• Gadu seei hën bi o butëën ko tiima. „Miseei wë buta di könu u mi a wooko . . . Mi o da i dee köndë u goonliba kuma gudu fii, söseei mi o da i hii di goonliba tu.”​—Psalöm 2:6, 8.

• A bi o dë wan bakamii u Könu Dafiti. „De pai wan mii da u. Wan womi mii de pai da u . . . A hii së a o abi makiti kuma gaama, nöö hii ten soni o nango bunu te a sindo a di könubangi u Dafiti ta tii di könuköndë fëën di o dë u teego.”​—Jesaaja 9:6, 7.

• De bi o pai ën a Betelehem. „Aai Betelehem . . . , a ju wan sëmbë di o dë tiima o kumutu . . . A o abi makiti a hii së u goonliba.”​—Mika 5:2, 4.

• Sëmbë an bi o këën kuma tiima, nöö de bi o kii ën. „Sëmbë bi mbei ën fa, söseei u bi si ën kuma wan sösö soni. . . . De tjökö ën u dee zöndu fuu hedi. De penëën u dee hogidu fuu hedi.”​—Jesaaja 53:3, 5.

• A bi o toona weki baka, nöö a bi o feni nëbai. „Ja o disa mi a geebi. Ja o mbei di sëmbë di hoi hënseei a ju, si di baaku u di geebi. . . . Te mi dë a di letisë maun fii, nöö mi o ta dë waiwai hii juu.”​—Psalöm 16:10, 11.

Te u luku hii dee soni dee de bi taki a fesi u di tiima aki, nöö di wan kodo sëmbë di fiti u dë di tiima aki, da Jesosi Keesitu. Wan basia u Gadu bi piki Malia, di mama u Jesosi taa: „Masa Gadu o butëën ko könu nëën gaan avo Dafiti kamian, nöö . . . taki fëën an o kaba möönsö a mundu.”​—Lukasi 1:31-33.

Jesosi an toon tiima a goonliba aki. Ma a o dë Könu u di Könuköndë u Gadu a liba ala ta tii libisëmbë a goonliba aki. Faandi mbei a o dë di möön bunu tiima? Boo luku unfa Jesosi bi ta libi di a bi dë a goonliba aki.

•   Jesosi bi ta booko hën hedi ku sëmbë. Jesosi bi ta heepi hii pei sëmbë. A bi ta heepi womi sëmbë, mujëe sëmbë, njönkuwan, gaan sëmbë, guduma ku pootima tuu (Mateosi 9:36; Maikusi 10:16). Wan kököbëma bi hakisi ën taa: „Masa o, mi sabi taa ee i kë i sa kula mi o.” Hën tjali u di sëmbë kisi Jesosi, hën a kulëën.​—Maikusi 1:40-42.

• Jesosi bi ta lei sëmbë unfa de sa du soni di ta kai ku Gadu. A bi taki taa: „Ja sa waka a Masa Gadu baka ku dee gudu u goonliba aki baka makandi.” A bi da sëmbë taanga u de libi ku wotowan leti kumafa de bi o kë u sëmbë libi ku de. Boiti di dë, a bi lei taa Gadu ta booko hën hedi ku dee soni dee u ta du, söseei ku dee soni dee u ta pakisei, te kisi di fasi fa u ta fii. Hën da ee u kë u Gadu feni u bunu, nöö u musu ta köni ku di fasi fa u ta fii (Mateosi 5:28; 6:24; 7:12). A bi taki söseei taa ee u kë ta dë waiwai tuutuu, nöö u musu ko sabi andi Gadu kë taa u musu du, nöö u musu du dee soni dë.​—Lukasi 11:28.

• Jesosi lei sëmbë unfa de musu lobi wotowan. Dee soni dee Jesosi bi ta taki ku dee soni dee a bi ta du, bi dou sëmbë hati. ’Hii sëmbë tuu bi ta foondo gaanfa seei, u di a bi ta konda soni da de gbelin seei kuma hënseei da basi fëën’ (Mateosi 7:28, 29). A bi piki de taa: „Un musu lobi dee felantima fuunu.” A bi begi da so u dee sëmbë dee bi mbei de kii ën tu. A bi taa: „Taata o, na hoi dee sëmbë ta kii mi aki a bëë e, biga de an saandi de ta du.”​—Mateosi 5:44; Lukasi 23:34.

Jesosi hën da di möön bunu tiima, u di a ta heepi sëmbë, söseei a abi sutifasi. Ma na un ten a bigi tii?