DI WOTO DI NAMA KU DI KAFITI
Ambë da dee Jehovah kotoigi?
„Mi sabi Mike sömëni jaa kaa. Hën da wan Jehovah Kotoigi. Ma ma sa fusutan di keiki fëën. Ambë da Jehovah? Faandi mbei de an ta hoi dee piizii daka? A wan sëkte Mike dë nö?”—Becky, California, Amëëkanköndë.
„Di dee sëmbë di ta libi a mi bandja bi bigi lei soni u Bëibel ku Jehovah Kotoigi, hën mi hakisi miseei taa: ’Andi di në Jehovah Kotoigi kë taki? Unfa wan keiki sa abi sö wan në?’”—Zenon, Ontario, Kanada.
„Mi ku mi mujëë bi pakisei taa dee Jehovah Kotoigi ta ko a u u di de kë faa hati u taa wa nango a keiki. Nöö u bi pakisei taa ee dee gaangaan keiki an bi sa lei u bumbuu soni, nöö unfa seei dee Jehovah Kotoigi bi o sa lei u bumbuu soni.”—Kent, Washington, Amëëkanköndë.
„Ma bi sabi ambë da de, nöö ma bi sabi andi de ta biibi.”—Cecilie, Esbjerg, Denimaliki.
Kandë i bi si dee Jehovah Kotoigi ta peleiki da sëmbë a de pisi, nasö a kamian ka hia sëmbë ta pasa. Nasö kandë i si de ta paati buku di ta taki soni u Bëibel da sëmbë, söseei fa de ta lei sëmbë soni u Bëibel. Kandë wan Jehovah Kotoigi hën da i di buku aki. Tökuseei i sa ta hakisi iseei ambë da dee Jehovah Kotoigi tuutuu. Kandë i ta pakisei kumafa dee sëmbë a bigi u di woto aki ta pakisei.
Ee i ta hakisi iseei dee lö soni aki, nöö naasë i si kuma i sa feni dee piki? Unfa i sa ko sabi andi Jehovah Kotoigi ta biibi tuutuu, nöö naasë de ta feni möni u du di peleikiwooko? Naasë de ta feni möni u mbei dee kamian ka de nango dini Gadu? Faandi mbei de nango peleiki da sëmbë a de pisi, söseei faandi mbei de ta peleiki a kamian ka hia sëmbë ta waka pasa?
Cecilie di u bi taki fëën kaa, taki taa: „Mi lesi sömëni soni u Jehovah Kotoigi a Internet. Nöö mi jei hogi soni di sömëni sëmbë ta taki u de. Te u kaba fëën ma bi ta pakisei bunu u Jehovah Kotoigi möön.” Wë Cecilie bi fan ku dee Jehovah Kotoigi seei, nöö a bi ko si taa dee soni dee a bi jei an bi dë sö tuutuu.
I bi o kë sabi ambë da dee Jehovah Kotoigi tuutuu ö? Wë u ta da i taanga u go fan ku dee Jehovah Kotoigi seei, di mbei di buku aki (Nöngö 14:15). Wë dee woto dee ta ko baka disi o heepi i fii ko sabi ambë da u, söseei andi u ta biibi. Nöö de o heepi i tu fii ko fusutan di wooko di u ta du möön bunu.
