De bi ta tei ën u mbii soni kuma kalu sö ko boon u mbei bëëë. Dee mujëë ku dee futuboi dee bi ta wooko a sëmbë wosu bi ta mbii soni hiniwan daka. Dee sëmbë fu awooten bi abi di guwenti u jei sëmbë ta mbii soni hiniwan daka.​—Ëkisodesi 11:5; Jelemia 25:10.

Dee sitonupobiki ku dee peentje di dee Egepiti sëmbë fu awooten bi ta mbei, ta lei fa sëmbë bi ta mbii soni. De bi ta buta soni kuma kalu a wan godo sitonu pisi dendu di mbei u mbii soni. Te sëmbë bi ta mbii soni, nöö de bi ta tjökö kini a goon ta mbii di soni ku wan möön piki sitonu pisi, nöö dee tu së maun tuu ta gili ën nango ta ko u te a ko finu. Wan buku taki taa di möön piki sitonu di de bi ta tei u mbii soni bi ta wegi söwan 2 te go miti 4 kilo. Ee sëmbë bi tei sö wan sitonu kuma kodjo u hiti naki wan sëmbë, nöö a bi sa kii ën.​—Kuutuma 9:50-54.

Dee sëmbë u wan wosudendu bi abi wan maun mbii fanöudu. Fëën mbei di Bëibel bi taki taa ja musu tei wan maun mbii u wan woto sëmbë hoi a panti. Detolonomi 24:6 ta taki taa: „Na wan sëmbë musu tei wan maun mbii nasö wan sitonu di de ta mbii soni u wan woto sëmbë buta a panti, biga di wotowan abi di sitonu dë fanöudu faa sa libi.”

Di Bëibel bi taki taa Jesosi bi dë ku hën tata „makandi te wata an sa pasa a de mindi” (Johanisi 1:18). Di soni aki ta lei fa Jesosi ku hën Tata zuntu tjika, söseei fa de lobi deseei tjika. Söseei a nama ku di guwenti di dee Dju sëmbë bi abi te de bi ta sindo a tafa ta njan makandi.

A di ten u Jesosi, dee Dju sëmbë bi abi di guwenti u kandi ku bandja a wan kunsu liba lontu di tafa, te de bi o njan. Hiniwan sëmbë bi ta tuwë hedi go a di së u di tafa, nöö de bi ta buta di töötösë agomaun a di kunsu liba, sö taa de bi sa du soni ku di letisë maun. Wan buku ta taki taa u di dee sëmbë dee bi ta njan a di tafa bi ta kandi buta töötösë maun a di kunsu liba bandja ku bandja, mbei „hedi u de bi ta dë zuntu ku di hati mindi u di sëmbë di dë nëën baka.” Nöö fëën mbei de bi guwenti u ta taki taa sö wan „ta kandi a wan woto sëmbë hati mindi.”

Wan sëmbë bi ta si ën kuma wan gaandi te a bi sindo zuntu ku di hedima u di wosudendu, nasö u di sëmbë di bi kai ën ko njan nëën pisi. Fëën mbei a di lasiti Pasika di Jesosi bi hoi, apösutu Johanisi di bi „dë gaan mati u Masa Jesosi möön de oto”, hën bi sindo a Jesosi bandja. A sö wan fasi a „bi sindo hëngi a Masa Jesosi”, nöö a bi sa hakisi ën wan soni.​—Johanisi 13:23-25; 21:20.