1, 2. Unfa so sëmbë ta pakisei u Gadu?

SÖMËNI sëmbë ta pakisei taa Gadu an ta booko hën hedi ku di fasi fa de ta libi. De ta pakisei tu taa Gadu an ta booko hën hedi ku dee soni dee ta miti de. Di wan gaan ventu bi ko booko wan gaan pisi u di köndë Filipijnen, a ëlufumu-liba u di jaa 2013, hën wan hedima u wan foto bi taki taa: „A musu u dë sö taa Gadu bi dë a wan woto kamian.”

² So sëmbë ta pakisei taa Gadu an sa si andi de ta du (Jesaaja 26:10, 11; 3 Johanisi 11). Sö nöö so sëmbë di bi ta libi a di ten u apösutu Paulosu bi ta pakisei tu. A bi taki u dee sëmbë aki taa: „Dee soni u Gadu de bi sabi naandë, hën de feni taa an dë fanöudu u de hoi de a de pakisei möön.” Dee sëmbë aki an bi ta libi a wan leti fasi. De bi abi hogihati, de bi abi langahati, nöö de bi ta du hogi.​—Loomë 1:28, 29.

3. (a) Un soni u musu hakisi useei? (b) Andi di Bëibel ta lei u te a ta taki u di makiti u Gadu?

³ Wë unfa a dë ku u? U sabi taa Jehovah ta si hiniwan soni di u ta du. Ma u ta biibi taa a ta booko hën hedi ku u tuutuu ö? U ta si dee  soni a ta du da u ö? A di Bëibel, de lo’ u taki u di „makiti” u Gadu u lei fa a ta wooko ku di kaakiti fëën. A ta wooko ku di kaakiti fëën u heepi dee dinima fëën, söseei u wini dee felantima fëën. (Lesi Detolonomi 26:8.) Jesosi bi taki taa so sëmbë „ku Gadu o miti nöömö fesi ku fesi” (Mateosi 5:8). U da wan u dee sëmbë dë u? Unfa u ku „Gadu o miti nöömö fesi ku fesi”? Boo go luku unfa so sëmbë fu awooten bi si fa Gadu bi heepi de, söseei fa wotowan an bi si fa Gadu bi heepi de. Woo si tu unfa biibi sa heepi u fuu si dee soni dee Gadu ta du da u.

4. Faandi mbei dee felantima u dee Isaëli sëmbë bi ta niinga u si taa Gadu hën bi ta heepi dee sëmbë fëën?

⁴ A di ten di pasa sömëni sëmbë bi si fa Gadu bi heepi dee Isaëli sëmbë, nöö de bi sa jei ën a wotowan tu. Jehovah bi du sömëni foombo soni u puu dee sëmbë fëën a Egepiti köndë, söseei a bi du sömëni foombo soni u wini dee könu dee bi dë a di Paamusi Köndë (Josua 9:3, 9, 10). Hii fa dee woto könu bi si, nasö de bi jei fa Jehovah bi tjubi dee sëmbë fëën, tökuseei „de tuu bi hai ko nama u de go feti ku Josua ku dee Isaëli sëmbë” (Josua 9:1, 2). Te dee könu aki bi ta feti ku dee Isaëli sëmbë, nöö de bi ta si fa Gadu bi ta heepi dee sëmbë fëën. Jehovah bi wooko ku di kaakiti fëën u di a bi mbei „di sonu fika piii a wan kamian, nöö di liba wojo seei bi fika piii tu, u te dee Isaëli sëmbë wini hii dee felantima u de” (Josua 10:13). Ma Jehovah bi disa dee felantima u dee Isaëli sëmbë u de ko abi taangajesi, nöö di soni aki bi mbei taa de go feti ku dee Isaëli sëmbë (Josua 11:20). Dee felantima u dee Isaëli sëmbë lasi di feti, u di de bi niinga u si taa Jehovah hën bi ta feti da dee sëmbë fëën.

5. Andi di hogihati Könu Akab an bi kë biibi?

⁵ Bakaten, di hogihati Könu Akab bi si sömëni pasi fa Jehovah ta wooko ku di kaakiti fëën. Elia bi piki ën taa: „Do wata nasö tjuba an o kai, boiti ee mi taki ën!” (1 Könu 17:1). Elia an bi o sa du sö wan soni ee na Gadu hën bi heepi ën. Ma hii fa Akab bi si di soni aki, tökuseei an bi kë biibi. Bakaten Elia begi Jehovah, hën Jehovah mbei faja kumutu a liba ala saka ko a goon. Nöö Akab bi si di soni dë. Hën Elia toona piki Akab taa Jehovah o mbei tjuba kai (1 Könu 18:22-45). Akab bi si hii dee foombo soni aki, ma tökuseei an bi kë biibi taa di kaakiti u Jehovah hën a bi si dë. Andi u sa lei u di woto aki? Wë, u musu ta mbei möiti fuu sa ta si dee soni dee Gadu ta du da u.

6, 7. Andi Lakabu ku dee Gibion sëmbë bi ko fusutan?

⁶ Dee Gibion sëmbë an bi dë kuma dee woto köndë sëmbë dee bi ta libi a de bandja. De bi ta si taa Jehovah ta heepi dee sëmbë fëën. De an bi go feti ku dee Isaëli sëmbë, ma de bi go mbei mati ku de. Faandi mbei de bi du di soni aki? De bi taki taa de bi du ën, u di de bi jei soni u Jehovah, söseei u di de bi jei u hii dee foombo soni a bi du (Josua 9:3, 9, 10). A bi dë wan köni soni seei fa de bi ko fusutan taa Jehovah hën bi ta feti da dee Isaëli sëmbë.

⁷ Lakabu seei bi si fa Jehovah ta heepi dee sëmbë fëën. Lakabu an bi dë wan Isaëli sëmbë, ma a bi jei fa Jehovah bi puu dee Isaëli sëmbë a katibo a Egepiti köndë. Di dee tu Isaëli womi di bi ko tjubi luku di köndë, bi ko a di wosu u Lakabu, hën a piki de taa: „Mi sabi taa Jehovah o da unu di köndë.” Lakabu bi ta biibi taa Jehovah bi o sa tjubi ën ku dee famii fëën. A bi lei taa a ta futoou Jehovah, hii fa a bi sabi taa a bi sa lasi hën libi.—Josua 2:9-13; 4:23, 24.

8. Andi so u dee Isaëli sëmbë bi ko fusutan?

⁸ Na hii dee Isaëli sëmbë bi dë kuma di hogihati Könu Akab. Di so u de bi si di faja ta kumutu a liba ala ta ko, hën de bi ko fusutan taa Gadu hën bi piki di begi u Elia. Hën de bai taa: „Jehovah hën da di tuutuu Gadu!”  (1 Könu 18:39). De bi dë seiki taa di kaakiti u Gadu hën de bi si dë.

9. Unfa u sa si dee soni dee Jehovah ta du da u a di ten aki?

⁹ U bi luku woto u sëmbë di bi si fa Gadu ta heepi dee sëmbë fëën, söseei u bi si tu fa wotowan bi niinga u si ën. U sa lei sömëni soni a dee woto aki. Te u mbei möiti u ko sabi Jehovah möön bunu, söseei te u ta ko sabi dee fasi fëën, nöö ’wojo fuu o ko limbo’ fuu sa ko si dee soni dee a ta du da u (Efeise 1:18). Di soni aki ta da u degihati fuu sa kë djeesi dee dinima u Gadu fu awooten ku dee u di ten aki tu. Woo kë djeesi de a di fasi fa de bi ta biibi taa Gadu ta heepi dee sëmbë fëën. U ta si soni di ta lei u taa Gadu ta heepi sëmbë a di ten aki ö?

10. Un soni ta lei taa Jehovah ta heepi sëmbë a di ten aki? (Luku di peentje a bigi u di woto.)

¹⁰ Sömëni soni dë di ta lei u taa Jehovah ta heepi sëmbë a di ten aki. U lo’ u jei woto di ta taki u sëmbë di bi begi Jehovah faa heepi de, nöö a bi piki dee begi u de tu (Psalöm 53:2). Di wan baaa de kai Allan bi ta peleiki a wan paati di dë a di köndë de kai Filipijnen, hën a bi miti wan mujëë, nöö di a fan ku ën te a kaba, hën di mujëë bigi ta këë. Allan taki taa: „Di mamate dë seei di mujëë bi begi Jehovah u dee Kotoigi fëën ko nëën.” Di a bi möön njönku, nöö dee Jehovah Kotoigi bi ta lei ën soni u Bëibel. Ma di a toou, hën a foloisi go ta libi a di paati dë, nöö an bi ta lei soni u Bëibel möön. Di piki di Gadu bi piki di begi fëën sö hesi, bi bigi dëën seei. An dou jaa seei, hën a buta hën libi a Jehovah maun.

11, 12. (a) Unfa Jehovah ta heepi dee dinima fëën a di ten aki? (b) Konda unfa Jehovah bi heepi wan sisa.

¹¹ Sömëni u dee dinima u Jehovah bi si fa a bi heepi de u disa di sumuku di de bi ta sumuku, di hai di de bi ta hai taku tabaku, nasö di luku di de bi ta luku fanafiti soni u womi ku mujëë. So sëmbë bi taki taa de bi mbei möiti u disa dee soni aki te de wei, ma de an bi sa du ën de wanwan.  Ma di de begi Jehovah faa heepi de, hën a da de „di gaan kaakiti” fëën. Te u kaba fëën de an bi ta du dee lö soni dë möön.—2 Kolenti 4:7; Psalöm 37:23, 24.

¹² Jehovah ta heepi dee dinima fëën u hoi dou tu, te de abi bookohedi. Sö Jehovah bi heepi wan sisa de kai Amy. De bi mandëën faa go heepi mbei wan Könuköndë zali ku wan sëndëlengi wosu a wan piki paati di dë a di gaan ze de kai Stille Oceaan. Ma Amy an bi guwenti di libi u di kamian dë. So juu wata ku faja an bi ta dë. Dee pasi bi ta singi, nöö a bi ta hangi dee sëmbë fëën, söseei a bi ta libi a wan piki kamba. Wan daka, hën a gandji da wan sisa di bi ta wooko ku ën di daka dë. A bi hati ën seei taa a bi du di soni dë. Di a bi toona go a di kamba fëën di an bi abi faja, hën a begi Jehovah faa heepi ën. Nöö di di faja ko baka, hën a lesi wan pisi u di Hei Wakitimawosu di ta taki u sëmbë di bi kaba di Giliati-siköö. Di pisi aki bi ta taki soni u dee seei bookohedi dee a bi abi. Amy taki taa: „Mi bi ta fii kuma Jehovah hën bi ta fan ku mi di ndeti dë. Di soni aki bi da mi taanga u mi go dou ku di wooko di de bi da mi.”—Psalöm 44:25, 26; Jesaaja 41:10, 13.

13. Un soni ta lei taa Jehovah bi heepi dee sëmbë fëën u de hopo taki da di leti di de abi u peleiki?

¹³ Wan woto soni hën da Jehovah ta heepi dee sëmbë fëën u de sa hopo taki da di bunu buka di u ta paaja, sö taa lanti sa da u pasi fuu peleiki (Filipi 1:7). Di so u dee tiima bi kë tapa di peleikiwooko di u ta du, hën u bi tja di taki dë go a kuutubangi. U bi wini söwan 268 gaan kuutu a hii së u goonliba. Sensi di jaa 2000 u bi wini 24 kuutu a di kuutubangi u Europa di ta feti da dee leti di hii libisëmbë abi. A dë gbelingbelin u si taa na wan sëmbë sa tapa Gadu te a kë du wan soni!—Jesaaja 54:17; lesi Jesaaja 59:1.

14. Un woto soni ta lei taa Gadu ta heepi dee sëmbë fëën?

¹⁴ Di peleiki di u ta peleiki a hii së u goonliba ta lei taa Gadu ta heepi u (Mateosi 24:14; Tjabukama 1:8). Dee dinima u Jehovah dee kumutu a peipei nasiön ta libi makandi ku deseei. Nöö di soni aki an bi o sa pasa ee na Jehovah seei hën bi ta heepi de. Di soni aki dë wan apaiti soni seei! Sëmbë di an ta dini Jehovah seei ta taki taa: „Gadu dë a unu mindi tuutuu” (1 Kolenti 14:25). Sömëni soni dë di ta lei taa Gadu dë ku dee sëmbë fëën. (Lesi Jesaaja 66:14.) Ma unfa a dë ku i? I ta si fa Jehovah ta heepi i a di libi fii ö?

15. Faandi mbei a sa pasa taa so juu wa ta si dee soni dee Jehovah ta du da u?

¹⁵ So juu, a sa pasa taa wa ta si dee soni dee Gadu ta du da u. Faandi mbei a ta pasa sö? Te u abi fuka te a hia, nöö u sa fëëkëtë fa Jehovah bi heepi u sömëni pasi kaa. Di soni aki hën bi pasa ku Elia. Di womi aki bi abi degihati, ma di di mujëë könu de kai Iseibëli bi kë kii ën, hën a bi ko ta fëëë seei. Ma a di ten dë a fëëkëtë fa Jehovah bi heepi ën sömëni pasi kaa. Di Bëibel ta taki taa  Elia bi kai dëdë (1 Könu 19:1-4). Naasë a bi o sa feni heepi ku degihati? Wë a bi musu suku heepi a Jehovah!—1 Könu 19:14-18.

16. Unfa u sa si dee soni dee Gadu ta du da u, hii fa fuka ta miti u?

¹⁶ Jöpu bi ta buta pakisei a dee bookohedi fëën gaanfa seei taa an bi ta si soni möön kumafa Jehovah bi ta si soni (Jöpu 42:3-6). So juu a sa taanga da u fuu si dee soni dee Gadu ta du da u te sömëni fuka ta miti u. Ma andi sa heepi u fuu ko si dee soni dee Gadu ta du da u? U musu ta pakisei fundu u dee soni di di Bëibel ta taki u dee fuka dee ta miti u. Te u du sö, nöö möönmöön woo ta si Jehovah kuma wan tuutuu sëmbë, nöö useei o sa taki taa: „Mi bi jei soni fii, ma nöunöu miseei ta si i ku mi wojo.”

17, 18. (a) Unfa i sa ko si dee soni dee Jehovah ta du da i? (b) Konda wan woto di ta lei fa Jehovah ta heepi u a di ten aki.

¹⁷ Unfa i sa si fa Gadu ta heepi i a di libi fii? Boo go luku feifi soni dee sa heepi u. Di fosu soni, hën da kandë i si fa Jehovah heepi i fii ko feni di tuutuu lei. Di u tu, kandë i ta mëni jeti di i bi go a dee komakandi, di wan baaa bi hoi wan taki, hën i taki taa, „Di soni aki mi bi abi fanöudu!” Di u dii, kandë i si fa Jehovah piki wan u dee begi fii. Di u fö, kandë i bi kë du möön soni a di dini u Jehovah, nöö i si fa a heepi i fii dou di maaka dë. Di u feifi, kandë i disa di wooko fii, u di a bi ta tei hia ten fii, nöö ja bi sa ta du hia soni a di dini u Jehovah. Ma bakaten i ko si fa Jehovah du di soni di a paamusi, di a bi taki taa: „Na wan juu mi o disa i wanwan möönsö” (Hebelejën 13:5). Te u ko dë gaan mati ku Jehovah, nöö an o taanga da u fuu si dee soni dee Gadu ta du da u.

¹⁸ Wan sisa de kai Sarah di ta libi a Keinia, bi taki taa: „Mi bi begi Jehovah faa heepi wan studie u mi, u di mi bi ta si kuma an bi ta tei dee soni dee mi bi ta lei ën u bigi. Hën mi hakisi Jehovah ee mi bi musu tapa ku di lei di mi bi ta lei ën soni u Bëibel. Nöö hën fa mi kaba taki ’Amen’, hën di tëlëfön u mi bai. Di studie u mi wë bëli mi u hakisi, ee a sa ko ku mi a komakandi! Di soni aki bi bigi da m’ seei!” Ee u ta buta pakisei a dee soni dee Gadu ta du da u, nöö woo si fa a ta heepi u. Wan sisa de kai Rhonna di ta libi a wan köndë u Asia, bi taki taa a ta tei ten u ko si dee soni dee Jehovah ta du da u. A bi taki tu taa: „Te i du sö, nöö iseei o si fa Jehovah ta booko hën hedi ku u tjika!”

19. Andi u musu du möön, fuu sa si dee soni dee Gadu ta du da u?

¹⁹ Jesosi bi taki taa dee sëmbë dee „ku Gadu o miti nöömö fesi ku fesi” musu dë sëmbë di ’hati u de dë limbolimbo a Gadu wojo’ (Mateosi 5:8). Andi di soni aki kë taki? A kë taki taa u musu ta pakisei bunu soni, nöö wa musu ta du soni di an bunu. (Lesi 2 Kolenti 4:2.) A di woto aki u bi lei taa ee u kë si dee soni dee Gadu ta du da u, nöö u ku ën musu ko dë möön gaan mati. A di woto di ta ko, woo taki unfa biibi sa heepi u fuu sa si möön bunu andi Jehovah ta du da u.