1, 2. Un möiti hiniwan Keesitu sëmbë musu mbei?

BOO taa wan mujëë nango bai fuuta a wojowojo da dee sëmbë fëën wosudendu. Un fuuta i si kuma a o suku? An o suku dee möön gaan fuuta nasö dee möön bunkopu wan, ma a o suku bumbuu fuuta di de sa njan. An o kë bai guuunguuun fuuta, ma a o kë bai lepilepi fuuta.

² Baka te wan sëmbë lei soni u Jehovah u te a tei dopu, nöö a ta mbei möiti go dou fëën ku Gadu ko dë möön gaan mati. Apösutu Paulosu bi kë u dee Keesitu sëmbë u Efeise bi ko dë sëmbë di taanga a di biibi. A bi da de taanga u de ko dë wan a di biibi, söseei u de ta lei soni u Jesosi go dou u te de ko ’sabi ën bumbuu kumafa a dë, nöö de o ko dë gbelingbelin kumafa Masa Jesosi seei dë söndö föutu’.​—Efeise 4:13.

3. Na un fasi dee sëmbë u di kemeente u Efeise dë kuma dee sëmbë u Jehovah a di ten aki?

³ Di kemeente u Efeise bi dë sömëni jaa kaa ufö Paulosu bi sikifi di biifi manda da de. Sömëni sëmbë u di kemeente dë bi taanga a di biibi kaa. Ma tökuseei woto sëmbë bi dë a di kemeente di bi musu  ko taanga a di biibi tu. Hën da de bi musu ko dë möön gaan mati ku Jehovah. Sö nöö a di ten aki, sömëni baaa ku sisa di dini Jehovah sömëni jaa longi kaa, ko taanga a di biibi tu. Ma so u dee baaa ku sisa fuu an taanga sö jeti. Dusudusu sëmbë ta tei dopu hiniwan jaa, nöö de musu ko taanga a di biibi tu. Unfa a dë ku i?​—Kolosën 2:6, 7.

4, 5. Unfa Keesitu sëmbë di taanga a di biibi, tooka ku deseei? Ma andi i sa si a hii de tuu? (Luku di peentje a bigi u di woto.)

⁴ Te i ta suku lepilepi fuuta a wojowojo, nöö i ta si taa hii de tuu lepi, hii fa de an dë di wan fuuta. Sö nöö a dë ku Keesitu sëmbë di taanga a di biibi. Na hii de tuu dë di wan. De dë sëmbë di kumutu a peipei köndë, nöö de kiija a peipei fasi. I abi gaanwan ku pikiwan tuu, nöö na hii de tuu lobi di wan soni. Ma hii Keesitu sëmbë di taanga a di biibi abi fasi di i sa si a de taa de taanga a di biibi. Andi da wan tu u dee fasi dë?

⁵ Wan Keesitu sëmbë di taanga a di biibi ta djeesi Jesosi, nöö a ta „waka” finifini „nëën baka” (1 Petuisi 2:21). Jesosi bi taki taa a dë fanöudu seei u wan sëmbë lobi Jehovah ku hii hën hati, ku hii hën libi, söseei ku hii hën fusutan. A bi taki tu taa u musu lobi woto sëmbë kumafa u lobi useei (Mateosi 22:37-39). Wan Keesitu sëmbë di taanga a di biibi ta mbei taanga möiti u du dee soni aki. Di fasi fa a ta libi ta lei taa a ta si di lobi di a musu lobi Jehovah ku di lobi di a musu lobi wotowan, kuma di möön fanöudu soni nëën libi.

6, 7. (a) Andi da wan tu fasi di i musu si a wan Keesitu sëmbë u sabi ee a taanga a di biibi? (b) Andi u musu hakisi useei?

⁶ Lobi da wan u dee fasi di wan Keesitu sëmbë di taanga a di biibi ta lei taa a abi, ma na di fasi dë nöö a abi (Galasia 5:22, 23). Sö wan sëmbë abi saapifasi, a ta duwengi ënseei, nöö a abi pasensi tu. Dee fasi aki sa heepi ën faa hoi dou te di libi ta taanga dëën, söseei a sa heepi ën fu an lasi hati te wan soni an pasa kumafa a bi mëni. Te sö wan sëmbë ta lei soni u Bëibel, nöö a ta suku dee mama wëti u Bëibel di sa heepi ën faa ko sabi andi bunu ku andi an bunu. Nöö te a ta mbei di Bëibel ta tii di háti fëën, nöö a o ta du soni a wan köni fasi. Wan Keesitu sëmbë di taanga a di biibi abi sakafasi, nöö fëën mbei a ta biibi taa dee wëti u Jehovah ku di fasi fa Jehovah ta du soni, bunu hii juu möön dee u fëën. * (Luku di pisi a basu.) Sö wan sëmbë ta paaja di bunu buka fajafaja, nöö a ta du hii soni di a sa du sö taa hii sëmbë u di kemeente sa ta libi makandi ku deseei nöömö.

⁷ Aluwasi u ta dini Jehovah sömëni jaa longi kaa, tökuseei u sa hakisi useei dee soni aki: ’Soni dë di mi sa tooka u mi sa djeesi Jesosi möön bunu ö? Soni dë jeti di mi sa du möön bunu ö?’

8. Unfa Jesosi bi sabi di Bëibel tjika, nöö unfa a bi ta fusutëën?

⁸ Jesosi Keesitu bi sabi di Wöutu u Gadu bumbuu, nöö a bi ta fusutëën bumbuu tu. Di a bi abi 12 jaa, a bi taki soni di sikifi a di Bëibel di a bi ta fan ku dee leima a di Wosu u Gadu. „Hii dee sëmbë dee [bi] ta jei di fan u di mii, nöö a [bi] ta foondo de te na soni. Biga de an sabi unfa a waka a abi sö wan bumbuu fusutan te a ta piki dee sëmbë dee ta fan ku ën dë kuma na piki mii a dë” (Lukasi 2:46, 47). Bakaten di a bi ko ta peleiki, nöö a bi ta wooko a wan köni fasi ku di Wöutu u Gadu u tapa dee felantima fëën buka.​—Mateosi 22:41-46.

9. (a) Un guwenti wan Keesitu sëmbë di taanga a di biibi musu abi? (b) Faandi mbei u ta lei soni u Bëibel?

 ⁹ Wan Keesitu sëmbë di kë ko taanga a di biibi ta djeesi Jesosi, nöö a kë fusutan di Bëibel bumbuu. Hii juu a ta öndösuku dee fundu lei u di Wöutu u Gadu, u di a sabi taa „gbelingbelin njanjan, . . . dë u dee gaangaan sëmbë” (Hebelejën 5:14). Wan Keesitu sëmbë di taanga a di biibi kë „sabi” soni u di Bëibel „bumbuu” (Efeise 4:13). Fëën mbei hakisi iseei: ’Mi ta lesi di Bëibel hii daka u? Mi buta wan ten ka mi ta lei miseei soni u Bëibel ö? Mi ta hoi di Wosudendu Dini u mi hiniwan wiki ö?’ Te i ta lei soni u Bëibel, nöö suku dee mama wëti di sa heepi i u ko sabi unfa Jehovah ta pakisei ku unfa a ta fii. Nöö wooko ku dee mama wëti dë te i musu du wan soni. Di soni dë o heepi i fii sa ko möön zuntu ku Jehovah.

10. Unfa wan Keesitu sëmbë di taanga a di biibi ta pakisei u dee lai u Gadu ku dee mama wëti u Bëibel?

¹⁰ Na sabi nöö wan Keesitu sëmbë di taanga a di biibi, sabi andi di Bëibel ta taki, ma a musu lobi dee lai u Gadu ku dee mama wëti u Bëibel tu. Nöö di lobi aki o dë u si te a kë du andi Jehovah kë, ka faa du dee soni di hënseei ta kë. Söseei a ta tooka di fasi fa a ta libi, di fasi fa a ta pakisei ku di fasi fa a ta du soni. A ta djeesi Jesosi, nöö a ta ko abi di njunjun fasi u libi ’di Gadu da u, nöö a o ko ta djeesi ën seei, ta libi bunu a hii futu ku limbo hati’. (Lesi Efeise 4:22-24.) A dë fanöudu u hoi a pakisei taa Gadu bi mbei di santa jeje fëën tii dee sëmbë dee  sikifi di Bëibel. Fëën mbei te wan Keesitu sëmbë ta lei soni u Bëibel, nöö di santa jeje u Gadu ta heepi ën faa ko sabi möön soni, faa ko abi möön lobi, söseei faa ko dë möön gaan mati ku Jehovah.

11. Andi Jesosi bi ta si di a bi dë a goonliba aki?

¹¹ Jesosi an bi abi zöndu. Ma di Jesosi bi dë a goonliba aki, a bi ta libi a zöndu libisëmbë mindi. Hën mama ku hën tata ku dee baaa ku sisa fëën seei bi abi zöndu. Dee bakama u Jesosi seei dee bi ta waka ku ën hii juu, bi abi gaanfasi, nöö de bi ta pakisei deseei nöö. Di ndeti ufö Jesosi dëdë, hën dee bakama fëën bi ta buja ku deseei „ta hakisi taa fa de sai dë undi u de sa dë möön hei möön dee oto” (Lukasi 22:24). Hii fa dee bakama u Jesosi an bi ta pakisei a wan bunu fasi, tökuseei a bi sabi taa an bi o tei longi möön, nöö de bi o ko toon Keesitu sëmbë di taanga a di biibi. Nöö de bi o sa ta heepi dee sëmbë u di kemeente u de ta libi makandi ku deseei. A di wan seei ndeti dë, Jesosi bi begi da de u de sa libi makandi ku deseei. A bi hakisi hën Tata faa heepi dee bakama fëën u de sa libi makandi. A taa: „Taata o, mi begi i gaantangi, be de tuu ko dë wan makandi e, leti kumafa mi ku i dë wan aki. Sö u ku de tuu musu dë wan makandi.”​—Johanisi 17:21, 22.

12, 13. (a) Andi u kuma Keesitu sëmbë kë du? (b) Unfa wan baaa bi lei u du soni di ta da wotowan taanga u libi makandi ku deseei?

¹² Wan Keesitu sëmbë di taanga a di biibi ta heepi dee sëmbë u wan kemeente u de libi makandi ku deseei. (Lesi Efeise 4:1-6, 15, 16.) U kuma Keesitu sëmbë kë u hiniwan fuu musu ’dë leti ka u fiti’. Hën da u kë wooko makandi ku useei. Wan Keesitu sëmbë musu abi sakafasi faa sa wooko makandi ku wotowan. Hii fa dee zöndu fasi u dee wotowan ta toobi ën, tökuseei wan Keesitu sëmbë di taanga a di biibi ta mbei taanga möiti u heepi wotowan a di kemeente u de ta libi makandi ku deseei. Fëën mbei hakisi iseei di soni aki: Andi mi ta du te wan baaa nasö wan sisa mbei wan föutu? Unfa mi ta fii te wan sëmbë du wan soni di hati mi? Ma ta fan ku di sëmbë dë möön u? Naa mi ta suku u ko dë bunu ku ën baka? Wan Keesitu sëmbë di taanga a di biibi ta suku fasi u seeka wan toobi di a abi ku wan sëmbë, ka faa dë wan bookohedi da wotowan.

¹³ Luku di woto u Uwe. Fosufosu, Uwe hati bi lo’ u boonu ku dee baaa ku sisa fëën u di de bi abi suwaki fasi. Nöö hën a buta taa a o lei soni u Dafiti a di Bëibel ku di buku Inzicht in de Schrift. Faandi mbei soni u Dafiti a bi kë lei? A bi kë lei soni u Dafiti, u di so u dee dinima u Jehovah seei bi ta du ku Dafiti tu. Könu Saulosu bi ta pooba u kii Dafiti, wanlö sëmbë bi kë naki ën ku sitonu kii, nöö di mujëë fëën seei bi ta mbei ën fa (1 Samuëli 19:9-11; 30:1-6; 2 Samuëli 6:14-22). Ma aluwasi andi de bi ta du ku Dafiti, tökuseei a bi lobi Jehovah, nöö Dafiti bi ta futoou ën tu. Dafiti bi ta lei tu taa a bi abi tjalihati. Uwe ko si taa a bi musu du di wan seei soni. Di a bi ta lei soni u Bëibel, hën a bi ko si taa a bi musu tooka di fasi fa a bi ta pakisei u dee suwaki fasi u dee baaa ku sisa fëën. An bi musu ta toona mëni dee föutu u de möön, nöö a bi musu du soni di ta da wotowan taanga u libi makandi ku deseei. Di soni dë i kë du tu ö?

14. Ambë Jesosi bi ta tei kuma mati?

¹⁴ Jesosi Keesitu bi ta libi a wan suti fasi ku sëmbë. Womi ku mujëë, pikiwan ku gaanwan tuu, te kisi piki mii seei, bi ta fii bunu te de bi dë ku Jesosi. Ma Jesosi bi ta luku bunu ambë a bi ta tei kuma gaan mati. A bi piki dee apösutu fëën taa: „Mi ku unu o dë mati, ee un ta du dee  soni dee mi ta manda unu fuun ta du” (Johanisi 15:14). Dee sëmbë di Jesosi bi tei kuma gaan mati bi dë sëmbë di bi ta waka nëën baka, nöö de bi lobi Jehovah, söseei de bi ta dini Jehovah tu. Sëmbë di lobi Jehovah ku hii de hati, i ta tei kuma mati ö? Faandi mbei a dë fanöudu u du ën?

15. Un wini njönkuwan sa feni te de dë mati ku Keesitu sëmbë di taanga a di biibi?

¹⁵ Gaansë u dee fuuta abi sonu fanöudu u de sa lepi bunu. A di wan seei fasi di lobi di dee baaa ku sisa fuu lobi u, sa heepi i fii ko dë wan sëmbë di taanga a di biibi. I dë wan njönkuwan di ta mbei möiti u ko sabi andi joo du ku di libi fii ö? Ee sö a dë, nöö a dë wan köni soni u tei sëmbë di ta dini Jehovah sömëni jaa kaa kuma mati, söseei sëmbë di ta da wotowan taanga u de libi makandi ku deseei a di kemeente. A kan taa sömëni soni bi miti dee sëmbë aki a de libi, nöö kandë tesi bi miti de a di dini u Jehovah. De sa heepi i u feni di möön bunu fasi u libi. Te i ta nama ku dee lö sëmbë aki, nöö de sa heepi i fii du soni a wan köni fasi, söseei de sa heepi i fii ko taanga a di biibi tu.​—Lesi Hebelejën 5:14.

16. Unfa dee baaa ku sisa u di kemeente dee ko gaandi kaa bi heepi wan sisa di a bi möön njönku?

¹⁶ Helga ta mëni di lasiti jaa di a bi dë a siköö jeti. A ta mëni fa gaansë u dee mii fëën kalasi bi ta taki andi de bi o du bakaten. Sömëni u de bi kë go a hei siköö u de sa feni wan bumbuu wooko. Ma Helga bi fan ku wan u dee mati fëën a di kemeente di taanga a di biibi. A taa: „Sömëni u de bi gaanwan u mi, nöö de bi heepi mi seei. De bi da mi taanga u du di hii-ten diniwooko. Bakaten mi bi sa du di pioniliwooko feifi jaa longi. Nöunöu sömëni jaa pasa kaa, nöö mi ta wai taa mi bi tei dee njönku jaa u mi u dini Jehovah. An ta hati m’ seei taa mi bi du di soni dë a mi libi.”

17, 18. Andi da di möön bunu fasi fa u sa dini Jehovah?

¹⁷ Te u ta djeesi Jesosi, nöö woo ko dë Keesitu sëmbë di taanga a di biibi. Woo ko möön zuntu ku Jehovah, nöö woo kë dini ën möön gaanfa. Wan sëmbë sa dini Jehovah möön bunu te a dë wan sëmbë di taanga a di biibi. Jesosi bi da dee bakama fëën taanga. A bi piki de taa: „Sö nöö di libi fuunu musu dë a di goonliba aki e, dee sëmbë. A musu dë gbegedee kuma wan faja limbo. Nöö sëmbë o ko si dee bunu soni un ta du, nöö de o ta gafa di Tata fuunu di dë a liba ala.”​—Mateosi 5:16.

¹⁸ U lei a di woto aki taa wan Keesitu sëmbë di taanga a di biibi sa dë kuma wan ahala da di kemeente. Te wan Keesitu sëmbë taanga a di biibi, nöö a ta dë u si a di fasi fa a ta mbei háti fëën tii ën. Unfa di háti fuu sa heepi u fuu du soni ku köni? Nöö unfa u sa lei taa u abi lesipeki da di háti u wotowan? Woo taki u di soni aki a di woto di ta ko.