Alona taki taa: „Te mi ta jei di sireine ta bai, nöö hati u mi ta naki seei, nöö mi ta kule go suku wan kamian tjubi. Ma te mi dë naandë seei mi ta fëëë jeti. Ma a ta möön hogi seei, te mi dë a döösë, nöö ma abi na wan kamian u kule go tjubi. Wan daka di mi bi ta waka a sitaati, hën mi bigi ta këë, nöö ma bi sa böö bunu. A bi tei sömëni juu longi u mi kisi mi seei. Hën wë di sireine bigi ta bai möön.”

Na feti nöö da di wan kodo soni di ta mbei sëmbë ta fëëë taa de sa lasi de libi. Te i ko sabi taa ju nasö wan lobiwan fii abi wan taku siki di ta kii sëmbë, nöö a sa mbei i ta booko i hedi gaanfa seei. Nöö woto sëmbë ta booko de hedi u di de ta fëëë dee soni dee sa pasa a di ten di ta ko. De ta hakisi deseei di soni aki: ’Dee mii u mi, nasö dee mii kai mi avo o libi a wan goonliba ka feti, hogidu, ku siki dë u? De o libi a wan goonliba di libisëmbë ta poi kaba a sösö u?’ Andi sa heepi u ee u ta booko u hedi ku dee soni aki?

Wan köni sëmbë di sabi taa hogi o ko miti ën, „ta kule go tjubi” (Nöngö 27:12). Leti kumafa u ta mbei möiti u dë gösöntu, sö nöö u musu ta mbei möiti u na pakisei soni di sa mbei u fëëë tu. Dee soni dee sëmbë u di goonliba aki ta du u piizii, ka hogidu dë u si ku dee taku soni u ta si a njunsu, sa mbei u ku dee mii fuu fëëë seei. Na u di u ta mbei möiti u na luku dee hogi soni, mbei wa ta booko u hedi ku dee soni dee ta pasa. Gadu an bi mbei u fuu ta pakisei hogi soni. Ma u musu ta pakisei „dee soni dee dë tuutuu”  . . . „dee soni dee dë leti, dee soni dee dë gbelingbelin a Gadu wojo, ku dee soni dee dë u lobi.” Ee u ta du ën, nöö ’di Gadu di ta kötö sëmbë hati’, o kötö u hati ku u fusutan tu.​—Filipi 4:8, 9.

Te u abi wan taanga biibi, nöö a o heepi u ku dee bookohedi fuu. Di Bëibel ta piki u taa u musu ta dë kabakaba ’fuu begi Gadu’ (1 Petuisi 4:7). U sa hakisi Gadu faa heepi u, faa da u köni ku degihati fuu sa du soni a di möön bunu fasi, nöö u musu abi di futoou taa a o jei u, u di u „dë ku di sabi nöömö taa a o da u di soni di u begi ën dë.”​—1 Johanisi 5:15.

Di Bëibel ta lei u taa na Gadu da di sëmbë „di ta tii goonliba”, ma Saatan hën da di sëmbë dë. Nöö nëën basu dee „sëmbë u di goonliba aki tuu dë” (Johanisi 12:31; 1 Johanisi 5:19). Fëën mbei Jesosi bi lei u gbelingbelin taa u musu begi Gadu faa „puu u a di didibi maun” (Mateosi 6:13). Alona taki taa: „Te di sireine ta bai, nöö mi ta hakisi Jehovah faa heepi mi u na fëëë. Söseei di lobi manu u mi ta bëli m’, nöö a ta begi ku mi. Begi ta heepi tuutuu.” Di Bëibel ta taki taa: „Jehovah dë zuntu ku hii dee sëmbë dee ta kai ën. A dë zuntu ku dee sëmbë dee ta bai kai ën ku wan limbo hati.”​—Psalöm 145:18.

A di taki di Jesosi bi hoi a di kuun liba, a bi lei dee bakama fëën u begi taa: „Di Tii [Könuköndë] fii musu paaja a hii goonliba” (Mateosi 6:10). Di Könuköndë u Gadu o puu hii dee soni dee ta da sëmbë bookohedi a di ten aki. Gadu o mbei Jesosi di dë di „Gaama u Bööböö libi”, „mbei feti kaba a goonliba palalaa te dou” (Jesaaja 9:6; Psalöm 46:9). „A [Gadu] o kuutu soni buta da hiahia sëmbë . . . Na wan nasiön sëmbë o tei sëufangi u go feti ku woto nasiön sëmbë möön, nöö de an o lei u feti möön tu. . . Na wan sëmbë o mbei de fëëë” (Mika 4:3, 4). Hii sëmbë u dee wosudendu o dë waiwai, nöö „de o mbei wosu, nöö deseei o ta libi a de, de o paandi doloifi djai, nöö de o ta njan dee fuuta u de” (Jesaaja 65:21). „Na wan hojo sëmbë o taki taa: ’Mi suwaki.’”​—Jesaaja 33:24.

A di ten aki, hii fa u ta mbei möiti u hogi an miti u, tökuseei „soni di wa mëni sa miti u” so juu, aluwasi teka u dë (Peleikima 9:11). Sömëni höndö jaa feti, hogidu, ku siki taa mbei taa bunuhati sëmbë ta dëdë. Ma un libi dee lö sëmbë dë sa mëni taa de sa feni?

Milionmilion sëmbë di bi dëdë, o toona ko libi a goonliba, ma Gadu nöö sabi un mëni dee sëmbë dë o dë. Ma nöunöu, de dë a geebi jeti, ma Gadu abi de a pakisei. Di juu o ko te a o kai de, nöö „de tuu o weki kumutu a geebi toona ko ku libi baka” (Johanisi 5:28, 29). Di Bëibel ta da u taanga te a ta taki u di wekibaka. A taa: „Di sabi u ta sabi taa Gadu o da u dee soni a paamusi u dë, hën ta hoi hati fuu leti kuma wan hanka de tuwë fu hoi wan sipi faa tan pii a wan kamian. Nöö leti kumafa wan sipi hanka musu abi wan kamian ka a sa peka gingin, söseei di biibi fuu dë gingin a Masa Jesosi” (Hebelejën 6:19). Nöö Gadu bi„ weki [Jesosi] baka a dëdë e, be sëmbë si taa dee lö soni a ta taki dë o pasa a mundu nöömö.”​—Tjabukama 17:31.

A di ten aki, dee sëmbë dee ta mbei möiti u du soni di ta kai ku Gadu seei o ta a’ bookohedi. U di Paul, Janet ku Alona bi ta begi Gadu, söseei u di de bi abi wan taanga biibi a dee soni di Bëibel paamusi u da di ten di ta ko, mbei soni bi waka bunu da de, hii fa de bi abi bookohedi. Be a dë sö taa „di Gadu di ta buta sö wan gaan biibi a u hati aki taa a o heepi u nöömö, hën musu fuu unu hati ku piizii e, ku kötöhati, fa i si un ta futoou ën naandë.”​—Loomë 15:13.