mujëë mii u go bai oli?

¹¹ Hën da ufö di gaan fuka bigi, hii dee salufuwan dee hoi deseei a Gadu dee dë a goonliba aki jeti o kisi di lasiti sitampu u de (Akoalimbo 7:1-4). Te de kisi di lasiti sitampu, nöö de dë seiki taa de o go a Gadu Köndë. Ma pakisei andi o pasa a dee jaa ufö di gaan fuka ko. Andi o pasa ku dee salufuwan dee an bi dë kabakaba u di de an hoi deseei a Gadu? De an o feni di lasiti sitampu. A di ten dë Gadu o salufu woto Keesitu sëmbë di hoi deseei nëën. Te di gaan fuka bigi, dee don salufuwan hati o latja seei te de si taa di Gaan Babilon poi kaba a sösö. A di ten dë ufö de o ko fusutan taa de an dë kabakaba da di ko u Jesosi. Andi o pasa ku de a di ten dë te de o ta hakisi sëmbë u heepi de? Di piki sikifi a di woto di Jesosi bi konda. Dee köni wëndjë mujëë mii an bi kë da dee don wëndjë mujëë mii oli, ma de piki de be de go bai oli. A di juu dë a bi dë „tuwalufu juu u ndeti” na wan sëmbë an bi dë u sei oli da de, biga a bi lati kaa!

12. (a) Andi o pasa a di pisiten u di gaan fuka ku dee salufuwan dee an bi hoi deseei a Gadu ufö de kisi di lasiti sitampu? (b) Andi o pasa ku dee salufuwan dee dë kuma dee don wëndjë mujëë mii?

 ¹² A di ten u di gaan fuka dee salufuwan dee hoi deseei a Gadu an o sa heepi na wan sëmbë di an hoi ënseei a Gadu. A o lati kaa. Nöö andi o pasa ku dee salufuwan dee an bi hoi deseei a Gadu? Luku andi bi pasa ku dee don wëndjë mujëë mii dee bi go bai oli. „Di womi ko miti ku de feifi mujëë mii dee bi fika dë, nöö hën de tjëën go a di tööuwosu. Nöö di de go dou, hën de tapa döö gbalai söötö”. Te Jesosi o ko a di kaba u di gaan fuka, nöö a o tei dee salufuwan dee hoi deseei a Gadu tja go a Gadu Köndë (Mateosi 24:31; 25:10; Johanisi 14:1-3; 1 Tesalonika 4:17). Ma Jesosi an o tei dee salufuwan dee an hoi deseei a Gadu. Leti kuma dee don wëndjë mujëë mii, de o ta bai taa: „Gaantangi o, . . . Un ko jabi döö da u baa”. Ma andi Jesosi o piki de? Wë a o piki de di wan seei soni di a o piki dee sëmbë dee a bi taki taa dë kuma kaabita. A o piki de taa: „Un go kumutu dë e! Ma sabi unu seei!”​—Mateosi 7:21-23; 25:11, 12.

13. (a) Faandi mbei wa sa taki taa sömëni u dee salufu bakama u Keesitu an o hoi deseei a Gadu? (b) Faandi mbei u sa taki taa di woto di Jesosi bi konda ta lei taa a bi abi futoou a dee salufu Keesitu sëmbë? (Luku di peentje a bigi u di woto.)

¹³ Kë Jesosi bi kë taki taa sömëni salufuwan an bi o hoi deseei a Gadu, sö taa Gadu bi sa salufu wotowan a de kamian u? Wë nönö. A Mateosi kapitel 24, u ta lesi taa Jesosi bi bai di köni saafu di dë u futoou taa an musu bia ko toon takuhati saafu. Di soni aki an kë taki taa Jesosi bi sabi taa di soni dë bi o pasa ku di köni saafu. A bi konda di woto u dee teni wëndjë mujëë mii u bai di saafu a fesi. Leti kumafa feifi u dee wëndjë mujëë mii bi don, nöö feifi u de bi köni, sö nöö hiniwan salufu bakama u Keesitu musu sabi ee a o dë seekaseeka ta wakiti ën. Ee de an du ën, nöö de sa ko dë kuma don wëndjë mujëë mii, nöö de an o hoi deseei a Gadu möön. Paulosu piki dee salufu baaa ku sisa fëën di wan seei soni (Lesi Hebelejën 6:4-9; nöö maakëën luku ku Detolonomi 30:19). Di soni di a bi piki de bi nama ku de. Ma a bi abi di futoou taa dee baaa ku sisa fëën bi o feni di u de paka. Di soni di Jesosi bi taki a di woto u dee teni wëndjë mujëë mii bi ta lei taa di wan seei futoou a bi abi a dee salufuwan. A bi sabi taa hiniwan u dee salufu futuboi fëën bi o sa tan hoi deseei a Gadu sö taa de sa feni di gaan paka u de!

14. Faandi mbei dee „oto sikafu” seei sa feni wini u di woto di Jesosi bi konda u dee teni wëndjë mujëë mii?

¹⁴ Di woto di Jesosi bi konda bi nama ku dee salufu Keesitu sëmbë. Ma dee „oto sikafu” sa fini wini u di woto di Jesosi bi konda tu ö? (Johanisi 10:16). Aai!  Di soni di di woto ta lei u hën da u musu: „Dë seei kabakaba hiniwanten.” Nöö Jesosi bi taki taa: „Fa i si mi ta fan ku unu aki, nöö sö nöö mi ta fan ku hii sëmbë. Un musu dë kabakaba ta luku mi e, dee sëmbë” (Maikusi 13:37). Jesosi kë taa hii dee bakama fëën dë seekaseeka ta wakiti ën. Nöö hii Keesitu sëmbë sa djeesi dee salufuwan a di buta di de ta buta di peleikiwooko a di fosu kamian a de libi. Ja musu fëëkëtë taa dee don wëndjë mujëë mii bi hakisi dee köni wëndjë mujëë mii u da de so u di oli u de. Ma de an bi da de. Di soni aki ta lei u taa hiniwan fuu musu hoi useei a Gadu fuu sa dë seekaseeka ta wakiti Jesosi. Na wan sëmbë sa du di soni dë da u. Hiniwan fuu sabi taa Jesosi Keesitu di ta kuutu soni a wan letifasi ta ko. Fëën mbei u musu dë kabakaba!

15. Faandi mbei di toou di Keesitu o toou ku di mujëë fëën o dë wan piizii soni da hii dee tuutuu bakama u Keesitu?

¹⁵ Hii Keesitu sëmbë ta piizii seei da di toou di o toou di Jesosi bi taki fëën a di woto di a bi konda. A di ten di ta ko baka di gaan feti Amagedon, nöö dee salufu bakama u Keesitu o toon di toou mujëë u Keesitu (Akoalimbo 19:7-9). Hii sëmbë a goonliba o feni wini u di toou aki di o toou a Gadu Köndë. Faandi mbei? U di a o tja wan bumbuu tii ko da hii libisëmbë. Aluwasi u abi di houpu u libi u teego a Gadu Köndë nasö a goonliba aki, boo ta mbei möiti hii juu u dë seekaseeka ta wakiti Jesosi. Ee u du hii dee soni aki, nöö woo feni di gaan bunu di Jehovah seeka da u a di ten di ta ko!