I bi hakisi iseei kaa ee woto soni dë u du a di libi boiti pëë, wooko, toou, kiija mii nasö u ko gaandi ö? (Jöpu 14:1, 2). Di Bëibel ta lei taa gaan köni sëmbë seei bi ta hakisi deseei di soni aki.​—Lesi Peleikima 2:11.

Faandi mbei u ta libi? Di fosu soni di u musu hakisi useei da: „Unfa libi du bigi?” Sömëni sëmbë ko si taa wan gaan köni Sëmbë hën mbei u. Biga te i go sindo pakisei u di fasi fa u fusutan ku u sinkii mbei, nöö u musu gafa di sëmbë di mbei u. (Lesi Psalöm 139:14.) Hën da a bi musu u mbei u wan soni hedi! Joo sa abi wan möön bunu libi te i ko sabi faandi mbei u ta libi.

Gadu bi mbei di fosu womi ku di fosu mujëë feni gaan bunu seei, nöö a bi da de wan sipan wooko u du. A bi mbei de ku di maaka u libi u teego, u pai mii fuu di goonliba, söseei u mbei di goonliba ko toon wan paladëisi.​—Lesi Kenesesi 1:28, 31.

Di soni di Gadu bi abi a pakisei an bi go dou, u di libisëmbë bi hopo fia ku di tii fëën. Ma Gadu an bi disa u, nöö an bi tooka di soni di a bi abi a pakisei ku di goonliba tu. Di Bëibel ta piki u taa u sa dë seiki taa Gadu ta wooko jeti faa sa tjubi dee sëmbë dee ta hoi deseei nëën, söseei taa di soni di a bi abi a pakisei u du ku u, o pasa tuutuu! Fëën mbei Gadu kë taa i musu si di libi kumafa a bi kë taa a bi musu dë! (Lesi Psalöm 37:29.) Lei soni a di Bëibel, fii ko sabi andi iseei sa du fii sa feni di libi di Gadu paamusi libisëmbë.