1, 2. Andi dee dinima u Jehovah musu kë du?

DEE dinima u Jehovah bi ta wakiti ku pasensi u dee tjabukama woto pasa tuu. Jelemia bi ta wakiti u si fa dee sëmbë u Babilon bi o ko booko di foto u Juda kaba a sösö, nöö di soni dë bi pasa tuu a di jaa 607 Bi.K (Jelemia 25:8-11). Jesaaja bi taki a fesi taa Jehovah bi o puu dee Dju a katibo tja go a Juda baka. A bi taki taa: „Dee sëmbë dee ta wakiti ën, de o ta dë waiwai” (Jesaaja 30:18). Mika seei bi ta wakiti dee soni di Jehovah bi paamusi, di a taa: „Ma mi o dë u mi ta wakiti Jehovah” (Mika 7:7). Höndöhöndö jaa kaa dee dinima u Gadu bi ta biibi taa di Mësiasi, nasö di Keesitu di Gadu bi paamusi de, bi o ko.​—Lukasi 3:15; 1 Petuisi 1:10-12. * (Luku di pisi a basu.)

² A di ten aki, useei ta wakiti u dee tjabukama woto dee nama ku di Könuköndë u Jehovah pasa tuu. Abiti möön Jesosi di dë Könu u di Könuköndë dë, o ko puu dee dinima u Gadu a di hogi goonliba aki basu. A o kii dee hogihati sëmbë, nöö a o puu hii pena ku hii fuka di ta miti libisëmbë (1 Johanisi 5:19). Fëën mbei u musu dë ku di  mëni taa di daka u Jehovah sa ko hiniwan daka, nöö u musu du hii soni di u sa du fuu sa dë kabakaba da di daka dë.

3. Andi u sa bigi ta pakisei, ee u dë ta wakiti di kaba u di goonliba sömëni jaa longi kaa?

³ U kë u di daka dou seei ka di kë u Gadu o pasa a goonliba (Mateosi 6:10). Ma ee u dë ta wakiti sömëni jaa kaa u di kaba u di goonliba ko, nöö kandë u sa ta hakisi useei taa: ’Faandi mbei u musu dë ku di mëni nöömö taa di kaba u di goonliba aki o ko abiti möön?’

4. Faandi mbei a dë fanöudu taa u musu „dë setiseti ta mëni” di daka u Jehovah?

⁴ Jesosi bi piki dee bakama fëën taa de bi musu ta „dë setiseti ta mëni” di daka dë, söseei taa de bi musu „dë ku wojo”. Fëën mbei useei a di ten aki, musu ta mëni nöömö taa di kaba u di goonliba aki o ko abiti möön (Mateosi 24:42; Lukasi 21:34-36). Di ölganisaasi u Jehovah seei ta mëni u taa u musu ’ta watji di daka seei ku wai ta biinga ta du soni fu di daka musu ko’, söseei u musu ta buta u pakisei a di njunjun goonliba di Jehovah paamusi u.​—Lesi 2 Petuisi 3:11-13.

5. Un woto soni ta lei u taa u musu ta mëni di daka u Jehovah nöömö?

⁵ Ee dee bakama u Jesosi bi musu ta buta mëni a di daka u Jehovah nöömö taa a o ko, nöö useei a di ten aki musu ta buta mëni nëën möön gaanfa. Faandi mbei? U di dee maaka di Jesosi bi da u, ta lei taa a dë Könu u di Könuköndë u Gadu sensi di jaa 1914, söseei de ta lei u tu taa u ta libi a dee lasiti daka nasö a di kaba u „di ten u dë aki”. Te u luku di soni di Jesosi bi taki a di tjabukama woto, nöö u ta si taa di goonliba aki ta ko möön hogi seei, söseei u ta si taa di bunu buka u di Könuköndë ta paaja a hii di goonliba (Mateosi 24:3, 7-14). Jesosi an bi taki un longi dee lasiti daka bi o dë. Fëën mbei u musu dë seekaseeka taa di kaba u di goonliba aki sa ko hiniwan juu.

6. Unfa u du sabi taa di goonliba aki o ko möön hogi fa di kaba u di goonliba ta ko möön zuntu?

⁶ Te di Bëibel ta taki taa „di ten u dë aki o kaba”, nöö a kë taki u wan ten di o ko ka soni o ko möön hogi a goonliba möön fa a dë nöunöu aki ö? Di Bëibel ta taki taa dee sëmbë u di goonliba aki o ta ko möön hogi „a dee lasiti daka u di goonliba aki” (2 Timoteo 3:1, 13; Mateosi 24:21; Akoalimbo 12:12). Ma hii fa hogi soni dë a goonliba gaanfa, tökuseei u sabi taa soni o ko möön hogi.

7. Andi di tëkisi u Mateosi 24:37-39 ta lei u u di fasi fa di goonliba bi o dë a dee lasiti daka?

⁷ So sëmbë sa pakisei taa ufö di „gaan fuka” dou, nöö gaan feti o dë a hii köndë u goonliba, söseei taa gaansë u sëmbë o ta siki nasö de an o ta abi soni u njan (Akoalimbo 7:14). Ma ee di soni aki bi ko pasa, nöö hii sëmbë bi o si taa dee tjabukama woto u Bëibel ta pasa tuutuu. Dee sëmbë dee an kë sabi soni u Bëibel seei bi o si ën gbelingbelin tu. Ma toona mëni taa Jesosi bi taki taa a dee lasiti daka, gaansë u sëmbë an bi o „mëni seei taa sö wan hogi dë u ko miti de”. De o ta libi u de kumafa de guwenti, nöö de o panta seei te di daka u Jehovah o dou. (Lesi Mateosi 24:37-39.) Wa musu mëni taa ufö di „gaan fuka” ko, di goonliba aki o ko hogi gaanfa tee taa dee sëmbë o bia ko biibi taa di kaba o ko abiti möön.​—Lukasi 17:20; 2 Petuisi 3:3, 4.

8. Andi u ta biibi tuutuu, u di u ta buta mëni a dee maaka di Jesosi bi da u?

⁸ Dee maaka di Jesosi da u, bi dë maaka u lei dee bakama fëën gbelingbelin u de sabi na un pisiten u di goonliba de bi o ta libi. Dee bakama u Jesosi ta buta mëni a dee maaka aki (Mateosi 24:27, 42). Sensi di jaa 1914 dee peipei maaka di Jesosi bi da u ta pasa leti kumafa a bi taki. U ta biibi tuutuu taa u ta libi a dee lasiti daka u „di ten u dë aki”. Jehovah buta kaa na un ten a o poi di hogi goonliba u Saatan.

9. Faandi mbei u musu ta mëni nöömö taa di kaba u di goonliba aki o ko abiti möön?

 ⁹ Faandi mbei u musu ta mëni nöömö taa di kaba u di goonliba aki o ko abiti möön? Wë u di u ta piki Jesosi buka. Söseei u ta si gbelingbelin taa dee maaka di Jesosi bi da u, dee nama ku dee lasiti daka ta pasa tuutuu. U ta biibi taa di kaba u di goonliba aki zuntu, u di u dë seiki taa dee tjabukama woto u Bëibel ta pasa tuutuu, ma na u di u ta biibi hiniwan soni di u ta jei. Fëën mbei u musu dë ku wojo, söseei u musu dë kabakaba u te di kaba u di goonliba aki dou.

10, 11. (a) Faandi mbei Jesosi bi piki dee bakama fëën taa ’de musu dë kabakaba ta luku ën’? (b) Andi Jesosi piki dee bakama fëën taa de musu du, te de si kuma di kaba an ta ko hesi kumafa de bi mëni? (Luku di peentje a bigi u di woto.)

¹⁰ Sömëni fuu ta dini Jehovah ku hii u hati sömëni jaa kaa, nöö u dë seei ta wakiti di daka u Jehovah faa ko. Aluwasi un longi u dë ta wakiti kaa, tökuseei u musu dë ta mëni di daka nöömö taa a o ko abiti möön. U musu dë kabakaba seei te Jesosi o ko poi di goonliba u Saatan aki kaba a sösö. Mëni di soni di Jesosi bi piki dee bakama fëën. A bi piki de taa: „Hën mbei un musu dë kabakaba këëë ta watji mi. Biga wan sa na un juu mi o ko. Mi o kondëën da unu a wan fasi aki taa a dë leti kuma wan bigima di o go a oto köndë go waka. Nöö hën a kai dee wookoma fëën go buta wooko a de maun te a kaba u de ta du, hiniwan sëmbë ku ën wooko. Nöö hën a fan ku di sëmbë ta watji a di dööbuka taa: ’I musu dë kabakaba ta luku mi e.’ Nöö un musu dë kabakaba ta luku mi. Biga wan o sabi di ten nasö di juu di mi o ko e, ee a sapate buka, ee a gaan ndeti, ee a ganian kanda, ee te kamian ta limbo, wan o sabi. Te fii sabi nöö mi dou kaa, nöö na be a dë taa i dë kuma i ta duumi di juu dë e. Nöö sö e. Fa i si mi ta fan ku unu aki, nöö sö nöö mi ta fan ku hii sëmbë. Un musu dë kabakaba ta luku mi e, dee sëmbë.”​—Maikusi 13:33-37.

¹¹ Di dee bakama u Jesosi ko fusutan taa a bigi tii a di jaa 1914, hën de ko si taa di kaba u di goonliba aki sa ko hiniwan juu. Fëën mbei de bi dë seekaseeka da di daka dë, u di de bi ta peleiki möön gaanfa seei. Jesosi bi taki taa a sa ko „a ganian kanda, ee te kamian ta limbo” seei. Ee di soni dë ko pasa, nöö andi dee bakama fëën musu du? Jesosi taki taa: „Un musu dë kabakaba ta luku mi e, dee sëmbë.” Fëën mbei aluwasi u ta fii kuma u ta wakiti longi poi, tökuseei di soni dë an kë taki taa di kaba u di goonliba aki an o ko jeti, nasö taa an o ko a di ten fuu aki.

12. Andi Habaki bi hakisi Jehovah, nöö andi a bi piki ën?

¹² Di tjabukama Habaki bi ta wakiti ku pasensi, hii fa a bi ta piki dee sëmbë taa de bi o poi Jelusalen kaba a sösö. Woto tjabukama bi ta paaja di buka aki sömëni jaa longi ufö Habaki  seei. Habaki bi ta si fa soni bi ko möön hogi a goonliba, söseei a bi si fa sëmbë an bi ta du soni a wan leti fasi möön. A bi begi Jehovah faa heepi ën. A taa: „Jehovah o, un longi mi musu bai ka i fii ko heepi mi?” Hii fa Jehovah an bi taki na un daka di kaba bi o ko, ma a bi paamusi Habaki taa: „An o ko lati!” Jehovah bi piki Habaki söseei taa a „musu ta mëni ën nöömö”.​—Lesi Habaki 1:1-4; 2:3.

13. Andi Habaki bi sa pakisei, nöö faandi mbei a bi o dë wan hogi soni u pakisei sö?

¹³ Pakisei di soni aki. Ee Habaki bi ko wei u wakiti u di kaba ko, nöö a bi taki taa: ’Sömëni jaa longi kaa mi dë ta wakiti u de ko poi Jelusalen kaba a sösö. An dë fanöudu u mi dë ta paaja di buka aki möön, u di di kaba an o ko djunsu. Woto sëmbë sa du ën.’ Andi bi o pasa ee a bi ta pakisei sö? Jehovah an bi o feni Habaki bunu möön. Söseei ee an bi o dë kabakaba ta wakiti di kaba faa ko, nöö a bi sa dëdë seei.

14. Faandi mbei woo dë ku tangi a hati taa Jehovah bi piki u a fesi fuu dë ta mëni nöömö taa di kaba u di goonliba aki o ko?

¹⁴ Pakisei taa i dë a di njunjun goonliba. Hii dee tjabukama woto dee nama ku dee lasiti daka pasa tuu kumafa Jehovah bi taki. Joo ta biibi Jehovah möön gaanfa, nöö joo ko dë möön seiki taa a o du hii dee woto soni dee a paamusi. (Lesi Josua 23:14.) Joo dë ku tangi a hati seei taa Jehovah bi buta di soifi ten u tja di kaba u di goonliba ko, söseei taa a bi piki u a fesi taa u musu dë ta mëni di daka nöömö.​—Tjabukama 1:7; 1 Petuisi 4:7.

15, 16. Faandi mbei u musu du hii soni di u sa du u peleiki da sëmbë a di pisiten u di kaba u di goonliba aki?

¹⁵ Di ölganisaasi u Jehovah o ta mëni u nöömö fuu ta lei taa di dini di u ta dini Jehovah da di möön fanöudu soni a u libi. Na heepi nöö dee soni di di ölganisaasi ta mëni u aki, ta heepi u fuu sa dini Gadu fajafaja, ma de ta heepi u tu fuu sa si gbelingbelin taa wa musu biabia u paaja di buka aki. U ta si gbelingbelin taa dee maaka dee Jesosi bi da u u di ten fuu aki ta pasa tuutuu nöunöu, söseei taa di kaba o ko abiti möön. Fëën mbei u ta buta Jehovah a di fosu kamian a u libi, nöö u ta paaja di bunu buka u di Könuköndë fajafaja.​—Mateosi 6:33; Maikusi 13:10.

 ¹⁶ Te u ta paaja di bunu buka da wotowan, nöö u ta heepi de u de kumutu a di goonliba u Saatan di o poi kaba a sösö abiti möön. Wan u dee gaan hogi di bi pasa a ze, bi pasa a di jaa 1945 di di sipi de ta kai Wilhelm Gustloff bi singi. Dusudusu sëmbë bi dëdë. Ma de bi ko heepi dee sëmbë u di boto. De bi heepi wan sisa ku hën manu. Di sisa ta mëni jeti fa wan mujëë bi ta bai ta kai wolo di di sipi bi ta singi. A bi ta bai taa: „Dee valisi u mi ooo! Dee valisi u mi ooo! Dee goutu soni u mi! Hii dee goutu soni u mi dë a di sipi dendu jeti. Mi lasi hii soni!” Ma dee woto sëmbë dee bi dë a di sipi dendu bi fusutan taa a bi dë möön fanöudu u heepi sëmbë u de an dëdë. A di ten aki sëmbë sa lasi de libi tu. Fëën mbei u kë dë kuma dee sëmbë dee bi ta heepi dee woto sëmbë u de an dëdë, nöö u kë buta hii u pakisei a di paaja di u ta paaja di bunu buka fajafaja. Fëën mbei u musu du hii soni di u sa du u heepi sëmbë u pasa di kaba u di goonliba aki libilibi.

17. Faandi mbei u musu biibi taa di kaba u di goonliba aki sa ko hiniwan juu?

¹⁷ U ta si gbelingbelin taa dee tjabukama woto u Bëibel ta pasa tuutuu, söseei taa di kaba u di hogi goonliba aki dë zuntu seei. U ta wakiti u „dee teni tutu” ku „di [hogi] mbeti” ko du ku dee poipoi keiki, di Bëibel ta kai di Gaan Babilon (Akoalimbo 17:16). Wa musu mëni taa a o tei longi möön ufö di soni aki pasa. Wa musu fëëkëtë taa Gadu o „butëën a de hati” u go feti ku dee poipoi keiki, nöö di soni aki sa pasa hesihesi seei, söseei a sa pasa hiniwan juu (Akoalimbo 17:17). Abiti möön di hogi goonliba u Saatan an o dë möön. Fëën mbei u musu du di soni di Jesosi bi taki. A bi taa: „Un mëni unu seei e, fu wan booko unu hedi ku dee sölugu u di goonliba aki ku dee jajo libi fëën, te nöö un fëëkëtë di Daka dë e. Wan musu ta sai dë ta dööngö ta poi ten te nöö di daka kisi unu söndö un mëni. Biga a o ko kai a hii sëmbë tuu liba kuma aviti” (Lukasi 21:34, 35; Akoalimbo 16:15). Boo dë ku wojo seei, söseei boo dini Jehovah fajafaja go dou, u di u dë seiki taa a ta „heepi dee sëmbë dee ta wakiti ën nöömö”.​—Jesaaja 64:4.

18. Un hakisi woo piki a di woto di ta ko?

¹⁸ U musu tei di lai di Judasi bi da u, hii fa u dë ta wakiti di kaba u di hogi goonliba aki. A bi sikifi taa: „Ma nöö un dee sëmbë u mi naandë, . . . Un musu heepi unu seei makandi be di biibi fuunu musu ta göö möönmöön u sëmbë si ën a unu libi. Nöö un musu ta begi nöömö tu, ku . . . di Akaa [santa jeje, NW] u Gadu. Un musu ta hoi unu seei a wan fasi ka di lobi u Gadu sa dou a unu, nöö a di lobi dë seei dendu un musu dë ta watji di ko fuu Masa Jesosi Keesitu. Biga wan daka a o ko nöömö, nöö woo feni di libi u teego di a bi buta da u kaa fu di a abi tjalihati fuu” (Judasi 20, 21). Ma unfa u sa lei taa u dë ta wakiti di njunjun goonliba u Gadu faa ko abiti möön, söseei taa u kë faa ko? Woo piki di hakisi aki a di woto di ta ko.