DI MI bi a’ nëigi jaa, hën ma göö go dou möön. Nöunöu mi abi 43 jaa, nöö mi langa wan mëti nöö. Di mi mama ku mi tata ko si taa ma o ko möön langa, hën de piki mi u go wooko taanga u ma buta pakisei a di sati u mi poi. Fëën mbei mi seti wan tafa a di dööbuka fuu u sei fuuta. Nöö mi bi ta seekëën faa sa ta dë limbolimbo, söseei faa sa ta hai sëmbë pakisei. Di soni dë mbei sömëni sëmbë bi ta ko ta bai soni a mi.

Wë di wooko di mi bi ta wooko taanga an bi mbei mi libi tooka wan apaiti. Mi bi dë satisati jeti, nöö fëën mbei mi bi musu mbei taanga möiti u du dee soni di sëmbë guwenti u du hiniwan daka. Ma bi sa ta dou dee tonbangi u dee wënkë, u di de bi hei da mi poi. A bi djei kuma de mbei hii soni da dee sëmbë dee bi langa tu toon möön mi. A bi ta hati mi seei, ma di soni aki bi ko tooka di mi bi abi 14 jaa.

Wan daka hën tu mujëë di bi dë Jehovah Kotoigi ko bai fuuta a mi, hën de hakisi mi ee mi kë u de lei mi soni u Bëibel. An bi tei longi u mi ko fusutan taa a dë möön taanga fanöudu u buta pakisei a di ko di mi musu ko sabi Jehovah ku dee soni dee a o du da u, ka u mi dë ta buta pakisei a di sati u mi. Di soni dë bi heepi mi gaanfa seei. Di tëkisi a Psalöm 73:28 bi ko dë wan tëkisi di mi lobi. Di fosu pisi u di tëkisi ta taki taa: „A bunu da mi u ko zuntu ku Gadu.”

Te wan pisi, hën dee sëmbë u mi foloisi kumutu a Ivoorkust go libi a Burkina Faso. Di foloisi di u bi foloisi bi tooka soni a mi libi gaanfa seei. Dee sëmbë u di pisiwata ka u bi ta libi, bi lo’ u si mi a di fuuta tafa u mi. Ma dee sëmbë u di njunjun kamian ka u bi foloisi go libi an bi sabi mi, nöö fëën mbei gaansë u de bi ta luku mi wan pei fasi. Dee sëmbë bi ta luku mi diin seei. Fëën mbei sömëni wiki longi ma bi ko a döö. Hën mi ko toona pakisei fa a bi dë wan bunu soni di m’ bi ta ko zuntu ku Jehovah. Sö a ko pasa taa mi sikifi wan biifi manda go a di bëikantoo u Jehovah Kotoigi, hën de manda wan sëmbë ko a mi. Wan sëndëlengi de kai Nani bi ko luku mi. A bi ko ku wan bölömu.

Dee sandu pasi u di kamian ka u ta libi ta dë koogakooga hii juu, nöö te tjuba ten, nöö dee pasi bi ta dë ku pötöpötö seei. Sömëni pasi Nani kai ku di bölömu fëën te a bi ta ko lei mi soni u Bëibel. Ma di soni dë an bi tapëën u ko a mi. Wan daka, hën a hakisi mi ee a sa ko tei mi tja go a komakandi. Wë mi bi sabi taa ee mi bi go ku ën a komakandi, nöö dee sëmbë bi o taanpu ta luku mi diin baka. Boiti di dë, mi bi ta pakisei tu taa te a bi o tja mi a di bölömu fëën a dee sandu pasi dee bi taanga u lëi kaa, nöö mi bi o möön hebi dëën u tja. Tökuseei mi go ku ën. Mi bi hoi di u tu pisi u di tëkisi di mi lobi a  pakisei. Di u tu pisi taki taa: „Di Möön Hei Masa Jehovah mi ta si kuma di tjubi kamian u mi.”

Mi ku Nani kai sömëni pasi a pötöpötö. Ma u di u bi lobi dee komakandi, mbei wa bi abi toobi seei. Te mi dë a di Könuköndë zali dee sëmbë ta lafu ku mi seei, ma te mi dë a sitaati, nöö sëmbë ta luku mi diin! Baka nëigi liba hën mi tei dopu.

Di u dii pisi u di tëkisi di mi lobi taki taa: „Fëën mbei mi o konda hii dee soni dee i du da sëmbë.” Mi bi sabi taa di peleikiwooko bi o dë di möön taanga soni da mi. Mi ta mëni jeti di mi bi go a di peleikiwooko di fosu pasi. Pikimii ku gaan sëmbë tuu bi ta luku mi diin, nöö de bi ta waka a mi baka ta djeesi mi a di fasi fa mi bi ta waka. A bi hati mi seei. Ma mi ko toona pakisei taa leti kumafa mi abi di paladëisi fanöudu, sö nöö deseei abi ën fanöudu tu, nöö di soni dë bi heepi mi u hoi dou.

Mi bi bai wan baisigi di abi dii banti, nöö de ta lëi ën ku maun, nöö an bi taanga da mi sö möön u go a kamian. Di sëmbë di mi ku ën bi ta wooko a di peleikiwooko bi ta tötö mi a di baisigi te u bi musu subi wan kuun, nöö a bi ta djombo sindo a di baisigi te u bi o bazia di kuun. Bigibigi di peleikiwooko bi taanga da mi, ma te u kaba fëën a bi ta mbei mi ta piizii seei. Fëën mbei mi bi bigi ku di kowoonu pioniliwooko a di jaa 1998.

Mi bi ta lei sömëni sëmbë soni u Bëibel, nöö feifi u dee sëmbë aki tei dopu. Mi ta wai seei u di wan u dee piki sisa u mi ko a di tuutuu biibi tu. Te mi ta jei fa woto sëmbë nango a fesi a di biibi, nöö a ta da mi degihati seei a wan ten di mi abi ën fanöudu. Wan daka di mi bi dë ku suwaki u di malalia bi kisi mi, hën wan sëmbë manda wan biifi kumutu a Ivoorkust ko da mi. Mi bi bigi wan Bëibel studie ku wan womi mii di nango a hei siköö nëën dööbuka a Burkina Faso. Hën mi hakisi wan baaa u go lei ën soni u Bëibel. Bakaten di womi mii bi foloisi go libi a Ivoorkust. Mi bi wai seei u jei taa a toon wan peleikima di an dopu jeti!

Naasë mi ta feni möni u sölugu miseei? Wan ölganisaasi di ta heepi sëmbë di an sa du soni de wanwan, bi lei mi u nai soni. Di wan u dee sëmbë di bi ta lei mi di wooko, bi si fa mi ta wooko taanga, hën a bi taki taa: „U musu lei ën unfa a sa mbei sopu.” Wë sö de ko lei mi mbei sopu. Mi ta mbei peipei sopu a mi pisi. Dee sëmbë lobi di sopu u mi, nöö de ta piki wotowan taa de musu bai sopu a mi. Ku di bölömu u mi di abi dii banti, mi ta lëi ta tja di sopu go da dee sëmbë dee bai sopu a mi.

Ma a tjali taa a di jaa 2004 mi bi musu disa di pioniliwooko, u di baka u mi bi ta hati mi seei. Ma mi nango hii juu a di peleikiwooko jeti.

Dee sëmbë ta taki taa mi lo’ u lafu. Wë a dë sö tuu, biga mi ta wai u di di ko di mi ko dë zuntu ku Gadu bi bunu da mi seei.​—Kumafa Sarah Maiga konda di woto.