Gaansë u sëmbë lo’ u libi bunu ku wotowan, de an lo’ u ganjan wotowan, nöö de abi sutifasi tu. Ma nöö faandi mbei u ta si sëmbë ta libi hogi ku wotowan, ta du hogihati soni ku de? Hiniwan daka u ta jei hogi soni ta pasa. Ma wan sëmbë dë di ta mbei sëmbë ta du hogi ö? Lesi 1 Johanisi 5:19.

Gadu bi mbei libisëmbë u de ta du hogi ö? Nönö. Jehovah Gadu mbei libisëmbë kumafa hënseei dë. A mbei de u de sa lei taa de lobi wotowan (Kenesesi 1:27; Jöpu 34:10). Ma Gadu mbei libisëmbë a sö wan fasi taa de sa taki andi deseei kë du. Di fosu mama ku di fosu tata fuu bi du wan hogi soni di de pasa Gadu buka. Hën wë de bi ko toon zöndu libisëmbë. Fëën mbei useei ko toon zöndu libisëmbë tu.​—Lesi Detolonomi 32:4, 5.

Gadu kë fuu hoi useei u na go du hogi (Nöngö 27:11). Fëën mbei a ta lei u andi u sa du u na du hogi soni, söseei andi u sa du u abi wan piizii libi. Ma nöunöu wa sa lobi sëmbë te dou kumafa Gadu ta du ën.​—Lesi Psalöm 32:8.

Hii fa hogidu fuu a goonliba nöunöu, Gadu an puu ën, u di a kë u hii sëmbë si andi ta pasa te sëmbë ta du hogi (2 Petuisi 3:7-9). Ma abiti möön, di goonliba o fuu ku sëmbë di dë waiwai di ta piki Gadu buka.​—Lesi Psalöm 37:9-11.