1. (a) Faandi mbei a dë taanga fanöudu u feti ku Saatan a di ten aki? (b) Unfa u du sabi taa u sa wini di feti di u ku Saatan ta feti?

SAATAN ta feti ku dee salufuwan dee dë a goonliba aki jeti, söseei a ta feti ku dee „oto sikafu” tu (Johanisi 10:16). A di sati pisiten di fika da Didibi jeti, a ta suku u poi di biibi u dee dinima u Jehovah te ka a sa feni dou (Lesi Akoalimbo 12:9, 12). Ma u sa wini di feti di u ku Saatan ta feti. Di Bëibel ta taki taa: „Un musu feti ku di didibi . . . , nöö a o kule go disa i.”​—Jakobosi 4:7.

2, 3. (a) Faandi mbei Saatan kë u sëmbë biibi taa an dë tuutuu? (b) Unfa u du sabi taa Saatan dë tuutuu?

² Sömëni sëmbë an ta biibi taa Saatan dë tuutuu. De feni taa Saatan ku dee taku jeje da soni di dë a buku, a dee hogi fëlön nasö a game nöö. Dee sëmbë dë ta feni taa ee i da wan köni sëmbë, nöö ja o biibi taa taku jeje dë tuutuu. Ma a ta toobi Saatan taa sëmbë an ta biibi taa hën ku dee taku jeje fëën dë tuutuu ö? Na seei! A möön bunu da Saatan u ganjan dee sëmbë dee an ta biibi taa a dë tuutuu (2 Kolenti 4:4). Te i luku  ën bunu, Saatan ta mbei sëmbë biibi taa an dë tuutuu faa sa feni de ganjan.

³ Ma u kuma dinima u Jehovah, wa ta mbei Saatan ganjan u. U sabi taa Didibi dë tuutuu. Unfa u du sabi? Di Bëibel ta piki u taa Saatan bi tei wan sindeki u fan ku Eva (Kenesesi 3:1-5). A bi piki Jehovah taa Jöpu an bi ta dini ën u sösö (Jöpu 1:9-12). Saatan bi pooba u ganjan Jesosi (Mateosi 4:1-10). Baka di Jesosi toon Könu a di jaa 1914, hën Saatan bigi „buta [feti, NW]” ku dee salufuwan dee dë a goonliba aki jeti (Akoalimbo 12:17). Di feti aki nango dou te kuma tide jeti u di Didibi ta pooba u mbei dee salufuwan ku dee oto sikafu lasi di biibi di de abi a Gadu. Ee u kë wini di feti, nöö u musu finga futu da Saatan, söseei u musu abi wan taanga biibi tu. A di woto aki woo taki u dii soni di sa heepi u u abi wan taanga biibi.

4. Unfa a du ko taa Saatan da di möön gaanfasi sëmbë di dë?

⁴ Saatan abi gaanfasi seei. Di takuhati ëngëli aki bi abi di degihati u hopo fia ku Gadu taa an abi di leti u tii, nöö a bi pooba u mbei sëmbë dini ën ka u de dini Jehovah. Fëën mbei u sa taki taa Saatan da di möön gaanfasi sëmbë di dë. Wan fasi fa u sa feti ku Saatan, da te u ta mbei möiti u na ko abi gaanfasi, ma u abi sakafasi.​—Lesi 1 Petuisi 5:5.

5, 6. (a) A dë wan föutu soni te sëmbë ta fii bunu u wan bunu soni di de du ö? Konda faandi mbei. (b) Un Bëibel woto ta lei taa an dë wan bunu soni u abi gaanfasi?

⁵ So juu an dë wan föutu soni te u dë seiki taa u sa’ u du wan soni nasö te u ta lesipeki useei. Söseei an dë wan föutu soni te u ta fii bunu u di useei nasö wan sëmbë di u sabi du wan bunu soni nasö abi wan bunu soni. Apösutu Paulosu bi taki piki dee baaa u Tesalonika taa: „U ta njan buka seei fuunu hedi e. U ta konda kumafa un ta biibi tjika. Nöö u ta taki tu taa hii fa dee sëmbë fuunu köndë dë ta da unu sitaafu seei, ma un ta hoi pasensi nöömö nango kodo. Hën wë mbei u ta njan buka da unu e, dee sëmbë” (2 Tesalonika 1:4). Fëën mbei a sa dë wan bunu soni te u ta fii bunu u di wotowan du wan bunu soni, nasö te u ta fii bunu u wan soni di useei du. Wa musu ta sen da dee famii fuu, di lö ka u kumutu nasö di kamian ka de kiija u.​—Tjabukama 21:39.

⁶ Ma te wan sëmbë abi gaanfasi, nöö di soni dë sa poi ën ku woto sëmbë, nöö a sa poi ën ku Jehovah tu. Ee u abi gaanfasi, nöö a sa mbei taa hati fuu ta boonu te wotowan da u wan lai. A sa mbei taa wa kë tei di lai seepiseepi, u di wa abi sakafasi (Psalöm 141:5). Te wan sëmbë abi gaanfasi, hën da a „ta pakisei tumisi fu ënseei”. So juu wan sëmbë di abi gaanfasi „ta biibi tu taa a bunu möön woto sëmbë, hii fa an abi di leti u pakisei sö”. Jehovah buuse sëmbë di abi gaanfasi (Ezekiëli 33:28; Amösi 6:8). Ma Saatan lobi te sëmbë ta njan buka kuma ën. Pakisei fa Saatan bi ta wai di Nimloti, Falao, ku Absalöm, bi ta njan buka u di de bi abi gaanfasi! (Kenesesi 10:8, 9; Ëkisodesi 5:1, 2; 2 Samuëli 15:4-6). Di gaanfasi di Kain bi abi, hën bi mbei taa hën ku Gadu an bi dë mati möön. Jehovah bi da Kain lai, ma Kain bi ta fii ënseei poi, fëën mbei an bi haika Gadu. A bi abi taangajesi, an bi haika di Jehovah bi ta bai ën, nöö fëën mbei a bi go du wan gaan zöndu.​—Kenesesi 4:6-8.

7, 8. (a) Andi a kë taki te wan sëmbë ta buuse sëmbë u wan woto lö, nöö unfa a nama ku gaanfasi tjika? (b) Konda unfa gaanfasi sa mbei taa wa ta libi fiifii ku wotowan a di kemeente möön.

 ⁷ A di ten aki, sëmbë ta du sömëni soni di ta lei taa de abi gaanfasi. So juu di gaanfasi di sëmbë abi ta mbei taa de ta buuse sëmbë u wan woto lö. Wan wöutubuku taki taa te sëmbë ta buuse sëmbë di dë u wan woto lö, nöö „de ta feni taa de bunu möön dee sëmbë dë, nasö taa de sa’ u du soni a wan möön bunu fasi möön de”. Di buuse di sëmbë ta buuse sëmbë u wan woto lö, ta mbei taa de ta feti ku deseei, gaan feti ta feti, nöö hën ta mbei taa de ta kii gaan hia sëmbë makandi tu.

⁸ Wë dee lö soni dë an musu pasa a di kemeente. Ma a sa pasa taa gaanfasi sa mbei taa baaa ku sisa u di kemeente ta buja ku deseei, nöö di soni dë sa tja gaan toobi ko. Di soni dë hën bi pasa ku dee Keesitu sëmbë u di fosu jaahöndö. Fëën mbei Jakobosi bi hakisi de taa: „Faandi mbei un lo’ u kisi toobi ku unu seei sö?” (Jakobosi 4:1). Ee u ta buuse sëmbë u wan woto lö, nasö ee u ta feni taa u bunu möön de, nöö a sa pasa taa u taki nasö du wan soni u hati de (Nöngö 12:18). A dë gbelingbelin u si taa gaanfasi sa mbei taa wa ta libi fiifii ku wotowan a di kemeente möön.

9. Unfa di Bëibel ta heepi u u na buuse sëmbë u wan woto lö, söseei u na feni taa u bunu möön wotowan? (Luku di peentje a bigi u di woto.)

⁹ Ee u ta feni taa u bunu möön wotowan, nöö u musu hoi a pakisei taa Jehovah buuse „hii sëmbë di abi gaanfasi” (Nöngö 16:5). U musu öndösuku useei, nöö u musu hakisi useei di soni aki: ’Mi feni taa mi bunu möön sëmbë u wan woto lö, u wan woto köndë nasö sëmbë di kiija a wan woto fasi ö?’ Ee u piki aai, hën da u fëëkëtë taa Gadu ’seti goonliba ku wan kodo sëmbë tö, tefa i si hii dee peipei sëmbë ko fika a goonliba aki’ (Tjabukama 17:26). Te i luku ën bunu, hii u tuu da sëmbë u wan kodo lö, u di hii sëmbë kumutu a Adam. An bi o dë wan bunu soni u pakisei taa Gadu mbei sëmbë u wan lö, bunu möön wan woto lö. Ee u bi o pakisei sö, nöö u bi o da Saatan pasi faa mbei wa lobi dee baaa ku sisa fuu möön, söseei u na libi ku de kuma wan famii möön (Johanisi 13:35). Ee u kë wini di feti di u ta feti ku Saatan, nöö wa musu feni taa u bunu möön wotowan seepiseepi.​—Nöngö 16:18.

10, 11. (a) Faandi mbei an dë wan taanga soni u lobi dee soni u di goonliba? (b) Andi bi o ko pasa ku Demasi di a bi ko lobi dee soni u di goonliba?

¹⁰ Saatan da „di takulibima di ta tii goonliba”, nöö hii di goonliba dë nëën maun dendu (Johanisi 12:31; 1 Johanisi 5:19). Sömëni u dee soni dee sëmbë u di goonliba aki ta du, an ta kai ku di Bëibel seepiseepi. Ma na hii soni u di goonliba aki da soni di na bunu. Tökuseei u sa dë seiki taa Saatan o wooko ku dee soni u di goonliba fëën u pooba u, söseei u mbei u du zöndu. Nasö a o pooba u fuu ko lobi  dee soni u di goonliba aki, söseei u na dini Jehovah ku hii u hati möön.​—Lesi 1 Johanisi 2:15, 16.

¹¹ So u dee Keesitu sëmbë u di fosu jaahöndö bi lobi dee soni u di goonliba aki. Paulosu bi sikifi taa: „Demasi ko lobi dee soni u goonliba aki tee a disa mi” (2 Timoteo 4:10). Di Bëibel an ta taki andi da di soni di Demasi bi lobi a di goonliba, di bi mbei taa a bi go disa Paulosu. A bi sa dë sö taa Demasi bi bigi lobi gudu möön di dini di a bi ta dini Jehovah. Ee gudu Demasi bi lobi tuu, hën da a bi lasi di okasi u kisi dee apaiti gaandi dee a bi sa kisi a di dini u Gadu. Di soni di Demasi bi du dë bi tja bunu ko dëën u? Nönö. Demasi bi sa ta heepi Paulosu go dou. Di goonliba an bi o sa dëën wan möön bunu soni möön Jehovah!​—Nöngö 10:22.

12. Unfa Saatan sa tei ’dee gudu u di goonliba aki ta ganjan u ta hai u a baka’?

¹² Di wan seei soni sa pasa ku u a di ten aki. U kuma Keesitu sëmbë sabi taa u abi di faantiwöutu u sölugu useei ku dee sëmbë fuu wosudendu (1 Timoteo 5:8). Jehovah kë fuu abi wan bunu libi. U sabi taa sö a dë u di a bi buta Adam ku Eva a wan gaan hanse paladëisi (Kenesesi 2:9). Ma Saatan ta tei „dee gudu u di goonliba aki” u ganjan u kisi (Mateosi 13:22). Sömëni sëmbë ta pakisei taa te de abi möni ku gudu, nöö de o ta dë waiwai nasö taa soni o ta waka bunu da de. Ee u ta pakisei kuma dee sëmbë dë, nöö a sa mbei u lasi di möön dii soni di u abi, hën da di dë di u ku Jehovah dë mati. Jesosi bi taki taa: „Na wan sëmbë sa dini tu masa makandi e. I musu fu lobi wan möön wan, ee nasö joo hëngi a wan möön wan. Nöö söseei tu, ja sa waka a Masa Gadu baka ku dee gudu u goonliba aki baka makandi e, kwetikweti” (Mateosi 6:24). Ee u ta kule a gudu baka, nöö tapa u tapa u dini Jehovah kaa. Di soni dë hën Saatan kë fuu du. Nöiti u musu mbei möni nasö dee soni dee u sa bai, ko dë möön fanöudu da u möön di dë di u ku Jehovah dë mati. Ee u kë wini di feti di u ta feti ku Saatan, nöö wa musu ta si gudu kuma di möön fanöudu soni a u libi.​—Lesi 1 Timoteo 6:6-10.

13. Unfa dee sëmbë u di goonliba aki ta si di toou libi, ku di duumi di womi ku mujëë ta duumi ku deseei?

¹³ Wan woto soni di Saatan ta tei u ganjan sëmbë, da fanafiti libi a di së u manu ku mujëë. Sömëni sëmbë ta pakisei taa ja a’ fu hoi iseei a i mujëë nasö i manu a di ten aki möön, söseei de feni taa te i toou, nöö ja o sa du andi i kë möön. Wan mujëë di ta pëë fëlön bi taki taa ja sa libi ku wan kodo sëmbë u nöömö. A bi taki tu taa: „Ma sabi wan sëmbë di an ta waka da hën mujëë nasö da hën manu, nasö di an bi o kë waka da di sëmbë di hën ku ën toou.” Wan womi di ta pëë fëlön bi taki taa: „Ma si kuma Gadu mbei u taa u musu libi ku wan kodo sëmbë u nöömö.” Saatan ta wai te nëbai sëmbë ta kuutu di seti di Gadu seti di toou libi. Didibi an lobi ën seepiseepi taa Gadu seti di toou libi, nöö  an kë taa womi ku mujëë di toou abi wan bunu toou libi. Fëën mbei ee u kë wini di feti di u ta feti ku Saatan, nöö u musu si di toou libi kumafa Gadu ta si ën.

14, 15. Andi i sa du ee i ta fii taa i kë go du fanafiti soni a di së u manu ku mujëë?

¹⁴ Aluwasi u toou nasö wa toou, tökuseei u musu mbei taanga möiti u na go nama ku na wan soni di nama ku fanafiti libi a di së u manu ku mujëë. A dë wan taanga soni u du ö? Na seei! Ee i da wan njönkuwan, nöö kandë i ta jei fa woto mii a siköö ta njan buka fa de ta duumi ku ambë de kë. Kandë de ta njan buka fa de ta manda sms ku footoo u fanafiti soni u manu ku mujëë da deseei a tëlëfön. A so köndë so sëmbë ta taki taa di soni aki dë di wan seei soni kuma te de bi o manda footoo nasö fëlön da woto sëmbë ka sëmbë ta duumi ku piki mii. Di Bëibel ta taki taa: „Di hogi a di së u manu ku mujëë soni ta kisi i seei sinkii a wan hii oto fasi. Biga ku i sinkii i ta du di hogi dë” (1 Kolenti 6:18). Sömëni sëmbë ta tja fuka, söseei de ta dëdë u di de bi libi fanafiti a di së u manu ku mujëë, nöö a bi tja taku siki ko kii de. Nöö gaansë u dee njönkuwan dee bi duumi ku womi nasö ku mujëë ufö de toou, bi taki bakaten taa a bi hati de taa de bi du sö wan soni. Dee sëmbë u di goonliba aki dee ta mbei fëlön, buku ku poku, kë mbei u biibi taa hogi an o miti u te u ta pasa dee wëti u Gadu. Ee u ta biibi dee lö soni dë, nöö ’soni o ganjan u tja go a hogi së [u du zöndu, NW]’.​—Hebelejën 3:13.

 ¹⁵ Andi i sa du ee i ta fii taa i kë go du fanafiti soni a di së u manu ku mujëë? I musu ko si taa i abi wan suwakifasi (Loomë 7:22, 23). Begi Jehovah faa da i taanga fii hoi iseei (Filipi 4:6, 7, 13). Köni ku soni di sa mbei i du wan fanafiti soni a di së u manu ku mujëë (Nöngö 22:3). Nöö te i miti wan tesi, nöö i musu kule wantewante.​—Kenesesi 39:12.

16. Andi Jesosi bi taki di Saatan bi ta poobëën, nöö andi u sa lei u di woto fëën?

¹⁶ Jesosi lei u gbelingbelin andi u musu du. Jesosi an bi mbei Saatan ganjëën ku dee soni dee a bi piki ën taa a o dëën. An bi pena go pakisei dee soni dë seei. Ma wantewante a bi piki Saatan taa: „Ja jei fa a sikifi a Gadu Buku ö?” (Lesi Mateosi 4:4-10). Jesosi bi sabi andi sikifi a di Wöutu u Gadu, fëën mbei a bi sa kai so pisi u Bëibel wantewante di Saatan bi ta poobëën. Ee u kë wini di feti di u ta feti ku Saatan, nöö wa musu mbei na wan soni ganjan u fuu go du fanafiti soni a di së u manu ku mujëë.​—1 Kolenti 6:9, 10.

17, 18. (a) Un woto soni Saatan ta tei u ganjan u, nöö faandi mbei u sabi taa a sa ganjan u ku de? (b) Andi o pasa ku Saatan, nöö unfa di soni dë ta da u taanga u hoi dou?

¹⁷ Gaanfasi, di kule di sëmbë ta kule a gudu baka, ku fanafiti libi a di së u manu ku mujëë, da dii u dee soni dee Saatan ta tei u ganjan u. Ma sömëni soni dë jeti di a ta tei u ganjan u. So Keesitu sëmbë abi famii di ta du ku de, nasö de ta sindo ku mii a di wan kalasi di ta mbei de fa. Wotowan ta libi a köndë ka lanti ta pooba u tapa de u na peleiki möön. U sabi taa dee lö soni aki o miti u. Jesosi seei bi piki u taa: „Hii sëmbë o buuse unu fu di un ta nama ku mi hedi. Ma nöö di sëmbë di ta hoi te go dou a di kaba pisi, nöö hën o feni di heepi u Gadu.”​—Mateosi 10:22.

¹⁸ Andi u musu du ee u kë wini di feti di u ta feti ku Saatan? Jesosi bi taki taa: „Ee un hoi a di biibi go dou, nöö na wan u dee uwii a unu hedi seei sa lasi” (Lukasi 21:19). Na wan hogi di wan libisëmbë sa du ku u, o dë u nöömö. Na wan sëmbë sa mbei u ku Gadu an dë mati möön ee na useei da di sëmbë dë pasi (Loomë 8:38, 39). Hii fa a ta pasa taa dee dinima u Jehovah ta dëdë, tökuseei di soni dë an kë taki taa Saatan wini de. Jehovah o mbei de toona libi baka (Johanisi 5:28, 29). Ma soni u Saatan o kaba a mundu wan daka. Baka te Gadu puu di hogi goonliba aki, nöö de o tuwë Saatan go a di baaku di na abi goon faa tan dë 1000 jaa longi (Akoalimbo 20:1-3). Baka te dee dusu jaa di Keesitu o tii pasa, nöö „de o lusu di didibi puu a di baaku dendu ka de bi tuwëën go”, nöö a o pooba u ganjan libisëmbë wan pasi möön te de an o abi zöndu möön. Baka di dë, nöö de o kii Saatan (Akoalimbo 20:7-10). Hii fa de o poi Didibi kaba a sösö, ma ii sa libi u teego! I musu ta feti ku Saatan nöömö, nöö i musu ta mbei di biibi fii ko möön taanga. I sa feti ku Saatan u te i wini ën!