Di Bëibel ta piki u taa wan ëngëli bi hopo fia ku Gadu. U ko sabi di ëngëli aki kuma Saatan Didibi. A bi feni taa Gadu an abi di leti u tii. A bi taki taa libisëmbë bi o ta möön dë waiwai ee Gadu an bi ta tii de. A tjali taa dee fosu gaansëmbë fuu, Adam ku Eva, bi biibi di soni di Saatan bi taki. Fëën mbei deseei bi hopo fia ku Gadu tu.​—Kenesesi 3:1-6; Akoalimbo 12:9.

U di Adam ku Eva an bi kë u Gadu tii de möön, mbei de an bi sa libi a di Paladëisi möön, söseei de an bi o sa libi u teego söndö zöndu möön tu (Kenesesi 3:17-19). Di soni di de bi du dë, bi mbei dee bakamii u de seei an bi sa feni wan bunu libi möön. Di Bëibel ta taki taa: „Adam hën tja hogi du ko da hii sëmbë a goonliba aki e, nöö di hogi du tja dëdë ko” (Loomë 5:12). Ma di zöndu tja wan woto hogi ko tu. Di Bëibel taki taa di ’libisëmbë bigi basi wotowan, nöö an tja bunu ko da de’ (Peleikima 8:9). Hën da te libisëmbë ta tii deseei, nöö bookohedi nöö a o tja ko da de.

Nimloti da di fosu sëmbë di di Bëibel ta taki taa bigi tii sëmbë. Nöö a bi hopo fia ku Jehovah. Sensi di ten u Nimloti, hën womi di bi abi makiti ta tii a wan hogihati fasi. Söwan 3000 jaa pasa, Könu Salumon bi sikifi taa: „Mi si dee wojo wata u dee sëmbë dee ta pena, ma na wan sëmbë bi dë u kötö de hati. . . . Dee sëmbë dee bi ta pena de, bi abi makiti seei.”​—Peleikima 4:1.

Sö nöö soni dë a di ten aki tu. A di jaa 2009, di ölganisaasi de kai Verenigde Naties bi taki taa di hogihati fasi fa sëmbë ta tii, da wan u dee soni di ta mbei hogi ta pasa a goonliba aki a di ten aki.

Di goonliba abi möön bunu tiima fanöudu sö taa soni sa waka bunu. Di soni dë di Gadu di mbei u paamusi u taa a o du!

Gadu seti wan tii di o puu di tii di libisëmbë ta tii, nöö di tii dë „seei o dë u nöömö” (Daniëli 2:44). Di Könuköndë aki wë milionmilion sëmbë ta begi taa musu ko (Mateosi 6:9, 10). Ma na Gadu seei hën o tii. A buta wan Tiima di bi libi a goonliba aki wan daka. Ambë da di sëmbë dë?