1, 2. Ambë da u di háti di u abi ta tii u, nöö faandi mbei u sa da Jehovah tangi u di a da u ën?

JEHOVAH GADU mbei libisëmbë a sö wan fasi taa de sa taki da deseei andi de kë. Jehovah da u wan soni di sa tii u te u kë du wan bunu soni. Di soni dë, hën da di háti di ta tii u. A dë wan soni di dë a u dendu di ta piki u andi bunu ku andi an bunu. Te u ta mbei di háti fuu ta tii u a wan bunu fasi, nöö a sa heepi u fuu du bunu soni, söseei fu wa go du soni di na bunu. Di háti di Jehovah da u ta lei u taa a lobi u, söseei taa a kë u soni waka bunu ku u.

² So sëmbë a di ten aki ta du bunu soni, nöö de ta buuse hogi soni, hii fa de an sabi dee wëti u Bëibel. (Lesi Loomë 2:14, 15.) Unfa a du ko? U di di háti u de ta tii de. Di háti aki hën ta tapa sëmbë u na go du hogi soni. Pakisei fa di goonliba bi o hogi ee na wan sëmbë bi abi wan háti di ta tii ën! Kandë u bi o ta jei möön hogi soni ta pasa möön leki fa u ta jei ën nöunöu aki. U sa da Jehovah tangi taa a da libisëmbë wan háti di ta tii de!

3. Unfa di háti fuu sa heepi u a di kemeente?

³ Gaansë u sëmbë an ta seeka di háti u de faa sa ta tii de a wan bunu fasi. Ma dee sëmbë u Jehovah kë u di háti u de tii de a wan bunu fasi,  u di a sa heepi de u de ta libi makandi ku deseei a di kemeente. U kë u di háti fuu ta heepi u fuu ta mëni dee wëti u Bëibel di ta taki andi bunu ku andi an bunu. Ee u kë seeka di háti fuu faa sa ta tii u a wan bunu fasi, nöö na lei nöö u musu lei andi di Bëibel ta taki. Ma u musu lobi dee wëti u Gadu, nöö u musu ta biibi taa de sa heepi u möön bunu. Paulosu bi sikifi taa: „Di Buka di Gadu manda u u ta lei aki, nöö hën da lobi. Nöö unfa di lobi dë sa ko? A sa ko te hati fii dë limbolimbo. A sa ko tu, te i piki di hati fii a di bunu soni a manda i. Nöö te i ta biibi Masa Gadu söndö ganjan, nöö hën ta tja lobi ko tu” (1 Timoteo 1:5). Te u ta seeka di háti fuu faa sa tii u bunu, söseei te u ta du andi a ta piki u, nöö di lobi di u lobi Jehovah ku di biibi di u ta biibi ën o ko möön taanga. Di fasi fa u ta mbei di háti fuu ta tii u ta lei fa u ku Jehovah dë mati tjika, söseei a ta lei fa u kë du soni di ta kai ku ën. Di háti fuu ta lei ambë u dë tuutuu.

4. Unfa u sa seeka di háti fuu faa sa ta tii u a wan bunu fasi?

⁴ Unfa u sa seeka di háti fuu faa sa ta tii u a wan bunu fasi? U musu ta lei soni a di Bëibel hii juu, nöö u musu ta pakisei fundu u dee soni dee u ta lesi, söseei u musu ta hakisi Jehovah faa heepi u u du dee soni dee u ta lei. Hën da na lei nöö u musu ta lei u ko sabi dee wëti u Gadu nöö a kaba. Ma u ta lei soni a di Bëibel, u di u kë ko sabi Jehovah möön bunu. U ta ko sabi ambë dëën tuutuu, söseei u ta ko sabi andi a lobi ku andi an lobi. Te u ta lei möön soni u Jehovah, nöö di háti fuu o sa si möön hesi andi Jehovah ta feni bunu ku andi an ta feni bunu. Möön u ta seeka di háti fuu faa sa ta tii u a wan bunu fasi, möönmöön woo sa ta pakisei kumafa Jehovah ta pakisei.

5. Andi woo luku a di woto aki?

⁵ Kandë u ta hakisi useei di soni aki: Unfa wan háti di seeka a wan bunu fasi sa tii u te u musu du wan soni? Unfa u sa lesipeki di háti u dee baaa ku sisa fuu? Nöö unfa di háti fuu sa tii u fuu du bunu soni? Boo go luku dii soni ka di háti fuu musu ta tii u bunu: (1) te u musu suku heepi a data, (2) te u kë mbei piizii, ku (3) te u musu peleiki.

6. Andi u musu du te a nama ku di fasi fa u kë u data musu kula u?

⁶ Di Bëibel ta piki u taa u musu ta köni ku dee soni dee sa du hogi ku u, söseei a ta piki u taa wa musu ta njan ta bebe pasa maaka (Nöngö 23:20; 2 Kolenti 7:1). Te u ta du dee soni dee Bëibel ta piki u fuu du, nöö a sa heepi u fuu sa ta dë gösöntu tu. Ma tökuseei u ta siki, nöö u ta ko gaandi tu. Andi woo du te u musu suku heepi? A so köndë, sëmbë nango a data u feni heepi, nasö de lo’ u go suku heepi a sëmbë di ta mbei busi deesi. Baaa ku sisa lo’ u sikifi biifi manda go a dee bëikantoo u hakisi de soni di nama ku di fasi fa data musu kula de. Sömëni u de lo’ u hakisi soni kuma: „Wan dinima u Jehovah sa kula a di lö fasi aki nasö di lö fasi dë u?”

7. Andi sa heepi u fuu du soni a wan köni fasi te a nama ku buuu?

⁷ Na wan bëikantoo nasö na wan gaanwomi u kemeente abi di leti u piki wan sëmbë di dë wan bakama u Keesitu andi a musu du te a nama ku di fasi fa data musu kulëën, aluwasi di sëmbë dë hakisi de andi a musu du (Galasia 6:5). Ma dee gaanwomi sa lei sö wan sëmbë andi Jehovah taki u di lö soni dë, sö taa di sëmbë sa du soni a wan köni fasi. Wan soni di Gadu piki u, hën da wa musu njan soni buuu (Tjabukama 15:29). Di wëti aki ta heepi wan Keesitu sëmbë faa fusutan gbelingbelin taa an sa mbei data dëën buuu, söseei an sa mbei data kulëën ku wan u dee fö möön fanöudu pisi u buuu. Te wan Keesitu sëmbë sabi di soni aki, nöö a sa mbei di háti fëën tii ën faa sabi ee a musu tei dee pikipiki soni dee data ta puu a buuu. * (Luku di pisi a basu.) Un Bëibel lai sa heepi u tu, fuu sa du soni a wan köni fasi te a nama ku di fasi fa data musu kula u?

8. Unfa Filipi 4:5 sa heepi u u du soni a wan köni fasi te a nama ku di gösöntu fuu?

 ⁸ Nöngö 14:15 ta taki taa: „Wan sëmbë di na abi öndöfeni ta biibi hii soni di a jei, ma wan köni sëmbë ta luku bunu ka a ta buta futu.” A di ten aki, so siki dë di data an sabi kula fëën. Fëën mbei u musu luku bunu ku deesi di sëmbë piki u taa ta kula so siki, hii fa soni an dë di ta lei taa a ta kula dee siki dë tuutuu. Paulosu bi sikifi taa: „Un musu ta libi ku saka fasi [a wan köni fasi, NW] a hii sëmbë dendu be de ta si” (Filipi 4:5). Te u ta libi a wan köni fasi, nöö woo sa ta buta mëni a di dini di u ta dini Jehovah, ma wa o ta buta mëni nöömö a soni di nama ku di gösöntu fuu. Ee u ta booko u hedi pasa maaka ku di gösöntu fuu, nöö a sa mbei u ko dë wan sëmbë di ta pakisei hënseei nöö (Filipi 2:4). U sabi taa solanga u dë a di goonliba aki, woo ta siki. Fëën mbei ja musu fëëkëtë nöiti taa di möön fanöudu soni a i libi, musu dë di dini di i ta dini Jehovah.​—Lesi Filipi 1:10.

9. Unfa Loomë 14:13, 19 sa heepi u u du soni a wan köni fasi te a nama ku di gösöntu fuu? Nöö andi sa poi di libi di u ta libi makandi ku useei kuma baaa ku sisa?

⁹ Wan Keesitu sëmbë di ta köni ku di fasi fa a ta libi ku wotowan, an ta duwengi de u de du soni kumafa hën ta pakisei. A wan köndë, wan baaa fuu ku hën mujëë bi da woto baaa ku sisa taanga u de bebe wanlö deesi, söseei u de njan wan tu apaiti soni u dë gösöntu. Te u kaba fëën, so baaa ku sisa bi haika de, ma wotowan an bi haika de. Ma di dee deesi ku dee soni di de bi njan an bi o wooko kumafa de bi piki de, hën sömëni baaa ku sisa hati bi ko boonu seei. Di baaa fuu ku hën mujëë bi abi di leti u taki da deseei ee de bi o bebe dee deesi dë nasö ee de bi o njan dee soni di de bi taki dë. Ma i pakisei taa a bi dë wan köni soni u di baaa ku di sisa dë mbei dee woto baaa ku sisa u de poi ku deseei u gösöntu hedi ö? So Keesitu sëmbë di bi ta libi a Loomë, an bi ta si soni a di wan fasi te a nama ku so u dee soni sëmbë bi ta njan, söseei ku piizii daka di sëmbë bi ta hoi. Wë un lai Paulosu bi da de? A bi piki de taa: „A kandë wan sëmbë ta hoi wan daka apaiti möön dee oto daka. Di otowan ta luku hii daka tuu di wan fasi nöö. Ma fa de ta du ën dë, hiniwan u de musu sabi gbelin nëën hati taa Gadu kë faa du sö e.” Fëën mbei boo luku bunu u na mbei wotowan naki futu kai.​—Lesi Loomë 14:5, 13, 15, 19, 20.

10. Faandi mbei u musu ta lesipeki wotowan te háti u de manda de u de du wan soni? (Luku di peentje a bigi u di woto.)

¹⁰ Na hii juu woo ta fusutan faandi mbei wan baaa nasö wan sisa u di kemeente du wan soni. Andi u musu du te a dë sö? Wa musu hesi poi u kuutu ën, nasö u duwengi ën faa tooka di fasi fa a ta pakisei u wan soni. Kandë di sëmbë musu seeka di háti fëën faa sa ta tii ën möön bunu, nasö kandë di háti fëën ta kuutu ën a hii pikipiki soni di a kë du (1 Kolenti 8:11, 12). Nasö kandë di háti fuu an seeka tjika faa a sa ta tii u a wan bunu fasi. Hiniwan sëmbë musu taki da hënseei andi a o du te a nama ku di gösöntu fëën, nöö hënseei musu tja di faantiwöutu u di soni di a o du dë.

11, 12. Unfa di Bëibel ta heepi u fuu mbei piizii a wan fasi di fiti?

¹¹ Jehovah mbei u a sö wan fasi taa u sa ta mbei piizii a wan bunu fasi. Salumon bi sikifi taa „wan ten dë u lafu”, söseei „wan ten dë u baja” (Peleikima 3:4). Ma na hii piizii di sëmbë ta piizii ta mbei de fii bunu. Boiti di dë wa musu ta tei di ten fuu ta mbei piizii pasa maaka. Unfa di háti fuu sa tii u fuu mbei piizii a wan fasi di Jehovah o feni bunu?

¹² Di Bëibel ta bai u taa u musu luku bunu ku ’dee soni di hati fuu ta manda u fuu du dee na ta kai ku Gadu’. Dee soni dë da te „i ta libi jajo libi. I ta libi fanafiti libi söndö sen. I ta du peipei hogi a di së u manu ku mujëë soni. I ta dini oto gadu möön leki Masa Gadu. I ta wisi sëmbë. I ta buuse sëmbë. I lo’ fia ta buja ku sëmbë. I ta djalusu da otowan. I a’ taku hatiboonu. I ta biinga fii wanwan tö musu feni bunu. I lo’ u suku toobi ta pii oto ta paati sëmbë ku sëmbë. I ta hai i seei puu a sëmbë dendu fu hiniwan piki soni hedi. I ta haun ku sëmbë. I ta bebe soni ta dööngö ta du fanjanfanjan soni, ta libi hii dee lö libi dë.” Paulosu bi sikifi taa „dee lö sëmbë ta libi dee lö libi dë, de an o dë a dendu u dee sëmbë Gadu ta tii möönsö” (Galasia 5:19-21). Fëën mbei u sa hakisi useei dee soni aki: ’Di háti u mi ta piki m’ taa ma musu du sport nasö luku sport ka sëmbë ta feti ö? Söseei a ta piki taa ma musu luku sport di sa mbei mi ko dë wan sëmbë di ta kë feti, di lo’ u fia ku wotowan nasö wan sëmbë di lobi di köndë fëën pasa maaka u? Háti u m’ ta bai m’ te a ko a m’ pakisei u luku wan fëlön ka fanafiti soni u womi ku mujëë dë u si nasö wan fëlön di ta da sëmbë taanga u libi fanafiti, u bebe dööngö nasö u du obiawooko u?’

13. Unfa di lai di sikifi a 1 Timoteo 4:8 ku Nöngö 13:20 sa heepi u te a nama ku piizii di u kë mbei?

¹³ Dee mama wëti u Bëibel sa heepi u fuu seeka u háti, fuu sa sabi un piizii u sa mbei. Di Bëibel ta piki u taa te wan sëmbë „ta djombo ta seki sinkii”, nöö wan piki wini nöö a ta tja ko dëën (1 Timoteo 4:8). Sömëni sëmbë feni taa te i ta du sport, nöö a ta bunu da di sinkii dendu fii. Ma unfa a dë te u kë du sport ku wotowan? U sa du sport ku hii sëmbë u? Nöngö 13:20 ta piki u taa: „Di sëmbë di ta waka ku köni sëmbë o ko köni, ma di sëmbë di ta hulu don sëmbë, soni an o nango bunu dëën seei.” U ta fusutan gbelingbelin taa a dë fanöudu u mbei di Bëibel tii di háti fuu te u kë mbei piizii.

14. Unfa dee sëmbë u wan wosudendu bi wooko ku di soni di sikifi a Loomë 14:2-4?

¹⁴ Wan baaa de kai Christian ku hën mujëë Daniela abi tu mujëë mii. Christian bi taki taa: „Wan ndeti di u bi hoi di Wosudendu Dini fuu, u bi taki u piizii di sëmbë ta mbei. Nöö u tuu bi fusutan taa i abi piizii di bunu, söseei i abi wotowan di an  bunu. Ku ambë u sa mbei piizii? Wan u dee mujëë mii fuu bi taki taa te de bi dë a böö juu a siköö, nöö so u dee mii dee dë Kotoigi ta tja deseei a wan fasi di na fiti. Nöö a bi taki taa hënseei bi ta kë du soni kuma de. U bi lei ën taa hiniwan sëmbë abi wan háti di ta tii ën. Nöö di háti dë hën musu tii u a hiniwan soni di u kë du, söseei hën musu piki u ku ambë u musu mbei piizii.”​—Lesi Loomë 14:2-4.

15. Unfa Mateosi 6:33 sa heepi u te u kë mbei wan piizii?

¹⁵ Di mbei di i ta mbei piizii ta tei gaansë u di ten fii ö? I ta buta di go di i musu go a komakandi, di peleiki di i musu peleiki ku di lei di i musu ta lei soni u Bëibel kuma dee fosu soni dee i musu ta du ö? Naa piizii hën ta ko a di fosu kamian? Andi da di möön fanöudu soni da i? Jesosi bi taki taa: „A di fosu kamian un musu biinga fuun ta dë a di Tii u Masa Gadu dendu ta libi kumafa a kë, nöö hii dee soni u taki dë tuu woon feni” (Mateosi 6:33). Te i musu taki un mëni ten joo ta tei u ta du soni, nöö di háti fii ta mbei i mëni di soni di Jesosi bi piki u ö?

16. Unfa di háti fuu ta da u taanga u peleiki da sëmbë?

¹⁶ Te u seeka di háti fuu faa sa ta tii u bunu, nöö na bai nöö a o ta bai u fu wa go du soni di na bunu, ma a o heepi u fuu ta du bunu soni tu. Wan u dee bunu soni aki da di peleiki di u ta peleiki da sëmbë a de pisi, söseei di peleiki di u ta peleiki da hiniwan sëmbë di u miti. Di soni dë hën Paulosu bi ta du. A bi sikifi taa: „Mi musu u kondëën [di bunu buka] da sëmbë. Nöö helu u mi tu ee ma kondëën” (1 Kolenti 9:16). Te u ta djeesi Paulosu, nöö háti fuu an o ta fon u, u di u sabi taa u ta du di soni di u musu du. Söseei te u ta paaja di bunu buka da wotowan, nöö u ta da de taanga u mbei de háti tii de tu. Paulosu bi taki taa: „Wa ta bia di Buka, ma u ta kondëën gbelingbelin be libisëmbë ku Gadu tuu si taa u ta du di wooko a wan leti fasi.”​—2 Kolenti 4:2.

17. Unfa wan sisa bi mbei di háti fëën tii ën a wan bunu fasi?

¹⁷ Di wan sisa de kai Jacqueline bi abi 16 jaa, hën a bi lei soni a siköö di nama ku mbeti nasö ku libisëmbë sinkii. Ma de bi ta lei de di lei de ta kai evolutie tu, di ta taki taa hii soni ta göö ko toon woto soni. Jacqueline bi taki taa: „Háti u mi an bi ta da m’ pasi u taki soni a dee lësi dë kumafa mi bi naa fan a dee woto lësi. Ma bi lobi di evolutie lei seepiseepi. Hën mi bi go piki di mësitë taa mi ta biibi taa Gadu hën mbei hii soni. Mi bi foondo seei di mi si fa a bi fan ku m’ a wan suti fasi. A bi da m’ pasi u mi konda da dee mii u di kalasi faandi mbei mi ta biibi di soni dë.” Jacqueline bi wai seei taa a bi haika di soni di di háti fëën bi piki ën faa du. Háti fii ta tii i fii du soni kumafa a fiti tu ö?

18. Faandi mbei u musu kë taa di háti fuu ta tii u a wan bunu fasi?

¹⁸ U kuma Keesitu sëmbë kë libi kumafa dee mama wëti ku dee wëti u Jehovah ta taki. Te u ta lei soni a di Wöutu u Gadu hii juu, te u ta pakisei fundu u dee soni dë, ku te u ta du dee soni dee u ta lei, nöö a sö wan fasi u ta seeka di háti fuu faa sa ta tii u a wan bunu fasi. Te u kaba fëën, di gaan gudu di Gadu da u aki o sa ta tii u a di libi fuu kuma Keesitu sëmbë!