So sëmbë di an toou jeti, di ta dini Gadu bi taki di wan seei soni. De sabi taa Jehovah kë taa dee sëmbë dee ta dini ën musu toou ku sëmbë di dë „wan biibima tu”. Hën da ku wan sëmbë di dë wan tuutuu Keesitu sëmbë nöö de musu toou (1 Kolenti 7:39). Wë nöö faandi mbei so Keesitu sëmbë ta taki dee soni aki?

Dee baaa ku sisa dee taki dee soni aki, sa feni taa sisa di na toou, hia möön baaa di na toou. Sö a dë a sömëni köndë tuu. Wë a di köndë de kai Kolea, a dë sö taa te i tei 100 Kotoigi di na toou, nöö 57 u de o dë sisa, nöö 43 u de o dë baaa. A di köndë de kai Kolombia, te i tei 100 Kotoigi di na toou, nöö 66 u de o dë sisa, nöö 34 u de o dë baaa.

A so köndë, a sa pasa taa dee mama ku dee tata dee an dë Kotoigi ta hakisi gaan hia möni nasö diidii soni te de o da di mujëë mii u de manu. Nöö so baaa di na toou an sa paka di lö paima dë. Te u kaba fëën, so sisa ta hakisi deseei ee wan daka de o sa feni wan manu a di biibi. *​—Luku di pisi a basu.

Ee i ta si kuma joo fika a ganda, nöö i sa dë seiki taa Jehovah ta fusutan i, nöö a saanfa i ta fii tuutuu.​—2 Kloniki 6:29, 30.

Ma hii fa i sa fii sö, tökuseei Jehovah ta piki u a di Bëibel taa ku wan biibima nöö u musu toou. Faandi mbei? U di a sabi andi möön bunu da u, nöö an kë hogi miti u. An kë taa u du soni di o hati u bakaten nasö di o mbei u bai sabisö. A di ten u Nehemia, sömëni u dee Dju bi toou ku mujëë di an bi ta dini Gadu. Fëën mbei Nehemia bi piki de  andi bi pasa ku Salumon, di a bi go toou ku mujëë di an bi ta dini Gadu. Gadu „bi lobi ën [Salumon] tee taa a bi butëën ko könu u hii Isaëli. Ma tökuseei dee woto köndë mujëë fëën bi mbei a go du zöndu” (Nehemia 13:23-26). Jehovah sabi taa dee wëti dee a ta da u bunu da u, nöö fëën mbei a piki dee Keesitu sëmbë taa ku wan sëmbë di dë a di biibi nöö de musu toou (Psalöm 19:7-10; Jesaaja 48:17, 18). U dë ku tangi a hati seei taa a ta da u lai di u sa futoou, di ta lei taa a lobi u. Te u ta piki Jehovah buka kuma di Tiima fuu, nöö u ta lei taa a abi di leti u piki u andi u musu du.​—Nöngö 1:5.

U dë seiki taa ja kë ’tai iseei ku sëmbë di na ta biibi Gadu’, hën da ja kë toou ku wan sëmbë di na lobi Jehovah. Di sëmbë dë sa mbei ja dini Gadu möön (2 Kolenti 6:14). Dee soni Jehovah ta piki u, ta heepi u hii juu, nöö sömëni Keesitu sëmbë a di ten aki du wan köni soni u di de buta taa de o ta piki hën buka a soni. Ma so Keesitu sëmbë an bi du di soni dë.

Wan sisa de ta kai Maggy *(Luku di pisi a basu.) di ta libi a di köndë de kai Ösutualia, bi ko lobi wan womi di na dë wan Kotoigi. A taki taa: „Mi misi sömëni komakandi u di m’ bi kë dë nëën bandja. Te u mi kë mëni, mi bi go a baka a di biibi seei”. Wan woto sisa de kai Ratana di ta libi a India bi ko lobi wan womi mii di hën ku ën bi ta sindo a di wan kalasi, di bigi lei soni u Bëibel. Ma di womi mii bi ta lei soni u Bëibel u di a bi kë ën. Te u kaba fëën, a disa Jehovah u dini, hën a go a wan woto keiki faa sa toou ku di womi mii.

Wan njönku sisa de kai Ndenguè u wan köndë de kai Kamelun, bi abi 19 jaa di a toou ku wan womi di an bi ta dini Jehovah. Ufö de bi toou, di womi bi piki ën taa an bi o tapëën faa dini Gadu. Ma tu wiki baka di de toou, hën a piki ën taa an o disëën faa go a dee komakandi möön. Di sisa aki taki taa: „M’ bi ta fii taa mi dë mi wanwan, nöö sösö këë m’ bi ta këë. Mi bi ko fusutan taa ma bi o sa du andi m’ kë möön. Hii juu di soni dë bi ta hati m’.

A dë sö tuu taa so baaa ku sisa toou ku wan sëmbë di na ta dini Jehovah, di bi abi bunu fasi jeti baka di de toou. Ma hii fa di sëmbë di i ku ën toou abi bunu fasi, andi sa pasa ku di matifasi fii ku Jehovah? Unfa joo fii te i sabi taa ja bi haika di lai di Jehovah bi da i fii sa abi wan bunu libi? Ma di möön fanöudu soni di i musu hakisi iseei da, unfa Jehovah o fii u di soni di i du dë?​—Nöngö 1:33.

Baaa ku sisa a hii së u goonliba di bi tei di lai di Jehovah bi da de u toou ku wan sëmbë di dë „wan biibima tu”, dë seiki taa di soni dë da di möön bunu soni u du. Baaa ku sisa di kë toou ta mbei hii möiti u toou ku wan sëmbë di ta dini Jehovah, u di de sabi taa di soni dë o mbei Jehovah piizii. Wan sisa de kai Michiko di ta libi a di köndë Japan, bi kë piki Jehovah buka, hii fa dee famii fëën bi ta pooba u mbei a toou ku wan sëmbë di an lobi Jehovah. A bi ta taanga dëën te a bi ta si so u dee mati fëën ta toou ku sëmbë di ta dini Jehovah, hii fa an bi toou jeti. A taa: „Mi bi ta piki m’ seei këdë taa u di Jehovah da wan ’piizii Gadu’, mbei wa musu u toou fuu sa dë waiwai. Mi ta biibi tu taa a ta da u dee soni dee u hati ta kë. Hën da ee wa sa feni wan sëmbë fuu ku ën toou, nöö a möön bunu fuu dë fuu sö u te u feni wan sëmbë” (1 Timoteo 1:11). Bakaten, Michiko feni wan bumbuu baaa toou, nöö a ta wai seei u di a bi tei di lai u Jehovah.

Baaa dë tu di bi wakiti u te de feni wan bunu sëmbë di de sa toou ku ën. Wan baaa de kai Bill di ta libi a di köndë Ösutualia, taa wan ten bi dë di a bi ta si hanse mujëë di na bi ta dini Jehovah, nöö a bi lobi fa de dë. Ma an bi ta nama ku de poi u di di soni dë bi sa mbei taa a tja hënseei go ’tai ku wan sëmbë di na ta biibi Gadu’. A bi pasa taa a bi ko lobi wan tu sisa, ma de an bi kë ën. Bill wakiti 30 jaa longi ufö a feni wan sisa di bi abi dee seei maaka kuma hën. A taa: „Ma bai sabisö. M’ ta fii taa Gadu limbo di pasi u m’, biga mi ku m’ mujëë nango a di peleikiwooko makandi, u ta lei soni u Bëibel makandi, nöö u ta dini ën makandi tu. Mi ta wai te m’ ta miti dee mati u di mujëë u mi, biga  hii de tuu da sëmbë di ta dini Jehovah. U ta wooko ku dee mama wëti u Bëibel u mbei soni waka möön bunu a di toou libi fuu”.

Andi i sa du a di pisiten di i ta wakiti fii feni wan sëmbë u toou di ta dini Jehovah, u di i ta futoou dee lai u Jehovah? I sa tei di ten u pakisei faandi mbei ja toou. Ee i ko fusutan taa u di i kë hoi di wëti u Jehovah mbei ja toou jeti, nöö i sa dë seiki taa Jehovah ta piizii u di soni dë hedi (1 Samuëli 15:22; Nöngö 27:11). Söseei i musu ta begi Jehovah hii juu ta piki ën unfa i ta fii tuutuu (Psalöm 62:8). Ee i ta mbei hii möiti u finga futu da tesi hiniwan daka, söseei u feti ku dee taku fii dee ta ko a i hati, nöö i ku Jehovah o ko dë möön gaan mati. I sa dë seiki taa Jehovah ta booko hën ku di fasi fa i ta fii ku dee soni dee i abi fanöudu u di i dii nëën wojo. Jehovah an paamusi na wan sëmbë taa a o dëën mujëë nasö manu. Ma ee di soni dë i abi fanöudu tuutuu, nöö Jehovah sabi di möön bunu fasi fa a musu da i dee soni i abi fanöudu​—Psalöm 145:16; Mateosi 6:32.

Kandë so juu i sa fii kuma Dafiti, di bi taki taa: „Piki mi hesihesi o, Jehovah. Kaakiti u mi kaba. Na tjubi fesi fii da mi” (Psalöm 143:5-7, 10). Na lasihati. Da Jehovah ten faa lei i andi a kë taa i musu du. Haika Jehovah te i ta lesi di Bëibel, nöö pakisei fundu u dee soni i lesi. Di soni dë o heepi i u ko sabi andi Jehovah kë taa i musu du, söseei a o heepi i u ko sabi unfa a bi heepi dee dinima fëën a di ten di pasa. Te i ta haikëën, nöö joo abi di degihati u du dee soni a ta piki i fii du.

Andi i sa du möön a di pisiten di ja toou sö taa i sa dë waiwai? I sa mbei möiti u ko dë möön gaan mati ku Jehovah, söseei u ko abi wan bunu në nëën. I sa lei u ko dë wan sëmbë di lo’ u da wotowan soni, wan sëmbë di ta wooko taanga, wan sëmbë di sa’ u libi ku wotowan, söseei u ko dë wan sëmbë di ta hoi iseei a Jehovah. A dë fanöudu u ko abi dee fasi aki ee i kë abi wan bunu toou libi (Kenesesi 24:16-21; Luti 1:16, 17; 2:6, 7, 11; Nöngö 31:10-27). Suku di Könuköndë u Gadu fosu u di i ta wooko taanga a di peleikiwooko, söseei a di kemeente fii. Dee soni aki o heepi i fu ja du wan soni di na bunu. Bill taki u dee jaa dee an bi toou taa: „De pasa hesihesi! Mi tei di ten dë u dini Jehovah kuma pionili.”

Di piki di Jehovah piki u taa u musu toou ku „wan biibima”, da wan soni di fiti da di ten fuu aki jeti. Te u buta taa woo toou ku wan sëmbë di dë wan tuutuu bakama u Keesitu, nöö u ta bigi Jehovah, nöö u ta mbei a ta piizii. Di Bëibel taki taa: „Di sëmbë di abi gaan lesipeki da Jehovah ta dë waiwai. A ta piizii seei ku dee wëti fëën. Gudu ku diidii soni dë a di wosu fëën, nöö u teego a o ta du soni di leti a Gadu wojo” (Psalöm 112:1, 3). Fëën mbei i musu mbei hii möiti u hoi di wëti u Gadu u toou ku wan „biibima tu”.