1. Faandi mbei a dë fanöudu taa u musu abi biibi? (Luku di peentje a bigi u di woto.)

I HAKISI iseei wan daka ee Jehovah o kë tjubi i a di pisiten u di gaan fuka u? Apösutu Paulosu bi taki taa di möön fanöudu fasi di u musu abi fuu sa pasa di gaan fuka libilibi, hën da biibi. A bi taki taa: „An dë taa Gadu sa a’ piizii möönsö ku wan sëmbë di an ta biibi e. Kwetikweti” (Hebelejën 11:6). Di soni di sikifi a di tëkisi aki sa djei wan piki soni, ma di Bëibel ta taki taa „na hii sëmbë ta biibi Gadu” (2 Tesalonika 3:2) Dee tu Bëibel tëkisi aki o heepi u fuu ko fusutan faandi mbei a dë fanöudu fuu taanga di biibi fuu.

2, 3. (a) Unfa di biibi fuu dë fanöudu tjika? (b) Andi woo luku a di woto aki?

² Apösutu Petuisi bi taki u wan biibi di de „pooba” luku. (Lesi 1 Petuisi 1:7.) U di di gaan fuka zuntu seei, mbei u kë ’dë a dendu u dee sëmbë ta biibi [Gadu], dee a heepi te de feni libi’ (Hebelejën 10:39). Fëën mbei u musu mbei taanga möiti u taanga di biibi fuu. U kë dë a dendu u dee sëmbë dee o feni paka te di Könu fuu Jesosi Keesitu o ko. Wë, useei kë dë kuma di womi di bi taki taa: „Heepi mi be mi biibi tjika” (Maikusi 9:24). Nasö u kë dë kuma dee apösutu dee bi taki taa: „Heepi u be di biibi fuu ko möön taanga.”​—Lukasi 17:5.

³ A di woto aki woo luku unfa u sa taanga di biibi fuu, unfa u sa lei taa di biibi fuu taanga, söseei faandi mbei u sa dë seiki taa Gadu o piki dee begi fuu te u hakisi ën faa da u möön biibi.

4. Un woto ku un woto sa mbei di biibi fuu ko taanga?

⁴ Biibi da wan fanöudu soni seei. Fëën mbei Jehovah mbei sëmbë sikifi sömëni woto a Bëibel u sëmbë di bi abi biibi. Nöö „de sikifi de tuu fu de lei u soni” (Loomë 15:4). Dee woto u sëmbë kuma Abahamu, Sala, Isaki, Jakopu, Mosesi, Lakabu, Gidion, Balaki, ku sömëni woto sëmbë jeti, sa mbei di biibi fuu ko taanga (Hebelejën 11:32-35). Boiti dee woto u dee sëmbë dee sikifi a Bëibel, u abi woto u baaa ku sisa fuu a di ten aki di sa heepi u fuu ko abi wan taanga biibi tu. * (Luku di pisi a basu.)

5. Unfa Elia bi lei taa a bi abi wan taanga biibi a Jehovah, nöö andi u sa hakisi useei?

⁵ Wan sëmbë di u sa djeesi, hën da Elia. Pakisei fundu u di woto fëën, nöö buta mëni a feifi soni di ta lei taa Elia bi abi wan taanga biibi a Jehovah. (1) Elia bi piki Könu Akab taa Jehovah o tja wan deewei ko a di köndë. A bi piki ën gbelin taa: „Solanga Jehovah, di Gadu u Isaëli di mi ta dini, dë ku libi, do wata nasö tjuba an o kai” (1 Könu 17:1). (2) Elia bi ta biibi taa Jehovah bi o da hën ku dee woto sëmbë hii soni di de bi abi fanöudu a di pisiten u di deewei (1 Könu 17:4, 5, 13, 14). (3) Söseei Elia bi dë seiki taa Jehovah bi o sa weki di womi mii u wan mujëë di manu fëën dëdë (1 Könu 17:21). (4) A bi ta biibi taa Jehovah bi o manda faja kumutu a liba ala ko tjuma dee mbeti di a bi tja go tjuma dëën a di Kamëli Kuun (1 Könu 18:24, 37). (5) Ufö di tjuba bigi kai seei Elia piki Akab gbelingbelin taa: „Subi go a di kuun liba, nöö i njan, nöö i bebe wan soni, biga mi ta jei wan gaan tjuba ta ko” (1 Könu 18:41). Baka di u luku di woto aki, nöö u sa hakisi useei taa: ’Mi abi wan taanga biibi kuma Elia u?’

6. Andi Jehovah musu da u fuu sa taanga di biibi fuu?

⁶ U wanwan an sa mbei di biibi fuu ko taanga. Fëën mbei u musu hakisi Gadu faa heepi u ku di santa jeje fëën. Faandi mbei? U di biibi da wan u dee fasi di di santa jeje u Gadu ta mbei sëmbë ko abi (Galasia 5:22). A dë wan köni soni te u ta du di soni di Jesosi bi piki u. Jesosi bi piki u taa Jehovah „sa da unu di Akaa [santa jeje NW] fëën . . . te un ta begi ën”.​—Lukasi 11:13.

7. Konda unfa u sa ko abi wan taanga biibi, di woo sa hoi sö u nöömö.

⁷ Te di biibi fuu ko taanga a Gadu kaa, nöö u musu mbei möiti be a fika sö. U sa tei biibi djei ku wan faja. Te i mbei wan faja, nöö di faja sa ta kisi gililili seei. Ma ee wa ta buta udu a di faja, nöö te wan pisi dee udu o tjuma kaba, nöö a o ko fika sindja wanwan. Ma ee u ta buta udu a di faja nöömö, nöö a o ta kisi nöömö tu. Sö nöö a dë ku di biibi fuu tu. Te u ta lesi di Wöutu u Gadu nasö te u ta lei soni nëën hii daka, nöö woo ko lobi di Bëibel ku Jehovah möön gaanfa. Te u kaba fëën, woo ko abi wan taanga biibi, söseei woo sa hoi ën sö u nöömö.

8. Andi sa heepi i fii taanga di biibi fii, söseei fii sa hoi ën sö u nöömö?

⁸ Ja musu dë tifihedi nöö ku dee soni dee i bi lei ufö i tei dopu (Hebelejën 6:1, 2). Te u lei soni u dee tjabukama woto dee pasa kaa, nöö a o heepi i fii sa taanga di biibi fii, söseei fii sa hoi ën sö u nöömö. I sa öndösuku soni a di Wöutu u Gadu fii sa sabi ee di biibi fii taanga tuutuu.​—Lesi Jakobosi 1:25; 2:24, 26.

9, 10. Unfa di biibi fuu o ko taanga (a)  te u abi bumbuu mati? (b) te u nango a dee komakandi hii juu? (c) te u ta peleiki?

⁹ Apösutu Paulosu bi taki taa u kuma Keesitu sëmbë sa ta „da u seei taanga, fa u ta biibi Gadu makandi aki” (Loomë 1:12). Andi di soni aki kë  taki? Hën da te u ta du soni makandi ku dee baaa ku sisa fuu, nöö woo sa ta da useei degihati u mbei di biibi fuu ko möön taanga. Wan möön bunu fasi fa u sa du di soni aki, hën da te u ta du soni makandi ku dee baaa ku sisa fuu dee bi miti „tesi” a di biibi u de (Jakobosi 1:3). Taku mati sa mbei di biibi fuu ko suwaki, ma bumbuu mati sa mbei di biibi fuu ko taanga (1 Kolenti 15:33). Fëën mbei de ta da u di degihati taa u musu nango hii juu a dee komakandi. Te u nango a dee komakandi, nöö woo sa ta „da u seei taanga nöömö”. (Lesi Hebelejën 10:24, 25.) Boiti di dë, dee soni dee u ta lei a dee komakandi ta taanga di biibi fuu. Di Bëibel ta taki taa: „Te i jei di buka u Gadu ufö biibi ta ko a i hati” (Loomë 10:17). Fëën mbei hakisi iseei di soni aki: „Mi nango hii juu a dee komakandi ö?”

¹⁰ U ta taanga di biibi fuu tu, te u ta peleiki da wotowan, söseei te u ta lei sëmbë soni u di bunu buka di dë a Bëibel. Leti kuma dee Keesitu sëmbë fu awooten, sö nöö useei ko lei u abi futoou a Jehovah, nöö u ko lei tu u abi degihati u konda soni fëën hiniwan ten.​—Tjabukama 4:17-20; 13:46.

11. Andi bi mbei Kaalëpu ku Josua bi abi wan taanga biibi, nöö unfa useei sa ko abi wan taanga biibi kuma de?

¹¹ U ta ko abi möön taanga biibi a Jehovah te u ta si fa a ta heepi u, söseei te u ta si fa a ta piki dee begi fuu. Di soni aki hën bi pasa ku Kaalëpu ku Josua. De bi lei taa de abi biibi a Jehovah, di de bi go tjubi luku di Paamusi Köndë. Möön dee jaa bi ta pasa, möönmöön di biibi u de bi ta ko taanga u di de bi ta si fa Jehovah bi ta heepi de. Josua bi piki dee Isaëli sëmbë gbelingbelin taa: „Jehovah di Gadu fuunu du hii dee soni dee a bi paamusi unu.” Hën a taki bakaten taa: „Fëën mbei un musu fëëë Jehovah. Un dini ën ku wan limbohati söseei a wan leti fasi.” Hën Josua toona taki taa: „Mi ku mi wosudendu, u woo dini Jehovah” (Josua 23:14; 24:14, 15). Te u ta futoou Jehovah, söseei te u ta si fa a ta heepi hiniwan fuu, nöö di biibi fuu o ko möön taanga.​—Psalöm 34:8.

12. Unfa u sa lei taa u abi wan taanga biibi?

¹² Unfa u sa lei taa u abi wan taanga biibi? Di bakama u Jesosi de kai Jakobosi bi taki taa: „Fa mi dë aki, ee sëmbë luku mi libi te de kaba nöö  de o si taa mi ta libi a di fasi. Mi ta biibi a Gadu tuu” (Jakobosi 2:18). Dee soni dee u ta du o lei ee u abi wan taanga biibi. Boo go luku na un fasi.

13. Na un fasi di peleiki di u ta peleiki ta lei taa u abi biibi?

¹³ Wan bunu fasi fa u sa lei taa u abi biibi, hën da te u ta peleiki. Faandi mbei u taki sö? Wë u di te u ta peleiki, nöö u ta lei taa u ta biibi taa di kaba u di goonliba aki zuntu, söseei taa „an o ko lati!” (Habaki 2:3). Ee u kë sabi ee di biibi fuu taanga, nöö u sa hakisi useei di soni aki: ’Mi ta si di peleikiwooko kuma wan fanöudu soni ö? Mi ta du hii soni di mi sa du u konda soni u Gadu da woto sëmbë u? Mi ta suku fasi u mi sa du möön soni a di dini di mi ta dini Jehovah u?’ (2 Kolenti 13:5). Boo lei taa u abi wan taanga biibi, u di woo ta paaja di bunu buka da sëmbë taa de sa feni tjubi.​—Lesi Loomë 10:10.

14, 15. (a) Unfa u sa lei hiniwan daka taa u abi biibi? (b) Konda wan woto di ta lei fa wan sëmbë sa lei taa a abi biibi.

¹⁴ U ta lei söseei taa u abi biibi a Jehovah te u ta hoi dou te dee bookohedi u di goonliba aki ta miti u. Te u siki, te u ta fii bookosaka, te u ta lasi hati, te u ta pena nasö te woto fuka ta miti u, nöö u musu ta biibi taa Jehovah ku Jesosi o ’heepi u a soni ku de bunuhati te u dë a wan fuka’ (Hebelejën 4:16). U ta lei taa u abi biibi a Jehovah te u ta hakisi ën faa heepi u. Jesosi bi taki taa u sa hakisi Jehovah faa „da u dee soni u abi fanöudu fuu pasa u libi tide” (Lukasi 11:3). Sömëni woto dë a Bëibel di ta lei taa Jehovah sa da u hii soni di u abi fanöudu. Wan u dee woto aki da di woto di ta lei fa Jehovah bi da Elia soni u njan, söseei fa a bi dëën wata u bebe di wan gaan deewei bi dë a Isaëli. Di Bëibel ta taki taa „dee baaka fou bi ta tja bëëë ku gbamba go dëën, nöö te a bi kë wata u bebe, nöö a bi nango bebe a lio” (1 Könu 17:3-6). Wë useei ta biibi taa Jehovah sa da u hii soni di u abi fanöudu tu.

¹⁵ U dë seiki taa te u hoi dee mama wëti u Bëibel, nöö woo sa da dee sëmbë fuu wosudendu hii dee soni di de abi fanöudu. Wan sisa di toou de kai Rebecca, di ta libi a wan köndë u Asia, bi taki unfa hën ku dee sëmbë fëën wosudendu bi du dee soni dee sikifi a Mateosi 6:33 ku Nöngö 10:4. A bi taki taa hën manu bi ko si taa di wooko  di a bi ta du, bi ta mbei taa de an bi sa dini Jehovah ku hii de hati möön. Fëën mbei di manu fëën bi ko disa di wooko. Ma de bi abi fö mii u sölugu, nöö fëën mbei de bi bigi ta boi njanjan ta sei. Te u kaba fëën di wooko dë bi mbei taa hii juu de bi ta abi möni tjika u sölugu hii sëmbë a di wosudendu. Di sisa taki taa: „U bi ta fii taa nöiti Jehovah bi disa u. Hiniwan daka u bi ta abi soni u njan.” Iseei bi miti sö wan soni di bi taanga di biibi fii tu ö?

16. Andi woo feni te u ta biibi Gadu?

¹⁶ U sa dë seiki taa ee u ta libi kumafa Jehovah kë, nöö a o heepi u. Paulosu bi toona taki di soni di Habaki bi taki. A bi taki taa: „Di sëmbë di ko bumbuu sëmbë a Gadu wojo fu di a ta biibi nëën hedi, nöö hën nöö o feni di libi u Gadu” (Galasia 3:11; Habaki 2:4). Fëën mbei u musu abi wan taanga biibi a di Sëmbë di sa heepi u tuutuu. Paulosu bi mëni u baka taa Gadu hën ta da u „di gaan kaakiti fëën [di] ta wooko a u hati tjika aki, nöö a sa du soni gaanfa möön leki fa u ta begi ën. A sa du soni pasa ka pakisei fuu sa dou seei” (Efeise 3:20). Dee dinima u Jehovah ta du hii soni di de sa, u du di kë u Gadu. Ma de sabi tu taa soni dë di de an sa du. U dë ku tangi a hati taa Gadu dë ku u, söseei taa a ta mbei u feni bunu u hii dee möiti dee u ta mbei.

17. (a) Na un fasi Jesosi bi piki dee apösutu fëën? (b) Faandi mbei u sa dë ku di mëni taa Jehovah o piki dee begi fuu, te u ta hakisi ën faa da u möön biibi?

¹⁷ Wë dee soni dee u luku aki, sa mbei u fii di wan seei soni di dee apösutu bi fii, di de bi hakisi Jesosi taa: „Heepi u be di biibi fuu ko möön taanga” (Lukasi 17:5). Wë a di Pensiti Daka u di jaa 33, Jesosi bi piki dee bakama fëën a wan apaiti fasi, di di santa jeje bi ko a de liba. Hën de bi ko fusutan dee pakisei u Gadu möön bunu. Di soni aki bi taanga di biibi u de. Un wini de bi feni bakaten? De bi bigi di möön gaan peleikiwooko u di ten dë (Kolosën 1:23). U sa ta dë ku di mëni taa Jehovah o piki dee begi fuu te u ta hakisi ën faa da u möön biibi ö? Jehovah paamusi u taa „ee di begi kai ku di pakisei fëën, nöö a o jei” (1 Johanisi 5:14).

18. Unfa Jehovah ta mbei dee sëmbë dee ta taanga di biibi u de, feni bunu?

¹⁸ Te u ta biibi Jehovah ku hii u hati, nöö a o ta wai ku u. A o piki dee begi fuu te u ta hakisi ën faa da u möön biibi. Te u kaba fëën di biibi fuu o ko möön taanga, nöö woo ’ko dë a di fa fuu sa njan di suti u di tii fëën.’​—2 Tesalonika 1:3, 5.