DI WOTO DI NAMA KU DI KAFITI | U TA FENI HEEPI TE U TA BEGI Ö?
Faandi mbei sëmbë ta begi?
„Mi bi dë wan sëmbë di bi lo’ möni pëë, nöö mi bi ta begi u mi wini wan gaan möni. Ma ma bi wini ën möönsö.”—Samuel, * Keinia.
„A siköö de bi lei u wan tu begi dee u bi musu ta hoi a hedi, nöö u bi musu ta toona taki de baka.”—Teresa, Filipijnen.
„Mi ta begi te mi abi bookohedi. Mi ta begi be Gadu da mi paadon u dee zöndu u mi, söseei mi ta begi ën u mi sa ko dë wan möön bumbuu Keesitu sëmbë.”—Magdalene, Gaana.
Di soni di Samuel, Teresa, ku Magdalene, taki aki, ta lei taa sëmbë ta begi da peipei soni. So sëmbë ta begi da bunu soni, ma wotowan ta begi da soni di an bunu. So sëmbë ta konda da Gadu andi dë a de hati tuutuu, ma wotowan an ta konda andi dë a de hati. So sëmbë ta begi te de ta mbei wan ëksaame a siköö, te de kë u di sport team di de lobi, wini wan pëë, nasö de ta begi Gadu faa heepi de u soni waka bunu a di wosudendu libi u de. Sömëni woto soni dë di sëmbë ta begi da. Wë di soni aki ta lei taa milionmilion sëmbë ta begi u di de ta fii taa de musu begi. So öndösukuma ko si taa sëmbë di an ta biibi a Gadu seei ta begi so juu.
I ta begi ö? Wë ee sö, nöö andi i ta begi da? Kandë i abi di guwenti u begi, nasö kandë ja ta begi, ma kandë i ta hakisi iseei dee soni aki: ’U ta feni heepi te u ta begi ö? Wan sëmbë dë ta haika u ö?’ Wan womi bi sikifi taa begi da wan „pei fasi u kula”. So u dee data seei ta pakisei sö tu. De ta taki taa a dë „wan pei deesi”. I si kuma di begi di sëmbë ta begi ta heepi ö? Nasö i ta si ën kuma wan pei deesi tu ö?
Di Bëibel ta lei u taa di begi di wan sëmbë ta begi sa heepi ën tuutuu. Ma di Bëibel ta lei u wan woto soni di nama ku begi tu. A ta lei u taa wan sëmbë dë ta haika dee begi fuu tuutuu te u ta begi ën a wan fasi di ta kai ku ën. Sö a dë tuu ö? Wë boo go luku faandi mbei u taki sö.
^ pal. 3 So u dee në u di woto aki tooka.
