Te i ta jei sëmbë ta taki u „Di kaba u di goonliba!”, nöö andi i ta ko a i pakisei? I si kuma wan gaan sitonu o kumutu a liba ala ko booko hii di goonliba, kii hii sëmbë puu fiaa u? Nasö i si kuma wan gaan wata nasö wan gaan ventu nasö wan woto fuka o ko miti di goonliba aki sö u? Naa i si kuma di u dii goonliba feti o ko? Wë dee soni dë sa mbei sëmbë ta fëëë. Ma woto sëmbë an ta kaba biibi dee soni dë seei, de ta si ën kuma lafu woto.

Di Bëibel ta taki taa: „Di ten u dë aki o kaba” (Mateosi 24:14). A ta taki söseei taa a dë „di gaan feti a di Daka di di Gadu di abi hii makiti u mundu buta”, söseei di Bëibel ta kai ën „Amagedon” (Akoalimbo 16:14, 16). Sömëni keiki ta buuja sëmbë ku dee soni di de ta taki te a nama ku di kaba u di goonliba. Nöö woto sëmbë ta mbei wotowan ta fëëë u di de ta konda sömëni soni di an dë tuu. Ma di Bëibel ta lei u gbelingbelin andi o pasa a di kaba u di goonliba aki tuutuu. Di Wöutu u Gadu ta heepi u fuu si taa di kaba u di goonliba zuntu. Ma di möön bunu soni, hën da a ta lei u andi u musu du fuu sa pasa di kaba u di goonliba aki libilibi! Ma boo go luku dee soni dee sëmbë ta taki u di kaba u di goonliba aki, di an dë sö tuutuu. Ma andi di Bëibel ta taki u „di kaba” u di goonliba aki?

1. DI KABA U DI GOONLIBA NA DI TJUMA DI WAN GAAN FAJA O KUMUTU A LIBA ALA KO TJUMA DI GOONLIBA KABA A SÖSÖ.

   Di Bëibel ta taki taa: „Gadu seti di goonsei u di goonliba aki gingin seei, nöö na wan daka seei a o kumutu ka a dë” (Psalöm 104:5). Di tëkisi aki ku wan tu woto tëkisi ta lei u taa nöiti Gadu o poi di goonliba aki kaba a sösö, söseei an o disa sëmbë poi ën tu.​—Peleikima 1:4; Jesaaja 45:18.

2. DI KABA U DI GOONLIBA NA WAN GAAN HOGI DI O KO MITI DI GOONLIBA WAN PASA VOU SÖ.

   Di Bëibel ta lei taa Gadu bi taki a fesi kaa taa wan kaba bi o ko. A sikifi taa: „Di juu ku di ten di mi o toona ko a goonliba, na wan sëmbë sabi ën e. Dee basia u Masa Gaangadu köndë an sabi ën, nöö miseei di ko Libisëmbë Mii aki an sabi ën tu. Gadu u Tata wanwan tö nöö sabi di juu ku di ten dë. Hën mbei un musu dë kabakaba këëë ta watji mi. Biga wan sa na un juu mi o ko” (Maikusi 13:32, 33). Awa, Gadu („u Tata”) buta wan „juu” ka di kaba u di goonliba aki o ko.

3. NA LIBISËMBË HËN O TJA DI KABA U DI GOONLIBA KO, SÖSEEI NA WAN GAAN SITONU HËN O KUMUTU A LIBA ALA KO BOOKO DI GOONLIBA KABA A SÖSÖ.

   Ma ambë o tja di kaba ko? Akoalimbo 19:11 ta taki taa: „Nöö hën mi bia luku, hën mi si liba ala jabi hooo. Hën mi si wan weti hasi ku wan Sëmbë nëën liba sindosindo. Nöö di Sëmbë dë, hën de kai Futoou ku Leti.” A vers 19 a ta taki go dou taa: „Hën mi si di mbeti ku dee könu u goonliba ku hii dee sodati u de, ka de bi hai go zunta ta seeka fu de go feti ku di Sëmbë di dë a di weti hasi liba ku dee sodati fëën” (Akoalimbo 19:11-21). Hii fa dee soni dee sikifi aki taki a nöngö fasi, tökuseei u ta fusutan taa: Gadu o manda dee ëngëli fëën dee dë kuma hia sodati fëën, ko kii hii dee felantima fëën puu.

1. DI KABA U DEE TIIMA U DI GOONLIBA AKI.

   Di Bëibel ta taki taa: „Di Gadu u liba ala o seti  wan könuköndë di na o sa poi wan daka. Nöö di könuköndë seei an o pasa a na wan woto sëmbë maun dendu. A o booko hii dee könuköndë aki pisipisi, nöö a o kaba de. Nöö di könuköndë seei o tan u nöömö” (Daniëli 2:44). Kumafa u bi taki a di u 3 soni a liba ala kaa, nöö de o kii dee „könu u goonliba ku hii dee sodati u de” dee o „hai go zunta ta seeka fu de go feti ku di Sëmbë di dë a di weti hasi liba ku dee sodati fëën”.​—Akoalimbo 19:19.

2. FETI, HOGIDU, KU HOGILIBI AN O DË MÖÖN.

   „Gadu ta mbei feti kaba a goonliba palalaa te dou” (Psalöm 46:9). „Dee sëmbë dee ta libi leti, o libi a goonliba, nöö dee sëmbë dee ta du bunu, o libi nëën u nöömö. Ma de o koti dee hogidu sëmbë puu a goonliba, söseei de o hön dee sei-sëmbëma puu a goonliba tu” (Nöngö 2:21, 22). Gadu taki taa: „Wan si ö? Mi ta tooka hii soni buta ko njunjun.”​—Akoalimbo 21:4, 5.

3. DEE KEIKI DEE AN TA DU ANDI GADU KË, SÖSEEI DEE TA PENA LIBISËMBË AN O DË MÖÖN.

   „Dee tjabukama seei ta konda tjabukama woto di na tuu. Dee mindima ta basi sëmbë ku di makiti di de abi. . . . Ma andi woon du te di kaba dou?” (Jelemia 5:31). „Mi o jaka sömëni sëmbë puu a mi fesi taa ma sabi de. Nöö de o fia taa: ’Masa, unfa wë? Na u bi da sëmbë buka a i në nö? Na u bi jaka sömëni gadu puu a sëmbë hedi ku di në fii ö? Sömëni hia gaan foondowooko u bi du a i në, nöö unfa a waka ja sabi u?’ “Nöö mi o piki de taa: ’Ambë? Mi? Na wan ten seei mi bi sabi unu möönsö e. Un waka pasa kumutu a mi fesi naandë, un takusëmbëma!’”​—Mateosi 7:21-23.

4. DEE SËMBË DEE TA MBEI DI GOONLIBA AKI KO HOGI AN O DË MÖÖN.

   Jesosi bi taki taa: „Nöö di soni aki sö, hën da di soni mbei sö wan sëmbë musu kisi sitaafu. A dë sö taa Gadu manda limbo ko a goonliba u limbo libisëmbë wojo, ma nöö de an këën. Fa de sai dë, de lobi di dungu möön di limbo. Biga de an kë disa di hogilibi u de fu de ko a di së u limbo” (Johanisi 3:19). Di Bëibel ta taki fa Gadu bi kii hogi sëmbë puu a goonliba a di ten u Noa, wan womi di bi ta hoi hënseei a Gadu. „Gadu bi si taa libisëmbë ta libi hogi poi, hën a singi hii di goonliba kaba a sösö piii, be an fika kumafa a bi dë. Ma a di seei fasi Gadu bi taki taa a disa dee mundu ku di goonliba u tjuma de ku faja. A disa de u te di daka dou te a o kuutu dee hogi sëmbë, söseei te a o kii de tuu puu”.​—2 Petuisi 3:5-7, NW.

Di Bëibel ta taki taa „[Gadu] o kuutu dee hogi sëmbë” leti kumafa a bi kuutu „dee sëmbë u di ten u Noa”. Ambë da dee sëmbë dee a bi kii a di ten ala? „Dee hogi sëmbë” dee bi dë felantima fëën a bi „kii”. „Te di daka dou te [Gadu] o kuutu” sëmbë, nöö a o kii dee felantima fëën tu. Ma dee mati u Gadu o tan a libi leti kumafa Noa ku hën wosudendu bi tan a libi.​—Mateosi 24:37-42.

Pakisei fa di goonliba o hanse seei baka te Gadu kii dee hogi sëmbë puu! Awa, dee soni di di Bëibel ta taki u di kaba u di goonliba aki, da wan bunu njunsu seei, na wan taku njunsu. Ma kandë i ta hakisi iseei di soni aki jeti: Di Bëibel ta konda da u na un ten di kaba o ko u? Di kaba dë zuntu ö? Unfa mi sa pasa di daka dë libilibi?