So sëmbë ta fii kuma begi an ta tja na wan wini ko da de, u di de ta si kuma na wan sëmbë ta haika dee begi u de. So sëmbë bi begi, ma de bi si kuma Gadu an piki dee begi u de. Wan sëmbë di an ta biibi a Gadu bi abi wan föutu pakisei u di fasi fa Gadu dë. Hën wë a begi taa: „Ko fan sapisapi sö a mi jesi.” Di a kaba begi, hën a taki taa Gadu an piki ën.

Ma di Bëibel ta piki u taa wan Gadu dë di ta haika begi. Di Bëibel ta lei u taa a bi paamusi wan nasiön sëmbë fu awooten di soni aki: „Te [Gadu] jei wan fuunu ta bai kai ën, nöö a o du wan bunu dëën nöömö. Te a jei di wolo fëën, nöö a o piki ën” (Jesaaja 30:19). Wan woto Bëibel tëkisi ta taki taa: „Dee begi u dee limbohati sëmbë ta dëën piizii.”​—Nöngö 15:8.

Di Bëibel abi sömëni woto u sëmbë di Gadu bi haika dee begi u de. Wan woto Bëibel tëkisi ta taki taa Jesosi bi begi Gadu „ku bai këë, ku wata a wojo seei, fu di a sabi taa Gadu nöö sa puu ën fu an musu dëdë di lö dëdë di a o dëdë naandë”, nöö di tëkisi ta taki tu taa „Gadu jei di begi fëën” (Hebelejën 5:7). Woto begi di sëmbë bi begi dë u feni a di buku Daniëli 9:21 ku 2 Kloniki 7:1.

Wë nöö faandi mbei so sëmbë ta feni taa Gadu an ta piki dee begi u de? Ee u kë u Gadu piki dee begi fuu, nöö wa musu begi na wan woto gadu, söseei wa musu begi dee gaansëmbë fuu tu, ma u musu begi di wan kodo Gadu di di Bëibel ta lei taa u musu begi. Hën da Jehovah. * Gadu kë taa dee soni u ta hakisi ën musu ta „kai ku di pakisei fëën” tu. Ee u ta begi a sö wan fasi, nöö u sa dë seiki taa Gadu „o jei” (1 Johanisi 5:14). Fëën mbei ee u kë u Gadu ta haika dee begi fuu, nöö u musu ko sabi ën, söseei u ko sabi andi ta kai ku ën.

Sömëni sëmbë ta biibi taa di begi di sëmbë ta begi an dë wan soni di de musu ta du nöö, ma de ta biibi taa Gadu ta haika te sëmbë ta begi, nöö a ta piki de tu. Isaac, di ta libi a Keinia ta taki taa: „Mi bi begi Gadu faa heepi mi u m’ ko fusutan di Bëibel. An bi tei longi seei, hën wan sëmbë ko a mi, hën a piki mi taa a o heepi mi u fusutan di Bëibel.” Wan mujëë de kai Hilda u di köndë Filipijnen, bi kë disa di sumuku di a bi ta sumuku. Ma di a mbei möiti te a wei, ma an bi sa disa di sumuku möönsö. Hën di manu fëën piki ën taa: „Faandi mbei ja kë begi Gadu faa heepi i?” Wë a bi du di soni di hën manu piki ën. Bakaten hën a taki taa: „Mi foondo seei u si fa Gadu heepi mi tjika. Ma bi ta fii u sumuku möön seei. Awaa ufö mi bi sa disa di sumuku di mi bi ta sumuku.”

I ta si kuma Gadu sa heepi i ku dee bookohedi dee i abi ö?