Te tu sëmbë dë mati, nöö de ta fan ku deseei u de sa ko dë möön gaan mati. Wë a di wan seei fasi nöö Gadu kë fuu fan ku ën, sö taa u ku ën sa ko dë gaan mati. Fëën mbei a taki taa: „Un musu kai mi, un musu ko a mi, un musu begi mi, nöö mi o haika unu” (Jelemia 29:12). Te i ta fan ku Gadu, nöö joo „ko zuntu u Gadu, nöö a o ko zuntu fii tu” (Jakobosi 4:8, NW). Di Bëibel ta piki u taa: „Jehovah dë zuntu ku hii dee sëmbë dee ta kai ën” (Psalöm 145:18). Möön woo ta begi Gadu, möönmöön u ku ën o ko dë möön gaan mati.

Jesosi bi taki taa: „Ee di mii fii hakisi i wan pisi bëëë, undi fuunu o go tei sitonu dëën? Ee a hakisi wan pisi fisi nöö joo go tei wan pisi sindeki tja ko dëën u? Wë nönö, ja o du sö e. Biga . . . i ta da dee mii fii bumbuu soni. Nöö di Tata fuunu di dë a liba ala wë? Na möön hesi a o da unu bumbuu soni te un begi ën nö?” (Mateosi 7:9-11). Awa, Gadu kë fii begi ën, u di „a a’ toobi ku i” (1 Petuisi 5:7). A ta piki u söseei fuu tuwë dee fuka fuu dëën. Di Bëibel ta piki u taa: „Wan musu ta booko hedi a na wan soni e, ma un musu ta begi Masa Gadu nöömö ta dëën tangi. I musu ta tja hii dee fuka fii nango ta konda dëën.”​—Filipi 4:6.

Könima di ta öndösuku di fasi fa libisëmbë dë, ko si taa milionmilion sëmbë ta fii taa de musu begi Gadu. * Sëmbë di an ta biibi a Gadu ku sëmbë di an ta si kuma de sa ko sabi soni u Gadu seei, ta fii di wan seei fasi. Di soni aki ta lei taa libisëmbë mbei a sö wan fasi taa de abi Gadu fanöudu. Jesosi bi taki taa: „Un dee sëmbë dee ta fii taa un abi Gadu fanöudu, un dë bunu e” (Mateosi 5:3, NW). Wan fasi fa u ta lei taa u abi Gadu fanöudu, hën da te u ta fan ku ën.

Gadu kë fuu begi ën. Wë nöö un heepi woo feni ee u du sö?