1, 2. Faandi mbei Jesosi bi konda di woto u dee talënti?

JESOSI bi konda di woto u dee talënti u lei dee salufu bakama fëën un faantiwöutu de abi. Ma di woto aki nama ku hii dee bakama u Jesosi. Aluwasi u abi di houpu u go libi a Gadu Köndë nasö u libi a goonliba aki, tökuseei u musu ko fusutan andi di woto aki kë taki.

² Na un ten Jesosi bi konda di woto u dee talënti? A bi kondëën di a ta piki dee bakama fëën un maaka de bi o si, di bi o lei taa a toon Könu, söseei taa di ten u di kaba bigi (Mateosi 24:3). Di woto u dee talënti da wan pisi u di maaka di u bi o si a di ten fuu aki.

3. Andi u ta lei u dee woto dee sikifi a Mateosi kapitel 24 ku 25?

³ Di Jesosi bi konda di woto u dee talënti, a bi konda dii woto jeti di bi o lei taa u ta libi a di ten u di kaba. Hii dee woto aki ta taki u dee fasi di dee bakama fëën musu abi. U sa lesi dee woto dë a Mateosi 24:45 te go miti 25:46. Di fosu woto ta taki u di saafu di dë u futoou, di dë di piki kulupu u dee salufuwan di abi di faantiwöutu u lei dee sëmbë u Jehovah soni. De musu dë u futoou, söseei de musu ta du  soni a wan köni fasi tu. * (Luku di pisi a basu.) Di woto di Jesosi konda baka di dë, ta taki u dee teni wëndjë mujëë mii. A di woto dë, Jesosi bi piki dee salufuwan taa de bi musu dë seekaseeka ta wakiti ën, u di de an bi o sabi di daka nasö di juu di a bi o ko. * (Luku di pisi a basu.) Baka di dë, Jesosi konda di woto u dee talënti u lei hii dee salufuwan taa a bi o dë fanöudu u de mbei taanga möiti u tja dee faantiwöutu u de. Te u kaba fëën, Jesosi konda di woto u dee sikapu ku dee kaabita, di ta taki u dee sëmbë dee abi di houpu u libi a goonliba aki. A bi lei de gbelingbelin taa de an musu disa dee salufu baaa fëën, söseei taa de musu du hii soni di de sa du u heepi de. * (Luku di pisi a basu.) A di woto aki, woo luku andi di woto u dee talënti kë taki.

4, 5. Ambë da di womi u di woto u dee talënti, nöö andi da wan talënti?

⁴ Lesi Mateosi 25:14-30. A di woto u dee talënti, Jesosi bi taki u wan womi di bi go a waka a wan oto köndë. A wan woto di dë kuma disi, Jesosi bi taki u wan womi di bi go a wan longi köndë fu de butëën ko könu. * (Luku di pisi a basu.) (Lukasi 19:12). Sömëni jaa kaa u bi ta taki a dee buku fuu taa di womi di bi go a wan woto köndë, a di woto u dee talënti ku di u dee mina da Jesosi. A bi go a Gadu Köndë a di jaa 33. Ma Jesosi an bi toon Könu wantewante di a go a Gadu Köndë. A bi wakiti u te di jaa 1914 dou, di Gadu buta dee felantima fëën „nëën basu, kuma wan piki bangi i ta buta futu.”​—Hebelejën 10:12, 13.

⁵ Jesosi bi taki taa di womi u di woto di a bi konda, bi abi aiti talënti. Hën da a bi abi gaan hia möni seei. * (Luku di pisi a basu.) Di womi bi da dee saafu fëën di möni dë ufö a bi go a di woto köndë. A bi piki de taa de bi musu wooko ku ën u mbei möön möni dëën. Leti kumafa di möni dë bi dë wan gaan soni da di womi, sö nöö wan soni bi dë wan gaan soni da Jesosi tu. Andi da di soni dë? Di soni dë da di wooko di a bi ta du di a bi dë a goonliba aki.

6, 7. Andi dee talënti u di woto kë taki?

⁶ Di peleikiwooko bi dë wan gaan soni da Jesosi seei. Di peleiki di a bi ta peleiki bi mbei taa sömëni sëmbë bi ko toon bakama fëën (Lesi Lukasi 4:43). Ma a bi sabi taa möön hia wooko bi o dë u du jeti, söseei taa möön hia sëmbë bi o haika di bunu buka. A bi piki dee bakama  fëën taa: „Un hopo wojo luku dee njanjan u dee goon. De lepi tjika u koti kaa” (Johanisi 4:35-38). Wan sëmbë di ta paandi goon an bi o disa wan goon fëën di lepi tjika u koti. Jesosi bi ta si soni a di wan seei fasi. Kölö sö ufö a toona go a Gadu Köndë, a bi piki dee bakama fëën taa: „Un musu ta waka a dee köndëköndë u goonliba ta paaja di buka u mi da hii sëmbë, be de bia ko dë bakama u mi kuma unu” (Mateosi 28:18-20). A sö wan fasi Jesosi bi da de wan gaan gudu, di faantiwöutu u paaja di bunu buka.​—2 Kolenti 4:7.

⁷ Kuma di womi di da dee saafu di möni fëën, sö Jesosi da dee salufu bakama fëën di wooko u lei sëmbë u de ko dë bakama fëën tu (Mateosi 25:14). Dee talënti u di woto da di faantiwöutu di dee salufu bakama u Jesosi abi u paaja di bunu buka, söseei u lei sëmbë u de ko dë bakama u Jesosi.

8. Hii fa hiniwan u dee saafu an bi kisi di wan seei möni, tökuseei andi di masa bi kë u hii de tuu du ku di möni?

⁸ Jesosi bi taki taa di masa bi da di fosu saafu feifi talënti, a bi da di u tu saafutu talënti, nöö a bi da di u dii saafu wan talënti (Mateosi 25:15). Di masa an bi da hiniwan u dee saafu di wan seei möni, ma a bi kë u hii de tuu mbei möiti u mbei möön hia möni dëën. A di wan seei fasi, Jesosi kë taa dee salufu bakama fëën mbei hii möiti u du di  peleikiwooko (Mateosi 22:37; Kolosën 3:23). A di Pensiti Daka u di jaa 33, dee bakama u Jesosi bi bigi mbei sëmbë u hii nasiön ko dë bakama fëën. Te u ta lesi di buku Tjabukama, nöö u ta si gbelingbelin taa dee bakama u Jesosi bi wooko taanga seei. * (Luku di pisi a basu.)​—Tjabukama 6:7; 12:24; 19:20.

9. (a) Andi dee tu bumbuu saafu du ku di möni di de bi kisi, nöö andi u sa lei u di soni di de du dë? (b) Andi dee sëmbë dee abi di houpu u libi a goonliba musu du?

⁹ Dee tu fosu saafu, di bi wooko ku di möni u di masa a wan bunu fasi, da dee salufu baaa ku sisa dee ta hoi deseei a Gadu a di ten u di kaba aki. Sensi di jaa 1919 de ta mbei hii möiti di de sa mbei u du di peleikiwooko. A di woto u dee talënti, dee tu saafu an kisi di wan seei möni, ma di soni dë an kë taki taa tu kulupu salufuwan dë. Hii dee tu saafu dë wooko taanga, nöö de bi feni tu toon möön hia u di möni di de bi abi. Ma dee salufuwan nöö musu wooko taanga a di peleikiwooko u? Wë nönö. Di woto di Jesosi bi konda u dee sikapu ku dee kaabita ta lei u taa dee sëmbë dee abi di houpu u libi u teego a goonliba musu heepi dee salufu baaa fëën ku di peleikiwooko, söseei de musu ta nama ku de nöömö. De ta si ën kuma wan gaan soni taa de sa heepi de. Dee sëmbë u Jehovah dë „wan kodo hipi sikapu”, nöö hii de tuu ta wooko taanga u peleiki, söseei u heepi sëmbë u ko dë bakama u Jesosi.​—Johanisi 10:16.

10. Andi da wan pisi u di maaka di ta lei taa u ta libi a di ten u di kaba?

¹⁰ Jesosi kë u hii dee bakama fëën mbei taanga möiti u heepi möön hia sëmbë u ko dë bakama fëën. Di soni dë  dee bakama fëën bi du a di fosu jaahöndö. A di ten u di kaba aki, dee soni di Jesosi bi taki a di woto u dee talënti ta pasa tuu. Ma nöö u ta si dee bakama u Jesosi ta du di wooko u? Aai, nöiti sö hia sëmbë bi jei di bunu buka te de bia ko dë bakama u Jesosi, sö jeti! Hii dee bakama u Jesosi ta mbei taanga möiti u du di peleikiwooko. Fëën mbei höndöhöndö dusu sëmbë ta tei dopu hiniwan jaa, nöö de seei ta ko heepi u u du di wooko aki tu. Hii dee soni aki ku dee bunu soni di di peleikiwooko ta tja ko, ta lei gbelingbelin taa di peleiki di u ta peleiki da wan pisi u di maaka di Jesosi bi taki taa u bi o si a di ten u di kaba. Jesosi musu u ta wai seei ku di wooko di dee bakama fëën ta du!

11. Unfa u du sabi taa Jesosi o ko a di pisiten u di gaan fuka?

¹¹ Jesosi bi taki taa: „Wë nöö di masa u de go tan longi seei ufö a toona ko. Nöö di a toona ko, nöö hën a kai dee futuboi fu de ko konda dëën unfa de wooko ku di möni tjika” (Mateosi 25:19). Jesosi, di Masa, o toona ko a di kaba pisiten u di gaan fuka. Unfa u du sabi sö? A Mateosi kapitel 24 ku 25, Jesosi bi taki sömëni pasi taa a ta ko. Wë a bi taki taa sëmbë bi ’o si di maaka u di sëmbë di ko dë Libisëmbë Mii te a liba ala, ta ko a dee bundji dendu ala’. Di ten dë da di pisiten u di gaan fuka te Jesosi o ko kuutu sëmbë. A bi piki dee bakama fëën dee ta libi a di ten u di kaba taa de musu dë ku wojo ta wakiti ën. A bi taki taa: „Wan o sabi na un juu di Masa fuunu aki o toona ko a unu. . . . Mi o dou a unu liba vau sö, a wan juu di wan bi mëni seei taa mi ta ko” (Mateosi 24:30, 42, 44). Hën da a di woto u dee talënti, Jesosi bi taki u di ten di a o ko u ko kuutu sëmbë tu, nöö a o booko di goonliba u Saatan kaba a sösö. *​—Luku di pisi a basu.

12, 13. (a) Andi di masa piki dee tu saafu, nöö faandi mbei? (b) Na un ten dee salufuwan o kisi di lasiti sitampu? (Luku di pisi „ De dini Gadu u te de dëdë, nöö hën a feni de bunu.”) (c) Un paka dee sëmbë dee bi heepi dee salufuwan o kisi?

¹² Di di masa toona ko baka, hën a si taa di saafu di a bi da feifi talënti bi wooko ku de te a feni feifi talënti a de liba  möön, nöö di saafu di a bi da tu talënti bi wooko te a feni tu talënti a liba. Di masa piki hiniwan u de taa: „Aai, womi, i dë wan sëmbë u futoou e. I dë wan bumbuu futuboi u mi seei. Wë nöö di i wooko sö bunu ku di piki soni mi bi buta a i maun dë, nöö mi o toona buta wan möön gaan soni a i maun awaa” (Mateosi 25:21, 23). Andi Jesosi, di Masa, o du te a o toona ko baka?

¹³ Kölö sö ufö di gaan fuka bigi, Gadu o lei dee salufuwan wan lasiti pasi taa a feni de bunu. Dee salufuwan dë wooko taanga, nöö de o dë a goonliba a di ten dë jeti. Disi da di lasiti sitampu di de o kisi (Akoalimbo 7:1-3). Nöö ufö Amagedon bigi, Jesosi o paka de u di a o tja de go a Gadu Köndë. Ma andi o pasa ku dee sëmbë dee abi di houpu u libi a goonliba di bi heepi dee salufuwan ku di peleikiwooko? A di ten dë, Jesosi kuutu de kaa, nöö a feni taa de dë kuma sikapu. Nöö di paka di de o feni, hën da teego libi a di goonliba di di Könkuköndë u Gadu o tii.​—Mateosi 25:34.

14, 15. Jesosi bi taki taa sömëni u dee salufuwan bi o ko abi hogihati, söseei taa de bi o ko malëngë u? Konda faandi mbei i taki sö.

¹⁴ Di woto ta taki soni u wan saafu di kisi wan talënti tu. Di saafu dë an bi wooko ku di talënti fëën u feni möön hia möni da di masa fëën, söseei an bi tjëën go buta a banku faa bi sa feni möön hia möni tu. Ma a bi diki baaku bei di möni. Di masa bi taki taa di saafu dë abi hogihati, nöö a malëngë tu. Hën wë di masa tei di talënti puu a di hogihati saafu maun, hën a tei ën da di fosu saafu. Baka di dë, a tuwë di hogihati saafu go „a  dungudungu”, hën di saafu sai naandë ta bai ta këë.​—Mateosi 25:24-30; Lukasi 19:22, 23.

¹⁵ Jesosi bi taki taa wan u dee dii saafu bi abi hogihati, söseei taa a bi malëngë. An bi kë taki taa ee dii salufuwan dë, nöö wan u de o ko dë kuma di hogihati saafu dë. U sabi di soni aki te u luku unfa di woto aki ta djei dee tu wotowan. A di woto u di köni saafu di dë u futoou, Jesosi bi taki soni u wan futuboi di bi dë wan hogi sëmbë, di bi ta fon dee oto futuboi ta du hogihogi ku de. Jesosi an bi kë taki taa wan tu u dee salufuwan di dë di köni saafu di dë u futoou bi o ko dë hogihati sëmbë. Nöö a di woto u dee teni wëndjë mujëë mii, Jesosi bi taki u feifi mujëë mii di bi waka a wan don fasi. Jesosi an bi kë taki taa hafu u dee salufuwan bi o waka a wan don fasi. Ma Jesosi bi kë lei de andi bi o pasa ee de an dë seekaseeka ta wakiti ën. * (Luku di pisi a basu.) Sö nöö Jesosi an bi konda di woto u dee talënti u lei taa sömëni u dee salufuwan bi o ko abi hogihati nasö taa de bi o ko malëngë a dee lasiti daka. Ma Jesosi bi kë lei dee salufuwan taa de an musu ko dë kuma di hogihati saafu, ma de musu ta mbei taanga möiti u du di peleikiwooko.​—Mateosi 25:16.

16. (a) Andi da dee tu soni dee u ta lei a di woto u dee talënti? (b) Unfa di woto u luku aki heepi u fuu fusutan di woto u dee talënti? (Luku di pisi „ Unfa u musu fusutan di woto u dee talënti?”)

¹⁶ Andi da dee tu soni dee u ta lei a di woto u dee talënti? Di fosu soni, hën da Jesosi da dee salufu bakama fëën wan gaan gudu, di faantiwöutu u paaja di bunu buka, söseei u lei sëmbë u de ko dë bakama fëën. Di u tu soni, hën da Jesosi kë u hii u tuu wooko taanga a di peleikiwooko. Ee u du di wooko aki go dou, söseei ee u ta haika Jesosi ta nama ku ën nöömö, nöö u sa dë seiki taa a o paka u.​—Mateosi 25:21, 23, 34.