DI WOTO DI NAMA KU DI KAFITI | WAN SËMBË DI DËDË SA TOONA LIBI BAKA U?
Andi ta pasa ku wan sëmbë te a dëdë?
„Mi bi mëni taa dii kamian dë ka wan sëmbë sa go te a dëdë: Gadu Köndë, didibi faja, nasö taa a bi nango a wan kamian go tei sitaafu ufö a go a Gadu Köndë. Mi bi sabi taa ma bi bunu tjika u go a Gadu Köndë, ma ma bi hogi sö u go a didibi faja tu. Ma bi kaba fusutan andi da di kamian ka de taa sëmbë nango tei sitaafu ufö de go a Gadu Köndë. Ma bi lesi sö wan soni a Bëibel wan daka. Jei nöö m’ bi ta jei sëmbë ta taki soni fëën.”—Lionel.
„De bi lei mi taa hii sëmbë nango a Gadu Köndë te de dëdë, ma ma bi ta biibi di soni dë. Mi bi ta mëni taa te wan sëmbë dëdë, nöö hii soni fëën kaba a mundu, nöö an o sa toona libi wan daka möön.”—Fernando.
Kandë i bi hakisi iseei dee soni aki kaa: ’Andi ta pasa tuutuu ku wan sëmbë te a dëdë? Dee lobi sëmbë fuu dee dëdë dë a wan kamian ta tja sitaafu ö? Woo toona si de wan daka möön u? Unfa u sa dë seiki u sö wan soni?’ Gaantangi luku dee soni Gadu Buku ta lei u. Boo go luku fosu andi di Bëibel taki taa ta pasa ku wan sëmbë te a dëdë. Baka di dë, nöö woo taki u di bunu soni di di Bëibel taki taa o pasa ku dee dëdë sëmbë.
Andi ta pasa ku wan sëmbë te a dëdë?
ANDI DI BËIBEL TA TAKI: „Dee sëmbë dee dë a libi sabi taa de o dëdë, ma dee dëdë sëmbë an sabi na wan hojo soni. De an o kisi na wan paka möön tu, biga na wan sëmbë ta mëni soni u de möön. Hii soni di i maun feni u du, du ën ku hii i kaakiti, biga a Geebi, di kamian teka joo go, sëmbë an ta wooko naandë, de an ta pakisei soni, de an sabi na wan soni, nöö de an abi na wan köni tu.” * (Luku di pisi a basu)—Peleikima 9:5, 10.
Di Geebi di de ta taki fëën aki, an dë wan tuutuu kamian. Te wan sëmbë go a Geebi, nöö an sabi na wan soni möön, söseei an sa du na wan soni möön tu. Unfa Jöpu bi ta si di Geebi aki? A bi lasi hii soni di a bi abi, söseei hii dee mii fëën bi dëdë a wan kodo daka dendu, nöö boi bi kisi ën hii hën sinkii. Jöpu bi begi Gadu taa: „Ke, ee i bi sa tjubi mi a di Geebi baa. Mi wensi taa i bi sa tjumi mi” (Jöpu 1:13-19; 2:7; 14:13) Jöpu an bi ta si di Geebi aki kuma wan kamian ka a bi o tjuma a faja u teego, nasö ka a bi o go tei möön gaan sitaafu. Ma a bi ta si ën kuma wan kamian ka a bi o go böö.
Wan woto fasi dë fa i sa ko sabi andi ta pasa ku wan sëmbë te a dëdë. U sa luku woto a Bëibel di ta taki u aiti sëmbë di bi weki kumutu a dëdë ko a libi baka.—Luku di pisi „ Di Bëibel ta taki u aiti sëmbë di bi dëdë di Gadu bi weki baka”.
Na wan u dee aiti sëmbë dë bi taki taa de bi ta piizii ka de bi dë ala, nasö taa de bi ta tja fuka nasö sitaafu. Wë ee dee sëmbë di Gadu bi weki baka bi go a sö wan kamian di de bi dëdë, nöö ja feni taa de bi o kondëën da woto sëmbë u? Ja si kuma dee soni dë bi o dë sikifisikifi a Bëibel fuu tuu sa feni de lesi ö? Ma di Bëibel an ta taki u na wan u dee soni dë. Na wan u dee aiti sëmbë dë bi feni wan soni taki. Wë faandi mbei? U di de an bi sabi na wan soni möön. A bi dë kuma te wan sëmbë dë a wan fundu duumi. A dë sö taa di Bëibel seei ta tei di dëdë di wan sëmbë dëdë, maaka ku di duumi di sëmbë ta duumi. Di di mujëë mii u di womi de kai Jailusi bi dëdë, nöö Jesosi bi taki taa „duumi a ta duumi”.—Maikusi 5:39.
Wë nöö wan libi dë di dee sëmbë dee dëdë sa feni baka u? De sa weki kumutu a di duumi di de ta duumi dë u?
^ pal. 7 Di wöutu di de puu ko „Geebi” da di Hebelejën wöutu „Sjeol” ku di Giiki wöutu „Hades”. So u dee Bëibel ta puu dee wöutu dë ko „didibi faja”, ma di Bëibel an ta taki na wan soni u wan kamian ka de ta sitaafu sëmbë a faja.