Gadu o disa libisëmbë u ta basi wotowan, sö taa de an abi na wan houpu da di ten di ta ko u? Nönö! Kumafa u bi si kaa, nöö a o hopo puu hii soni di ta tja fuka ku hogidu ko da libisëmbë. Di Gadu di mbei libisëmbë ku di goonliba kë fii ko sabi taa di ten di a o hopo du wan soni, dë zuntu. Unfa a o lei u di soni dë?

Luku di woto aki: Ufö i tei wagi u lëi go a wan kamian, nöö kandë i nango suku a Internet nasö i ta tei wan kaita u sa feni di kamian ka i kë go. Te i dë a pasi ta lëi nango, nöö te i ta si dee pasi në dee dë a di kaita, nöö sö i ta dë seiki taa i zuntu ku di kamian ka i nango. A di wan seei fasi, Gadu da u di Wöutu fëën di ta heepi u si gbelingbelin un soni ta tooka a hii së u goonliba. Te u ta si dee soni aki, nöö u sa dë seiki taa di kaba zuntu. Di Bëibel ta piki u taa di goonliba o dou wan pisiten ka a o ko möön hogi seei, nöö di soni dë hën o tja di kaba ko.

A di ten dë soni o pasa a hii goonliba di an bi pasa wan daka jeti sensi di libisëmbë dë a goonliba. Boo go luku wan tu u dee soni aki di sikifi a di Wöutu u Gadu.

1. BUUJA O DË A HII SË U GOONLIBA: Di tjabukama woto di sikifi a Mateosi kapitel 24 ta taki u dee soni dee bi o ta pasa a goonliba a di wan seei ten. Dee soni dë o lei taa „di juu di ten u dë aki o kaba” (Vers 3 ku 14). Dee soni dee o ta pasa da gaan feti, gaan hangi, kamian o ta bai ta latja, dee sëmbë o ta libi hogi ku deseei, sëmbë an o lobi wotowan, nöö hedima u keiki bi o ta ganjan sömëni sëmbë (Vers 6-26). Wë tuu, u sa taki taa dee soni aki bi ta pasa höndöhöndö jaa kaa. Ma te di juu u di kaba o ko möön zuntu, nöö dee soni aki tuu o ta pasa a di wan seei pisiten. Dee dii soni dee woo taki u de nöunöu bi o dë u si tu.

2. DEE FASI DEE SËMBË U DI GOONLIBA AKI ABI: Di Bëibel ta taki taa a „dee lasiti daka u di goonliba aki”, hën da di ten ufö di kaba ko, sëmbë bi o ko abi taku manii seei. U ta lesi taa: „Sëmbë u di ten naandë an o lobi oto sëmbë möön leki de seei nöö. De o abi langahati möön hii soni. De o ta njan buka ta mbei deseei taa de dë gaan womi. De o ta kosi Gadu ta dëën gaan buka. Di ten dë, de an o ta saka deseei a de mama ku de tata basu möönsö. De an o ta da sëmbë tangi tu, na Gadu, na libisëmbë, te de feni bunu. Na wan pisi u di libi u de o kai ku Gadu möönsö. De an o abi fii a de hati da na wan kodo sëmbë. De o ta hoi sëmbë a bëë ta mindi soni da sëmbë ta tja de ta njan a baka. Fa de sai dë, de an o ta hoi deseei a tii möönsö. De o dë hogi leti kuma taku mbeti. . . . Dee lö sëmbë dë an o lobi na wan soni di dë bumbuu möönsö. Fa de sai dë, ja o sa futoou de, biga te fii sabi nöö de o ta tja i go sei da sëmbë. De o abi hesihati. De o ta abi gaan fasi. De o ta lobi piizii möön Gadu” (2 Timoteo 3:1-4). A dë sö tuu taa sëmbë an bi ta lesipeki wotowan kaa, ma a „dee lasiti daka u di goonliba aki”, a bi o ko hogi sö tee taa Bëibel bi taki taa a bi o dë ’wan tumisi hogi ten’ di taanga u pasa. I ta si fa dee sëmbë u di goonliba ta ko abi taku manii möönmöön u?

3. SËMBË TA POI DI GOONLIBA: Di Bëibel ta taki taa Gadu ’o poi dee sëmbë dee ta poi di goonliba fëën kaba a sösö’ (Akoalimbo 11:18). Na un fasi sëmbë bi o ta poi di goonliba? Di Bëibel bi taki taa soni bi o dë di wan seei fasi a di ten aki kumafa fa bi dë a di ten u Noa. A bi taa: „Di tuutuu Gadu ko si taa goonliba bi poi seei, nöö hogi bi fuu goonliba.” Fëën mbei Gadu bi taki taa: „Mi o kii hii libisëmbë puu” (Kenesesi 6:11-13). I ta si dee gaan hia soni dee ta lei taa hogidu ko fuu di goonliba u? Boiti di dë, libisëmbë ko hogi sö tee taa de sa kii hii sëmbë puu a goonliba. De abi dee fetilai u du di soni dë. Ma de ta poi di goonliba a wan woto fasi. Libisëmbë ta poi hii dee soni u abi fanöudu u tan a libi. De ta sundju di ventu di u ta hai u dë a libi, de ta du soni  di ta mbei taa dee mbeti ku dee pau ta dëdë, nöö de ta sundju dee ze tu.

Hakisi iseei: ’Libisëmbë bi abi di makiti u poi di goonliba wan höndö jaa pasa u?’ Ma nöunöu libisëmbë sa du di soni aki u di de ta mbei gaan kofaliki fetilai, söseei u di de ta sundju hii di goonliba kaba a sösö. Libisëmbë ko ta mbei njunjun soni, ma a djei kuma de an sabi un hogi dee soni dë o tja ko da di goonliba. Ma an dë a libisëmbë maun u taki andi o pasa ku di goonliba. Gadu o kii dee sëmbë dee ta poi di goonliba ufö de poi hii soni a goonliba. Di soni dë a paamusi u!

4. WAN PELEIKIWOOKO DI TA DU A HII GOONLIBA: Wan soni di di Bëibel ta taki taa bi o dë u si a di ten u di kaba, da wan wooko di sëmbë an bi du a goonliba jeti: „Di bunu buka u di Njunjun Tii [Könuköndë, NW] u Gadu musu paaja te dou hii goonliba e, be hii föluku musu jei. Nöö baka u di dë ufö di ten u dë aki o kaba” (Mateosi 24:14). Di peleikiwooko aki bi o tooka seei u di peleiki di gaansë u dee keiki sëmbë bi ta peleiki a dee höndöhöndö jaa dee pasa. A dee lasiti daka u di goonliba aki, sëmbë bi o paaja wan apaiti bosikopu, hën da „di bunu buka u di Könuköndë”. I sabi wan keiki di ta paaja di buka aki ö? Ee a dë taa so sëmbë ta paaja sö wan buka seei, ma de ta ’paajëën te dou hii goonliba, be hii föluku jei’ ö, naa a wan kodo kamian nöö de ta du ën?

Di website www.pr418.com ta hai sëmbë pakisei a „di bunu buka u di Könuköndë”. Di website abi buku ku woto soni di ta konda soni u di buka dë a möön leki 700 töngö. I sabi wan woto soni di sëmbë ta du u mbei sëmbë u hii goonliba jei soni u di Könuköndë u? Gaanduwe ufö Internet bi dë, sëmbë bi sabi dee Jehovah Kotoigi u di möiti di de ta mbei u paaja di bunu buka u di Könuköndë u Gadu. Sensi di jaa 1939, de bi sikifi a di kafiti u Di Hei Wakitimawosu taa: „A ta bai basia da di Könuköndë u Jehovah.” Wan buku di ta taki soni u keiki, bi taki taa „woto sëmbë an bi peleiki sö fajafaja, nasö a sö hia kamian” kumafa dee Jehovah Kotoigi ta peleiki. Di bunu buka di de ta paaja, hën da abiti möön Gadu o mbei di Könuköndë fëën tja ’di kaba ko’ a goonliba.

I ta si fa hii dee fö soni dee u bi o taki u de a di woto aki, di Bëibel bi taki taa bi o pasa, ta pasa a di ten fuu aki ö? Möön leki wan höndö jaa kaa, Di Hei Wakitimawosu ta taki soni u heepi sëmbë u deseei ko fusutan taa u ta libi zuntu ku di kaba u di goonliba. Ma hii fa so sëmbë ta si dee soni  dee ta pasa gaangaan, tökuseei de an ta biibi di soni dë. De feni taa sëmbë ta taki andi de kë, söseei taa de an ta sikifi dee soni kumafa de dë tuutuu. De ta taki tu taa u di sömëni soni dë di ta mbei taa an taanga möön u ko sabi andi ta pasa a goonliba, mbei a djei kuma di goonliba ta ko möön hogi. Aluwasi andi sëmbë ta taki, tökuseei sömëni sëmbë ta si dee soni dee ta lei gbelingbelin taa u ta libi a wan apaiti pisiten sensi di libisëmbë dë a goonliba, di ta lei taa di kaba zuntu seei.

Dee soni dee u ta si ta lei taa u ta ko zuntu ku wan ten ka gaan soni o tooka a goonliba. A di jaa 2014, wan tu sabisonima bi taki di soni aki, di sa mbei hii sëmbë kaba a goonliba tuu: „Te u luku hii dee soni di libisëmbë ta mbei di ta mbei sëmbë ta fëëë, nöö u sa taki taa de sa poi hii di goonliba kaba a sösö.” Möönmöön sëmbë ta si gbelingbelin taa u ta dou a wan apaiti pisiten sensi di libisëmbë dë a goonliba. Dee sëmbë dee sikifi di Hei Wakitimawosu aki, dë seiki taa u ta libi a dee lasiti daka u di goonliba, söseei taa di kaba dë zuntu seei. Ma ka fii ta fëëë andi o pasa a di ten di ta ko, i sa dë waiwai seei u dee soni dee o pasa. Faandi mbei u sa taki sö? U di sëmbë o pasa di kaba libilibi!