1. Un degihati apösutu Johanisi da u, nöö faandi mbei a bi da u ën?

APÖSUTU Johanisi bi da u taanga fuu ta pakisei fundu u di fasi fa Jehovah lobi u tjika. A sikifi a 1 Johanisi 3:1 taa: „Masa Gadu lobi u te na soni!” Te u ta pakisei fundu u di fasi fa Jehovah lobi u, söseei u di fasi fa a ta lei taa a lobi u tjika, nöö woo ko möön zuntu ku ën. Boiti di dë woo ko lobi ën möön gaanfa seei.

2. Faandi mbei a ta taanga da so sëmbë u fusutan taa Gadu lobi de?

² A tjali taa so sëmbë an ta fusutan unfa Gadu sa lobi de. De ta pakisei taa Gadu an ta booko hën hedi ku sëmbë. Kandë de ta biibi taa wëti nöö Gadu sa’ u buta da sëmbë, söseei sitaafu nöö a sa’ u sitaafu dee sëmbë dee an ta piki hën buka. U di keiki ta lei so sëmbë poipoi soni, mbei de ta pakisei taa Gadu abi hogihati, söseei taa sëmbë an sa lobi Gadu. Wotowan ta pakisei taa Gadu lobi hii sëmbë, aluwasi andi de ta du. Ma di i lei soni u Bëibel, hën a heepi i fii ko sabi ambë da Jehovah tuutuu. I bi lei tu taa u hii dee fasi di Jehovah abi, lobi da di fasi di Gadu abi möön gaanfa, söseei taa a manda di Womi Mii fëën ko dëdë paka paima da u (Johanisi 3:16; 1 Johanisi 4:8).  Tökuseei dee soni dee i miti a i libi, sa mbei a taanga da i u fusutan fa Jehovah lobi i tjika.

3. Andi o sa heepi u fuu ko fusutan unfa Jehovah lobi u tjika?

³ Ee u kë fusutan unfa Jehovah lobi u tjika, nöö di fosu soni di u musu fusutan, hën da Jehovah hën mbei u. Hën da u libi. (Lesi Psalöm 100:3-5.) Fëën mbei Bëibel kai di fosu libisëmbë „di mii u Masa Gadu” (Lukasi 3:38). Nöö Jesosi bi piki u taa u musu kai Jehovah „u Tata a liba” (Mateosi 6:9). Awa, Jehovah da u Tata, nöö a lobi u kumafa wan tata lobi dee mii fëën.

4. (a) Un pei Tata Jehovah dë? (b) Andi woo luku a di woto aki ku di woto di ta ko?

⁴ A ta taanga da so sëmbë u si wan tata kuma wan lobihati sëmbë. Kandë de ta mëni dee hogi soni di de tata bi ta du ku de di de bi dë piki mii. Nöiti Jehovah o du sö wan soni ku dee mii fëën. Hën da di möön bunu Tata di u sa abi (Psalöm 27:10). A lobi u gaanfa seei, nöö a ta sölugu u a sömëni fasi. Möön u ta fii taa Jehovah lobi u, möönmöön useei o ko lobi ën tu (Jakobosi 4:8). A di woto aki woo luku fö fasi fa Jehovah ta lei taa a lobi u. Nöö a di woto di ta ko woo luku fö fasi fa useei sa lei Jehovah taa u lobi ën tu.

5. Andi Gadu da hii sëmbë?

⁵ Di apösutu Paulosu bi dë a di foto Atene di dë a Giikiköndë, hën a bi si sömëni pindi gadu, söseei a bi si taa dee sëmbë ta biibi taa dee gadu u de ta da de libi. Hën a piki de taa: „Di Gadu di i si mi ta taki aki, . . . hën mbei goonliba ku hii dee soni dë nëën tuu.” A bi piki de söseei taa Gadu „ta da hii sëmbë libi. Hën ta da i böö, a ta da i hii soni”. A bi piki de möön taa „hën ta da u libi, mbei u ta dë ta buli” (Tjabukama 17:24, 25, 28). Jehovah da u hii soni di u abi fanöudu u dë a libi, söseei fuu sa piizii u di libi tu. Pakisei u so u dee soni dee a da u u di a lobi u.

6. Un pei tan kamian Jehovah da u? (Luku di peentje a bigi u di woto.)

⁶ Jehovah mbei wan hanse tan kamian da u fuu libi (Psalöm 115:15, 16). Gadu mbei sömëni logoo soni buta a liba ala di de ta kai palanëti. U hii dee palanëti aki, di goonliba dë wan apaiti wan. Dee könima bi go öndösuku mundu ala, hën de bi ko si taa sömëni palanëti dë, nöö de an bi sa feni wan woto palanëti ka libisëmbë bi o sa libi. Jehovah da u hii soni di u abi fanöudu fuu sa dë a libi, söseei a mbei wan hanse goonliba da u di suti u libi, nöö a dë wan bunu kamian di o dë u nöömö ka u sa ta piizii u di libi (Jesaaja 45:18). Te u ta pakisei di tan kamian di di lobihati Tata fuu Jehovah da u, nöö u ta si fa a lobi u tjika.​—Lesi Jöpu 38:4, 7; Psalöm 8:3-5.

7. Unfa di fasi fa Jehovah mbei u ta lei taa a lobi u tuutuu?

⁷ Wan woto fasi fa Jehovah lei taa a lobi u, hën da di mbei di a mbei u a sö wan fasi taa u sa djeesi ën (Kenesesi 1:27). Hën da u sa fii taa a lobi u, nöö useei sa lei ën taa u lobi ën tu. Jehovah sabi taa di soni dë hën ta mbei u ta dë waiwai. Miii ta möön dë waiwai te de ta fii taa de mama ku de tata lobi de. Nöö hoi a pakisei taa Jesosi bi lei u taa woo ta dë waiwai te u ta dë zuntu ku di Tata fuu Jehovah (Mateosi 5:3). Jehovah da u „hii dee soni dee u abi, fuu sa njan de ku piizii”. A dë gbelingbelin u si taa Jehovah lo’ u da u soni, söseei taa a lobi u seei.​—1 Timoteo 6:17; Psalöm 145:16.

8. Faandi mbei u kë u Jehovah ta lei u soni?

⁸ Wan tata lobi dee mii fëën, nöö an kë u sëmbë ganjan de tja go kaba a sösö. Ma sömëni mama ku sömëni tata u di ten aki, an ta wooko ku dee wëti u Bëibel u sabi andi da bunu ku andi da hogi. Fëën mbei de an sa kiija dee mii u de a wan bunu fasi, nöö di soni dë hën ta mbei taa  dee mii an ta dë waiwai, söseei de ta buuja te de an ta saandi de musu du (Nöngö 14:12). Ma Jehovah ta lei dee mii fëën a di möön bunu fasi, u di hën da „di Gadu di ta taki tuutuu soni” (Psalöm 31:5). A ta wai seei u lei u dee tuutuu soni dee nama ku ën, söseei a ta lei u unfa u musu dini ën. Nöö a ta lei u di möön bunu fasi fa u musu libi. (Lesi Psalöm 43:3.) Wë nöö andi Jehovah lei u di ta lei fa a lobi u tjika?

9, 10. (a) Faandi mbei Jehovah konda soni fëën da u? (b) Unfa a lei u andi a abi a pakisei?

⁹ Di fosu soni di Jehovah ta du, hën da a ta konda soni fëën da u. A kë fuu ko sabi ën (Jakobosi 4:8). Fëën mbei a kai di në fëën da u. Di në fëën u ta feni möön hia möön hii dee woto në dee dë a Bëibel. Jehovah ta konda da u un pei sëmbë a dë. Te u luku dee soni dee a mbei, nöö u ta si fa a abi makiti tjika ku fa a köni tjika (Loomë 1:20). Te u ta lesi di Bëibel, nöö u ta lei fa a ta du soni a wan leti fasi ku fa a lobi u tjika. Möön u ta ko sabi dee fasi u Jehovah möön bunu, möönmöön woo ta ko zuntu ku ën.

¹⁰ Boiti di dë, Jehovah ta lei u andi a abi a pakisei u du. A ta konda da u taa useei da sëmbë u di wosudendu fëën tu. Söseei a ta konda da u andi a kë taa u musu du, sö taa u sa ta wooko waiwai makandi ku hii sëmbë u di wosudendu fëën. Di Bëibel ta lei u gbelingbelin taa Gadu an bi mbei u fuu sa taki da useei andi bunu ku andi an bunu (Jelemia 10:23). Jehovah sabi andi möön bunu da u. Nöö di saka di woo ta saka useei nëën basu, söseei di piki di woo ta piki hën buka, da di wan kodo soni di sa mbei u ta libi waiwai. Jehovah lei u dee soni aki u di a lobi u.

11. Andi di lobihati Tata fuu konda da u u di ten di ta ko?

 ¹¹ Wan lobihati tata ta booko hën hedi gaanfa seei ku di fasi fa soni o waka da dee mii fëën te de o ko möön bigi. A kë u de abi wan bunu libi. A tjali taa sömëni sëmbë a di ten aki ta booko de hedi ku di fasi fa di libi o ko dë bakaten, nasö de ta biinga a wan tu soni baka di an o dë u nöömö (Psalöm 90:10). U ta wai seei fa Jehovah, di Tata fuu ta lei u fa u sa abi wan bunu libi nöunöu kaa. Ma u ta wai tu taa a paamusi u taa u sa abi wan möön bunu libi a di ten di ta ko!

12. Unfa Jehovah bi pooba u heepi Kain ku Baluku?

¹² Di Jehovah bi si taa Kain bi o go du wan hogi soni, hën a suku fasi u heepi ën fu an go du di hogi soni dë. A hakisi ën taa: „Faandi mbei hati fii boonu sö? Faandi mbei fesi fii dë gudjuu sö? Ja pakisei taa ee i bia ko ta du bunu baka, mi o toona wai ku i ö?” (Kenesesi 4:6, 7) Kain an bi mbei Jehovah heepi ën, nöö fëën mbei soni an bi waka bunu dëën (Kenesesi 4:11-13). Ma te i luku di woto u Baluku, nöö u ta si taa Jehovah bi si taa an bi ta pakisei bunu soni, nöö di soni dë bi mbei a ko wei seei, nöö a bi ta fii booko saka tu. Hën Jehovah piki Baluku taa an bi ta pakisei bunu, nöö a bi musu tooka di fasi fa a ta pakisei. Baluku bi haika di lai di Jehovah bi dëën, nöö di soni dë bi mbei taa an bi dëdë.​—Jelemia 45:2-5.

13. Andi so u dee dinima u Jehovah bi lei di de bi ta miti tesi?

¹³ Jehovah ta lei u andi u musu du, nöö a ta sitaafu u u di a lobi u. Na sitaafu nöö a ta sitaafu u u lei u wan soni, ma a ta seeka u tu (Hebelejën 12:6). A di Bëibel u ta feni woto u dinima u Jehovah di a bi seeka u ko dë möön bumbuu sëmbë. Te u luku di woto u Josëfu, Mosesi ku Dafiti, nöö u ta si taa de bi abi wan pisiten a de libi ka soni an bi nango bunu da de. Ma a dee pisiten dë Jehovah an bi disa de. Dee soni de bi lei di dee tesi dë bi ta miti de, bi heepi de di Jehovah bi da de möön gaan faantiwöutu bakaten. Te u ta lesi woto a di Bëibel di ta taki fa Jehovah ta heepi dee sëmbë fëën, söseei fa a ta seeka de, nöö u ta fii taa Jehovah lobi u tuutuu.​—Lesi Nöngö 3:11, 12.

14. Te u du wan soni di an bunu, nöö unfa Jehovah ta lei taa a lobi u?

¹⁴ Aluwasi u du wan soni di an bunu, tökuseei Jehovah ta lei u jeti taa a lobi u. Ee u piki hën buka te a bai u a soni, söseei ee u ta lei taa u ta tjali u di zöndu di u du, nöö a o da u „paadon ku hii hën hati” (Jesaaja 55:7). Andi di soni aki kë taki? Dee soni dee Dafiti bi taki u di fasi fa Jehovah ta da sëmbë paadon, ta lei u fa a dë wan Tata di abi tjalihati. Di Bëibel taki taa: „A ta da i paadon u hii dee föutu dee i ta mbei. A ta puu i a hii dee fuka fii basu. A ta puu i a geebi fii sa toona libi baka. A ta lei taa a abi bunuhati fii, söseei taa a abi tjalihati fii. Leti kumafa sonu kumutu longi ku sonu go, sö nöö a buta dee zöndu fuu tee a longi ala” (Psalöm 103:3, 4, 12). Jehovah ta sitaafu u a peipei fasi, söseei a ta lei u soni a peipei fasi tu. I dë wan sëmbë di ta mbei möiti u tooka soni wantewante te Jehovah ta da i lai ö? Hii juu u musu ta hoi a pakisei taa Jehovah ta sitaafu u u di a lobi u.​—Psalöm 30:5.

15. Andi da wan woto fasi fa Jehovah ta lei taa a lobi u?

¹⁵ Wan lobihati tata ta tjubi dee mii fëën u hogi an miti de. Nöö di wan seei soni di Tata fuu Jehovah ta du da u. Di psalöm sikifima bi taki u Jehovah taa: „A ta tjubi di libi u dee sëmbë dee ta hoi deseei nëën. A ta puu de a dee hogi sëmbë maun” (Psalöm 97:10). Pakisei di soni aki: Leti kumafa i bi o tjubi dee wojo fii u soni  an du de, sö nöö Jehovah seei an ta biabia faa tjubi dee sëmbë fëën.​—Lesi Sakalia 2:8.

16, 17. Unfa Jehovah bi tjubi dee sëmbë fëën a di ten di pasa, nöö unfa a ta tjubi de a di ten aki?

¹⁶ A di ten di pasa Jehovah bi tei dee ëngëli u tjubi dee sëmbë fëën. Sö nöö a ta du ën a di ten aki tu (Psalöm 91:11). Wan ëngëli bi kii 185.000 sodati u Asilia a wan kodo ndeti, sö taa a bi sa tjubi dee dinima u Jehovah (2 Könu 19:35). A dee fosu jaahöndö, Jehovah bi tei ëngëli u puu Petuisi, Paulosu, ku wanlö woto sëmbë a dunguwosu (Tjabukama 5:18-20; 12:6-11). Wan tu jaa pasa wan gaan feti bi feti a wan u dee köndë fu Afiikan. Nöö di soni dë bi mbei taa dee sëmbë u di köndë bi ta du soni fanjanfanjan. De bi ta feti, de bi ta fufuu, de bi ta kisi mujëë, söseei sëmbë bi ta kii wotowan tu. Hii fa a bi dë sö, tökuseei na wan u dee baaa ku sisa fuu bi dëdë. Sömëni u de bi lasi hii dee soni di de bi abi. Ma di wan kodo soni di de an bi lasi, hën da di lobi di Jehovah bi ta lei taa a lobi de, söseei di booko di a bi ta booko hën hedi ku de. Hii fa dee soni aki bi ta miti de, tökuseei de bi ta dë waiwai. Di wan u dee baaa di di hedikantoo bi manda ko bi hakisi dee baaa ku sisa ee unfa a nango ku de, hën de piki ën taa: „Hii soni nango bunu, nöö u ta da Jehovah tangi u di dë!”

¹⁷ De bi kii so u dee dinima u Jehovah u di de bi hoi deseei nëën. Wan u de bi dë di bakama u Jesosi de kai Sitefani. Na hii juu Jehovah ta tapa di soni aki fu an pasa. Ma a ta tjubi dee sëmbë fëën u di a ta piki de unfa de musu luku bunu ku dee peipei fasi fa Saatan ta mbei möiti u kisi de (Efeise 6:10-12). U ta feni dee lai aki a di Bëibel, söseei a dee buku di di ölganisaasi u Jehovah ta da u. De ta lei u taa u musu ta luku bunu ku soni kuma Internet, di lobi di sëmbë ta lobi möni, di libi di sëmbë ta libi fanafiti a di së u manu ku mujëë, ku fëlön ka de ta du hogihati soni. Söseei de ta lei u taa u musu luku bunu ku dee buku dee u ta lesi, nasö dee game dee u ta pëë. U ta si gbelingbelin taa Jehovah lobi u, nöö u ta si taa a kë tjubi u tu.

18. Unfa i ta si di lobi di Jehovah lobi i?

¹⁸ Di Mosesi bi pakisei hii dee jaa dee a bi dini Jehovah, nöö di soni dë bi mbei a bi dë seiki taa Jehovah lobi ën. Fëën mbei a bi taki taa: „Boo fii di bunuhati fii a mamate, sö taa u sa bai kai piizii wolo ta wai hii u libi” (Psalöm 90:14). Wan gaan bunu u feni seei, u di u ko fusutan fa Jehovah lobi u tjika, söseei di u ko ta fii taa a lobi u. A dë wan gaan gudu seei di u feni, u di Jehovah ta lei u taa a lobi u! U ta fusutan di soni di apösutu Johanisi bi fusutan, di a bi taki taa: „Ee u ta tja di në taa u da Gadu mii, nöö nëën da Masa Gadu lobi u te na soni nö?”​—1 Johanisi 3:1.