1, 2. (a) Faandi mbei u musu hoi useei a Jehovah, nöö unfa di soni dë o heepi u u na tja useei go nama ku dee soni u di goonliba aki dee ta paati sëmbë ku sëmbë? (Luku di peentje a bigi u di woto.) (b) Andi sömëni sëmbë ta lobi gaanfa a di ten aki, nöö andi di soni dë ta tja ko?

DEE dinima u Jehovah an ta tja deseei go nama ku dee soni dee ta paati sëmbë ku sëmbë a di ten aki. Wan tu u dee soni dë da di tei di sëmbë ta tei së ku wan köndë, ku di lobi di de lobi di föluku sëmbë di de dë nasö di lobi di de lobi di fasi fa dee sëmbë u de köndë ta libi. Wë faandi mbei wa tja useei go nama ku dee soni dë? U di u lobi Jehovah, u di u ta hoi useei nëën, söseei u di u ta piki hën buka a soni (1 Johanisi 5:3). Hii u tuu ta hoi useei a dee wëti u Gadu, aluwasi na un köndë u ta libi nasö na un köndë u kumutu. Di hoi di u ta hoi useei a Jehovah da di möön fanöudu soni da u (Mateosi 6:33). Fëën mbei u sa taki taa „na sëmbë u di goonliba aki” u dë möön.​—Lesi Johanisi 17:11, 15, 16; Jesaaja 2:4.

² Sömëni sëmbë u di ten aki ta du soni u lei taa de lobi di köndë u de, di lö u de, di fasi fa de kiija de nasö di sport team u de gaanfa seei. Ma a tjali taa dee soni aki ta mbei sömëni u dee sëmbë dë ta fia ku deseei, ta buuse wotowan, söseei a ta pasa taa de ta kii dee sëmbë dee na dë a de së. Hii fa wa ta tei së a dee lö soni dë, tökuseei de sa tja  bookohedi ko da u ku dee famii fuu, nöö de sa mbei sëmbë libi hogi ku u tu. U di Gadu mbei u a sö wan fasi taa u sa sabi andi bunu ku andi an bunu, mbei a sa pasa taa hesihesi seei u tei sëmbë së te dee tiima u di goonliba an kuutu wan soni a wan leti fasi (Kenesesi 1:27; Detolonomi 32:4). Unfa i ta fii te wan sëmbë du wan soni ku i di an bunu? I sa hoi iseei u na tei na wan sëmbë së u?

3, 4. (a) Faandi mbei wa ta tei së a dee feti nasö a dee soni u di goonliba aki dee ta paati sëmbë ku sëmbë? (b) Andi woo luku a di woto aki?

³ Sömëni sëmbë ta tei dee tiima u di goonliba aki së te feti ta feti, u di dee tiima ta piki de taa di soni dë hën wan bumbuu sëmbë di ta libi a di köndë bi o du. Ma uu ta djeesi Jesosi. Fëën mbei wa ta tja useei go nama ku politiki soni, nöö wa nango a feti tu (Mateosi 26:52). Dee tuutuu bakama u Keesitu an ta feni taa wan pisi u di goonliba u Saatan bunu möön wan wotowan (2 Kolenti 2:11). Wa kë nama na wan tjë sö seei ku dee feti nasö dee soni u di goonliba aki dee ta paati sëmbë ku sëmbë.​—Lesi Johanisi 15:18, 19.

⁴ U di u da zöndu libisëmbë, mbei a sa dë a u dendu jeti taa so fuu an ta pakisei bunu u wotowan di an dë kuma u (Jelemia 17:9; Efeise 4:22-24). A di woto aki, woo taki u mama wëti di o heepi u fuu kaba ku dee taku fii aki dee ta paati sëmbë ku sëmbë. Söseei woo luku unfa u sa lei useei fuu ko ta pakisei kumafa Jehovah ku Jesosi ta pakisei, nöö di soni dë o heepi u fuu sa hoi useei a di Könuköndë.

5, 6. Unfa Jesosi bi ta si dee peipei kulupu sëmbë di a bi dë a goonliba, nöö faandi mbei?

⁵ Te i feni taa a taanga u hoi iseei u na tei së a dee soni u di goonliba aki, nöö hakisi iseei: ’Andi Jesosi bi o du?’ Di Jesosi bi dë a goonliba, dee sëmbë u Judea, u Galilea ku Samalia bi abi toobi ku deseei. Pakisei dee soni aki. Dee Dju ku dee Samalia sëmbë an bi ta fan ku deseei (Johanisi 4:9). Dee Faliseima ku dee Saduseima bi ta fia ku deseei (Tjabukama 23:6-9). Dee Dju dee bi sabi soni u di Wëti bi feni taa de bi bunu möön dee sëmbë dee an bi sabi di Wëti (Johanisi 7:49). Nöö sömëni sëmbë bi ta buuse dee sëmbë dee bi ta pii lanti möni (Mateosi 9:11). Ma Jesosi an bi tja hënseei go nama ku dee lö libi dë. Hii fa Jesosi bi ta konda tuutuu woto di nama ku Jehovah da sëmbë, ku hii fa a bi sabi taa dee Isaëli sëmbë bi dë dee apaiti sëmbë u Gadu, tökuseei nöiti a bi lei dee bakama fëën taa de bi bunu möön wotowan (Johanisi 4:22). Ma a bi lei de u lobi hii sëmbë.​—Lukasi 10:27.

⁶ Faandi mbei Jesosi an bi feni taa wan kulupu sëmbë bunu möön wan wotowan? U di hën ku hën Tata lobi hii sëmbë. Jehovah mbei libisëmbë u de bi sa pai mii fuu di goonliba ku hii pei föluku sëmbë (Kenesesi 1:27, 28). Fëën mbei Jehovah ku Jesosi an ta feni sëmbë u wan föluku, u wan köndë nasö sëmbë di ta fan di wan töngö, bunu möön di wotowan (Tjabukama 10:34, 35; Akoalimbo 7:9, 13, 14). U musu pakisei kumafa Jehovah ku Jesosi ta pakisei.​—Mateosi 5:43-48.

7, 8. (a) Ambë së u ta tei, nöö faandi mbei? (b) Andi da di wan kodo soni di sa heepi libisëmbë u puu dee fuka u de?

⁷ Faandi mbei wa dë ku na wan u dee tiima u di goonliba aki a wan së? U di u dë ku Jehovah a wan së. Hën da di Tiima fuu. Saatan bi taki a di djai u Eden taa Jehovah an bi dë di möön bunu tiima da libisëmbë. Saatan bi kë u libisëmbë biibi taa di fasi fa a bi ta du soni bi bunu möön di u Gadu. Jehovah disa u fuu taki da useei ambë së u kë tei. Wë nöö ju wë, andi joo du? I ta piki Jehovah buka u di i ta biibi taa di fasi fa a ta du soni bunu möön di fasi fa ii ta du soni ö? I ta biibi tuutuu taa di Könuköndë u Gadu wanwan tö nöö sa puu dee fuka fuu ö? Naa i si soni sa waka bunu taa dee sëmbë dee ta tii deseei söndö Gadu?​—Kenesesi 3:4, 5.

⁸ Boo taa wan sëmbë hakisi i unfa i ta feni wan u dee politiki paatëi nasö wan woto pei  ölganisaasi di ta du soni da sëmbë. Andi i bi o piki ën? So u de sa dë ku bunu soni a pakisei, nöö de sa kë heepi sëmbë tuutuu. Ma u ko fusutan taa di Könuköndë u Jehovah wanwan tö nöö sa puu dee fuka di libisëmbë abi ku hii di hogilibi di dë a goonliba aki. A di kemeente seei u ta mbei Jehovah tii u, ka u hiniwan sëmbë du di soni di hën si kuma möön bunu. Fëën mbei dee sëmbë u di kemeente ta wooko makandi.

9. Andi da di soni di so u dee Keesitu sëmbë u di fosu jaahöndö ta du di na bi bunu? Nöö andi de bi musu du?

⁹ A di fosu jaahöndö, so u dee Keesitu sëmbë u Kolenti bi ta fia ku de seei. De bi ta taki taa: „’Mii ta tei di lei u Paulosu.’ Otowan taa: ’Mii ta tei di lei u Apolo.’ Di otowan taa: ’Mii ta tei di lei u Kefasi.’ So sëmbë taa: ’U ta waka a Keesitu wanwan baka.’” Di Paulosu bi ko jei di soni aki, nöö a bi bigi dëën seei. A bi dë wan gaan soni seei, biga di soni dë bi sa mbei taa dee sëmbë u di kemeente an bi ta libi fiifii ku deseei möön. Fëën mbei a bi hakisi dee baaa ku sisa fëën taa: „Fa un dë a peipei sëmbë baka dë, Keesitu paati a pisipisi nö?” Paulosu bi piki de taa: „Un dee sëmbë u mi dë, fa mi gafa unu dë seei, ma mi kë toona bai unu a wan soni. Mi tei di në u Masa Jesosi Keesitu ta begi unu baa, taa be un disa di fia un ta fia ku unu seei naandë, ku di paati un ta paati ku unu na unu. Un musu dë makandi ku wan pakisei e, ku wan hati.” Sö a dë da u a di ten aki tu. Wa musu ta libi paatipaati ku useei a di kemeente.​—1 Kolenti 1:10-13; lesi Loomë 16:17, 18.

10. Andi Paulosu bi toona mëni dee Keesitu sëmbë, nöö andi u sa lei fëën?

¹⁰ Paulosu bi toona mëni dee salufu bakama u Keesitu taa de da sëmbë di o go libi a Gadu Köndë ala, nöö de an musu buta pakisei a „dee soni u di goonliba aki” (Filipi 3:17-20). * (Luku di pisi a basu.) Dee salufuwan da sëmbë di ta wooko da Gadu ku Keesitu a goonliba aki. Wan sëmbë di de manda go faa go ta taki soni u di köndë fëën a wan woto köndë, an ta tja hënseei go nama ku dee politiki soni ku dee toobi u di köndë ka a go dë. A di wan seei fasi, an bi o fiti taa dee salufuwan ta tja deseei go nama ku dee politiki soni ku dee toobi u di goonliba aki (2 Kolenti 5:20). Dee sëmbë dee abi di houpu u libi u teego a goonliba seei ta du soni di ta lei taa de ta hoi deseei a di Könuköndë, nöö de an ta tei së a dee feti nasö a dee soni u di goonliba aki dee ta paati sëmbë ku sëmbë.

11, 12. (a) Un fasi u pakisei wa musu abi ee u kë hoi useei a di Könuköndë u Gadu? (b) Unfa wan sisa bi ta pakisei u so sëmbë, nöö andi bi heepi ën u tooka di fasi fa a bi ta pakisei?

¹¹ A gaansë u dee köndë u goonliba, sëmbë ta fii bunu te de dë makandi ku sëmbë di de ku de kiija a di wan seei kamian, söseei ku sëmbë di ta fan di wan töngö kuma de. So juu de ta lobi di kamian ka de kumutu seei. Ma wa musu abi dee lö fasi dë. Ma u musu tooka di fasi fa u ta pakisei, söseei u musu seeka di háti fuu faa sa heepi u u na tei sëmbë së aluwasi andi ta pasa. Unfa u sa du di soni dë?

¹² Luku di woto u wan sisa de kai Mirjeta. * (Luku di pisi a basu.) De pai ën a wan köndë di de bi ta kai Jugoslavia. Dee sëmbë u di kamian ka de bi kiijëën bi ta buuse dee Sëlifia sëmbë. Ma di a ko sabi soni u Jehovah, hën a ko fusutan taa Jehovah an lobi sëmbë u wan föluku möön wan wotowan. A bi ko fusutan tu taa Saatan hën kë taa sëmbë musu ta buuse wotowan. Fëën mbei Marjeta bi mbei taanga möiti u tooka di fasi fa a bi ta pakisei. Ma di dee sëmbë u peipei föluku bi bigi feti ku deseei a di pisiwata ka Marjeta bi ta libi, hën a bi ta pakisei hogi u dee Sëlifia sëmbë baka. Na peleiki seei a bi ta kë peleiki da de möön. A bi sabi taa na wan bunu soni a bi ta du  dë. Fëën mbei a bi begi Jehovah faa heepi ën u na ta pakisei sö möön. A bi hakisi Jehovah tu faa heepi ën be a bigi du di pioniliwooko. Marjeta taa: „Mi ko si taa di möön bunu soni di bi heepi mi, hën da di buta di mi bi buta hii mi pakisei a di peleikiwooko. Te mi ta peleiki, nöö mi ta mbei möiti u djeesi Jehovah a di fasi fa a lobi sëmbë, nöö mi ko si taa ma ta pakisei hogi u sëmbë möön.”

13. (a) Andi bi pasa ku Zoila, nöö andi a bi du? (b) Andi u sa lei a di woto u Zoila?

¹³ Zoila da wan sisa di bi ta libi a wan köndë de kai Mëkisikou, nöö a bi foloisi go libi a wan köndë u Europa. A di kemeente ka a go, baaa ku sisa u woto köndë u di pisiwata u Latijn-Amerika dë naandë tu. Zoila taki taa so u de ta mbei di köndë ka a kumutu fa. Söseei de ta lafu di fasi fa sëmbë ta libi ala, ku dee poku u di köndë. Hati fëën bi ta boonu, nöö fëën mbei a bi begi Jehovah faa heepi ën fu an tei de u hogi. Andi u bi o du ee u bi dë nëën kamian? So u dee baaa ku sisa fuu ta mbei taanga möiti jeti u hoi deseei te de ta jei sëmbë ta taki hogi u di kamian ka de kumutu. Fëën mbei nöiti u musu kë taki wan soni nasö du wan soni di o mbei wan kulupu sëmbë si kuma de bunu möön wan woto kulupu sëmbë. Wa kë du soni di o mbei sëmbë ta libi paatipaati ku deseei a di kemeente nasö a hiniwan woto kamian.​—Loomë 14:19; 2 Kolenti 6:3.

14. Andi sa heepi i fii sa ta si sëmbë a di wan seei fasi kuma Jehovah?

¹⁴ Hii u tuu sabi taa dee dinima u Jehovah dë wan kodo kulupu sëmbë nöö. Fëën mbei nöiti u musu feni taa wan kamian nasö wan köndë bunu möön wan wotowan. Ma a sa dë sö taa dee famii fii ku dee sëmbë dee i ku de göö makandi sa mbei i lobi di kamian ka i kumutu gaanfa seei. Fëën mbei so juu i sa ta pakisei hogi u wotowan jeti di dë sëmbë u wan woto köndë, di kiija a wan woto fasi, di ta fan woto töngö nasö di dë u wan woto föluku. Ma andi sa heepi i fii sa tooka di fasi dë? Pakisei fundu u di fasi fa Jehovah ta pakisei u dee sëmbë dee lobi di köndë u de gaanfa nasö di feni taa de bunu möön wotowan. Suku soni möön fini di nama ku di soni aki te i ta du di Wosudendu Dini fii nasö te i ta lei iseei soni u  Bëibel. Nöö hakisi Jehovah faa heepi i fii sa ta si sëmbë a di wan seei fasi kuma ën.​—Lesi Loomë 12:2.

15, 16. (a) Andi so sëmbë sa du u di u ku de an ta si soni a di wan seei fasi? (b) Unfa mama ku tata sa heepi dee mii u de u de hoi deseei a Jehovah?

¹⁵ Wa kë fuu háti ta fon u te u ta dini Jehovah. Fëën mbei so juu wa o ta du soni a di wan seei fasi kuma dee sëmbë dee u ku de ta wooko a di wan kamian, dee mii dee u ku de dë a di wan kalasi, dee sëmbë dee u ku de ta libi a di wan pisiwata nasö dee famii fuu (1 Petuisi 2:19). Jesosi bi piki u taa sëmbë bi o ta buuse u, u di u ku de an ta du soni a di wan seei fasi. Hoi a pakisei taa gaansë u dee sëmbë dee ta du ku u, an sabi soni u di Könuköndë u Gadu. De an ta fusutan faandi mbei u ta si ën kuma wan fanöudu soni u hoi useei a di Könuköndë u Gadu, ka fuu hoi useei a dee tiima u di goonliba aki.

¹⁶ Ee u kë hoi useei a Jehovah, nöö u musu piki hën buka aluwasi andi woto sëmbë sa du nasö andi de piki u (Daniëli 3:16-18). Njönku sëmbë sa feni taa a möön taanga da de u du soni a wan fasi di tooka u wotowan. Un dee mama ku dee tata, un heepi dee mii fuunu u de abi degihati te de dë a siköö. Dee mii fuunu sa ta fëëë u piki wotowan taa de an o kanda da di faaka u di köndë nasö taa de an o hoi dee piizii daka u di köndë. Te un ta hoi di Wosudendu Dini fuunu, nöö un sa lei soni u di fasi fa Jehovah ta pakisei u dee soni dë. Lei de u de sa konda da wotowan gbelingbelin a wan lesipeki fasi andi de ta biibi (Loomë 1:16). Boiti di dë, ee a dë fanöudu, nöö go konda da dee sëmbë dee ta lei de a siköö andi u ta biibi. A sö wan fasi un sa heepi dee mii fuunu tu.

17. Un fasi u pakisei wa musu abi, nöö faandi mbei?

¹⁷ U lobi dee soni u di kamian ka de kiija u, kuma dee soni de ta njan a di kamian dë, di töngö di de ta fan, di fasi fa di kamian dë ku dee guwenti di de abi naandë. Ma u ta si kuma dee soni dee u lobi, de nöö ta bunu möön dee soni dee woto sëmbë ta lobi ö? Wë Jehovah kë fuu lobi hii dee peipei soni dee a mbei (Psalöm 104:24; Akoalimbo 4:11). Wë nöö faandi mbei i musu feni nömönömö taa di fasi ii ta du soni bunu möön di fasi fa wotowan ta du soni?

18. Faandi mbei a bunu taa u ta si wotowan kumafa Jehovah ta si de?

¹⁸ Jehovah kë u hii pei sëmbë ko sabi soni fëën, u de dini ën, söseei u de libi u teego (Johanisi 3:16; 1 Timoteo 2:3, 4). Fëën mbei te dee baaa ku sisa fuu piki unfa de ta pakisei u wan soni, nöö u dë kabakaba u haika de, solanga di fasi fa de ta pakisei dë, ta kai ku di fasi fa Jehovah hën a ta pakisei. Te u du sö, nöö libi fuu o möön suti, söseei woo ko lei sömëni soni seei. Boiti di dë, woo dë kuma wan famii makandi ku dee baaa ku sisa fuu. U si a di woto di u luku aki, taa u di u ta hoi useei a Jehovah ku di Könuköndë fëën, mbei wa ta tei së a dee soni u di goonliba aki dee ta paati sëmbë ku sëmbë. Wa lobi di gaanfasi di dee sëmbë u di goonliba u Saatan abi ku di fia di de ta fia ku deseei. U dë ku tangi a hati seei taa Jehovah lei u u libi fiifii ku wotowan, söseei u abi sakafasi! U ta fii kumafa di psalöm sikifi bi ta fii, di a bi taki taa: „Luku fa a bunu ku fa a suti te baaa ku baaa ta libi makandi kuma wan famii!”​—Psalöm 133:1.