1, 2. Andi dee wöutu ’bangi ka Gadu ta buta futu’ kë taki so juu a dee Hebelejën Buku u Bëibel?

JEHOVAH GADU bi taki taa: „A liba aki di könubangi u mi dë, nöö goonliba da mi bangi ka mi ta buta futu” (Jesaaja 66:1). Gadu bi ta taki tu u di ’bangi ka a ta buta futu’ di a bi taki taa: „Mi o mbei di kamian ka mi ta buta mi futu ko möön hanse” (Jesaaja 60:13). Unfa Gadu mbei di bangi ka a ta buta futu ko möön hanse? Nöö andi di soni dë kë taki da dee sëmbë dee ta libi a goonliba di dë di bangi ka Gadu ta buta futu?

² Te de ta taki a dee Hebelejën Buku u Bëibel, u di ’bangi ka Gadu ta buta futu’, nöö so juu a kë taki u di Wosu u Gadu di bi dë a di awooten Isaëli (1 Kloniki 28:2; Psalöm 132:7). Di Wosu u Jehovah bi hanse dëën seei u di a bi dë di kamian ka sëmbë bi musu go dini ën. Nöö de bi nango nëën u gafa Jehovah a goonliba aki.

3. Naasë sëmbë nango dini di tuutuu Gadu a di ten aki, nöö na un ten di soni di Gadu seti dë, bigi wooko?

³ Wë naasë sëmbë nango a di ten aki u go dini Gadu? De an nango a wan wosu di de mbei kuma di Wosu u Gadu na awooten,  ma a di Wosu u Gadu di wa sa si ku wojo. Di Wosu dë ta tja gafa ko da Jehovah möön hii woto wosu di libisëmbë bi sa mbei. Wë nöö andi da di Wosu u Gadu di wa sa si ku wojo? Hën da dee soni di Gadu seti u heepi libisëmbë u de sa ko dë mati ku ën, söseei u de sa dini ën. Di lusupaima u Jesosi hën mbei taa Gadu bi sa seti sö wan soni. Di soni di Gadu seti dë, bigi wooko di Jesosi tei dopu a di jaa 29, di Jehovah salufu ën faa ko dë Gaan Mindima a di Wosu fëën di wa sa si ku wojo.​—Hebelejën 9:11, 12.

4, 5. (a) Andi dee tuutuu dinima u Jehovah kë du kumafa Psalöm 99 ta taki? (b) Andi u musu hakisi useei?

⁴ U dë ku tangi a hati seei taa Gadu seti soni a sö wan fasi taa u sa dini ën. U ta lei taa u dë ku tangi a hati te u ta konda soni u di në u Jehovah ku soni u di lusupaima da wotowan, di dë wan gaan bunu soni di a du da u. U ta wai seei u di möön leki aiti milion tuutuu Keesitu sëmbë dë di ta gafa Jehovah hiniwan daka! Sömëni sëmbë di nango a keiki feni taa de o go libi a Gadu Köndë te de dëdë, ma dee sëmbë u Jehovah sabi taa a dë fanöudu u gafa Jehovah nöunöu ka u dë a goonliba aki.

⁵ Te u ta gafa Jehovah, nöö u ta djeesi dee dinima fëën dee Psalöm 99:1-3, 5 ta taki u de. (Lesi ën.) Dee womi kuma Mosesi, Alon ku Samuëli, bi du hii soni u lei taa de bi lobi di fasi fa Gadu bi seti soni u sëmbë dini ën a di ten di pasa (Psalöm 99:6, 7). A di ten aki, ufö dee salufuwan dee dë a goonliba aki go dini kuma mindima ku Jesosi a liba ala, de ta dini Jehovah ku hii de hati a goonliba aki a di Wosu di wa sa si ku wojo. Milionmilion „oto sikafu” dë tu di ta heepi de nöömö (Johanisi 10:16). Hii dee tu kulupu sëmbë aki ta dini Jehovah makandi. Ma hiniwan fuu musu hakisi ënseei: ’Mi ta lei ku hii mi hati taa mi lobi dee soni Jehovah seti u dini ën kuma di tuutuu Gadu ö?’

6, 7. Andi da di hogi soni di bi ko pasa a di fosu kemeente u Keesitu sëmbë, nöö andi bi pasa a di jaa 1919?

⁶ An bi dou 100 jaa seei baka di di fosu kemeente u Keesitu sëmbë seti, hën sëmbë bigi go disa di tuutuu biibi kumafa di Bëibel bi taki (Tjabukama 20:28-30; 2 Tesalonika 2:3, 4). Baka di ten dë, a bi ko möön taanga u ko sabi ambë da dee tuutuu dinima u Gadu. Sömëni höndö jaa bi pasa ufö Jehovah mbei Jesosi mbei sëmbë ko sabi ambë da dee sëmbë dee bi ta dini ën tuutuu a di Wosu fëën di wa sa si ku wojo.

⁷ A di jaa 1919, sëmbë bi sa si gbelingbelin ambë da dee sëmbë dee Gadu feni bunu, dee ta dini ën a di Wosu fëën di wa sa si ku wojo. De bi tooka soni a di fasi fa de bi ta dini Gadu sö taa Jehovah bi sa feni de bunu (Jesaaja 4:2, 3; Maleaki 3:1-4). Di soni di apösutu Paulosu bi si a wan wojolimbo sunjan höndöhöndö jaa a fesi, bi bigi ta pasa tuu.

8, 9. Andi da di „paladëisi” di Paulosu bi si a wan wojolimbo sunjan?

 ⁸ Di soni di Paulosu si a di wojolimbo sunjan sikifi a 2 Kolenti 12:1-4. (Lesi ën.) Jehovah bi lei Paulosu wan soni di bi o pasa bakaten. Andi da di „paladëisi” di Paulosu bi si? Wë di soni di a bi sa dë, hën da di tuutuu paladëisi di o dë a goonliba abiti möön (Lukasi 23:43). Di u tu soni di a sa dë, hën da di paladëisi ka u dë nöunöu kaa, di o ko möön bunu a di njunjun goonliba. Nöö di u dii soni, hën da a sa dë dee gaan bunu di sëmbë sa feni a Gadu Köndë a ’di paladëisi u Gadu’.​—Akoalimbo 2:7.

⁹ Ma faandi mbei Paulosu bi taki taa a bi „jei wanlö sondi ala di an sa konda seei” di de bi „bai ën taa an musu konda”? U di di juu an bi dou jeti faa konda finifini andi da dee waiti soni dee a bi si a di wojolimbo sunjan. Ma a di ten aki Jehovah ta mbei u konda da wotowan un bunu dee sëmbë fëën ta feni nöunöu kaa!

10. Faandi mbei di paladëisi ka u dë nöunöu aki ku di Wosu u Gadu di wa sa si ku wojo an dë di wan seei soni?

¹⁰ U lo’ u taki u di paladëisi ka u dë nöunöu aki kaa. Ma andi da di paladëisi dë? A dë di apaiti fasi fa dee sëmbë u Gadu dë, u di de ku ën dë bunu. Fëën mbei u sa taki taa di paladëisi ka u dë nöunöu aki, ku di Wosu u Gadu di wa sa si ku wojo an dë di wan seei soni. Di Wosu u Gadu di wa sa si ku wojo da di soni di Gadu seti u sëmbë ko a di tuutuu biibi. Di paladëisi ka u dë nöunöu kaa, ta lei gbelingbelin ambë da dee sëmbë dee Gadu feni bunu, di ta dini ën a di Wosu fëën di wa sa si ku wojo.​—Maleaki 3:18.

11. Un gaandi u abi a di ten aki?

¹¹ A dë wan piizii soni seei u sabi taa sensi di jaa 1919, Jehovah bi mbei zöndu libisëmbë heepi ën seti di paladëisi ka u dë nöunöu aki. A bi da de di okasi u mbei a ko möön bigi, söseei u mbei di biibi u dee sëmbë dee dë a di paladëisi dë, ko möön taanga. I seei ta heepi u du di gaan wooko aki tu ö? I ta tei ën u bigi taa wan gaandi i abi u wooko makandi ku Jehovah u tja gafa ko dëën a goonliba aki ö?

12. Unfa di soni di sikifi a Jesaaja 60:17 pasa tuutuu? (Luku di peentje a bigi u di woto.)

¹² Di tjabukama de kai Jesaaja bi taki taa sömëni soni bi tooka a di pisi u di ölganisaasi u Gadu di dë a goonliba aki, di bi o mbei a ko möön hanse. (Lesi Jesaaja 60:17.) Njönkuwan ku njunjun sëmbë di ko a di biibi lesi soni u dee soni dee tooka a di ölganisaasi nasö jei nöö de jei soni u de. Ma sömëni baaa ku sisa dë di bi abi di gaandi u si dee soni dee bi tooka a di ölganisaasi! Dee dinima u Gadu aki dë seiki taa Gadu hën ta mbei Jesosi, di Könu fuu, tii di ölganisaasi fëën! Te u ta haika dee woto u dee lobi baaa ku sisa fuu, nöö di biibi ku di futoou di u abi a Jehovah o ko möön taanga.

13. Andi u musu du te u luku di soni di sikifi a Psalöm 48:12-14?

¹³ Hii dee tuutuu bakama u Keesitu musu konda soni u di ölganisaasi u Jehovah da wotowan. A dë wan foombo soni taa hii fa u ta libi a di hogi goonliba u Saatan aki, tökuseei u ta libi fiifii makandi ku hii dee baaa ku sisa fuu a hii së u goonliba! Waiwai seei u musu ta konda soni u di ölganisaasi u Jehovah ku di paladëisi ka u dë nöunöu aki, da de da dee „bakamii” dee o ko!​—Lesi Psalöm 48:12-14.

14, 15. Andi bi ko tooka a di ölganisaasi baka di jaa 1970, nöö unfa di ölganisaasi bi feni wini fëën?

¹⁴ Sömëni u dee gaan sëmbë dee dë a dee kemeente bi si fa sömëni soni tooka a di ölganisaasi u Jehovah di mbei taa a ko möön hanse. De sabi jeti di dee kemeente bi abi wan kemeente dinai ka u de bi abi wan  kulupu u gaanwomi u kemeente. De sabi jeti tu di dee bëikantoo bi abi wan bëikantoo dinai ka u de abi wan Bëikantoo Komite. Söseei de sabi jeti di wan fesima nöö bi ta tii di Watch Tower Society, di di Tii Kulupu u Jehovah Kotoigi ta tii nöunöu. Hii dee baaa aki bi dë u futoou, söseei de bi abi woto baaa di bi ta heepi de. Ma tökuseei wan kodo sëmbë hën bi ta taki da dee kemeente, da dee bëikantoo, ku di hedikantoo. Baka di jaa 1970, soni bi ko tooka a di ölganisaasi sö taa na wan kodo sëmbë nöö bi ta taki möön andi bi musu pasa, ma wan kulupu u gaanwomi.

¹⁵ Faandi mbei dee soni aki bi tja wini ko da di ölganisaasi? U di di ölganisaasi bi ko fusutan di Bëibel möön bunu. Ma nöunöu na wan kodo sëmbë hën ta taki andi musu pasa, wan kulupu u gaanwomi di abi „peipei gudu” hën ta du ën makandi. A sö wan fasi u ta feni wini u dee bunu fasi u hii dee gaanwomi di Jehovah buta u tei fesi a di ölganisaasi fëën.​—Efeise 4:8; Nöngö 24:6.

16, 17. Andi da dee soni dee tooka a dee jaa dee pasa aki di i lobi, nöö faandi mbei i lobi de?

¹⁶ Pakisei wan tu u dee soni dee tooka a dee buku fuu dee jaa dee pasa aki. U ta wai seei u paati dee waiti buku fuu dee ta heepi sëmbë, te u ta peleiki. Pakisei tu fa u ta wooko ku dee njunjun soni di könima mbei, di ta heepi u u paaja di bunu buka da wotowan. U ta wooko ku di website fuu jw.org, sö taa u sa heepi möön hia sëmbë u de feni dee soni di de abi fanöudu. Hii dee soni dee tooka aki, ta lei u taa Jehovah ta booko hën hedi ku sëmbë gaanfa, söseei de ta lei u taa a lobi sëmbë.

¹⁷ U lobi fa soni tooka a dee komakandi fuu, di mbei taa u abi ten u du di Wosudendu Dini nasö u lei useei soni u Bëibel. Söseei u lobi fa soni tooka a dee keling-komakandi ku dee könklësi fuu. Hiniwan jaa u ta si taa soni ta ko möön bunu! U ta wai seei tu ku dee soni dee u ta lei a dee sömëni Bëibel-siköö  fuu. A hii dee soni dee tooka aki u ta si gbelingbelin taa Jehovah ta tii di ölganisaasi fëën, söseei taa a ta mbei di paladëisi ka u dë nöunöu aki ko möön hanse!

18, 19. Andi u sa du u heepi mbei di paladëisi ka u dë nöunöu aki ko möön hanse?

¹⁸ Jehovah da u di gaandi fuu sa heepi mbei di paladëisi ka u dë nöunöu ko möön hanse. Unfa u ta du di soni dë? Te u ta paaja di bunu buka u di Könuköndë u Gadu ku te u ta heepi möön hia sëmbë u de ko dë bakama u Jesosi. Hiniwan juu te u heepi wan sëmbë u toon wan dinima u Gadu, nöö u ta heepi mbei di paladëisi ka u dë nöunöu ko möön bigi.​—Jesaaja 26:15; 54:2.

¹⁹ U ta heepi u mbei di paladëisi fuu ko möön hanse tu te u ta mbei taanga möiti u ko dë wan möön bunu bakama u Keesitu. Di soni aki ta heepi u u mbei di paladëisi ka u dë nöunöu ko möön hanse da wotowan. Na di sabi di u sabi soni u Bëibel nöö da di fosu soni di ta mbei sëmbë ko a di ölganisaasi. Ma di fasi fa u ta tja useei ku di fasi fa u ta libi fiifii ku wotowan, hën ta hai sëmbë ko a di ölganisaasi, nöö de ta ko dë bakama u Jehovah ku Jesosi.

20. Andi u musu kë du te u luku di soni di sikifi a Nöngö 14:35?

²⁰ Jehovah ku Jesosi musu u ta wai seei te de ta si di gaan hanse paladëisi ka u dë nöunöu a di ten aki. Di wai di u ta wai nöunöu u di u ta mbei a ko möön hanse, da wan tjë sö nöö u di gaan wai di woo wai bakaten te woo mbei di goonliba ko toon wan tuutuu paladëisi. Hii juu u musu ta hoi Nöngö 14:35 a pakisei, di ta taki taa: „Wan könu ta wai te a abi wan futuboi di ta du soni a wan köni fasi.” Boo du soni a wan köni fasi te u ta mbei taanga möiti u mbei di paladëisi ka u dë nöunöu aki ko möön hanse!