1. Faandi mbei a bunu taa u sa pakisei dee soni dee an dë u si ku wojo nöunöu jeti? (Luku di peentje a bigi u di woto.)

JEHOVAH da u wan gaan bunu soni seei. Di soni dë da di pakisei di u sa pakisei dee soni dee an dë u si ku wojo nöunöu jeti. Di soni dë ta heepi u fuu sa si dee bunu soni dee woo feni a di ten di ta ko, nöö de sa heepi u fuu seeka useei a fesi, söseei u na du soni di sa tja bookohedi ko da u. Jehovah sabi andi o pasa a di ten di ta ko, nöö a piki u andi da wan tu u dee soni dee u sa feni a di ten dë. Hii fa wa ta si dee soni dë nöunöu, tökuseei u sa pakisei u de, nöö u sa abi di biibi taa de o pasa tuutuu.​—2 Kolenti 4:18.

2, 3. (a) Unfa di pakisei di u ta pakisei u soni sa heepi u? (b) Un hakisi woo piki a di woto aki?

² So juu u ta pakisei soni di an o pasa nöiti. Wan piki mujëë mii sa pakisei taa a dë sindosindo a wan adömitö baka ta buwa ta lontu. Ma u sabi taa di soni dë an o pasa nöiti. Di mama u Samuëli de kai Hana hën a bi pakisei u soni di bi o sa pasa tuutuu. A bi ta pakisei nöömö u di daka dou ka a bi o tja di womi mii fëën go a di wosu u Gadu u go wooko ku dee  mindima. Na pakisei nöö Hana bi ta pakisei taa a bi o du di soni dë, ma a bi dë wan soni di a bi buta taa a bi o du tuutuu. Di pakisei di Hana bi ta pakisei u di daka dë dou, bi dëën di taanga u hoi ënseei a di soni di a bi paamusi Jehovah (1 Samuëli 1:22). Nöö te u ta pakisei dee soni dee Jehovah paamusi u taa a o du, hën da u ta pakisei u soni di o pasa tuutuu.​—2 Petuisi 1:19-21.

³ Sömëni u dee sëmbë u Jehovah di di Bëibel ta taki u de, bi ta pakisei u dee soni dee a bi paamusi de. Faandi mbei a bi bunu taa de bi ta du ën? Nöö faandi mbei a bunu taa useei ta pakisei unfa di libi fuu o dë te dee soni Gadu paamusi pasa kumafa a bi taki?

4. Faandi mbei Abeli bi sa pakisei taa wan möön bunu ten bi o ko bakaten?

⁴ Abeli bi dë di fosu womi di bi ta biibi dee soni Jehovah bi paamusi taa a bi o du. A bi sabi andi Jehovah bi piki di sindeki baka di Adam ku Eva du zöndu. Jehovah bi taki taa: „Mi o mbei ju ku di mujëë toon felantima, nöö mi o mbei ju mii ku hën mii toon felantima tu. Di mii u di mujëë o makisa i booko hedi, nöö joo da di mii u di mujëë makei nëën bakafutu” (Kenesesi 3:14, 15). Abeli an bi sabi unfa di soni dë bi o pasa tuutuu. Ma a bi musu u dë sö taa a bi ta pakisei u di soni Gadu bi taki dë. Kandë Abeli bi hakisi ënseei: ’Ambë seei o dë di sëmbë di di sindeki o da makei, nöö di bi o heepi libisëmbë u ko dë sëmbë di na abi zöndu möön?’ Abeli bi ta biibi taa hii soni di Jehovah bi taki bi o pasa tuutuu. Nöö di a bi tjuma mbeti da Jehovah, nöö Jehovah bi wai ku di soni dë.​—Lesi Kenesesi 4:3-5; Hebelejën 11:4.

5. Faandi mbei a bi dë wan bunu soni da Enöku taa a bi ta pakisei fa di libi bi o dë bakaten?

⁵ Enöku bi dë wan woto womi di bi ta biibi a Gadu. A bi ta libi a takuhati sëmbë mindi di bi „ta fan sömëni gaangaan fan ta kosi Gadu”. Ma Enöku bi abi degihati, nöö a bi ta paaja di buka u Gadu. A bi piki dee sëmbë taa Jehovah bi o kii dee takuhati sëmbë puu (Judasi 14, 15). Andi bi heepi Enöku u du di soni dë? Kandë Enöku bi ta pakisei fa hii di goonliba bi o dë te hii sëmbë bi o ta dini Jehovah.​—Lesi Hebelejën 11:5, 6.

6. Andi i si kuma Noa bi ta pakisei baka di Gaan Wata?

⁶ Di biibi di Noa bi ta biibi a Jehovah mbei taa an bi dëdë a di Gaan Wata (Hebelejën 11:7). Baka di dë, di biibi dë seei hën bi mbei taa Noa bi tjuma mbeti da Jehovah (Kenesesi 8:20). Baka di Gaan Wata, hogidu bi ko dë a goonliba baka. Nimloti bi bigi ta tii, nöö a bi kë u sëmbë hopo fia ku Jehovah (Kenesesi 10:8-12). Ma Noa an bi lasi di taanga biibi di a bi abi a Gadu. Leti kuma Abeli, a bi ta biibi taa wan daka Gadu o puu zöndu ku dëdë. Kandë Noa bi pakisei u di ten ka hogihati tiima an o dë möön. Useei sa pakisei u di gaan bunu ten dë di o ko abiti möön!​—Loomë 6:23.

7. Un libi Abahamu, Isaki, ku Jakopu bi sa ta pakisei taa de o feni bakaten?

⁷ Abahamu, Isaki ku Jakopu bi sa ta pakisei u di gaan bunu ten di bi o ko bakaten. Jehovah bi paamusi de taa dee „bakamii” u de bi o mbei hii nasiön sëmbë u goonliba feni gaan bunu (Kenesesi 22:18; 26:4; 28:14). Gadu bi paamusi de tu taa di  famii u de bi o ko toon wan gaan nasiön di bi o libi a di waiti köndë di a bi paamusi de (Kenesesi 15:5-7). U di Abahamu, Isaki ku Jakopu bi sabi taa dee soni Jehovah bi paamusi de bi o pasa tuutuu, mbei de bi sa ta pakisei fa de ku dee famii u de bi ta libi a di köndë dë kaa. Sensi di Adam ku Eva bi du zöndu, Jehovah bi heepi dee sëmbë dee bi ta dini ën ku hii de hati u ko fusutan unfa libisëmbë bi o sa toona ko feni di telutelu libi di a bi da de a fesi.

8. Andi bi heepi Abahamu faa abi wan taanga biibi, söseei faa bi ta piki Jehovah buka?

⁸ U di Abahamu bi abi wan taanga biibi, mbei a bi ta piki Jehovah buka a hii soni, nöö a bi ta du ën hii fa so juu a bi ta taanga dëën. Abahamu ku wotowan di bi hoi deseei a Gadu, bi sa ta pakisei dee soni Jehovah bi paamusi de, hii fa dee soni dë an bi pasa a di ten di de bi ta libi. Di Bëibel ta taki taa: „De bi ta si dee soni te a longi ala, nöö de ta wai da de seei” (Hebelejën 11:8-13). Abahamu bi sabi taa hii dee woto pasi Jehovah bi du dee soni a paamusi. Fëën mbei a bi dë seiki taa Jehovah o du hii dee soni a paamusi da di ten di ta ko.

9. Unfa di biibi di Abahamu bi abi a dee soni Gadu bi paamusi, bi heepi ën?

⁹ U di Abahamu bi ta biibi dee soni Jehovah bi paamusi ën, mbei a bi ta du dee soni Jehovah bi ta hakisi ën faa du. A bi go disa di köndë fëën Uli, hën a bi ta waka ta libi a peipei kamian u te a dëdë. A bi sabi taa dee köndë ka a bi nango ta libi dë, an bi o dë u nöömö u di dee tiima u de an bi ta dini Jehovah (Josua 24:2). Abahamu bi ta wakiti di ten ka Jehovah o tii hii di goonliba u teego. Di tii u Jehovah da ’di köndë di mbei kuma wan wosu ku bumbuu sitonu posu. Nöö di Sëmbë di buta fa di köndë dë musu mbei, ku di Sëmbë ta mbei di köndë seei, hën da Masa Gaangadu’ (Hebelejën 11:10). Abahamu, Abeli, Enöku, Noa ku dee woto sëmbë, bi ta biibi taa Gadu sa weki dëdë sëmbë. De bi ta abi wan möön taanga biibi a Jehovah, te de bi ta pakisei fa de bi o libi a wan hanse goonliba.​—Lesi Hebelejën 11:15, 16.

10. Faandi mbei a bi bunu taa Sala bi ta wakiti di ten di bi dë nëën fesi ta ko?

¹⁰ Di mujëë u Abahamu de kai Sala, bi ta biibi taanga taa dee soni Jehovah paamusi bi o pasa tuu. Di a bi abi 90 jaa di an bi pai miii jeti, a bi ta wakiti u di ten dou ka a bi o pai wan mii. A bi sa dë sö taa Sala bi ta pakisei seei fa dee mii fëën bi o ko toon wan gaan nasiön (Hebelejën 11:11, 12). Andi mbei Sala bi sa dë seiki u di soni dë? U di Jehovah bi piki Sala manu taa: „Mi o dëën gaan bunu, nöö mi o mbei a pai wan womi mii da i. Mi o mbei a feni gaan bunu, nöö mi o mbei a toon wan gaan nasiön. Dee bakamii fëën o toon könu di ta tii” (Kenesesi 17:16). Leti kumafa Jehovah bi taki a fesi, Sala ko pai wan womi mii, hën de kai ën Isaki. Di foombo soni di Jehovah bi du dë bi mbei a dë seiki taa hii dee soni Jehovah paamusi taa a o du, o pasa tuutuu. Useei sa ko abi wan taanga biibi te u ta pakisei dee gaan bunu soni dee Jehovah paamusi u taa a o du.

11, 12. Andi bi heepi Mosesi faa bi ko ta lobi Jehovah möönmöön?

¹¹ Mosesi seei bi abi biibi a dee soni Jehovah bi paamusi taa a o du. De bi kiijëën a di köndë Egepiti kuma wan könu mii. Ma u di Mosesi bi lobi Jehovah möön hii woto soni, mbei an bi kë makiti ku gudu. Hën mama ku hën tata di bi dë Isaëli sëmbë, bi lei ën soni u Jehovah. De bi lei ën taa Jehovah bi paamusi de taa a bi o puu dee Isaëli sëmbë a katibo a Egepiti, nöö a bi o da de di Paamusi Köndë (Kenesesi 13:14, 15; Ëkisodesi 2:5-10). Möön Mosesi bi ta pakisei dee soni Jehovah bi paamusi de, möönmöön a bi ko ta lobi Jehovah.

¹² Di Bëibel ta piki u andi Mosesi bi ta pakisei nöömö. A taa: „Nöö di juu ten di Mosesi ko bigi tjika, nöö hënseei ta biibi tu e. Hën mbei an kë fika a Egepiti köndë dë ta tja di në taa a dë miii u di mujëë mii u könu Falao möön. Ma a ta kuutu ku ën hati taa a möön bunu dëën faa saka go tja sitaafu ku dee sëmbë u Gadu makandi, möön leki fa a sai ku dee sëmbë u Egepiti köndë ta njan dee piizii u de, dee an ta kai ku Gadu. Fa dee lö piizii sai naandë, a wan ten nöö de o kaba nöömö, [ma dee u Gadu an o kaba möönsö]. Nöö hën a sakëën seei tja sen e, fu di Heepima di o ko hedi. Biga a si taa di nama a o nama ku dee sëmbë u Gadu dë, nöö a möön bunu dëën möön dee hia gudu fu Egepiti köndë. Biga a o kisi wan möön bumbuu paima [paka, NW] a Gadu a bakaten.”​—Hebelejën 11:24-26.

13. Faandi mbei a bi bunu taa Mosesi bi ta pakisei nöömö u dee soni di Jehovah bi paamusi taa a o du?

¹³ A musu u dë sö taa Mosesi bi ta pakisei fundu u di paamusi di Jehovah bi paamusi taa a o puu dee Isaëli sëmbë a katibo. Leti kumafa dee woto dinima u Jehovah bi sabi taa Jehovah bi o puu hii libisëmbë a dëdë basu, sö nöö Mosesi bi sabi ën tu (Jöpu 14:14, 15; Hebelejën 11:17-19). Di soni dë bi mbei Mosesi ko fusutan unfa Jehovah lobi libisëmbë tjika. A bi mbei Mosesi ko möön lobi Jehovah seei, nöö a bi mbei di biibi di a bi abi a Jehovah ko möön taanga tu. A bi heepi Mosesi faa bi sa dini Jehovah hii hën libi (Detolonomi 6:4, 5). Di Falao bi kë kii Mosesi seei, tökuseei an bi ta fëëë. A bi sabi taa Jehovah bi o pakëën bakaten.​—Ëkisodesi 10:28, 29.

14. Andi so sëmbë ta pakisei u di ten di ta ko?

¹⁴ Sömëni sëmbë ta pakisei soni u di ten di ta ko, ma de ta pakisei u soni di an o pasa nöiti. So sëmbë di pooti ta pakisei taa de o ko gudu, nöö de an o abi bookohedi möön. Ma di Bëibel ta taki taa hii juu di libi a di goonliba u Saatan o „dë ku bookohedi ku fuka” (Psalöm 90:10). Nöö so sëmbë ta pakisei tu taa wan tiima u di goonliba o puu dee fuka u di goonliba aki. Ma di Bëibel ta taki taa di tii u Gadu wanwan tö nöö o sa du ën (Daniëli 2:44). Nöö sömëni sëmbë ta pakisei taa soni an o tooka a di goonliba aki möönsö. Ma di Bëibel ta taki taa Gadu o puu di hogi goonliba aki (Sefanja 1:18; 1 Johanisi 2:15-17). Dee sëmbë dee ta pakisei u soni di an ta kai ku dee soni Jehovah taki, o si taa de an abi leti.

15. (a) Faandi mbei a bunu taa u ta pakisei u di libi di Gadu paamusi u da di ten di ta ko? (b) Andi da wan u dee soni dee i ta wakiti u du a di ten di ta ko?

¹⁵ Jehovah paamusi u wan bunu libi a di ten di ta ko. Te u ta pakisei u di ten dë,  nöö u ta dë waiwai seei, söseei a ta da u di degihati di u abi fanöudu u ta dini Jehovah go dou. Kandë i ta si kaa fa i ta du dee soni Jehovah paamusi i, aluwasi a Gadu Köndë ala joo dë nasö ee a goonliba aki. Ee i ta wakiti u di ten dë dou fii sa libi u teego a goonliba aki, nöö pakisei fa i ku dee mati fii ta wooko makandi u mbei di goonliba ko toon wan gaan hanse djai. Dee sëmbë dee ta tei fesi a di wooko dë, lobi i seei. Nöö hii sëmbë di dë a i bandja, lobi Jehovah kumafa i lobi ën. I dë gösöntu, nöö i abi kaakiti seei, nöö ja dë ku na wan bookohedi. I ta wai seei u di i sa heepi wotowan ku dee soni dee i sa’ u du, söseei u gafa Jehovah. Kandë i ta heepi sëmbë di ko a libi baka, nöö i ta lei de u de ko sabi Jehovah (Johanisi 17:3; Tjabukama 24:15). Te i ta pakisei unfa di libi fii o dë a di ten dë, nöö u soni di o pasa tuutuu i ta pakisei dë. Di Bëibel ta taki taa sö di libi o dë.​—Jesaaja 11:9; 25:8; 33:24; 35:5-7; 65:22.

16, 17. Faandi mbei a bunu u ta taki u dee soni di Jehovah paamusi u da di ten ko?

¹⁶ Te u ta piki dee baaa ku sisa fuu andi ku andi u bi o kë du a di njunjun goonliba, nöö u ta heepi useei makandi u si di gaan bunu ten di dë a u fesi ta ko. Wa sabi bumbuu andi hiniwan fuu o du a di ten dë. Ma te u ta taki u dee soni u ta wakiti u du, nöö u ta lei taa u ta biibi dee soni Jehovah paamusi u. A sö wan fasi u ta da useei degihati u tan dini Jehovah aluwasi u ta miti fuka. Di wan seei soni apösutu Paulosu ku dee baaa fëën a Loomë bi du.​—Loomë 1:11, 12.

¹⁷ Te i ta pakisei u di ten di Jehovah paamusi i, nöö ja o ta pakisei tumisi u dee bookohedi fii. Wan daka di wan soni bi ta toobi Paulosu, hën a piki Jesosi taa: „Wë Masa o, uu bi disa hii soni seei ko ta waka a i baka, nöö un paima u o feni?” Jesosi bi kë taa Petuisi ku dee woto bakama fëën bi  musu ta pakisei u dee gaan bunu soni di de o du a di ten di ta ko. A bi piki de taa: „Te a dou di juu fu hii soni musu ko njunjun, nöö Mi di ko dë Libisëmbë Mii aki o go sindo a di könu sutuu u mi ku hii di hei u Gadu di a abi. Nöö di juu dë, nöö un dee tuwalufu sëmbë bi ta waka a mi baka aki, nöö woon ko sindo a tiima sutuu tu, ta kuutu dee tuwalufu lö u Isaëli. Nöö na unu wanwan o feni paima e. Ma hii dee sëmbë dee disa de wosu, ee nasö de baaa, ee nasö sisa, tata, mama, miii, pandasi kamian, hiniwan soni fu di a kë waka a mi baka hedi, mi taki da unu taa dee lö sëmbë dë an o lasi. Biga de o toona feni dee soni naandë höndö toon baka, nöö te fu kaba fëën nöö de o feni di libi u teego a Gadu tu” (Mateosi 19:27-29). Fëën mbei Petuisi ku dee woto bakama u Jesosi bi sa ta si fa de ku Jesosi bi dë a Gadu Köndë ta tii, söseei fa de ta heepi dee sëmbë dee ta piki Gadu buka u ko dë telutelu libisëmbë söndö föutu.

18. Faandi mbei a bunu u pakisei u dee soni di Gadu paamusi u taa a o du da u?

¹⁸ U lei andi bi heepi dee dinima u Jehovah u ko abi wan taanga biibi. Abeli bi ta pakisei u di möön bunu ten di Jehovah bi paamusi ën taa a bi o feni a di ten di ta ko. Söseei u di a bi ta biibi di soni di Jehovah bi paamusi ën, mbei a bi ta du soni di bi ta kai ku Jehovah. Abahamu bi ta pakisei u di ten ka di paamusi u Jehovah di bi nama ku di „bakamii” fëën bi o pasa tuutuu. Nöö fëën mbei a bi ta piki Jehovah buka a hii soni, hii fa so juu a bi ta taanga dëën (Kenesesi 3:15). Mosesi bi ta wakiti di ten ka Jehovah bi o pakëën kumafa a bi paamusi ën. Nöö di soni aki bi heepi ën u lobi Jehovah, söseei u hoi hënseei nëën (Hebelejën 11:26). Te u ta pakisei u di ten te Jehovah o du hii dee soni dee a paamusi u, nöö di biibi fuu ku di lobi di u lobi Jehovah o ko möön taanga tu. A di woto di ta ko woo taki u wan woto fasi u pakisei soni.