1, 2. Faandi mbei u ku dee mbeti an dë di wan?

DI TÖÖNZÖN u libisëmbë mbei a wan apaiti fasi. Fëën mbei libisëmbë sa lei wan töngö. Nöö te u ko sabi wan töngö, nöö woo sa lesi, woo sa sikifi, woo sa fan, söseei woo sa fusutan andi u ta jei. A ta heepi u fuu sa begi Jehovah, söseei fuu sa kanda gafëën. Hii dee soni aki mbei taa u ku dee mbeti an dë di wan. Dee könima seei an sa kaba fusutan unfa di töönzön fuu ta mbei u du dee soni aki.

² Di fan di u sa fan wan töngö, da wan kado di Jehovah da u (Psalöm 139:14; Akoalimbo 4:11). A da u wan woto kado tu di mbei taa u ku dee mbeti an dë di wan. Hën da di mbei di libisëmbë mbei „kumafa Gadu dë”. U sa taki da useei andi ku andi u kë du. Nöö u sa lei wan töngö di o heepi u fuu dini Jehovah, söseei u gafëën.​—Kenesesi 1:27.

3. Andi Jehovah da u fuu sa ko köni?

³ Jehovah da u di Bëibel di ta lei u unfa u musu dini ën, söseei unfa u musu gafëën. Hii di Bëibel, nasö pisi fëën dë u feni a möön leki 2.800 töngö. Te u ta pakisei fundu u dee soni di di Bëibel ta taki,  nöö woo sa ko ta pakisei kumafa Gadu ta pakisei (Psalöm 40:5; 92:5; 139:17). Dee pakisei u Jehovah ta mbei u ko köni, nöö de o heepi u fuu feni di libi u teego.​—Lesi 2 Timoteo 3:14-17.

4. Andi a kë taki u pakisei fundu, nöö un hakisi woo luku a di woto aki?

⁴ Te u ta pakisei fundu, hën da u ta buta hii u pakisei a wan soni (Psalöm 77:12; Nöngö 24:1, 2). U ta möön feni wini te u ta pakisei fundu u dee soni dee u ta lei u Jehovah ku Jesosi (Johanisi 17:3). A di woto aki woo piki dee hakisi aki: Unfa u sa lesi a sö wan fasi taa an ta taanga da u u ta pakisei fundu? Fuun pei soni u sa ta pakisei fundu? Nöö andi sa heepi u fuu ta pakisei fundu hii juu, söseei fuu lobi ën?

5, 6. Andi sa heepi i u na fëëkëtë dee soni i lesi, söseei u fusutan dee soni i lesi möön bunu?

⁵ So soni dë di u ta du söndö fuu buta pakisei a de, kuma te u ta hai böö, te u ta waka, ku te u ta lëi baisigi. So juu a sa pasa taa i ta lesi söndö fii buta pakisei a di soni di i ta lesi, nasö i ta bigi pakisei woto soni hii fa i ta lesi. Andi i sa du u di soni aki an miti i? Wë, a dë fanöudu fii buta pakisei a di soni di i ta lesi, söseei fii pakisei andi a kë taki. Te i kaba lesi wan palaklafu, nasö te i kaba lesi wan pisi u wan woto, nöö wakiti pikisö, nöö i pakisei fundu u dee soni dee i lesi. Be a dë sö taa i fusutan dee soni dee i lesi.

⁶ Dee könima ko si taa u ta hoi dee soni dee u ta lesi möön bunu, te u ta lesi fuu sa jei andi u ta lesi. Di Gadu di mbei u, sabi di soni aki, fëën mbei a bi piki Josua taa a bi musu ta lesi di buku u di Wëti ku wan „saapi töngö”, hën da a bi musu ta lesi ën sapisapi da hënseei. (Lesi Josua 1:8.) Te i ta lesi di Bëibel fii sa jei andi i ta lesi, nöö a o heepi i fii buta hii i pakisei a dee soni i ta lesi, söseei a o heepi i u na fëëkëtë dee soni i lesi.

7. Andi da di möön bunu ten u pakisei fundu u dee soni i ta lesi a Bëibel? (Luku di peentje a bigi u di woto.)

⁷ U musu mbei taanga möiti u pakisei fundu u dee soni u ta lei, söseei wa musu mbei na wan soni puu u pakisei a dee soni dë. Fëën mbei a möön bunu fii pakisei fundu a wan ten di ja wei, nasö a wan pii kamian ka sömëni soni an dë u puu i pakisei. Di psalöm sikifima Dafiti, bi ta pakisei fundu a ndeti te a bi dë kandikandi nëën bedi liba (Psalöm 63:6). Jesosi seei di an bi dë wan zöndu libisëmbë, bi ta suku pii kamian u go begi nasö u pakisei fundu.​—Lukasi 6:12.

8. (a) Fuun pei soni u sa pakisei fundu? (b) Unfa Jehovah ta fii te u ta konda soni fëën da wotowan?

⁸ Boiti dee soni dee i ta lesi a Bëibel, woto soni dë tu dee i sa pakisei fundu u de. Kandë te i si wan u dee hanse soni di Jehovah mbei, nöö i hakisi iseei taa: ’Andi di soni aki ta lei mi u Jehovah?’ Te i ta du di soni aki, nöö a o mbei i da Jehovah tangi te joo begi ën. Nöö te i dë ku wotowan, joo kë konda dee soni aki da de tu (Psalöm 104:24; Tjabukama 14:17). Jehovah ta buta pakisei a u, nöö a ta wai te u ta pakisei fundu, te u ta begi, söseei te u ta konda soni fëën da wotowan. Di Bëibel ta piki u taa: „Jehovah mbei de sikifi wan buku faa mëni dee sëmbë dee ta lesipeki ën, söseei dee sëmbë dee ta pakisei fundu u di në fëën.”​—Maleaki 3:16.

9. (a) Andi da dee soni Paulosu bi piki Timoteo faa ta pakisei fundu u de? (b) Andi da wan tu soni dee u sa pakisei fundu u de, te u ta seeka useei da di peleikiwooko?

⁹ Apösutu Paulosu bi piki Timoteo faa ta pakisei fundu u di fasi fa a ta fan, u di fasi fa a ta tja hënseei, söseei u di fasi fa a ta lei wotowan soni (Lesi 1 Timoteo 4:12-16.) Iseei sa ta pakisei fundu u dee soni aki tu. Wë i abi ten fanöudu fii pakisei fundu te i ta seeka iseei fii go a wan sëmbë di i ta lei soni u Bëibel. Pakisei di sëmbë di i ta lei soni u Bëibel, nöö pooba fii feni wan hakisi, nasö wan woto di sa heepi di sëmbë  faa go a fesi a di biibi. Te i ta seeka iseei a di lö fasi aki, nöö iseei ta taanga di biibi fii tu, söseei i ta ko dë wan möön bunu leima, di ta lei sëmbë soni u Bëibel ku piizii. Joo feni wini tu te i ta pakisei fundu ufö i go a di peleikiwooko. (Lesi Ësala 7:10.) Kandë i sa lesi wan kapitel u di Bëibel buku Tjabukama, di o sa heepi i fii sa ko dë möön fajafaja a di peleikiwooko. I sa pakisei fundu tu u wan tu Bëibel tëkisi di i seeka da di peleikiwooko di daka dë, söseei u dee buku dee joo tja fii paati (2 Timoteo 1:6) Pakisei dee sëmbë dee ta libi a di pisiwata ka i ta peleiki, nöö pakisei andi joo taki di o mbei taa de o kë haika i.​—1 Kolenti 2:4.

10. Un woto soni dë di i sa ta pakisei fundu u de?

¹⁰ Un woto soni dë di i sa ta pakisei fundu u de? Ee i ta sikifi wan tu fanöudu soni te de ta hoi wan taki a kemeente, a dee keling-komakandi, nasö a dee könklësi, nöö i sa luku de bakaten. Te joo luku de baka, nöö i sa hakisi iseei, ’andi mi lei u di Wöutu u Gadu, nasö andi mi lei u di ölganisaasi u Jehovah?’ I sa pakisei fundu u dee soni dee u ta lesi a di Hei Wakitimawosu ku di Ontwaakt! di u ta kisi hiniwan liba, ku dee njunjun soni dee u ta kisi a könklësi. Te i ta lesi di Jaarboek, nöö i musu tei ten u pakisei u di woto di i lesi, nöö be a dou i hati. Te i ta lesi dee buku fuu, nöö kandë i sa hai wan maaka a dee möön fanöudu soni, nasö kandë i sa sikifi wan tu soni di i kë hoi a pakisei. Di soni aki o heepi i te i ta seeka iseei fii go a wan gobaka, te joo hoi wan taki, nasö ee i dë wan gaanwomi nöö a sa heepi i te joo go luku wan baaa nasö wan sisa.

11. Un buku da di möön fanöudu buku di u sa pakisei fundu fëën, nöö unfa a o heepi u te u du sö? (Luku di pisi a basu tu.)

¹¹ A dë sö tuu taa di Bëibel da di möön fanöudu buku di u musu pakisei fundu fëën, ma ee  wan daka de puu di Bëibel fii a i wë, nöö unfa joo du? * (Luku di pisi a basu.) Wë, na wan sëmbë o sa tapa i fii pakisei fundu u dee soni dee i bi lei kaa. Dee soni da soni kuma dee Bëibel tëkisi dee i lobi, nasö dee Könuköndë kanda dee i sabi a hedi (Tjabukama 16:25). Di santa jeje u Gadu o heepi i fii sa toona mëni dee soni dee i bi lei, nöö dee soni dë o heepi i fii sa hoi iseei a Gadu.​—Johanisi 14:26.

12. Andi da wan fasi fa i sa buta taa joo ta lesi di Bëibel fii hiniwan daka?

¹² Andi i sa du fii sa ta lesi di Bëibel hiniwan daka? Kandë so daka i sa ta lesi di lesi pisi u Bëibel di de o hoi a di Teokalasia-siköö di wiki dë, nöö i sa pakisei fundu fëën tu. Nöö kandë dee woto daka i sa ta lesi dee buku kuma, Mateosi, Maikusi, Lukasi, ku Johanisi, nöö i sa pakisei fundu u dee soni dee Jesosi bi taki, ku dee soni dee a bi du (Loomë 10:17; Hebelejën 12:2; 1 Petuisi 2:21). U abi wan buku tu di ta taki u di libi u Jesosi di a bi dë a goonliba aki. Di buku aki sa heepi i fii feni wini te i ta lesi dee Bëibel buku kuma Mateosi, Maikusi, Lukasi, ku Johanisi.​—Johanisi 14:6.

13, 14. Faandi mbei a dë taanga fanöudu fuu ta pakisei fundu u Jehovah ku Jesosi nöömö, nöö andi di soni aki o heepi u fuu du?

¹³ Te u ta pakisei fundu u soni di nama ku Jehovah ku Jesosi, nöö a sa heepi u fuu ko dë wan Keesitu sëmbë di o abi wan taanga biibi hii juu (Hebelejën 5:14; 6:1). Ee wan sëmbë an ta tei ten u pakisei fundu u dee soni dee a ta lei u Gadu, nöö pikipiki sö wan sëmbë ku Jehovah an o dë mati möön, nöö an o kë u Jehovah tii ën möön tu (Hebelejën 2:1; 3:12). Jesosi bi piki u taa ee wa ta haika nasö ee wa ta tei di Wöutu u Gadu ku ’wan bumbuu hati’ nöö wa o sa „hoi ën” a u hati. Ma woo abi ’bookohedi u dee soni u di goonliba aki tumisi. Woo ta pakisei dee peipei libi u di goonliba aki, hogi wan ku bunu wan tuu, ta suku gudu ku piizii’.​—Lukasi 8:14, 15.

¹⁴ Fëën mbei boo ta pakisei fundu nöömö u dee soni dee u ta lei a Bëibel, fuu ko sabi Jehovah möön bunu. Di soni aki o heepi u fuu sa djeesi ën möön bunu a dee fasi dee a abi (2 Kolenti 3:18). U sa lei möön soni u di Tata fuu a liba ala, nöö u sa ta djeesi ën u teego. Soni an dë di bigi möön di sabi di u ko sabi Jehovah!​—Peleikima 3:11.

15, 16. (a) Un wini i feni di i bi pakisei fundu u soni di nama ku Jehovah ku Jesosi? (b) Faandi mbei a sa taanga so juu fuu ta pakisei fundu? Nöö faandi mbei u musu ta mbei möiti nöömö?

¹⁵ Te i ta pakisei fundu u soni di nama ku Jehovah ku Jesosi, nöö a o heepi i fii ta dë fajafaja a di tuutuu lei. Te i dë fajafaja a di tuutuu lei, nöö joo sa da dee baaa ku sisa fii degihati, söseei joo sa da dee sëmbë dee i ta miti a di peleikiwooko degihati tu. Te i ta pakisei fundu u di paka di Jehovah mbei Jesosi paka di lusupaima da i, nöö hii juu joo ta tei ën u bigi taa i ku Gadu dë gaan mati (Loomë 3:24; Jakobosi 4:8). De bi söötö wan baaa de kai Mark di ta libi a Zuid-Afiikan dii jaa longi u di biibi fëën hedi. Di baaa aki bi taki taa: „Di pakisei di wan sëmbë ta pakisei fundu, dë kuma di köi di wan sëmbë nango köi a wan kamian di an bi si wan daka. Möön u ta pakisei fundu u soni di nama ku di Gadu fuu Jehovah, möönmöön woo ko si njunjun soni di nama ku ën. So juu te mi ta fii booko saka pikisö nasö te mi ta booko mi hedi ku di ten di ta ko, nöö mi ta tei di Bëibel u mi, nöö mi lesi wan pisi, baka di dë mi ta pakisei fundu u di pisi di mi lesi. Te mi du sö, nöö a ta da mi kötöhati seei.”

¹⁶ Di goonliba aki abi sömëni soni di ta puu u pakisei. Fëën mbei a ta taanga da u u feni ten u pakisei fundu u soni di nama ku di Bëibel. Wan  baaa de kai Patrick di ta libi a wan Afiikan köndë, bi taki taa: „Sömëni soni ta ko a mi pakisei. Soni di bunu ku soni di na bunu tuu. Nöö hiniwan daka mi musu ta luku undi mi o hoi. Te mi ta öndösuku dee soni dee dë a mi pakisei, nöö mi ta si taa peipei soni ta toobi mi. Te a dë sö nöö mi ta begi Jehovah faa heepi mi ku dee soni aki, nëën ufö mi sa ta pakisei fundu u wan soni. Hii fa di soni aki sa tei ten ufö mi sa bigi ta pakisei fundu u soni di nama ku Jehovah, tökuseei mi ta du ën, nöö mi ta fii taa mi ko möön zuntu ku Jehovah. Di soni aki ta heepi mi u fusutan di tuutuu lei möön bunu” (Psalöm 94:19). A sömëni fasi seei u ta feni wini te u ta lesi di Bëibel hiniwan daka, söseei te u ta pakisei fundu u dee soni u ta lesi.​—Tjabukama 17:11.

17. Unfa ii ta feni ten u pakisei fundu?

¹⁷ So sëmbë ta hopo fuuku mamate u lesi Bëibel, u pakisei fundu, söseei u begi. Ma wotowan ta du dee soni aki te de o njan. Kandë di möön bunu juu da i u lesi Bëibel da ndeti buka, nasö ufö i go kandi. So sëmbë lo’ u lesi Bëibel a mamate, nöö de ta toona lesi ën baka ufö de go duumi (Josua 1:8). Di möön fanöudu soni da u ’wooko ku di ten fii a wan köni fasi’. Hën da ja musu ta lasi i ten a soni di an dë fanöudu, sö taa i sa ta pakisei fundu u di Wöutu u Gadu hiniwan daka.​—Efeise 5:15, 16.

18. Andi di Bëibel paamusi dee sëmbë dee ta pakisei fundu u di Wöutu u Gadu hiniwan daka, söseei dee ta du dee soni de ta lei?

¹⁸ Di Bëibel ta paamusi u taa Jehovah o mbei hii dee sëmbë di ta pakisei fundu u di Wöutu fëën feni bunu, söseei hiniwan sëmbë di ta mbei möiti u du dee soni de ta lei o feni bunu tu. (Lesi Psalöm 1:1-3.) Jesosi bi taki taa: „Dee sëmbë dee ta jei di Wöutu u Masa Gadu ta piki hën buka, de ta dë waiwai!” (Lukasi 11:28, NW). Ma di möön fanöudu soni, hën da u musu ta pakisei fundu u di Wöutu u Jehovah hiniwan daka, nöö a o heepi u fuu ta libi a wan fasi di ta lei taa u ta gafëën. Te u ta du di soni aki, nöö Jehovah o mbei u dë waiwai, söseei a o mbei u feni di libi u teego a di njunjun goonliba fëën.​—Jakobosi 1:25; Akoalimbo 1:3.