1, 2. (a) Naasë dee dinima u Jehovah bi ta dini ën a di ten di pasa? (b) Unfa Jesosi bi ta si di Wosu u Gadu di bi dë a Jelusalen? (c) Andi woo taki a di woto aki?

DEE dinima u Gadu u di ten di pasa bi abi kamian ka de bi nango dini Gadu. Sö nöö a dë a di ten fuu aki tu. Wë di Abeli bi tja soni go tjuma da Jehovah, nöö kandë a bi mbei wan begitafa (Kenesesi 4:3, 4). Dee womi kuma Noa, Abahamu, Isaki, Jakopu, ku Mosesi, seei bi mbei wan begitafa u dini Gadu (Kenesesi 8:20; 12:7; 26:25; 35:1; Ëkisodesi 17:15). Jehovah bi piki dee Isaëli sëmbë taa de bi musu mbei wan tenti u dini ën (Ëkisodesi 25:8). Bakaten, a bi piki de u de mbei wan wosu u dini ën (1 Könu 8:27, 29). Baka di dee sëmbë u Gadu bi kumutu a katibo a Babilon, nöö hii juu de bi nango dini Gadu a dee keikiwosu u dee Dju (Maikusi 6:2; Johanisi 18:20; Tjabukama 15:21). Dee Keesitu sëmbë u di fosu jaahöndö bi ta ko makandi a dee wosu u de, u dini Gadu (Tjabukama 12:12; 1 Kolenti 16:19). A di ten aki dee sëmbë u Jehovah abi dusudusu Könuköndë zali ka de ta ko makandi u dini ën, söseei u lei soni fëën.

² Jesosi bi abi lesipeki da di Wosu u Jehovah di bi dë a Jelusalen gaanfa seei. Di lobi di Jesosi bi lobi di Wosu u Gadu bi mbei dee bakama fëën toona mëni di soni di di psalöm sikifima bi taki. A bi taa: „Di lobi di mi lobi di wosu fii, o dë kuma wan faja di ta kisi gililili a mi dendu.” (Psalöm 69:9; Johanisi 2:17). Wan Könuköndë zali an dë „di wosu u Jehovah”, kumafa di Wosu u Gadu  bi dë a Jelusalen (2 Kloniki 5:13; 33:4). Ma tökuseei u musu abi gaan lesipeki da dee kamian ka u nango dini Gadu. A di woto aki, woo taki u mama wëti u Bëibel di o lei u unfa u musu tja useei te u dë a dee Könuköndë zali fuu, söseei unfa u musu ta seeka dee zali fuu, ku unfa u sa heepi paka de. *​—Luku di pisi a basu.

3-5. Andi da wan Könuköndë zali, nöö unfa u musu si dee komakandi fuu?

³ Wan Könuköndë zali da di kamian ka gaansë fuu nango dini Jehovah. Dee komakandi da wan soni di Gadu seti u heepi u fuu ku ën ko dë möön gaan mati. A dee komakandi fuu di ölganisaasi fëën ta da u taanga u hoi dou a di biibi, söseei de ta lei u andi u musu du. A dë wan gaandi taa Jehovah ku di Womi Mii fëën ta kai u fuu ko njan a di „tafa [u Jehovah]” u de hiniwan wiki (1 Kolenti 10:21). Wa musu fëëkëtë nöiti taa wan apaiti kai u kisi dë.

⁴ Jehovah ta piki u gbelingbelin taa a kë fuu nango a dee komakandi u dini ën, söseei fuu ta da u useei taanga. (Lesi Hebelejën 10:24, 25.) U di u abi lesipeki da Jehovah, mbei wa o ta misi komakandi ee an dë fanöudu tuutuu. U ta lei taa u ta tei dee komakandi fuu u bigi te u ta seeka useei, ku te u ta da piki.​—Psalöm 22:22.

⁵ Di fasi fa u ta tja useei a dee komakandi fuu ku di fasi fa u ta seeka dee Könuköndë zali fuu ta lei unfa u ta lesipeki Jehovah tjika. U kë taa di fasi fa u ta tja useei, tja gafa ko da di në u Jehovah. So juu di në dë ta dë sikifisikifi a di Könuköndë zali.​—Luku 1 Könu 8:17.

6. Andi sëmbë bi taki u dee Könuköndë zali fuu, söseei u dee sëmbë dee nango a dee komakandi? (Luku di peentje a bigi u di woto.)

⁶ Sëmbë ta si ën te u abi lesipeki da dee Könuköndë zali fuu. Wan womi di ta libi a wan köndë de kai Tolukuköndë, bi taki taa: „Mi bi foondo seei di mi bi si fa di Könuköndë zali limbo ku fa soni bi dë seekaseeka nëën. Dee sëmbë dee mi bi miti ala bi bisi a wan fasi di fiti, de bi dë waiwai, nöö de bi ko fan ku mi a wan suti fasi seei. Di soni dë bi bigi da mi seei.” Di womi dë bi bigi go a hii dee komakandi, nöö an bi tei longi ufö a tei dopu. Dee baaa u wan kamian u Indonesia bi kai dee sëmbë dee bi ta libi zuntu ku de, ku wan tu heiheima u di kamian, u de ko luku di njunjun Könuköndë zali u de. Wan u dee womi dë bi foondo seei u si dee soni de bi tei mbei di zali ku di fasi fa de mbei ën. A bi foondo tu u si fa di djai u di zali hanse. A bi taki taa: „Di limbo di di zali aki limbo, ta lei fa di biibi fuunu dë tuutuu.”

7, 8. Unfa u ta lei taa u ta lesipeki Jehovah te u dë a di Könuköndë zali?

⁷ Jehovah hën ta kai u fuu ko a dee komakandi, nöö a ta buta pakisei a di fasi fa u ta bisi soni ku di fasi fa u ta tja useei te u dë ala. Fëën mbei te u dë a dee komakandi fuu, nöö wa ta buta hebi wëti di ta lei fa u musu tja useei, söseei wa ta tja useei kumafa u bi o tja useei te u nango köi. A dë sö tuu taa Jehovah kë taa u ku dee sëmbë dee u ta kai ko a di Könuköndë zali, fii bunu te u dë naandë. Ma wa kë lei a na wan futu taa wa abi lesipeki da dee komakandi fuu. Fëën mbei wa ta bisi soni a wan fasi di na fiti nasö kuma u nango a köi. Söseei wa ta manda sms, wa ta fan ku wotowan, söseei wa ta njan ta bebe te dee komakandi ta hoi. Un dee mama ku dee tata, un musu lei dee mii fuunu u de an ta kule ta pëë a di Könuköndë zali.​—Peleikima 3:1.

⁸ Di Jesosi bi si sëmbë ta sei soni a di  Wosu u Gadu, nöö hati fëën bi boonu seei, hën a bi jaka de puu naandë (Johanisi 2:13-17). A dee Könuköndë zali fuu, u ta dini Jehovah, nöö u ta lei soni fëën tu. Fëën mbei an bi o fiti u ta bai soni nasö u ta sei soni a dee zali fuu.​—Luku Nehemia 13:7, 8.

9, 10. (a) Unfa dee sëmbë u Jehovah ta du mbei dee Könuköndë zali u de, nöö un wini a bi tja ko? (b) Unfa di ölganisaasi u Jehovah heepi sömëni kemeente di an bi abi möni tjika u mbei Könuköndë zali?

⁹ A hii së u goonliba, dee sëmbë u Jehovah ta wooko taanga u mbei Könuköndë zali. Baaa ku sisa dë kabakaba u heepi du di wooko aki söndö paka. De ta teeken de buta a pampia fa de o mbei de, nöö de ta mbei de, söseei de ta seeka de ko njunjun baka te a dë fanöudu. Te u kaba fëën, a dë sö taa a dee 15 jaa dee pasa aki, u mbei möön leki 28.000 waitiwaiti Könuköndë zali a hii së u goonliba. Hën da u ta mbei söwan feifi Könuköndë zali hiniwan daka.

¹⁰ Di ölganisaasi u Jehovah ta buta sëmbë di dë kabakaba u wooko söndö paka u mbei dee Könuköndë zali. Nöö de ta wooko ku di möni di dee baaa ku sisa ta da, u mbei dee zali dë, ka de abi de fanöudu. U ta libi ku di mama wëti u Bëibel di ta taki taa dee sëmbë dee abi möön hia, sa heepi dee sëmbë dee an abi hia tjika. (Lesi 2 Kolenti 8:13-15.) Un wini a bi tja ko? Di ölganisaasi mbei sömëni Könuköndë zali da dee kemeente de an bi abi möni tjika u mbei zali.

11. Andi wan tu baaa taki u di njunjun Könuköndë zali u de, nöö unfa a ta mbei i ta fii?

¹¹ Wanlö baaa u wan köndë de kai Kösita Lika bi taki taa: „Te u taanpu ta luku di Könuköndë zali fuu, nöö a ta djei kuma u ta sunjan! Wa sa ta biibi andi u ta si. Aiti daka nöö a tei u de kaba mbei di gaan waiti Könuköndë zali fuu ku hii dee pikipiki soni fëën! U bi dou di maaka aki u di Jehovah bi mbei soni waka bunu, u di di ölganisaasi fëën bi seti soni u heepi u, söseei u di dee baaa ku sisa fuu bi heepi u. Di kamian di de mbei da u fuu ta dini Jehovah aki, da wan dii kado di Jehovah da u. Di u bi feni ën u bi wai seei te na soni.” A ta da u piizii seei te u ta jei fa dee baaa ku sisa fuu ta da Jehovah tangi u dee soni dee a du da de. Nöö u ta wai seei taa baaa ku sisa a hii së u goonliba abi wan Könuköndë zali ka de sa go dini Gadu. U ta si gbelingbelin taa Jehovah ta mbei soni waka bunu ku di mbei di de ta mbei dee Könuköndë zali, biga te de kaba mbei de, nöö möön hia sëmbë ta ko a dee komakandi u ko lei soni u Jehovah.​—Psalöm 127:1.

12. Andi i sa du u heepi mbei Könuköndë zali?

¹² Andi i sa du u heepi mbei Könuköndë zali? Kandë i sa go heepi te de ta mbei dee zali. Söseei i sa da möni u heepi mbei dee Könuköndë zali. Te u ta du hii soni di u sa du u heepi ku di wooko aki, nöö woo ta dë waiwai u di u ta da soni. Boiti di dë, woo du di möön fanöudu soni. Hën da woo ta gafa  Jehovah. U ta djeesi dee sëmbë u Gadu u awooten di bi dë kabakaba u da soni u heepi mbei dee kamian ka de bi nango dini Gadu.​—Ëkisodesi 25:2; 2 Kolenti 9:7.

13, 14. Unfa di Bëibel ta lei u taa u musu hoi di Könuköndë zali fuu limbolimbo?

¹³ Jehovah da wan limbo Gadu di dë santa. Hën da wan Gadu an ta du soni fanjanfanjan. Fëën mbei u musu ta hoi di Könuköndë zali fuu limbolimbo. (Lesi 1 Kolenti 14:33, 40.) Ee u kë dë santa, söseei limbolimbo kuma Jehovah, nöö u musu ta dini ën a wan limbolimbo fasi, u musu ta pakisei soni di fiti, söseei u musu ta du soni di fiti tu. Boiti di dë, u sinkii musu ta dë limbolimbo tu.​—Akoalimbo 19:8.

¹⁴ Te u ta hoi di Könuköndë zali fuu limbolimbo, nöö wa o ta fëëë u kai sëmbë ko a dee komakandi fuu. Nöö sëmbë o si tuutuu taa u ta du dee soni dee u ta konda da de u di njunjun goonliba di o dë limbolimbo. De o si taa u ta dini wan santa Gadu di o mbei di goonliba ko toon wan hanse paladëisi.​—Jesaaja 6:1-3; Akoalimbo 11:18.

15, 16. (a) Faandi mbei a ta taanga so juu u hoi di Könuköndë zali limbolimbo? Faandi mbei u musu hoi ën limbolimbo? (b) Unfa de ta seeka soni u seeka di Könuköndë zali faa sa ta dë limbolimbo, nöö un gaandi hii u tuu abi?

¹⁵ Na hii sëmbë ta pakisei a di wan seei fasi te a nama ku di fasi fa u musu limbo tjika. Wë faandi mbei? Kandë u di so sëmbë an kiija a di wan seei fasi, mbei de ta pakisei woto fasi. Boiti di dë, so sëmbë ta libi a kamian ka hia gudugudu dë nasö a kamian ka dee pasi dë nasinasi, söseei de ta dë ku pötöpötö. So sëmbë an abi wata tjika nasö soni kuma sopu u wasi soni. Ma aluwasi ka u ta libi nasö unfa sëmbë u di pisiwata ka u ta libi, ta pakisei u di fasi fa u musu limbo tjika, tökuseei u musu hoi di Könuköndë zali fuu limbolimbo. Hën da di kamian ka u nango dini Jehovah.​—Detolonomi 23:14.

 ¹⁶ Ee u kë u di Könuköndë zali fuu ta dë limbolimbo, nöö u musu seeka soni bunu a fesi. Dee gaanwomi u di kemeente musu buta a pampia na un ten di kemeente musu seeka di zali, nöö hii juu de musu ta sabi ee sopu nasö woto soni dë tjika u seeka di zali. Söseei dee gaanwomi musu seeka soni a sö wan fasi taa di kemeente du di wooko. Di kemeente musu ta seeka so soni baka hiniwan komakandi u di zali sa ta dë limbolimbo. Hii u tuu abi di gaandi u seeka di Könuköndë zali fuu faa sa ta dë limbolimbo.

17, 18. (a) Andi u sa lei u di fasi fa dee sëmbë u Jehovah u awooten bi ta seeka di Wosu u Gadu? (b) Faandi mbei u musu seeka di Könuköndë fuu faa sa ta dë bumbuu?

¹⁷ Te wan soni booko a di Könuköndë zali, nöö u ta du hii soni di u sa, u seeka di soni dë. Dee dinima u Jehovah u awooten bi ta du di wan seei soni. A di ten di Könu Joasi bi ta tii Juda, nöö dee sëmbë u Gadu bi ta tja möni go buta a di Wosu u Gadu. Di könu bi piki dee mindima taa de bi musu tei di möni dë u seeka dee kamian ka a bi booko a di Wosu u Gadu (2 Könu 12:4, 5). Möön leki 200 jaa baka di dë, Könu Josia seei bi tei di möni di sëmbë bi ta tja go buta a di Wosu u Gadu u seeka di Wosu tu.​—Lesi 2 Kloniki 34:9-11.

¹⁸ So u dee baaa u dee Bëikantoo Komite bi ko si taa dee sëmbë u di köndë ka de ta libi an ta seeka dee wosu u de nasö dee wookolai u de bunu. A ta pasa sö u di kandë wan tu sëmbë u dee köndë dë nöö sabi unfa de musu du di wooko dë. Nasö kandë de an abi möni tjika u seeka dee soni dë te de booko. Ma ee wa ta seeka soni di booko a di Könuköndë zali fuu te u musu du ën, nöö a o booko hesihesi. Sëmbë o si ën, nöö a sa tja poi në ko da u. Ma te hii u tuu ta du hii soni di u sa du, u seeka di Könuköndë zali fuu faa sa ta dë bumbuu, nöö a ta tja gafa ko da Jehovah. Nöö a sö wan fasi u ta lei tu taa wa ta poi di möni di dee baaa ku sisa ta da.

19. Andi joo du u lei taa i abi lesipeki da di kamian ka i nango dini Jehovah?

¹⁹ Wan Könuköndë zali da wan wosu di de buta a Jehovah maun. Na wan sëmbë abi di zali dë, söseei na wan kemeente abi ën tu. Kumafa u bi taki a di woto aki, nöö dee mama wëti u Bëibel o heepi u fuu si di kamian ka u nango dini Gadu a di soifi fasi fa u musu si ën. U di u ta lesipeki Jehovah, mbei u ta lei taa u abi lesipeki da dee komakandi fuu ku di Könuköndë zali. Ku hii u hati u ta da möni u mbei Könuköndë zali, nöö u ta wooko taanga u seeka de, söseei u hoi de limbolimbo. Leti kuma Jesosi, u ta lei taa u lobi di kamian ka u nango dini Jehovah seei, nöö u abi lesipeki da di kamian dë tu.​—Johanisi 2:17.