DI WOTO DI NAMA KU DI KAFITI | ANDI JEHOVAH KOTOIGI TA BIIBI?
Andi Jehovah Kotoigi ta biibi?
Jehovah Kotoigi ta biibi taa „Gadu seei wë mbei sëmbë sikifi hii dee soni dee dë a Gadu Buku. Dee soni aki bunu u lei u soni” (2 Timoteo 3:16). A di Bëibel u ta lei soni u di Sëmbë di mbei hii soni, söseei u ta lei unfa u sa abi wan bunu libi.
Di Bëibel ta taki taa: „Be sëmbë ko sabi taa di në fii da Jehovah. I wanwan tö da di Kaba Heiwan u hii mundu” (Psalöm 83:18). Fëën mbei Jehovah Gadu wanwan tö u ta dini, nöö u kuma Kotoigi fëën ta mbei taanga möiti u konda di në fëën da woto sëmbë.—Jesaaja 43:10-12
U kuma Keesitu sëmbë ta biibi taa Jesosi „di Womi Mii u Masa Gaangadu” * bi ko a goonliba aki, nöö hën bi ko toon di Mësiasi (Johanisi 1:34, 41; 4:25, 26). Baka di Jesosi dëdë, hën Gadu weki ën faa go a Gadu Köndë baka (1 Kolenti 15:3, 4). Bakaten, hën a ko toon Könu u di Könuköndë u Gadu (Akoalimbo 11:15). Di Könuköndë dë da wan tuutuu tii di o mbei di goonliba aki ko toon wan paladëisi baka (Daniëli 2:44). Di Bëibel taki taa: „Dee sakafasi sëmbë o feni goonliba, nöö de o piizii seei biga bööböö libi o dë pasa maaka.”—Psalöm 37:11, 29.
„Te de ta lesi di Bëibel, nöö de ta biibi taa Gadu ta fan ku de. Te de abi bookohedi a de libi, nöö de nango suku heepi a di Wöutu u Gadu. . . . De ta si di Wöutu u Gadu kuma wan soni di dë ku libi jeti.”—Sö wan hedima u Lomusu keiki de kai Benjamin Cherayath bi taki a di kolanti u Alumaköndë, de kai Münsterländische Volkszeitung.
Jehovah Kotoigi ta biibi taa a di ten aki seei sëmbë sa feni wini a dee mama wëti u Bëibel (Jesaaja 48:17, 18). Fëën mbei u ta hoi dee mama wëti aki. Di Bëibel ta bai u taa wa musu du soni di sa poi u fusutan ku u sinkii. Fëën mbei wa ta sumuku, nöö wa ta hai soni kuma puili di sa poi u fusutan (2 Kolenti 7:1). Söseei u ta luku bunu ku fasi u libi di di Bëibel ta lei u gbelingbelin taa an bunu. So u dee fasi u libi aki da bebe daan dööngö, libi fanafiti libi a di së u manu ku mujëë, ku fufuu.—1 Kolenti 6:9-11.
^ pal. 5 Söseei di Bëibel ta kai Jesosi „di wan kodo mii u Gadu” di hënseei mbei. Boiti di dë, hën da di fosu soni di Jehovah mbei.—Johanisi 3:18; Kolosën 1:13-15.